Exodus 40

Úiqaana máqa usakásee Yáaweena útaaqama ámaqaaqa.

1Yáaweefa Mooseena qímaminoo qinau. 2Indaarúqaa qúqoonasaa indaarúqaa faasaana ínnee qiní náaquqara úiqaana máqa óosana arasée usakáaqa. 3Moodáanaki kíra bookisaki qísaukuqara taikasee 10 sánda úfa márina káaqa náaquqara óosiranaki quqásee ititée fandínnana firaa qamunna marasée minásaa ititaaqa. 4Áikufaqaa qáinda marée mini quqáseeqa minásaa aináinifándinna ainainausa minásaa míni quqáaqa. Qóoma sáqari faqa míni quqáseeqa miná qóomauqa miná ati mau quqáaqa. 5Quqáseeqa kóorannai áuqira áidara ámiqira áfundi marí pauraqána suqée máriana maréeqee maamíqoo óosiranaki moodáanaki kíra bóokisa ámummaqa quqáaqa. Quqáseeqa kooqíki ititée mária qamunnána maraséeqa kooqíki díriaqa.

6Qáidara firaana aandáù tatúfirana suqée mariana úiqaana máaqa kooqí amummaqa quqúsaki quqáaqa. 7Kafáa nammári difaani maréeqee máaqa kooqi dínni firaa qaidara dínni qámbaana quqásee nammári adía umbiqáaqa. 8Quqúsa dapu úiqaana maaqa aru fíqu fíqumma datímasee kooqíki qamunna díriaqa.

9Yáaweefa Mooseena kafáa qímaminoo qínau. Qiní náaquqara fadameena maraséenana úiqaana máaqa faqa minakínaa áiqama áinaina qiní útaaqama qímaqaranasaa rurúfá másainanoo náaquqanoo máriani. 10Miqímmáseenana firaa aidara aandáu tatúfirana suqée máriana faqa minásaa qáraa áinainauqasaa faqa mi fadameenná rurúfa másainanoo káaqa náaquqanoo máriani. 11Nammári dífaanisaa faqa miná óosanasaa faqa miqí kai iaqa.

12Miqí másee Áaroona narí faiqi námu faqa nífiqamaree úiqaana máqa kooqíki múnusáinaqa nammári áuqaaqa. 13Áuqamásaifana aanáiqikirausa qamunna marasée Áaroona afisú ámaqasee qiní útaaqama qímaqara fadaméena akiiqa ámoondunna rurúfammásáinanoo náaquqanoo máridanoo qiní aanáiqikira sáikaki máriani. 14Miná faiqi námu nífiqee míniseenana aanáiqikirausa qamunna afisú nímaqaa. 15Miqí máseenana Áaroona íanandee ínana miná faiqi námu faqa fadaméena níkiiqa ámoondúnna rurúfamma nímaqaa. Miqímmasáinaqa qiní aanáiqikira sáikaki máriaqa. Mi fadameenafa misá náaruara qiní aanáiqikira sáikaki márirana nímiannoo. 16Móoseefa aiqáma áinaina Yáaweefa qímamúndee kai másee áuqanau.

17Isipa máqa máaqa kíqari ánukari moo áukuana áiqaróofaqa moo áukuana indaarúqaa úqoona miná indaarúqaa fáasaanasaa Yáaweena náaquqara úiqaana máaqa usakáqau. 18Mooseefa qufaqá úiqaana máaqa átuna ámaaqauqa maqáki quqáseeqa máaqa atuna minakíaqa kurádamasee ausana auní rúmasee kooqíndanai átuna faqa rakíaqau. 19Rakiqaseeqa indaarúqaa qamunna qairí akuséeqa miná ámuaaqa qaaramoó miná rafaaqafuanífeera qairí ákiqau. Yáaweena ufamaú kaimbiqau.

