Exodus 33

Yáaweefa Isaraee máqannaasara Sinái áaqana áikunni máruna minnísee fuaqéera qímanniminau.

1Yáaweefa maaqí qímasee Mooseena qímaminoo qinau. Anée faqa Isipa máqa máaqaindari nífiqee ánianna fásiqa ánaaseesa faqa maa maqána quqásee qinée qíma afeekaikámmasee Abarahaamána faqa Isakeena faqa Yákooboona faqa misásaa ani aruakí kambíqainausa faqa nímiraree qíafanna máqanasaa fua. 2Qinée qeeqá angiroo aiqáananoo ínni nífu úqi márinaqa fímarifaqa qinee Kannaa máqannaasa faqa Amoora máqannaasa faqa Heeta máqannaasa faqa Peerisa máqannaasa faqa Hifita máqannaasa faqa Yeebusa máqannaasa faqa náru nífáqaaqa ianaura. 3Ínnee áinoo faqaa maqásaa aináina úmmaqusaa fanoo réemindèemíri mari maqánasaa fifáranoo. Qinee qeeqá sia ínni faqa fuanáura. Ínnee ramoorámaa ímariasa máriafaqa qinee ínni faqa fídaqa aanái ínni náruanoora.

4Isaraee máqannaa Yáaweena mi ufána iriséeqa nifaaqa áuqira áinaina aiqáma raipáqu quqásee soofaará máridara foorá máfiqau. 5Yáaweefa maa ainainá áuqaaqéera qímannimufaqa miqíqau. Maaqí qímasee Yáaweefa Mooseena qímaminau. Ínnee káaqa ramoorámaa ímariasa máriafanoo. Qínee ínni faqa maqee fíqa ínni kurídi nímaqáunaiqini. Doo maqee ínneeqa nifaaqa áuqirana raipáqu quqásee káqi márifaqa qinée ínni náqaafee mánnimaqáannanara óonumafi írianaura. 6Miqí qímasoofaqa Sinai áaqana quqásee fídaqa Isaraee máqannaasa sía nárì nifaaqa áuqirana afisíqau.

Yáaweefa Mooseena fáqa ufa qímaru uiqaana maqáfa.

7Isaraee máqannaasa náriqa úiqaana máaqauqa usakásoofanoo Mooseefa náaquqara úiqaana máaqa naambeéqai níanasaa usakánau. Usakásee miná áuqureenoo Yáaweefa umeé mári uiqaana maaqá fée qinau. Faiqí ánaasee moó fánnoo Yáaweena íriranara írianee qímasee mi maaqána kooqínni fímariqau. 8Mooseefa narí úiqaana máaqai fufaqá faiqí ánaasee nárì úiqaana máqa kooqíkiaqa kikíqamafi qáfee máru fanoo kéeqanau. 9Mooseefa úiqaana maaqaki kéeqafufanoo asuru qumuréenoo mi kooqínaki márufanoo Yáaweefa minakíqari Mooseena fáqa ufa qímarinau. 10Asuru úiqaana maqa kooqíki qumu kásoo inoo márufaqa faiqí ánaasee miná qáfamasee ninuka túqu náumoo amisée Yáaweena ámooqí maríqau. 11Yáaweefa Mooseena faqa narí óori narí óori qáfaida ufa qímarinau, faíqi narí áqoondi faqa ufa qímarindee inau. Ufa taikáseenoo Mooseefa anirandée faiqí ánaasee máru úiqaana maaqánai finau. Kumaaráa moó miná dadaaqí márufa Yóosuafa Nunnaana ámaaku náaquqara úiqaana máaqaki káqi márinau.

Yáaweefa narí faiqí ánaasee faqa márianauree qímasee qima afeekaikinau.

12Mooseefa Yáaweena qímaminoo qinau. Óo Yáawee kúqaa anée qiníara maa fasiqa anaaseesá indaarúnnikamma nímaqainaqa mi maqánasaa fuaqée qinau. Anée sía qiní faqa fídanoo qiní dadaaqíaninna fásiqanara qímaqimiananoo. Anee qiníara ámiqimmasee íridana qiníara asasídaqee qíananoo. 13Anée kúqaa qiníara miqídana anee qímiriannana qímaqiminaqa qinée aní aináiniranaki máridqa maqee maqee ani asasammá ámaqáanaura. Anée maanára faqa íria, maa maqannáasa aní faiqí ánaasee anée útáaqama qáanausa máridaqa.

14Yáaweefa miná iriséenoo Mooseena qímaminau. Qinée aní faqa fídaqa adooárana ínni nímianaura.

15Mooseefa iriséenoo Yáaweena qímaminoo qinau. Anée sía maasá faqa fínana sía maasá maaqóoqari diqiqáà. 16Anee sía maasá faqa fínaqa náqaafee másee akaqáusa anee qíníara faqa aneenná faiqí ánaaseera faqa rímariannanara írifaranoo fee. Anée maasáki márinaqa maa maqa maaqána kínaasakiqari náaduma moó kírausa márianaura.

17Yáaweefa Mooseena mi ufána iriséenoo qímaminau. Dóo anée qíanandee káimmianáura. Qinee ámiqimmasee aníara írimarúnnanara faqa aníara asasí marúnnanara faqa miqíanaura.

18Mooseefa mi ufána iriséenoo kaifáa Yáaweena irámirinoo qinau. Amanée aneenná óori dároo dáraa irana uqaqífiqásainaqa qáfaanauree qufanóo Yáaweefa qinau.

19Amaná qinée qeeqá ámiqira aréenarana quqásaananoo ani áiàaqaree áfunni fúannoo. Qinée aní áfusaa qeeqá náaquqara dúquara koorooianáura. Qinée Yáaweesa qeeqá nífauarana faqa qeeqá qimudáoo qírana faqa qinee útaaqama qáunausa nímianaura. 20Moosee anée qiní dóori sía qáfeenaranoo moó fannoo qiní qíqafainafa sía amana káqi máriannoo kúquannoo. 21Moosee anée qiní dáakaarinni óonisaa kikiqína mária. 22Qiní dóori aréenarafa fínaqa qinée ani óoni afoo íranaki quqáseeqa qeeqá qísauku anísaa ititáseeqa fíqaramafíqa qísauku máraanaura. 23Qinée qísauku mara máraanana anee qiní itaufaka kái qíqafa. Sía dóori qíqafeennaranoo.

Copyright information for `BJR