Exodus 30

Ámiqira úndimari idá munána suqára qainda áuquaqa.

(Rafúdoo 37:25-28)

Yáaweefa kaifáa Mooseena qímaminoo qinau. Moosee ínnee akasia sáqari marasée ámiqira áfundi marí ida munána arée fandínna qáidarana áuquaqa. Mi qaidaráfa dínni dínni amana kái máriani. Miná kísaaqandanai 45 centimetres máriani. Miná qúsandanai miqí kai ínoo 45 centimetres máriani. Maqá sáaqari óoru fírafa 90 centimetres máriani. Miná qaara faqa qaara faqa áti moodáa sáqarinnoo kai burimakáu áanaira foorá áuquaqa. Miná áfu faqa aanai fooqáana faqa ataaqéeqara faqa ámiqira kóorannai kai rafáaqafúsee kóorannai miná fíqu fíqumma áuquaqa. Kóorannai qaara qánda ánaanu áuqusee dínni moó dínni moó quqásaifanoo qaindúsi fàndínna sáqarina atukarammá qúmáraani. Mi qaindusira saqari qandá akasia sáqarinnai áuqusee kóorannai rafáaqa fúàqa. Mi qaidárana mara máree náaquqara oosirana dínni qiní moodáanaki kíra búkisa márina óorinni quqáaqa. Miqóo qinée ínni faqa moodáanaki kianáura.

Aiqáma kánanaana Aroonafa qóomauqa andeeqárara aniréenoo mifá miná sáa ámiqira adiafaa íra afundí marína suqáani. Mifá kaifáa eendí márinanoo qóomauqa qumbíseenoo ámiqira adiafaa ímari afundána ímarina suqáani. Mi oosanáfa náaru náaru sía uqanna taikáannoo káqi kai máriannoo. Ínnee sía moó mi qaidarána saa qinee qáòo qíma qáunna áfundirana suqáaqa. Aandáù tatúfiranéè sakuma qaindiríra tátufiranee uáinna nammari adíasee suqára tatúfiranee sía minásaa suqáaqa. 10 Aiqáma áukuana moodáa faasaaná kai Áaroonafa mi qaidaránasaa ainaininanoo qiní qifusaa ámiqiannoo.

Yáaweena úiqaana maqánara takisa áqira oosana.

11 Yáaweefa kafáa Mooseena qímaminau. 12 Moosee anée Isaraee máqannaasa núqu marasáinaqa moodáa moodáa fasiqa náriqa máriranara qiní feefauru qímiaqa. Miqímmásee núqu máree márinaqa moó úmmaara sía misa saa áqufuannoo. 13 Aiqáma núqu ákaraki márisa úriqararausa auqu rámáqaa múnnimmana amana kái quqáaqa. Aiqámausa mi feefaurúna áqiqa qiní qímira áinaina qímifaránoo. 14 Faiqí moodáa fasiqa áiku ásauku taikásee 20 áukuana faqáasa faqa miná fíqarara áukuana faqáasa miqímmásee qini feefaurú qímiaqa. 15 Misá náríqa márirana maaqímmásee feefauríaqa. Aináina faqáasa sía fíqaramasee áqifaranoo. Aináina síaisa sía óorudupi másee áqifaranoo. Áiqáma amana amana kái áqifaranoo. 16 Mi munnimmána Isaraee máqannáasíànnai marasée qinee umeé márunna uiqaana maaqáfa mandáikinana minánnoo itípia. Misá náriqa máriranara mi takisána áqusáifaqa qínee misá saa ititá nímaqaranara írianaura.

Booróosannai firaa difaani áuquaqa.

17 Yáaweefa Mooseena maaqí qímasee kafáa qímamínau. 18 Moosee anée nammári áuqeemaría difaanína firaaná áuqua. Booróosannai áuqusee miná áiku faqa booróosannai kai áuqua. Auqúsee nammári minakí adíasee qiní úiqaana máaqa dínni márinana qaidara dínni márinana qámbaana quqáà. 19 Áaroona faqa narí faiqi námu faqa minakí níku nísauku nammári úqimarifaranoo. 20 Misá qiní ufa súqira máaqaki kéeqaanee qímasee níku nísauku minakí máfi nammári uqusée qiní qímifandínna nárana qaidarasáa suqá qímiaqa. Miqíqa sía kúqifaranoo. 21 Misá nárì níku nísauku nammári uquséeqa sía kuqífáranoo. Maa sanda ufána Áaroonafa narí faiqi námu faqa kásooqaqee misá sáa aniaruakínausa faqa maa sanda ufána áfaqée fáranoo.

