Exodus 36

1Mooseefa Isaraee máqannaasa qíma nímidanoo qinau. Beesareerána fáqa Ooqooriabana fáqa miqandá dadaaqí marúsa óosana óosana áinaina áuqirana akoofásaikira írirana Yáaweefa nimiqoosá aiqáma áinaina Yáaweefa naamúa qundée kai másee náaquqara uiqaana máqa áuqaaqa.

Faiqí ánaasee moómoo áinaina máree ániqau.

2Miqí qímaseenoo Mooseefa Beesareerána fáqa Ooqooriabana fáqa Yáaweefa aiqáma áinaina áuqira irirana akoofásaikírana nímimaru fasiqausa faqa náarama quqáseenoo qímanniminau. Doo ínnee óosana arasée áuqaaqa. 3Isaraee máqannaasa Yáaweena ámideequú áinainausa míni soo fanóo Mooseefa mi ainainira fasiqáusa nímufaqa áuqimariqau. Faiqí ánaasee eedóo qímasaida aiqáma kanánaana Ánutuna ámidee quú áinainausa káqikai máraidaqa Mooseefunnái múnu quqée maríqau. 4Náaquqara máqa usakée márusa moómoo ainaina qáfamasee náriqa aináinirana mínnisee Moosee finnaí óonuree qímamiqa qiqau. 5Faiqí ánaasee moómoo áinaina aabaa fáqa máree ánidammia. Yáaweefa maasára áuqaaqee qímaqaina amana mínisee aabaa fáqa mínisaafannoo káqi fífau máriannoo.

6Mooseefa miná iriséenoo ufa quqásoofaqá aiqámausa qímannímiqa qiqau. Faiqí ánaasee sía moó fannoo kafaa moó áinaina náaquqara úiqaana máqa usakáaqeera máree ániaqa. Miqí qímasee qimanímufaqa faiqí ánaasee miná iriséeqa sía kafáa máree ániqau. 7Indaarú míni qoo áinainausa aiqáma áinaina taikárana amana fáqa fíqaramásee aabaa faqa máree ániqau.

Misa Ánutuna úiqaana máqa usakáqau.

(Rafúdoo 26:1-37)

8Írirana káaqa fíqararausa kai indaarúqaa qamunna úiqaana máqasaa ákirana áuqiqau. Sipsípa asausí dirindáasi ákirana faqa pánnoona ákirana faqa faéena ákirana faqa sufusée ámiqira qamúnna áuqusee áqoosa faqáa áandau amana áuqusee minásaa atooqasee akúniqau. Miqímmáseeqa mináuqannái qísaukuqara taikásee 10 firaa qamunna áuqusee moodáanaki akuníqau. 9Mi aiqama qamunnáusa amana amana kai 12 metres kísaaqa miná qúsa 2 metres máriani. 10Mi qamunnáusa moodáannai qísauku 5 marasee ootúpamásee akuníqau. Dinní qísauku taikásee 5 faqa miqíkai iqau. 11Miqímmáseeqa mi qamunna qandá átiqara dirindáasi árira qámunnannai anaanu áuqúsee moodáanaki ootúpaqau. 12Firaa qamunna áti máu anaanu 50 áuqiqau. Moó qámunna faqa miqí kai íqa moó qámunna sáa qaraa anaanu amummaqa kai auqíqau. 13Kóora qumáree túrimmandee qúsa táfara foorá saaeemmá qumáree dínni dínni anaanuki upeekásoofanoo mi qamunna qandá moodáaraa foo inóo márinau.

14Úiqaana máqasaa ákira qamunna firaaná mimmí asausínnai 11 áuqiqau. 15Misá aiqáma moodáa kárirana kai auqiqau. Mina kísaaqa 13 metres amana márianoo miná qúsa fannoo 2 metres amaná márinau. 16Mi qamunnáusa moodáannai qísauku taikásee 5 qamunna akunúsoofanoo moodáa qamunnaika máfinau. Kafaa moodáannai qisauku taikásee dinni ani moodáa marasee 6 narísaa narísaa akunúsoofanoo firaanáikinau. 17Qamunna átimau anaanu 50 akúniqau. Moo átimau faqa mina amummaqa kái akúniqau. 18Booróosannai táfara foorá áti saaeemmásee 50 áuqusee minánnoo dínni dinni anaanuki áususee ootúpamásoofanoo moodáa qámunnara foora márinau. 19Kafáa misá úiqaana maqa akuámaqara qámunna sipsípa akoona apata faéena ákiranannai moó áuqiqau. Ínaaqianna amúaaqa ákirana ooruku námmarikinaa áandau apatannái áuqirafa márinau.

