Exodus 25

Faiqí ánaasee Ánutuna náaquqara úiqaana máqa usakára áinainauqa ámiaqa.

(Rafúdoo 35:4-9)

Mi aaqannánasaa Yáaweefa Mooseena qímaminoo qinau. Anée Isaraee máqannaasa qímanniminaqa misa óosana óosana ainaina qiní qímiani qínnana qímiaqa. Faiqí ánaasee qiní qímirara nídinaqa mínisáinna ainaina anée mara quqáà. Maa ainaináusa maree ánifaránoo. Kóora faqa siruáa faqa booroosá faqa ámiqira qámunna faqa dirindáasi ákira sipsípa ásausi faqa pánnoona ákira sipsípa ásausi faqa faéena ákira sipsípa ásausi faqa mimmí asausínnai áuqira qámunna faqa sipsípa ákoona apatasáa faéena ákirana faqa ooruku námmariki mári firaa noodaaná apata faqa akasia sáqari ámiqira sáqari faqa máree mínisaifana mara quqáà. Qóoma qumbí maría fadameenná faqa aanáiqikirausa áki maria óosana óosana fadameenná faqa moó pauraqa idá arasaafanóo múninoo ámiqira áfundi marí pauraqána faqa míni ámiaqa. Firaa feefaurú áqi maríà óonisa faqa aká ámiqira óoniuqa faqa aanáiqikirausa eefooda qámunnasaa faqa nímuqusasaa rumbée márianasaa faqa atooqáaqa.

Isaraee máqannaasa qímanniminaqa qiní náaquqara uiqaana maqa usakásáifaqa qinée misá qámbaanai márianaura. Ínnee úiqaana maqá faqa minakínaa áiqama áinaina faqa qinée naakápáunandee miqi kai másee áuquaqa.

Ínnee moodáanaki kíra bukísa áuquaqa.

(Rafúdoo 37:1-9)

10 Ínnee akasia sáqari marasée minánnai moodáanaki kira bookísa áuquaqa. Mina kísaaqa 110 centimetres amana auquaqa. Miná qusándanai faqa miná kúradarafa faqa amana amana kái 66 centimetres amana auquaqa. 11 Ínnee ámiqira kóora marasée túrimmásai ausi rúmafinaqa minánnai kai bookísa adisáa faqa aundurái faqa ititáaqa. Mi bookísana áfaimau kóorannai ámatookika masee rafáaqafuaqa. 12 Ínnee kóorannai qaindúsi fandínnana ámaaqa qaara faqa qaara faqa 4 áuqusee aiqáma áikusaa quqáaqa. Dínni áikusaa qaara qánda dínni áikusaa qaara qánda quqáaqa. 13 Akasia sáqari qaindúsi fandínna qanda kóora túrimandee ausirúma qumáree minánnai kukúqiaqa. 14 Kukúqa máseeqa dínni dínni ámaaqa áuquqainnanaki áusúaqa. 15 Miqímmáseeqa sía radúkúaqa, sáifanoo miqínoo máriani. 16 Miqímma sáifaqa kásooaqee qaara oonisáa qeeqá sánda ufa ákara rúma nímíànaqá minakí quqáaqa.

17 Bukísa áfu faqa Kóorannai kai áuquaqa. Miná kísaaqa 110 centimetres amana máriani. Miná qusa 66 centimetres amana máriani. 18 Ínnee kóoraa túrimmaseeqa bukísa afu áuquseeqa minánnai kai dínni dínni qangiroo qaara qánda nimana áuquaqa. 19 Áfu dínni átinni moó qángiroo amana áuqusee dínni moó qángiroo amana áuquaqa. Áfu fáqa mi qangiroo qandá nimana faqa moodáa kóorannai kai áuquaqa. 20 Mi qangiroo qánda bukísa áfusaa quqásaifaqa nóori narí qáfee narí qáfee iaqa. Miqandá níqoosa uqéerasaifanoo bookísa áfusaa ititánoo máriani. 21 Qaara oonísaa sánda ufa márina mi bukisánaki quqásee áfu rafáaqafuaqa. 22 Qinée ínni faqa miqóo moodáanakika máfiqa bukísa áfusaa qaara qangiroo qámbaana máridaqa qeeqá sánda ufa ínni Isaraee máqannaasa nímianaura.

