Exodus 2

Misa sía Mooseena fáiqi ánaaqi áriqau.

Mi kamúqoo mi aukuanná Réefina átikiqari kumaaráa moó fannoo fíndi finoo mánaaqa Réefina óosanakí máranau. Maraséenoo faiqì moó akoonaiqí maqaséenoo miná ánoofa qáfoofanoo ámiqira faiqi márufanoo Isipa máqannaasa árifoo qímaseenoo qaaramoó qúqoonasaa kukéeqa ámaqáqoofanoo márinau. Qaaramoó qúqoona áiqaróofanoo faiqi ánaaqi káqikaaqóo áaqoo írufanoo miná ánoofa akoofa rafáaqafirara óonumafi írusia miná ánoofa fúraa ámanee úqa kísaaqa difaaniará foorá áuqinau. Mifá koorootáqa qumáreenoo fúraa úqamau sía nammári ruqíqaki kéeqáanifeera akinau. Uqá áuquseenoo miná ánoofa faiqi ánaaqi uqáki rúmaseenoo fúraa moómoo nammári ámmáusái márunaki kukéeqaqoofanóo minakí márinau. Nammáriki márufanoo mi faiqína ánasaafa níanaindari kukéeqanoo máridanoo rakísi márinau. Nánee kambíqaannoo qímasaidanoo rakísi marínau.

Fáraoona áraamuna nammári áuqaaneera narí rakísimaru manaaqáusa faqa mi nammarínai qúminau. Mifá nammári áuqaidanoo fúraaki qáfoofanoo uqá márinau. Márufanoo qáfamaseenoo narí aináini maru manaaqána qímamufanoo mi uqána nammárikinaana máranau. Marasoofanoo Fáraoona áraamuna ásaukukinaana maraséenoo uqá óo raqásee faiqi ánaaqi qáfanau. Faiqi ánaaqi ikíraqoofanoo miná írufanoo ámuqusufanoo qinau. Maafá Heeburu máqannaasa faiqì akoonaiqí máridanoo fee qinau. Mifá miqí qímarufanoo mi faiqi anaaqína ánasaafa aniréenoo Faraoona áraamuna maaqí qímasee qímaminau. Amanéè Heeburu ánaasee moó óoru áfiqee múqusaananóo fée náamma ámiannoo fee. Faraoona áraamuna eedóo qufanóo mi faiqi anaaqína ánasaafa óoru nárì nínoona uqanna áfiqee qúminau. Qumuroofanóo Fáraoona áraamuna fannoo maaqí qímaseenoo mi anaaseená qímaminau. Anée maa faiqi anaaqína náamma ámidana rakísi márinaqa qinée maqee maqee feefaurú aní ámi maríanauranoo. Mi anaaseefá eedóo qímaseenoo narí faiqi ánaaqi uqanna narí máaqai múnu qaqée ídanoo rakísi marínau. 10 Mi faiqi anaaqífa káqi kaaqóo innooqáfufanoo narí ánoofa áfiqeenoo Faraoona áraamuna máruqoo mínisoofanóo narí faiqi kámámbinau. Fúka ánoofa áuqu rarara maaqí qinau. Qinée nammárikinaana máraunnanara áuqu Mooseeneé qianaura.

Mooseefa Midianna máqusai sandánau.

11 Máriiufanoo Mooseefa innooqáfufanoo moó kári narí máqanna Isaraee máqannaasa óonu níndafoofaqa firaa kadaapi rímariqau. Isipa máqannaa moó fánnoo Heeburu máqannaa Mooseena aqoónnana árimarufanoo Mooseefa qáfanau. 12 Áranaqoofanóo faiqíara dínni dínni múnu áfu máqee míni afu maqee ufanóo faiqí sía márufanoo Isipa máqannaa fásiqa Mooseefa kuqá aruséenoo miná irí núkuda afaqáseenoo minakí kukéeqasee ákundanau.

