Exodus 34

Mooseefa kafáa ínaaqianna sándufa máranau.

Lo 10:1-5

Yáaweefa Mooseena qímaminoo qinau. Moosee anée maa aaqannásaaqari óoquree óoni ausiqára ateekásee máree úrua. Anée indaarúqaa qanda amana kái ateekásee máree úrua. Múrusainaqa indaarú rukamúnnánasaa ákara rúafannufana kafáa ákara rúanaura. Anée maqee deedaqamáqai márinana dúna kanánaana eendái mara máree Sináì áaqanasaa ururée qiní paqúria. Faiqí moó fánnoo sía aní faqa úruannoo. Sía uqanna moó fannoo áaqanai fee áaqana aaqá fee máriani. Sía misá burimakáù sipsípa faqa áaqana aikunni ándanda naaqa.

Mooseefa iriséenoo óoni ausirírana qaara qánda ateekámaree kanánaana Yáaweefa qímamundee ínoo Sinai áaqanai óorufinau. Yáaweefa asurukína qumuréenoo Mooseena faqa kikíqa máfinoo narí áuquara koorooínoo qinée Yáaweesee qinau. Yáaweefa Mooseena óorinni fíqaree óonuree maaqí qímasee firaaqóo qinau. Qinée Yáaweesa máridaqa. Qinee qímuqusirana faqa qimudáòo qírana faqa umbiqárausa máridaqa. Qinée sía kái káqi áanooqunausa máridaqa, qinee káaqa faiqí anaaseera qímuqusi márunausa márdaqa, qinée óoqai márunnaqóo kai márunausa máridaqa. Qinée qeeqá qima afeekaikíra ufa kásooaqee núkudara foora kambiqáinausara qíma qáafanna ufana káqi kai íridqa, numóo faqa mandá óosana ákiiqara faqa minnínisaanaura. Qinee numóo áuqainna fásiqa ánaaseesa faiqi námu faqa miná ánaiqi mara faqa miná ásáifaqausa faqa afaqnáusa faqa sía sía náruanaura, naruanaura.

Mooseefa mi ufáusa iriséenoo kái káqi maqásaa óorindari mapámufufanoo Yáaweena amooqinau. Amooqídanoo maaqí qímasee Yáaweena qímaminau. Yáawee anée kúqaa uqanna qiníara asasídana qinee aníara maasá faqa fúanneera iráidaqa. Maa fasiqa anaaseesá ramoorámaa ídaqa anee maasá numóo ákiiqara minníqiseenana maasára aneenná faiqí ánaasee fée qia.

Ánutufa faiqí ánaasee faqa kafáa moodáanaki kináu.

(Rafúdoo 23:14-19, Lo 7:1-5, 16:1-17)

10 Yáaweefa Mooseena qimaminoo qinau. Maqee qinée Isaraee máqannaasa faqa moodáanakikira ufa qídaqa. Qinée misá nífusaa firaa ainainauqa sía maa maqánasaa moó átinai faqa moó máqannaa qámbaana faqa áuqaafánna áinainausa áuqaanaura. Aiqama faiqí ánaasee qinée Yáaweesa fíraa áinaina áuqaanaqa qáfaifanoo náaquqaannoo. Ínni dadaaqianifeera miqíanaura. 11 Qinée maqee qímannimianna sandufana ámiqimasee irisée mimaú fuaqa. Qinée Amoora máqannaa faqa Kannaana máqannaa faqa Heeta máqannaa faqa Peerisa máqannaa faqa Hifita máqannaa faqa Yeebusa máqannaa faqa ínni nóorinni fídaqa misá nífaqasaana fifáranoo. 12 Ínnee fúka maqasaa óonuree sía mi maqannáasa faqa káqikaa ainaina réè firaa ainaina réè sía misá faqa moodáanaki kíra ufa qiaqa. Misá ufaanara foora fufúsáifaqa ínnee minakí árifoora, minara qeeráiriaqa. 13 Misá tatúfirana suqée maría qaidarána misá óoni ateekárana rakíaaqee maasá náaquqara ánutunee qímariana ínnee miná rukámu áquaqa misá saqári ateeká rakíqasee maasá ánaasee ánutufa Aseeraafee qímariana mináuqa faqa ateekaatéekámma áqusaaqa. 14 Ínnee sía moó únna ánutunara innaaru qiaqa. Qinée Yáaweesa únna ánutufa qiní qímaaqa máqaranara rairaí qímarunausa máridaqa.

15 Innee fúka máqasaa óonuree sía uqanna misá faqa moó áinainara moodáanaki kíra ufa qiaqa. Misá náriqa únna ánutuna innaaru qídaqa tatúfirana suqámi máriana ínniara naaqée qífaqa nee fóora. 16 Ínni faiqi námu mi anaamuru anaaseesá maraséeqa qiní minnísee moó únna qíra ánutusara innaaru qifóora. Mi oosanáfa qiní qífusaa dapi nuá ánaaseesara foorá máridaqa.

17 Ínnee sía moó áinaina tasírisiri másee únna ánutuna amana áuqusee minára innaaru qiaqa.