Ínnee aiku faqaa teebóora áuqusee Yáaweena áminna feemuna miqóo quqáaqa.

(Rafúdoo 37:10-16)

23 Ínnee akasia sáqarinnoo teebóora áuqauqa. Miná kísaaqa 88 centimetres máriani. Miná qúsandanai 44 centimetres miná kurádarafa 66 centimetres máriani. 24 Ínnee ámiqira kóora marasée túrimmásaifanóo ausirúma fínaqa minánnai teebóora rafáaqa fúsee kafáa moónnái teebóora átiqara fíqu fíqumma ráfáaqa fuaqa. 25 Innee teebóora átiqara fíqu fíqumma 8 centimetres amana ititásee miná áfaimau kóorannai rafáaqa fuaqa. 26 Ínnee kóorannai qaindúsifandínnana ámaaqa 4 áuqusee teebóora áiqama áiku námusaa quqáaqa. 27 Teebóora áfái ameemaanandanai qaindúsirana ámaaqa áuquaqa. 28 Qaindúsifandínna saqári qanda akasia saqári ateekásee kóorannai miná kukú iaqa. 29 Ámiqira kóorannai kai teebóorasaa quqeefandínna pirita kaafáusa faqa kísaaqa káafauqa faqa úainna adíara pirita uqnaurírana faqa áuquaqa. 30 Qiní qímifandinna béreetana mi teebooránasaa quqáqaifanoo aiqáma kári qiní moodáanaki kíra búkisa aaqá máriani.

Ínnee qóoma qumbífandínna áikana áuquaqa.

(Rafúdoo 37:17-24)

31 Ínnee qóoma qumbífandínna áikana ámiqira kóorannai áuquà. Ínnee kóora túriiseeqa minánnai kai qóoma áika óosana faqa adaká faqa ásaanauqa faqa áuquaqa. Mi asaanáusa sáa mi kooránannái kaí taatuqée aqama áfufeenáari márindee máseeqa áuqusaifanoo káafara foorá afisú ámaqánoo máriani. 32 Mi qooma aikáusa qísauku dínni táikasee dínni ani moodáa marasée 6 máriani. Dínni qaaramoó dínni qaaramoó máriani. 33 Aiqáma mi asaana namúna atimau kóorannai taatuqée aqama áfufeenaari márindee másee afaaqa áuquaqa. Mi afufeenaariráfa téeqnóorina aqamara foorá márufaqa mi asaana namúna sáa áuquaqa. 34 Miná adakásaa qaara fáqa qaara fáqa 4 sáa taatuqée aqama téeqnóorina aqamara foorá áuquaqa. 35 Moodáa aqama indaarúqaa ásaana qara ameemaanai máriani. Kafaa miná múrufi ásaana qara áméemáanai moó aqama máriani. Kafaa miná múrufi ásaana qara ámeemáanai moó máriani. 36 Ámíqira kóora túriiseeqa minánnai kaí óosana faqa ásaanauqa faqa áfufeenáarirana faqa áuquàqa.

37 Miqímmáseenana dínni taikásee dínni ani qaara qánda marasée 7 qóoma áuqusee mi asaanáusa áti mau quqáà. Quqáseenana mara quandásáinanoo mi qoomáusa káaqa qárafa sía káqinni fúani. Máaqa aundurái kai káaqa qáani. 38 Miná úfaqa faqa futufíta faqa ámiqira kóorannai káì áuquaqa. 39 Qóoma quqára áika ámiqira kóorannai 35 kilogram ummaara amana kái marasée áuquaqa. 40 Moosee qinée áaqanasaa aní qímamúnandee aiqáma áinaina miqíkaimmásee andeeqásee áuqua.

Copyright information for `BJR