Exodus 39

Aanáiqi kírausa qamunna áuqiqau.

(Rafúdoo 28:1-14)

Misá sipsípa asausí dirindáasi ákirana faqa pánnoona ákirana faqa faéena ákirana faqa marasée aanáiqikirausa náaquqara óosiranaki aináiniaqéera ámiqira qámunna áuqiqau. Áaroona aanáiqikira qámunna faqa Yáaweefa Mooseena qímamúndee másee áuqiqau.

Misa sipsípa ásausi dirindáasi ákirana faqa pánnoona ákirana faqa faéena ákirana faqa kóora sánda faqa sufuséeqa eefooda qámunna áuqiqau. Misa koora túriisoofanoo adamanáika máfufaqa tirítándara foorá aukíiseeqa sipsípa asausí dirindáasi ákirana faqa pánnoona ákirana faqa faéena ákirana námu faqa sufuséeqa ámiqira qámunna áuqiqau. Eefooda qámunna anaanu qaaraqánda fánnoo áururusaa áakandiánínnana áuqusee éefooda qamunnasaa dínni dínni rumbáqau. Miná oóiqanda íaninnana ámiqira qámunnannai eefooda qámunna áuqundee kai másee áuqiqau. Mifá eefooda qámunnasaa akúnirafa márinau. Yáaweefa Mooseena qímamúndee kai ìqau.

Eefooda anaanusáa ákumáaqa óoni qaaraqánda pupú óoni marasée dínni ánaanusaa moó dínni ánaanusaa moó quqásee Yakooboona faiqi námu qísaukuqara taikásee qíkunni óoqu qaara marasée núqu mi ooni qandásaa ákara riqau. Miqímmasee áururusáa eefooda qámmunna áakandammásoofanoo Yakooboona faiqi námu qísaukuqara taikasee qíkunni óoqu qaara marasée 12 Isaraee máqannaasa kíkíqa úsinoo márinau.

Nímuqusasáa rumbára qámunna áuqiqau.

(Rafúdoo 28:15-30)

Eefooda qamunna áuqu ainaináusannoo kai ámuqusasaa rumbára qámunna áuquseeqa moodáa kárira ákara kai riqau. Mi qamunnána tukáandasoofanoo aiqáma áti amana amana kái 22 centimetres márinau. 10 Misá óoni ámiqirana firaa feefauru áqimaríana kai marasée qaara faqa qaara faqaki mi qamunnánasaa padíqau. Indaarúqaa pádiranaki moó óoni áuqu rubi fáqa moó óoni toopasa faqa moó óoni ganeeta faqa minamúna padíqau. 11 Miná ánaaqíanna padiranaki moo óoni áuqu eemeerara faqa moó óoni auqu safairee faqa moó óoni auqu daimánna faqa minamúnannai padíqau. 12 Miqandá múqufi padiranaki moó óoni áuqu teerakoisa faqa moó óoni áuqu agatee faqa moó óoni áuqu ameetisa faqa minamúnannai padíqau. 13 Ínaaqiana átimau padiranaki moo óoni áuqu beerira faqa moó óoni áuqu kanirianna faqa moó óoni áuqu yasapaa faqa minamúnannai padíqau. Mi oonísa kóorandannai ámuqusasaa máru qamunnanasáa isooqa áraqau. 14 Mi oonísa moodaa moodáa óoni fannoo Yakooboona faiqi námu qísaukuqara taikásee qíkunni óoqu qaara marasée 12 Isaraee máqannaasa kikíqa úsinoo márinau.

15 Misá nímuqusasaa rumbárana ánaanu ámiqira koorannai áuqira sándannai séenándara foorá áuquseeqa moodáanaki quqásee afundásee dínni dínni áti saa qusíqau. 16 Kóorannai anaanu qaara qánda áuqusee ámuqusasaa rúfuaninna qámunnana mirínni átisaa qara qúsiqau. 17 Qaaraqánda séenanda kóorannoo afundáranannai mi anaanu qandáki qusíqau. 18 Mi sandána áti qárannai áururusaa kóorandannai óoni isooqa aruqaanáki ootúpaaqa. Miqímmasoofanoo áururusaa eefooda qámunnasaa rumbánau. 19 Kafáa nímuqusasaa rufímariana anaanu qaara qánda kóorannai áuqusee aunduráindari átisaa mi anaanúna rumbásoofanoo eefooda qámunna mámmaaqai márinau. 20 Kafáa qaaraqánda ánaanu kóorannai áuqusee áfunni qumu máru eefooda qamunnánasaa aqaasanái ámiqira qámunnannai súfirana ooíqandi máruna áakaariqara rumbáqau. 21 Nímuqusasaa diri maría qamunnánasaa anaanukí dirindáasiandannai súfira sánda usuakí eefooda qámunnasáa qaraa anaanuki ususée rumbáqau. Miqimmásoofanoo ámuqusasaa ititára qamunna sía kási kásinau. Yáaweefa Mooseena qimamúndee káì iqau.

