Exodus 9

Isipa máqannaasa fírimaru aandausá kúqiqau.

Ánutufa kaifáa Mooseena qímaminau. Anée Fáraoo finnaí óonureenána maaqí qímaseenana qímamia. Oo Fáraoo, Yáaweefa Heeburu máqannaa Ánutufa aníara maaqí qídanoo. Anée qiní qíku qísauku idukúsainaqa qiníara innaaru qímaseeqa qimooqiaqee qinoo. Anée kaifáa qáòo qímasee Isaraee máqannaasa sía idukínaqa, qinée mandá áuriranara qíananoo aní aandáù qóosauqa faqa doonkíuqa faqa kaméerauqa faqa burimakáuqa faqa sipsípauqa faqa mimmíuqa faqa mi aurirána nímianauranoo. Qinée aandáù raináanauranoo Isipa máqannaa aadáù aurírana nímianauránoo. Isaraee máqannaasaindi sía aurírana nímianaqa sía misáindi kúquannoo.

Qinée Yáaweesa dúna fáasaana miqíanauranoo fee qídaqa. Iáqoo kanánaana Yáaweefa narí qundée inau. Isipa máqannaasa aandáù aiqáma kúqu taikáqau. Isaraee máqanaasa aandáù sía moó kúqinau. Káqi maríqau. Fáraoofa minára iriséenoo narí máqannaasa niqiqoofaqa óonu qáfamásee anirée Fáraoona qímamiqau. Isaraee máqannaasa aandáù sía uqanna moodáafa kúqinoo. Miqí qufanoo Faraoofa kaukaata qímasee sía Isaraee máqannaasa idukúsoofaqa fiqau.

Isipa máqannaasa nifaaqaí abeemáuqa kambíqanau.

Yáaweefa kafáa Mooseena faqa Áaroona faqa qímanniminoo qinau. Moosee anée danda qoodaa ásaukunnoo afaqámaree Fáraoona óorinni óonuree innaarúnai áqua. Miqímmásáinanoo mi dandáfa kookoomara foóra aiqáma Isipa máqa máaqakinai áqufinoo aandáùqa faqa faiqí ánaasee faqa nibeemá náruani. Naru fínoo radíqinoo namúana firaafá kambíqaani.

10 Mooseefa faqa Áaroonafa faqa Yáaweena ufa iriséeqa dandá afaqámaree Fáraoo funnái fiqau. Faraoona óorinni óonu kikíqa máfufaqa Mooseefa mi dandána innaarúnai áqinau. Áqusoofanoo maqásaa áqufinoo mi dandáfa aandáuqa faqa faiqí ánaasee faqa abeemá níminau. Nimisoofanóo mifa radíqinoo namúana firaafa nárí márinau. 11 Isipa máqannaa afunee fásiqauqa sía amana Mooseena áfusaa ánirana amanaíkiqau. Misá faqa aiqáma Isipa máqannaa undée kai ínoo abeemá nárí márunara sía Mooseefa máruqoo ániqau. 12 Miqufanóo Yáaweefa qufanóo Fáraoofa kaukaata qímasee Yáaweefa qundee ínoo sía Mooseesa Áaroonasa ufa írinau.

Firaa aaku faqa pupúsamu faqa áqufinau.

13 Yáaweefa miná qáfamaseenoo kafáa Mooseena qímaminoo qinau. Ínneeqara dúna kanánaana fíndifíqa óonureeqa Fáraoona maaqí qímasee qímamiaqa. Heeburu máqannaa maasá Ánutufa Yáaweefa aníara maaqí qídanoo. Anée qiní faiqí ánaasee idukúsainaqa misa qiní qimooqíaqee qídanoo. 14 Anée sía miqínaqa mi karí qinée sía aní aináiniranasaa rakísirausa faqa aní máqannaasa faqa kaí náruanauranoo, aní faqa aupúrarana ámianauranoo. Miqíanana anee írinnaranoo, sía moó fannoo qiní daanna rarafa aiqáma máqa máaqaki máridanoo. 15 Qinée aní faqa aní máqannaasa faqa mandá áuriranannai amaná náru taikáunaiqini. 16 Qinee ínni qeeqá afeeka uqannífiqarara ínni minní nísaunaqa káqi márianara qini áfeeka dúqu aiqáma máqa máaqaki dáraaniannoo. 17 Fáraoo, anée káqi kai ramoo rámaa ídana sía qiní faiqí ánaasee idukúsáanaqa fídammia. 18 Dúna súani áfu máà maqee márina amanasaa ururáinaqa qinee qíananoo aaku firaafá pupú sámu námufaqa áqufuannoo. Miqíra púpu sámu Isipa máqannaasa óoqai faqa maqee máriaqooqari faqa sía qáfoo áinainafa maqee kái kambíqáannoo. 19 Dóo aneenná máqannaasa qímanniminaqa nárìqa aandáùqa faqa aiqáma áinaina mádaanai mári ainaináusa faqa maréeqee máaqaki quqáaqa. 20 Mádaanai márinna áandausasáa faqa faiqí ánaaseesaa faqa firaa pupusamu áqufinoo kuqá náruannoo. 21 Akaqáusa Yáaweena ufa irisée níkóoqoosa misá nárìqa aináinira fásiqauqa faqa náriqa aandáuqa faqa káqi mádaanai quqáqoofaqa máriqau.

