Exodus 26

Ínnee Ánutuna úiqaana máqa usakáaqa.

(Rafúdoo 36:8-38)

Ínnee qiní náaquqara úiqaana máqasaa ákifandínna qamunna kísaaqa maaqímásee áuquaqa. Sipsípa asausí dirindáasi ákirana faqa pánnoona ákirana faqa faéena ákirana faqa sufusée ámiqira qamunna áuqusee áqoosa faqáa áandau amana áuqusee minásaa atooqásee akúniaqa. Miqímmasee mináuqannai ínnee qísaukuqára taikásee 10 firaa qamunna áuqusee moodáanaki akúniaqa. Mi aiqama qamunnáusa amana amana káì 12 metre kísaaqa miná qúsa 2 metre máriani. Mi qamunnáusa moodáannai qísauku 5 marasée moodáanaki ootúpamásee akúniaqa. Dínni qísauku taikásee 5 faqa miqí kai iaqa. Miqímmáséeqa mi qamunna qandá átiqara dirindáasi árira qámunnannái anaanu áuqusee moodáanaki ootúpaaqa. Firaa qámunna átimáu anaanu 50 áuquaqa. Moó qámunna faqa miqí kai íqa moó qámunna sáaqaraa ánaanu amummaqa káì áuquaqa. Kóora qumáree túrimándee qúsa táfara foorá saaeemmá qumáree dínni dínni anaanuki upeekásaifanoo mi qamunna qandá moodáara foó inóo máriani.

Uíqaana máqa sáa ákira qámunna firaaná mimmí asausínnai 11 áuquaqa. Ínnee aiqáma moodáa karirana kai áuquaqa. Miná kísaaqa 13 metres amana máriani. Miná qúsa fannoo 2 metres amana máriani. Mi qamunnáusa moodáannai qísauku taikásee 5 qamunna akunúsáinanóo moodáa qámunnaiká máfuani. Kafáa moodáannai qísauku taikásee dínni ani moodáa marasée 6 narísaa narísaa akuniísaifanoo firaafaíkíani.Miqímma fínaqa úiqaana máqa kooqíndaraana múrufi tukáanda quqáaqa. 10 Qamunna átimau anaanu 50 akúniaqa. Moó átimau faqa miná ámummaqa káì akuniaqa. 11 Booróosannai táfara foorá áti saaeemmásee 50 áuqusee minánnoo dínni dínni anaanuki áususee ootúpamá sáifanoo moodáa qamunnara foorá máriani. 12 Mi firaa qamunnána úiqaana máaqa akuamáqa sáifanoo mina áti fíqaramasee akúnirafa urúanatinai naambeéqai qúmíqàránoo máriani. 13 Aabaa akúnira qámunna fánnoo úiqaana máqa ati fíqaree áiqaree inóo máriani. Dínni dínni amana amana kái 50 centimetre kái máriani. 14 Miná taikásee miná ámuaaqa qaara qánda faqa áuquaqa. Moó sipsípa ákoona apata faéena ákiranannai áuquaqa. Áuquséeqa moó ooruku námmarikinaa áandau kúara fooqáa írana apatannái áuquseeqa minánnoo meeráqoo ámuaaqa akuaqa.

