Exodus 23

Isaraee máqannaasa andeeqára óosana áuqaaqa.

Ínnee aatáta qáraa únna ufa iriséeqa sía mooná múnu qímamia. Ínnee sía áaqee mári fásiqana únna úfannái miná dadaaqiaqa.

Kóotaki óonureeqa moómoosa únna ufa qífana anée sía misá dadaaqia. Misa ufakí kikíqa máfi andeeqára ufa mara fúrufarifana sía misá dadaaqia. Kudi fasiqa moó fánnoo kóotaki kikíqa máfinana sía kudi márinnana roo qímasee dadaaqia. Andeeqára nara kai qiaqa.

Ínnee ínneeqa namuqáa burimakáu fee doonkí fee fúrufariqa nífaqa ínnee qáfamáseeqa máree narí ákoona múnú ámiaqa. Mi fasiqána doonkí fannoo ummaara mara máree fídanoo aanái sáamurinoo márinaqa ínnee óonu qáfee sía fíàaqaráaqa dadaaqí uqéera aisaaqa.

Kudi fásiqa fannóo kóotaki márinaqa ínnee sía minára mandá fasiqee qímasee andeeqára oosana sía miná ámiaqa. Ínnee sía únna qímasee kóotaki aqoónnana kíkiqa úsua. Sía andeeqárausa numóo siáisa fífau kúqiranaki mara quqánnisaa. Qinée Ánutusa mi manda ainainná áuqáinnana kuqá áruanauranoo.

Moó fánnoo maqándanai kóotaki minásáa roo qíannee munnimma áminana sía uqanna máraa. Miqíra múnnima fánnoo faiqí nífu dimbarausaikamma sáifaqa sía andeeqárana qáfaidaqa. Andeeqára fásiqa faqa mara fúrufaramma áisaidanoo.

Ínnee óoqai Isípa maqasaa máridaqa ánaamuru áupurarana qáfeeusa máriafanoo minára ínnee sía quandáfi ánaamuru ínni faqa márinausa mandáikammá nímaqaaqa.

Qísauku dínni taikásee dínni ani qaara marasée 7 áukuanara faqa sabátara faqa qíra sándufa.

10 Ínneeqa maqá úmmaqu née maría maqánaki minakí dínni qísauku taikásee dínni ani moodáa marasée 6 aukuana úmmaqusaidaqa unakúsaidaqa naaqa. 11 Miqíqa fífi ínaqa qísauku dínni taikásee dínni ani qaara marasée 7 áukuanasaa sáifanoo maqá fánoo idooáani. Mi maqánasaa moo áinaina kambíqáinnana sía unakú naaqa. Kudi fásiqauqa miná naaqa. Misá náidaqa andaanauqa máfi sáinnana káasau áandauqa naaqa. Ínneeqa uáinna áfuqa faqa oorífa sáqari faqa miqí kai iaqa.

12 Ínnee moodáannai qísauku taikásee dínni ani moodáa marasée 6 fáasaana aináiniaqa. Aináiniqa fífi ínaqa dínni taikásee dínni ani qaara marasée 7 fáasaanasaa sía aináiniaqa. Ínni aináinira fáiqiuqa faqa ánaamuru ínni aináini márinausa faqa ínni aandáuqa faqa aiqáma idooaaqa.

13 Qinée Yáaweesa aiqáma ufa qímarúnnana iriaqa. Ínnee maa amaana ufáusa ámiqimasee irimáree fuaqa. Sía únna ánutusara innaaru qiaqa. Sía uqanna misá nuqu raaqa.

Qaaramoó úriqarara fáasaana amaana qíra fáasaana.

(Rafúdoo 34:18-26, Lo 16:1-17)

14 Aiqáma áukuanaki qaarammoó kári oomáqa sakasée náidaqa qiní Ánutusara innaaruqiaqa.

15 Ínnee Isipa máqa máaqaindari ánu quqoonnána Abiba qúqoonasáa qinée qímannimiafannandee íqa innooqée mári pauraqána sía áqira beréeta náidaqa asasiaqa. Mi oomaqánaki 7 fáasaanasáa sía innooqée mari pauraqána áqira bereeta náaqa. Ínnee qiní qimooqíraree qímasee sía káqi ániaqa. Qiní tatúfirana suqára áinaina faqa máree ániaqa.

16 Fúkakinaana unakúsee óomaqa sakasée asasídaqa námaseeqa ínneeqa nárana úmmaquqaana óosanarasee unakú naaqa. Saqári aqama akuqáinaqa ínnee miná tiqísee auqaánai máridaqa moó óomaqa sakasée náida asasiaqa.

17 Aiqáma aukuana mi qaaramoo oomaqiránakina aiqáma Isaraee máqannaa fásiqauqa aniréeqa qiní Yáaweesa ínneeqa Ánutusa qimooqiaqa.