Aanaíqi kírausa útaaqara fádameena áuquaqa.

22 Yáweefa kaifáa Mooseena qímaminoo qinau. 23 Moosee anée makáqa anoona moómoo 6 kilograms faqa isaaqa anoona moómoo 3 kilograms faqa ámiqira úndi mari innupína anoona moómoo 3 kilograms faqa máraa. 24 Saadápu moómoo 6 kilograms faqa máráà. Aiqáma áinaina úiqaana máqa sikéera amana kái máriani. Oorifa fádameena 4 litres amana minakí adíaaqa. 25 Mi náaquqara fádameena Yáaweenaindi fee qímasee níkiiqa ámoondunna adiee fandínnana áuqusee ámiqira áfundi marína námufaqa quandáaqa. 26 Anée mi fadameenáusa áuqu máree qiní úiqaana máqasaa akuséenana qiní moodaanaki kíra ufa mári bookisánasaa fáqa ákua. 27 Áiku faqáa téeboora faqa minasáa qaraa ainainauqa faqa qóoma sáqari faqa minásaa qáraa áinaináuqa faqa ámiqira áfundi mári pauraqána idá qée marí qaidarána faqa akuámaqáà. 28 Tatúfirana suqée mafia qaidarána faqa minásaaqaraa ainaináuqa faqa akuámaqásee nammári dífaani faqa miná áiku faqa akuámaqáà. 29 Miqímmásee mi ainaináusa áaduma sáa mara quqásainanoo káaqa náaquqanoo máriani. Moó fánnoo fée moó áinainee mi ainaináusa áuqáinafa mi ainaináusa náaquqara áfeeka fánnoo náruannoo. 30 Miqimmasee Áaroona narí faiqi námu faqa mi fadameenná aku nímaqa sáinaqa qini aanáiqikira sáikaki máriaqa. 31 Moosee anée Isaraee máqannaasa maaqí qímasee qímannimía. Maa naaquqara fadameenná nikiiqa ámoondúnna adíee fandínnana qiní aináiniranaki náaru náaru quqáaqa. 32 Maa fadameennáfa sía káiqee fasiqa adíannímaqee máriafa máridanoo. Ínnee sía moó fádameena miqírana áuquaqa. Mifá náaquqara áinaina márinara ínnee minára náaquqara fee qímasee eeráiriaqa. 33 Yáfee moó fannoo maa fadameennára foorá áuqusee mooná ákiiaaqa adíainafa qiní faiqí ánaaseekí sía máriannoo.

Ámiqira úndimari munána áuqimaria pauraqána óosana.

34 Yáaweefa kaifáa Mooseena qíminoo qinau. Moosee anée óosana óosana ámiqira úndi mári pauraqána sitakatee páuraqa fáqa oonikaa páuraqa fáqa karabanumma páuraqa faqa ámiqira makáqa anoona faqa aiqáma amana amana kái máráa. 35 Maraséenana ámiqira áfúndi márifaqa nifaaqaí áki maríanara foora áuqamásee idá arasáinanoo qéenoo ámiqira muna afundiani. Ooruku fáqa óodaa quqásainanoo ámiqinoo náaquqara faikíani. 36 Anee mina átiuqa maraséenana kaadá rírìisáinanoo kookoomaiká máfinana mara máree qinee umeé márunna máqanaki múruseenana moodáanaki kíra búkísa óorinni quqáà. Mi amiqira undána imarínara káaqa náaquara fee iaqa. 37 Ínnee sía moó miqíra áfudimarinnana áuquaqa. Ínnee minára náaquqara andeeqára áinaina Yáaweenaindi fée qiaqa. 38 Yáfee moó fánnoo miqírana ámiqira undi márina afaaqaí ákiraree qímasee áuqinafa sía qiní faiqí ánaaseeki máriannoo.

Copyright information for `BJR