15 Ínnee akasia sáqarinnai kai náaquqara úiqaana máqa átuna áuqusee kúradaaqa. 16 Maaqí mándee máaqa atuna áuquaqa. Saqári dínni dínni kurádarafa 4 metres máriani. Miná ausana qúsa 66 centimetres amana kái auní ruaqa. 17 Aiqáma átuna maqáki rakíqaranara irisée áti óoqiqara másee ateekáaqa. Aiqáma máaqa átuna miqí kai másee ateekáaqa. 18 Ínnee súani áfu átaaqéenni south kísaaqándanai máaqa átuna 20 narísaa narísaa apámandee kúradaaqa. 19 Máaqa átuna óosana sía maqáki káqi rakiáaqa. Siruáannai ámaaqa áuqusee minakí máaqa átuna kúradaaqa. Siruáannai 40 máaqa átuna óosana ámaaqa áuqusee minakí kúradaaqa. 20 Úiqaana máqa súani dínni ataaqeenni north kísaaqándanai máaqa atúna 20 narísaa narísaa apámandee kúradaaqa. 21 Máaqa átuna sía maqáki káqi rakíaaqa. Siruáannai 40 ámaaqa áuqusee minakí máaqa átuna kúradaaqa. 22 Súani kéeqee marí qaannai (west) úiqaana máaqa urúanatinai máaqa atuna dínni qísauku taikásee dínni ani moodáa marasée 6 narísaa narísaa apamandee áuquaqa. 23 Máaqa dínni dínni munu raqáranaki kafáa qaaraqánda áuqusee kúradaaqa. 24 Raudáranaki máaqa átuna óosanaki apámmasee kurádama sáifanoo ámiqimasee narísaa narísaa apínoo máriani. Máaqa átuna rakíqaraná óosanaki rumbá atukarasee miqí kai mámaree mirínni múrufisaaqa. Dínni dínni munu raqáranaki miqí kaimmiaqa. 25 Miqímmaseeqa máaqa atuna 8 óosanaki siruáannai qaaraqánda qaaraqánda ámaaqa áuqusaifanoo 16 máriani. 26 Ínnee qauníri fandínnana akasia sáqari 15 máraaqa. Úiqaana maqa ataaqée dínni dínni faqa urúanai faqa fáifa faifannoo auní rúmasaifanóo máaqa atukaramá qumáraani. 28 Mi maaqa atunná qámbaana aunírira sáqari fannoo máaqa amana káì dínni dínni áti máriani. 29 Máaqa atuna aiqáma kóorannai kai rafáaqa fuaqa. Máaqa átuna mau aiqáma kóorannai kai anaanu mámaree fuaqa. Aunírifándinna saqárisa faqa kóorannoo rafáaqafúsee mi anaanúsaki áusuaqa. 30 Dóo Moosee qiní úiqaana máqa áaqanasaa qinée qímamiafánandee másee usakáà. 31 Ínnee sipsípa asausi dirindáasi ákirana faqa pánnoona ákirana faqa faéena ákirana faqa sufusée minánnai ámiqira qámunna áuquaqa. Miqímmasee mi qamunnána sáa qangiroo qáqoosa faqáana amana áuquaqa. 32 Akasia sáqari qaara fáqa qaara fáqa 4 marasée kóorannai aiqáma rafáaqa fúsee miná átisaa mirínni qamunna dírifàndínna ámaaqa áuquaqa. Miqímmasee miná kúradee fándínnana ámaaqa 4 óosanaki siruáannai áuqusee mináki kúradaaqa. Káaqa náaquqara óosirana ititáanifeera kúradaaqa. 33 Miqímmaseeqa mi qamunnána ámaaqa áuqúqaanasaa dirisáifanoo ámaaqa áuqirana ámeemaanai qamunna áti óorèeqánoo máriani. Miqímmásaifanoo mi qamunnána ititárafa ataufaka ameemaanai óorèeqánoo máriani. Mi qamunnáfa ititáranaki moodáanaki kíra búkisaki qaara oonisáa sándufa márina quqáaqa. Mi qamunnáfa náaquqara óosirana faqa káaqa náaquqara óosirana faqa raináannoo. 34 Moodáanaki kíra bukisa káaqa náaquqara óosiranaki quqásee kóorannai miná áfu áuqusee rafáaqa fuaqa, nífauara áfu minásaa rafaaqa fuaqa. Dírira qamunna fánnoo rainá nimaqaidanoo kooqí kinaa óosiranara náaquqara maqa fee qímásee kukéeqara óosiranara úriqaramásee náaquqara máqa fee qíaqa. 35 Teebóora maréeqee náaquqara óosirana maaqóo óonumafi kooqíki súani afu dínni átaaqee qáannai (north) máfi quqáaqa. Qóoma saqári suani afu dínni ataaqee qaannai (south) máfi quqáaqa. 36 Úiqaana máqa kooqíki ititée fandínna qamunnana sipsípa ásausi dirindáasi ákirana faqa pánnóona ákirana fáqa faéena ákiranannái faqa marasée áuquaqa. Óosana óosana sándannái mooká máakira áinainauqa mi qamunnánasaa áuquaqa. 37 Mi qamunnána dírifandínnana moodáannai qísauku 5 akasia sáqari marasee kóorannai miná átimau rafáaqafusee qamunna dírifandínnana anaanu áuqusee quqáaqa. Miqímmasee booróosannai moodáannai qísauku 5 átuna óosana ámaaqa áuqusee minakí kúradaaqa.

Copyright information for `BJR