18 Óoqai ínnee Abiba qúqoonasaa Isipa máqasaaqari ánusa máriafanoo. Minára Abiba qúqoona aniráinaqa maqee maqee ínnee sía yís mári féemuna oomáqa sakasée maqee maqee naaqa. Dínni qísauku taikásee dínni óonu qaara marasée 7 fáasaana mi oomaqána sakasée naaqa. Isípa máqasaaqari ánu quqoonáfa márinara miqíaqa. 19 Aiqáma áinaina óoqásáa ánaaqi qiníndi máridanoo. Ínnikina óoqásáa akoonaiqí máqainafa faqa aiqáma máaqeena áandauqa óoqasaa ákoona máqainafa faqa qiníndi kai máriannoo. 20 Innee ínni doonki ánaaqi óoqásaa máqarafa káqi márianifee qímasee sipsípa ánaaqi miná ámaaqa maqasée tatúfirana suqá qímiaqa. Ínnee sía miqíqa miná anuka kurídíaqa. Ínnee aiqama ínneeqa óoqa fáiqiuqa feefauru másaifaqa kafáa inniqáindi kiaqa. Sía moó fannoo tátufirana suqára áinaina sía úqirafa qiní Yáaweesa qífusaa ániannoo.

21 Dínni taikásee dínni ani moodáa marasee 6 fáasaanasaa ínni aináinira fáasaana maridanoo. Dínni ani qaara marasée 7 fáasaanasáa sía aináiniaqa. Úmáqira áukuanée aiqíra áukuanee aniráinaqa sía mi faasaanná aináiniaqa, idooaaqa.

22 Ínnee unakírana óosana arasée miqóo áfíana nára óomaqa suqáaqa. Ínnee asumu aiqú quqára óomaqa faqa sakasée náidaqa miná áuqu réeqa asumu aiqú quqára óomaqa fee qiaqa. 23 Moodáa áukuanaki qaarammoó kári aiqáma Isaraee máqannaasa moodáaqoo suqúfi qiní Yáaweesa Isaraee máqannaasa Ánutusa qimooqiaqa. 24 Qinee ánaamuru ínnee fínnatinai nífaqaseeqa misá maqa máaqa ínni nímisée ínni mi maqa maaqána firaanáikámma nísaanaqa ínnee aiqáma áukuana qaaramoó kári moodáaqoo suqúfi ínneeqa Ánutusa qiní Yáaweesa qífusaa márifanoo sía moó ánaamuru anirée ínni maqa máaqa máreefaranoo.

25 Ínnee aandáù arusée tatúfirana suqá qímiraree qímasee sía innooqéemári pauraqána námufaqa féemu suqáaqa. Áinnaaqarara óomaqaki arusáinna aandáuna átaraasa fánnoo sía akaqáfa káqi márinanoo faiqée iaqáani.

26 Aiqáma áukuana indaarúqaa nárana áfiàna náraree qínnana Yáaweena náree máree múnu ámiaqa. Ínnee sía mimmí fée sipsípafee arusée narí ánoona náamma ánoonannái suqáaqa.

27 Yáaweefa mi ufánara Mooseena qímaminoo qinau. Anée aiqáma maa ufáusa ákara rúà. Maa ufáusa qinée aní fáqa Isaraee máqannaasa faqa moodáanaki qímá afeekai kámma qáunna ufana óosana máridanoo. 28 Miqí qímasoofanoo Mooseefa áaqanasaa Yáaweena faqa kísaaqasaa márinau. Qaara fasiqa níku nísauku taikásee 40 fáasaana fáqa eendáki fáqa nammári faqa nárana faqa sía neemarinau. Yáaweena moodáanaki kíra sánda ufa óoni qárasaa ákara rinau.

Mooseefa Sinái áaqanaindari qúminau.

29 Mooseefa Sinai áaqanaindari Yáaweena sánda ufa ákara ríra óoniqara úqirafa qúminau. Mifá Yáaweena faqa ufá qíqiunara miná óori áfiri dároo dáraa ímarufanoo narí sía minára írinau. 30 Áaroonafa Isaraee máqannaasa faqa Mooseena óori áfiri dároo dáraa ímaruna qáfamaseeqa rufíaida níanasaa máriqau. 31 Mooseefa misá níndafamáseenoo Áaroona faqa faiqí firaasá faqa náarama quqásoofaqa aiqáma aniroofanóo ufa qíma níminau. 32 Adeedí aniroofanóo Yáaweefa Sinái áaqanasaa aiqáma sandufa Mooseena qímamu ufána qímanníminau.

33 Mooseefa qímanními taikáseenoo károo károonaikíra qamunna qumáree óorisaa rafáaqafinau. Miná óori qáfee rufíeefoora miqínau. 34 Mooseefa áqoosai káqikaa uiqaana maqaki kéeqafinoo qamunna uturúquseenoo Yáaweena fáqa ufa qímárinau. Qímaseenoo mádaanai ráudamafinoo faiqí ánaasee Yáaweefa qímamu ufana qíma níminau. 35 Qíma ními márufaqa misá miná óori qafoofanóo dároo dáraa ufanóo Mooseefa narí óorisaa qámunannai ititáseenoo qíma ními taikáseenoo quándaki Yáaweena faqa ufa qíraree qímasee úiqaana máaqaki kéeqafinoo kaifáa qamunna uturúqinau.

Copyright information for `BJR