20Misá akasia sáqarinnai kai náaquqara úiqaana máqa átuna áuqusee kurádaqau. 21Maaqí mándee máaqa átuna áuqiqau. Saqári dínni dínni kurádarafa 4 metres márinau. Miná ausana qúsa 66 centimetres amana kái áuniriqau. 22Aiqáma atuna maqáki rakíqaranara irisée áti óoqiqaramásee ateekáqau. Aiqáma máaqa atuna miqí kaimásee ateekaqau. 23Misá súani áfu ataaqéenni south kísaaqandanai máaqa átuna 20 narísaa narísaa apámandee kurádaqau. 24Máaqa atuna óosana sía maqáki káqi rakíaqau. Siruaannai ámaaqa áuqusee minakí kurádaqau. 25Misá uiqaana máqa súani dinni ataaqéenni north kísaaqandanai máaqa atuna 20 narísaa narísaa apámandee kúradaqau. 26Máaqa atuna sía maqáki káqi rakíaqau. Siruáannai 40 ámaaqa áuqusee minakí máaqa atuna kúradaqau. 27Súani kéeqeemari qaannai west úiqaana máqa urúanatinai máaqa átuna dínni qísauku taikásee dínni ani moodáa marasée 6 narísaa narísaa apámandee áuqiqau. 28Máaqa dínni dínni munu raqáranaki kafáa qaaraqánda áuqusee kuradaaqa. 29Raudáranaki máaqa átuna óosanaki apámmasee kurádama soofanoo ámiqimasee narísaa narísaa apínoo márinau. Máaqa átuna rakíqarana óosanaki rumbá atukarasée miqí kai mámaree mirínni múrufi saqau. Dínni dínni munu raqáranaki miqí kaimmiqau. 30Miqímmaseeqa máaqa átuna 8 óosanaki siruáannai qaaraqánda qaaraqánda ámaaqa áuqusoofanoo 16 márinau.

31Misá aunírifandinnana akasia sáqari 15 máraqau. Úiqaana maqa dínni dínni ataaqée faqa urúanai faqa fáifa faifannóo aunirúmasoofanoo máaqa atukárama qumáranau. 33Mi maaqa atunná aunírira saqari fánnoo máaqa amana kái dínni dínni ati márinau. 34Máaqa atuna aiqáma kóorannai kai rafáaqa fiqau. Máaqa átunamau aiqáma kóorannai kai anaanu mámaree fiqau. Aunírifandinna saqárisa faqa kóorannoo mi anaanusáki rafáaqa fiqau.

35Misá sipsípa asausi dirindáasi ákirana faqa pánnóona ákirana faqa faéena ákirana faqa sufusée minánnái ámiqira qamunna áuqiqau. Miqímmasee mi qamunnánasaa angiroo níqoosa faqaasa nimana áuqiqau. 36Mi qamunnána dírianee qímasee qaara fáqa qaara fáqa 4 átuna akasia sáqari ateekásee kóorannai rafáaqafusee kúradaqau. Mina atimau kóorannai qamunna dírifandínna anaanusa áuqiqau. Mi saqarísa óosanaki siruánnai ámaaqa áuqusee minakíaqa kúradaqau. 37Úiqaana máqa kooqíki ititéefandínna qámunnana sipsípa ásausi dirindáasi ákirana fáqa pánnoona ákirana fáqa faéena ákiranannai faqa marasée kooqíki dírifandinna ámiqira qamunna áuqiqau. Óosana óosana sándannái mooká máakira áinainauqa mi qamunnánasaa áuqiqau. 38Mi qamunnána dírifandinnana moodáannai qísauku 5 akasia sáqari marasée kóorannai mina átimau rafáaqafusee qamunna dírifandínnana anaanu áuqusee quqáqau. Mi atunnána qumáraanífeera kóorannai saqári kukúqamasee átimau auníriqau. Miqímmasee booróosannai moodáannai qísauku 5 atuna óosana ámaaqa áuqusee minakí kúradaqau.

Copyright information for `BJR