13 Iqáqoofanóo kanánaana rafúdamakufanoo Mooseefa narí máqannaa níndafarara kafáa finau. Óonuree níndafoofaqa Heeburu fásiqa qaaraqánda rákiqau. Mooseefa aqoónnana árimaruna qímaminoo qinau. Anée náqaafee ifanée aneenná aqoónnana óosana síainaki fífau áridanee. 14 Miqí qufanóo áru fásiqafa qinau. Yáfee aníara karaambáiqee qifanée anée maasá ufa irisée andeeqáidanee. Eendá anée Isipa máqannaa áruanafa kafáa maqee qiní faqa dárínnaree qufanóo Mooseefa taútinau. Tautúmandee qinau. Dóo eendá árunnanara aiqáma kooróomminoo máridanoommifoo qímaseenoo rufíanau.

15 Fáraoofa minára iriséenoo Mooseena kuqá áruaneera ufanóo Mooseefa minára rufíamareenoo Isipa máqa máaqa quqásee Midianna máqa máaqai níanai sandánau. 16 Sandee óonureenoo nammári mádika áfaisaa óoqu márinau. Midianna máqannaa amaana máqaki aanáiqikirana miná áuqu Yeetaroona áraamuqmaaka dínni qísauku taikásee dínni óonu qaara marasée 7 máriqau. Mooseefa nammári madika áfaisaa márufaqa mi manaaqáusa nárì níkoona sipsípauqa faqa mimmíuqa faqa nammári saka nímianee qímasee aniraqau. 17 Faiqí akaqáusa nárì sipsípasaa rakísimarúsa mi manaaqáusa niqiqoofaqá anirandée fufaqá misá nárì sipsípa naaree nammári nímianeera qufanóo Mooseefa fíndifinoo misára qáòo qímaseenoo mánaaqauqa náaroofaqá aniroofanóo Mooseefa narí kai misá sipsípauqa faqa mimmíuqa faqa nammári saka níminau.

18 Mi manaaqáusa sipsípauqa nammári néeneesoofaqá nífiqee máaqai fiqau. Óonu roofanóo misá níkoofa irámirinoo qinau. Ínnee náqifee ifaqée maqee fáasaanasaa ánidee. 19 Miqí qufaqá misá qiqau. Isipa máqannaa fasiqa moó fánnoo faiqí sipsípasaa rakísi máriasa óonu raafanóo misára qáòo qímaseenoo maasá sipsípauqa narí kai nammári saka qumáree nímiisaifaqá dauní anidaqa. 20 Misá níkoofa miná írinoo qinau. Mi-fasiqáfa yáifee máridanoo fee. Nánaree ínnee minní áisee ánidee. Dóo sandée óonu áfiqaifanoo nárana ani náani. Miqí qímasoofaqa óonu Mooseena áfiqee ániqau. 21 Yeetaroofa Mooseenara qiní faqa máriannee qufanóo eedóo qímasee márinau. Márufanoo Yeetaroofa narí áraamuna Sipooraa námmarína Mooseena ámufanoo máranau. 22 Maraséenoo faiqi akoonaiqí máqanau. Maqaséenoo Mooseefa narí faiqi áuqureenoo qinée ánaamuru maqusaki máridee qímaseenoo Keerasoommá née qinau.

23 Mooseefa miqóo moómoo áukuanaki márufanoo Isipa máqanna karaambáiqa Fáraoofa kúqinau. Kuqufufaqa Isaraee máqannaasa Isipa máqannaasa afeeka rumbarana ámeemaanai káqi kai ánnadannada qídaqa máridaqa Ánutufinnai dadaaqíanifeera innaaru qímariqau. Misá innaaru qírafa Ánutufinnai ooru finau. 24 Ánutufa misá qikí ráqarana iriséenoo Abarahaamána faqa Isakeena faqa Yakooboona faqa moodáanaki kíra ufa qímaqoofa misá faiqinámu faqa dadaaqíanifeera óonu máfi írinau. 25 Ánutufa misá mandáinainaki márufanoo misára óonu máfi írufanoo ámuqusinau.

Copyright information for `BJR