Exodus 5

Mooseesa Áaroonasa Isipa máqannaasa kínna óonu qáfaqau.

1Innaaru qímasoofaqa Mooseesa Áaroonasa Fáraoo funnái óonuree qímamiqa qiqau. Óo Fáraoo, Yáaweefa maasá Isaraee máqannaa Ánutufa aníara maaqí qinoo. Anée qiní faiqi námu idukúsainaqa aadána máqa máaqaki óonureeqa oomáqa mándee qiníara innaaru qídaqa qimooqiaqee qinoo. 2Fáraoofa miqandá ufa iriséenoo qinau. Yáaweefa yáfee. Nánaree mina ufara eedóo qímasee Isaraee máqannaasa niiqáana fifáree. Sía qinée Yáaweenara íridaqa. Mínara qinee sía uqanna Isaraee máqannaasa niiqaanáura.

3Mooseesa Áaroonása kafáa Fáraoona qímamiqa qiqau. Maasá Heeburu máqannaasa Ánutufa maasá qífusaa koorooinoo. Anee maasára eedóo qínaqa qaaramoó fáasaana aadána máqa máaqaki óonuree Yáaweena maasá Ánutuna tatúfirana suqá ámianaura. Maasa sía miqíananóo mifa firaa manda auriranannái fee firaa dáriranannai fee maasá aiqáma dáruannoo. 4Fáraoofa iriséenoo Mooseesa Áaroonasa qímanniminoo qinau, ínneeqara nánaree faiqí ánaasee qiní aináini máriasa nífiqee fuafaqee minnísee fídee. Sáina kafáa anirandée aináiniranaki fuaqa. 5Ínnee Isaraee máqannaasa maqee moómoo kámmafi qiní aináinirana minnísararee fée qídafee.

6Mi faasaaná kai Fáraoofa Isipa máqannaa karabusasaa rakísi márusa faqa Isaraee máqannaa niqoónausasaa rakísi márusa faqa qímanninoo qinau. 7Ínnee maqee sía kafáa uíta asaki ateekásee Isaraee máqannaa nímifaqa minánnoo máaqa usakee maría simmeerána áuquaqa. Sái faqá nári kai máraaqa. 8Maraseéqa sía óorudupi masee áuquaqa. Aiqáma kári áuqi máriana amana kái áuquaqa. Misá kudikí maríasa máridaqa qiníara maasá idukúsáinaqa maasa óonuree Yáaweena nárì Ánutuna tatúfirana suqá ámianee qídaqa. 9Miqí qídaqifaqa ínnee firaa kadaapi nímifaqa misa óonauqee anauqee ídaqa Mooseesa Áaroonasa qínna únnufausa sía íriaqa.

10Miqí qufaqa karabúsasaa rakísi márusa faqa Isaraee máqannaasa nárì niqoónausasaa rakísi marusa óonuree maaqí qímasee Isaraee máqannaasa qímannimiqau. Fáraoofa maasára sía uíta asaki rarakú míni nímiaqee qídanoo. 11Mifa ínniara ínneeqá kai minakínai randásee máree míniseeqa óoqai áuqiu simmeerana amana kái áuquaqee qinoo. 12Miqí qufaqa misa Isipa máqa máaqaki aiqámatinai nídaqa uíta asaki randásee suqímáriqau. 13Isipa máqannaa karabúsasaa rakísi márusa fuki faakí qídaqa qiqau. Ínnee óoqai maasá uíta asaki nímiafana áuqeeundee másee miná amana kai simméera áuquaqa. 14Miqí qímaseeqa karabúsasaa rakísi maru Isipa maqannaa fasiqáusa Isaraee máqannaasa nárì niqoónausasaa rakísiaqeéra mara quqáqoosa naruséeqa qiqau. Ínnee nánaree simméera óoqai áuqiuna amana sía áuqídee.

15Qufaqa Isaaraee máqannaa rakísirausa Fáraoo funnaí óonuree qímamiqa qiqau. Oo úriqararafa. Anee náqaa fee ifanée maasá maaqímma qímaqaidanee. 16Misá sía uíta asaki nimiséeqa káqi maasára simméera áuquaqee qídaqa. Miná sáara maasá dária. Sía maasá óosanasáa fau. Ínneeqa óosanasaa fífau miqíafanoo.

17Fáraoofa iriséenoo qímanniminau. Ínnee kudikí maríasa aináiniranara níkóoqaifaqa qiníara maasá idukúqísainaqa Yáaweena tatúfirana súqamianee qímáriafanoo. 18Dóo káqi káqi anirandée ínneeqa aináinai fuaqa. Misá sía ínni uíta asaki nímifaranoo. Ínneeqá kai uíta asaki maree míniseeqa óoqai íùndée kai moómoo simmeera áuquaqa. Dóo fuaqa.

19Isaraee máqannaasa nári niqoónausasaa rakísi marúsa Fáraoofa óoqai áuqiundee kai másee áuquaqee qunára irisée doo maasa ummaaraki máridee qiqau. 20Fáraoo funnaindari quqásee ánidaqa Mooseesa Áaroonasa misá nífeesidaqa márufaqa ani paqúriqau. 21Ani paqúrimmasee qímannimiqa qiqau. Yáaweefa ínniqara óosana qáfamáseenoo miná ákiiqara nímiannoo. Ínneeqara óosana arasaafanóo minásaara Fáraoofa narí rakísirausa faqa maasá dáruannoo. Ínneeqará Fáraoofa maasá dáruanifeera andaana rúmasaafanóo dáruannoo.

Mooseefa aundurá ummaara roofanóo Ánutu funnai anunú rinau.

22Mooseefa misá úfa iriséenoo quándakufánoo óonureenoo Yáaweenara innaaru qinau. Óo Yáawee, anée náqaafee ifanée Isaraee máqannaa máà mandáikána mánnimaqaidanee. Anée náqi fee ifanée qiní maí diiqéenee. 23Qinée Fáraoo funnai óonureeqa ani ufa qímamiafanna qooqari Fáraoofa Isaraee máqannaasa mandáika kai mánnímaqaidanoo. Anée sía uqanna dadaaqíra kári máriananoo.

Copyright information for `BJR