Ínnee akaqá qámunna aanáiqi kírausaindi auquaqa.

(Rafúdoo 28:31-43)

22 Misá eefooda qámunna meeáqoo qáraana áuqirara dirindáasi ákira sípsipa ásausinnai kai qamunna kísaaqa áuqiqau. 23 Misá anuka ámaaqa áuqiqau. Qamunna raqándaammásee akunúsoofanoo anuka upeekóofanoo sía anaqínau. 24 Mina áti máu raqándaammásee akunúseeqa saqári aqama faqa káqikaa biru kóorannai áuqirana faqa mina átimau qusíqau. Dirindáasi ákira sípsipa ásausi faqa pánnoona ákiranannai faqa faéena ákiranannai mi saqari aqamána amana áuqiqau. Áuquseeqa mi saqari aqamána aaqa kóorannai áuqira bíru faqa qamunna átimau moó máfi quqée moó máfi quqée iqau.

27 Misá sipsípa asusí dirindáasi ákirana faqa pánnoona ákirana faqa faéena ákirana faqa tiríta uqanna namu faqa sufusée Áaroona narí faiqinámu siútauqa faqa Áaroona úriqarara qata faqa miná faiqinámu káqikaa qatauqa faqa áuqiqau. Áuqusée ooíqanda íaninnana minánnai kai áuquseeqa óosana óosana ákarannoo afaaqa áuqiqau. Miqímmaseeqa misá tarausísa tiríta uqannánnai áuqiqau. Yáaweefa Mooseena qímamúndee kai íqa aiqáma áinaina áuqiqau.

30 Misá ámiqira kóorannai níqinaaqa rumbéemaru doodapaanínara foorá áuqusee minásaa Ánutunaindi fee qímasee ákara riqau. 31 Misá doodapáani dirindáasiandannai áuqirana marasée qátasaa quqásee akúniqau. Yáaweefa Mooseena qímamúndee kái iqau.

Dóo aíqama sáika taikanau.

(Rafúdoo 35:10-19)

32 Miqímasee Yáaweena úiqaana maqá taikáqau. Isaraeena áiku ásauku Yáaweefa Mooseena qímamúndee kaí aiqáma ainaina iqau. 33 Misa úiqaana maqa faqa miná rafáaqa fímaria qamunnana faqa miná anaanu faqa mi maqána úsakara átunauqa faqa aunírira sáqari faqa óosuki faqa kooqíki faqa rakíqee fandínna saqárisa faqa saqári maqáki rakíqarana ámaaqa áuqirana faqa maree Móoseefa márunnai múnu quqáqau. 34 Sipsípa ákoona ápata faéena ákirana minánnai úiqaana máaqasaa ákirana fáqa ooruku námmarikinaa áandau apata úiqaana máqasaa ákirana fáqa káaqa náaquqara óosiranaki ititára qámunna fáqa máree múnu quqáqau. 35 Misá moodáaniki kíra bóokisa qaara óoni minakí máruna faqa miná áfu faqa miná qaindúsira saqari qara fáqa máree múnu Mooseefa unnái quqáqau 36 Misá áiku faqáa qáindá faqa minásaa mári ainaináusa faqa Anutuna áfusaa quqára feemu faqa maree múnu quqáqau. 37 Misá ámiqira kóorannai áuqira qóoma sáqari faqa miná qóomauqa faqa mina óosana óosana áinainauqa faqa mi qoomáusa fadaméena faqa máree munu quqáqau. 38 Kóorannai áuqira áidara faqa Yáaweenaindi fee qímasee útaaqama ámaqasee adía nímaqee maría fadameenná faqa áfundi marí pauraqána faqa úiqaana máqaki kooqí ititára qámunna faqa máree munu quqáqau. 39 Booróosannai áuqira áidara faqa mina fukaa ásaana booróosannai áuqirana faqa mina qaindúsira sáqari qára faqa miná óosana óosana áinaina faqa nammári adiee maría difaanína faqa miná óosana faqa maree muna Mooseefa unnái quqáqau. 40 Dapu qamunna faqa dapu fáqa dapu óosana ámaaqa áuqirana faqa dapu kooqí qamunna faqa dapu sánda faqa apúpuka faqa aiqáma áinaina náaquqara úiqaana máaqa aundurái áuqee maría ainaináusa faqa máree múnu Mooseena uqafíqáqau. 41 Mináuqa múnu uqafíqaseeqa Áaroona náaquqara qámunna faqa narí faiqi námundi faqa náaquqara máqaki aináinidaqa afisífandínna qamunnana ámiqirana múnu Mooseena uqafíqáqau.

42 Isaree máqannaasa Yáaweefa Mooseena qímamúndee kai másee aiqáma áinaina áuqaqau. 43 Mooseefa aiqáma áinaina aiququ másee qáfamaseenoo Yáaweena írirana máu kai auqeeaafoo qímaseenoo ámiqi ámiqimma nímaqanau.

Copyright information for `BJR