18 Ínnee aandáùnnoo qiní tatúfirana suqá qímiraree qímasee sía innooqée mari pauraqána áqira beréeta námu fáqa moodáanaki suqáaqa. Tatúfira áandau fadaméena fánnoo sía faiqée kanánaana káqi máriani aaqee kái aiqáma idáki áqusaifanoo qáma taikáfuani.

19 Aiqáma aukuana ínnee fúkakinaa nárana unakú maree qiní Yáaweesa ínneeqa Ánutusa amaana máqaki máree ániaqa. Ínnee sipsípa ánaaqi fée mimmí ánaaqi fée arusée sía narí ánoona náamma anoonannai suqáaqa.

Ánutufa Isaraee máqannaasa naamúaqira ufa faqa qíma afeekaikíra úfa faqa níminau.

20 Ánutufa kafáa qinau. Qinée qeeqá kai qeeqá Qangiroo aqiqáananoo mifá qumurée ínni indaarú níkidanoo ínnisaa rakísi márinaqa qinee ínni deedaqammá nísaafanna máqa máaqanaki fifáranoo. 21 Ínnee mi qangiroofá qínnandee iaqa. Sía miná ufa rukíaaqa. Qinee miná aiqáunanóo qumu márinara sía miná ufa rukíaaqa. Mifá sía ínni mandá óosana ákiiqara nífáuaannoo. 22 Ínnee miná ufa irisée andeeqásee qinée qúnnufa mau kai fífaqa qinée ínni namuqáauqa faqa rákuanaura. 23 Qiní qangiroo fannoo ínni indaarú níkínoo nífiqee Amoora máqa máaqa faqa Heeta máqa máaqa faqa Perisita máqa máaqa faqa Kannaana máqa máaqa faqa Hifitana máqa máaqa faqa Yeebusa máqa máaqaki máriasa faqa nárú taikáseenoo ínni miqóo quqánnisaannoo. 24 Ínnee miqóo óonu máridaqa sía misá únna qíra anutusara niqoori sáunu arafí innaaru qiaqa. Sía misá innaarú qímariandee iaqa. Ínnee misá únna ánutusa túri taari máseeqa óoni rakíaaqèe minára innaaru qímariana raudáandamméeqee áqusaaqa. 25 Ínnee qiní Yáaweesa ínneeqa Ánutusa qimooqífaqa qinée nárana faqa nammári faqa ínni nimiséeqa ínni auríranauqa mara áqunnisáanaura. 26 Ínnee Yáaweena kai amooqífaqa sía ánaaseeuqa eedáda faiqi máqee faranoo. Sía moó áafa ánaasee máriannoo. Ínnee sía dauní kúqifara, kísaaqasaa márifaranoo.

27 Qinée ínni nífiqee fídaqa ínni namuqáa qiníara rufíarana nimiséeqa ínni faqa rákinausa fúrufarirana nímianaura. Nimiséeqa qíanaqa ínni namuqáauqa quqásee sandéefara. 28 Qinée ukaqá nímimari doodaanína ínni namuqáaki quqásaana ukaqá níminaqa náaqoo nífu fúrufarináqa sandée faránoo. Ínnee fímarifaqa qinée Hifita máqannaasa faqa Kannaana máqannaasa faqa Heeta máqannaasa faqa nífaqasáanaqa ínnee miqóo óonu márifaranoo. 29 Qinée sía moodáa aukuanaki ínni namuqáa rapatutummá áquanaura. Qinée miqímmá sáananoo naakundúka máfinaqa káasau áandauqa moómoo mi maqa maaqánaki máridaqa ínni nárífoora. 30 Qinee misára qíànaqa misá moodáa kai qaara káì ídaqa taikáfifaqa ínnee moómoo kámmafi amana mi maqa maaqána máree faránoo.

31 Qinée ínni óosu maaqímasee óosumma nísaanaura. Dínni taatuqée námmari máriannoo. Dínni Firistia ooruku námmari máriannoo, dínni aadána máqa máaqa máriannoo, dínni Eeufarateesa námmari máriannoo. Qinee ínni afeeka nímianaqa ínnee mi maqa maaqánaki fímarifaqa qinee inni namuqáa rapatutu iqá fímaríanaqa ínnee misá maqa máaqa máreefaranoo. 32 Ínnee sía uqanna misá ufara eedóo qímasee moodáanaki kíra úfa qiaqa. Misá únna ánutusara faqa síà uqanna moodáanaki kiaqa. 33 Mi maqannáasa sía ínni maqa máaqaki máriaqa. Ínnee miqífaqa misá ínni maréeqee qiní numóokamma qímaqara tínai quqéefaranoo. Ínnee misá únna anutusa nimooqífanoo mifá ínni ninuka úfanara foora fufínoo máriannoo.

Copyright information for `BJR