22 Iáqóofanoo Yáaweefa Mooseena qímaminoo qinau. Aneenná ásauku innaarúnai uqéeraa. Uqéerasainanoo pupú samu aiqáma Isipa máqa máaqakinaa fásiqa ánaaseesáa faqa aandáuqasaa faqa aiqáma áfuqakinaa náranauqasaa faqa áqufuani. 23 Miqí qufanoo Mooseefa narí sáunù innaarúnai uqéerasoofanoo Yáaweefa innaarúnai qírana fáqa aakuasáa faqa pupúsamu faqa quqásoofanoo maqásaa qúminau. 24 Yáaweefa aaku faqa pupú samu faqa quqáseenoo aakuasáara qufanóo aiqáma átinai úqi márinau. Óoqai Isipa máqannaasa miqírana sía qáfaqau. Mi karí kai firaafá uqanna kambiqoofaqa qáfaqau. 25 Pupú samu fánnoo aiqáma Isipa máqannaa maqúsai quqáqoo áinainausa faqa aiqáma faiqí ánaasee faqa aandáuqa faqa nárínau. Mifá aiqáma áfuqakinaa nárana faqa saqári qaqama née márunauqa faqa itairí aqinau. 26 Kooseena máqa máaqaki Isaraee máqanaasa máruqoo kái pupú samu sía áqufinoo nárínau.

27 Fáraoofa miná qáfamaseenoo Mooseena faqa Áaroona faqa náaramáseenoo qímanniminau. Maqee qinée áaqamámma séeqa. Yáaweefa andeeqárafa máridanoo. Qinée faqa qeeqá máqannaasa faqa áaqee márúnausa máridaqa. 28 Ínneeqara óonuree Yáaweenara innaaru qiaqa. Maasa innaarúnai qíranara faqa pupú sámuara faqa qíkoo uqanna qéenoo. Qinée ínni idukúsaanaqa fifáranoo fee qímasee qíma afeekaikídaqa. Ínnee sía maaqóo kísaaqasaa márifaranoo.

29 Miqí qufanoo Mooseefa qímaminau. Qinée ani maqúsa naambeéqai óonureeqa qísauku Yáawee finnai uqéerasee innaaru qíananoo innaarúnai qírafa faqa pupú samu faqa taikáannoo. Miqímmásaanana anée maa maqa maaqánara Yáaweenaindi fee qímasee írinnaranoo. 30 Qinée íridaqa anée faqa aní aináiniranasaa rakísirausa faqa sía Yáaweena maasá Ánutunara rufiee máriafanoo.

31 Mi karí Isipa maqannaasa reepaa fáqa ráisa fooqáa íra áinaina baari fáqa mandáikinau. Baarí fánnoo akuqámáfufanoo reepaa qaqama írarara deedaqa máfufanoo pupú sámu fánnoo áqufinoo mandáika másanau. 32 Sía moodáa uíta fánnoo mandáikinau. Mifa ínaaqíanna úmmaqirafa máridanoo maqee úri marúnara sía mifá mandáikinau.

33 Mooseefa Fáraoona máaqakiqari ráudeenoo naambeéqai qumuréennoo ásauku innaarúnai uqéerasee Yáaweenara innaaru qinau. Innaaru qufanóo innaarúnai qírafa faqa pupú sámu faqa aaku fáqa aiqáma taikánau. 34 Taikáfufanoo Fáraoofa qáfamaseenoo kafáa áaqanau. Mifá faqa narí aináiniranasaa rakísi márusa faqa káqi kai kaukaataqiqá áni maríqau. 35 Óoqai Yáaweefa Mooseena qímàmúndee kai ínoo Fáraoofa kaukaata qímaseenoo sía Isaraee máqannaasa idukúsoofaqá fiqau.

Copyright information for `BJR