20Mooseefa sánda ufa ákararira óoniqara bookísaki quqáseenoo miná aindúsira áikaqara anaanukí upeekáseenoo miná nífauara afu rafáaqafinau. 21Rafáaqafúseenoo mi bookisána maréeqeenoo úiqaana máqaki quqáseenoo qamunna qumáreenoo dirisoofanóo minásaa ititá ámaqanau. Yáaweena ufamáu kai miqínau.

22Mooseefa áiku faqaa teeboora maréeqeenoo náaquqara óosiranaki súani áfu dínni átaaqeenni North quqánau. 23Quqáseenoo mi teebooránasaa Yáaweena ámiraree qù féemuna quqáqoofanoo márinau. Yáaweena ufamáu kai finau.

24Miqí máseenoo Mooseefa qóoma saqari úiqaana máqaki súani afu dínni átaaqeenni (South) máaqa atuna mámmaaqai quqánau. Dínni táatatai áiku faqaa teeboora quqásee dínni táatatai qóoma sáqari quqánau. 25Yáaweefa qúmi máru úiqaana maqánaki qóoma sáqari quqásee qumbísoofanoo qanau. Yáaweefa qímamúndee kai inau. 26Miqí máseenoo Mooseefa kóorannai áuqira qáidara maréeqeenoo úiqaana máqa maamiqóo óosiranaki ititáqoo qámunnana aaqá quqánau. 27Quqáseenoo mifá ámiqira áfundimaruna andaana rírana quqáseenoo idáranau. Yáaweena úfamau kai finau. 28Mifá úiqaana máqa kooqíki qámunna dírinau.

29Diriséenoo tatúfirana suqée máru qaidarána úiqaana máqa kooqí amummaqa mádaanai quqánau. Quqáseenoo Mooseefa aandáù tatúfirana faqa sakuma fooqáa írana qaindi rírana faqa tatúfinau. Yáaweena ufamáu kai miqínau.

30Miqí máseenoo Mooseefa nammári dífaani madáanai qaidara mianní márufanoo úiqaana máqa kooqí murúnni márufanoo qámbaana quqánau. Quqáseenoo nammári minakí adía qumbiqánau. 31Mi nammarínaki Mooseefa faqa Áaroonafa narí faiqi námu faqa mi nammarínaki níku nísauku nammári úqi máriqau. 32Misa úiqaana máqaki kéeqararee qímasee fée tatúfira qáidara aaqá fíraree qímasee fée mi nammarínaki níku nísauku nammári uqusée fímariqau. Yáaweena ufamáu kai miqí máriqau.

33Miqímma taikáseeqa Mooseefa qufaqá úiqaana maqa faqa firaa qaidara faqa quqúsa dapu fíqu fíqumma rakíqaqau. Rakíqaseeqa dapu kooqíki faqa qámunna ititáqau. Miqímmásee misa Mooseena faqa aiqáma áinainirana taikáqau.

Qasuru fannóo Ánutuna úiqaana máqa ákiiqa ámummaqa márinau.

(Namba 9:15-23)

34Miqí másoofanoo qasuru fannoo úiqaana máqa dukúnimámbufanoo Yáaweena káaqa qára dároo dáraa írafa úiqaana máqaki qumbiqá finau. 35Miqímmáfunara Mooseefa sía úiqaana máqa kéeqanau.

36Qasuru fannoo uqéeree fukári kai Isaraee máqannaasa nárì úiqaana máqa faqa Yáaweena úiqaana máqa faqa aiqáma áinaina faqa tatu máree fiqau. 37Qasuru fannóo káqi miqoo márufaqa misá faqa káqi miqóo máriqau. 38Isaraee máqannaasa fída márufanoo qasuru fannoo aiqáma fáasaana Yáaweena úiqaana máqa ákiiaaqa márinau. Aiqáma eendaki idáuruara foorá miná ákiiaaqa márufaqa qáfee máriqau. Miqínoo márufaqa fífiiufaqa Yáaweefa nímiraree qu máqa máaqanaki óonu ráqau.

New Testament

Copyright information for `BJR