Exodus 13

Isaraee máqannaasa akoonaiqí óoqa fáiqiuqara Yáaweena ámiqau.

Yáaweefa Mooseena qímaminau. Ínnee aiqáma akoonaiqí óoqa fáiqiuqa qiní kai qímia. Aiqáma Isaraee máqannaa óoqa faiqiuqa faqa aiqáma aandáù óoqásaa maqarana ákoonauqa faqa qiníndi márinara qiní qímiaqa.

Innooqée marú pauraqána sía áqira béreeta suqoo oomaqáfa.

Mooseefa Isaraee máqannaasa qíma níminóo qinau. Ínnee maa faasaannára íriaqa. Ínnee karabúsakiqari maa faasaanná Yáaweefa narí afeekannóo nífiqee ánunara innooqée marí pauraqána áqira béreeta sía naaqa. Ínnee maqee Abiba qúqoona indaarúqaa fáasaana márifaqa Isipa máqa máaqa quqásee áni máriafanoo. Yáaweefa ínni nikeekú nikaakú faqa óori kándamasee qíma afeekaiká másee Kannaana máqa máaqa fáqa Heeta máqa máaqa fáqa Amoora máqa máaqa fáqa Hifita máqa máaqa fáqa Yeebusa máqa maaqa fáqa misá maqa máaqa ínni nímiraree qinau. Mifa ínni nífiqeenoo áinoo faqáa máqa aináina rairaá ímariqoo múnu sáinaqa ínnee aiqáma áukuana indaarúqaa qúqoonasaa maa oomaqána sakasee náidaqa asasiaqa. Dínni taikásee dínni ani qaara qánda marasée 7 fáasaana innooqée marí pauraqána sía áqira bereeta naaqa. Ínnee miqímmáseeqa náidaqa mi 7 faasaanáfa taikáinaqa miqóo ínnee Yáaweenara úriqarara fee qímasee firaa oomaqa sakasée naaqa. Dínni qisauku taikásee dínni ani qaara qánda marasée 7 fáasaana innooqée marí pauraqána sía áqira bereeta kai naaqa. Mi kamúqoo ínni máaqaki fáqa ínni maqa máaqaki fáqa innooqée marí pauraqáfa faqa innooqée mári pauraqána áqira béreeta faqa sía uqanna máriani. Mi oomaqána náinna kari ínneeqa faiqi námu maaqí qímasee qímannimiaqa. Maasá Isipa máqa máaqakináana Yáaweefa nífiqee ánunara maa oomaqána sakasée náidaqee qiaqa. Mooseefa kafáa Isaraee máqannaa qímannimidanoo qinau. Maa oomaqána nárafa ínni náaqoo áuqaannoo. Nísaukuki sánda rumbéera foorá faqa níqinaaqa rumbéera foorá inóo máridanoo, mifa ínni náaqoo áuqainaqa ínnee Yáaweena sándufa qírana faqa miná ufa ásaana rúmasee írirana faqa náaqoo áuqaannoo. Yáaweefa narí afeekannóo ínni Isipa máqa máaqaindaraana nífiqee ánunara miqíaqa. 10 Aiqáma áukuanaki maa faasaanná maa oomaqána sakasee náidaqa asasiaqa.

Akoonaiqí óoqa fáiqiuqa.

11 Yáaweefa óoqai ínni faqa ínni nikeekú nikaakú faqa nímirara qíma afeekaikámmasee Kannaana máqa máaqa nímianauree qímaqoonnai nífiqee fúannoo. 12 Mifa ínni mi maqána níminaqa ínnee óoqá fáiqi akoonaiqíuqa Yáaweena amiaqa. Aiqáma áandau óoqasaa máqarana ákoonauqa Yáaweenaindi máriani. 13 Doonkí óoqasáa máqarana ánaaqi minísee sipsípa ánaaqi moodáa maraséeqa doonkí ánaaqi ámaaqa maqasáifanoo doonki ánaaqi káqi máriannoo. Ínnee sía moó áandaunnai doonkí ánaaqi ámaaqa máqaani qímasee doonkí ánaaqiuqa ninuka qumáree kurídiaqa. Ínnee ínneeqa óoqa faiqiuqa faqa Yáaweenaindikinoo márina kafaa ínneeqa feefauriaqa. 14 Kásooqaqee ínni faiqi námu mi suqanara oosannára ínni iráifaqa ínnee maaqí qímasee qímannimiaqa. Yáaweefa narí firaa afeekannóo maasá Isipa máqa máaqai rumbáranakináana qífiqee áninau foo qiaqa. 15 Fáraoofa kaukaata qímasee sía maasá idukíraree qufanóo Yáaweefa óoqa fáiqiuqa akoonaiqíuqa Isipa máqa maaqakináana aiqáma nárinau. Aiqáma áandau ákoona óoqasaa máqaranauqa faqa nárinau. Minára maasá aiqáma óoqasaa máqara áandau Yáaweena tatúfirana suqá amiséeqa nári faiqi námu kafáa máraidaqa. 16 Maa oomaqána nárafa maasá dáaqoo áuqaannoo. Nísauku sánda rumbéera foorá faqa níqinaaqa rumbéera foora inóo máridanoo, mifa maasá dáaqoo áuqainaqa Yáaweefa maasá Isipa máqa máaqaindaraana narí firaa afeekannóo nífiqee ánunara írianaura.

Ánutufa qasurukí faqa idáuruki faqa máridanoo misá nífiqee fináu.

17 Fáraoofa Isaraee máqannaa idukúsoofaqa fimárufanoo Ánutufa Firistianní qúsa aatata sía nífiqee finau. Isaraee máqannaasa Firistia maqannaasa faqa rákíqa anirandée kaifáa Isipa máqa máaqai fifóo qímaseenoo nífiqee moo áatata finau.

18 Minára iriséenoo Ánutufa misá nífiqeenoo aadána máqa máaqai fíquinoo taatuqée námmari fímarunnai nífiqee fíquinau. Fídaqa Isaraee máqannaasa rákira áinaina deedaqa múqirausa fiqau. 19 Óoqai Yóoseefaafa káqi máridanoo maaqí qímaseenoo Isaraee máqannaasara qufaqá nóori kándamasee miná ámudaani máree fírara qíma afeekaíkiqau. Yóoseefaafa maaqí qímasee qímanniminau. Kásooqaqee Ánutufa ínni nífiqee fínaqa ínnee qiní qímudaani faqa maa maqusánakinaana máree fuaqa. Mooseefa minára iriséenoo Yóoseefaana ámudaani faqa maréenoo finau.

20 Isaraee máqannaasa Sakoota máqusakiqari fífiufaqa aadána máqa máaqa átinni Eetama máqusai óonuree miqóo úiqaana máqauqa usakásee faiqaqau. 21 Yáaweefa fáasaana oonnámuki márufanoo oonámu fánnoo nífiqee fímarinau. Eendáki mifa idáùruki márufanoo idáùru fannoo káaqa qámannimaqee márufaqa eendáki faqa fáasaana faqa káqi kai fímariqau. 22 Aiqáma faasaana oonnámu misá nóorinni fímarinau. Aiqáma eendaki idáùru faqa miqíkai ímarinau.

Copyright information for `BJR