Galatians 1

Qinée Pauroosa Yísufa diqiqoo fásiqausa máridaqa maa-pasána ákara rúmannimaqaidaqa. Sía faiqí faiqi moó fannoo qiní maréeqee Yísufa niqiqoo saikánaki quqáqoosa máridaqa, sía Ánutufa moo fásiqara qufanoo qiní mára quqánau. Ánutuna ásauku mundírafa Yísufa faqa narí ákoona Ánutuna faqa Yísuna kúqiranakinaana uqéera quqóofa miqandákai qiní rafáaqafusee mara quqáqoosa máridaqa maa-saikánara qídaqa. Maaqóo mária níkaqaafasaasa dadaaqída ínni Karatia máqannaasa nímandaidaqa, Karatia máqa maaqaki Yísuna ufara suqímariasa ínni nímandaidaqa.

Maasá aiqámausa qíkoofa Ánutufa faqa miná ásauku mundírafa Yísufa maasá Karaambáiqa faqa Ánutuna idaaqíra ámiqi ámiqirana faqa naundurá asooárana faqa ínni nímiani.

Maasá qíkoofa Ánutufa qufanoo ásauku mundirafa iriséenoo eedóo qímaseenoo mi-maú finau maqee kámuqoo márunna mandáinaina afeekaikiranakinaana maasá idukúaqeera naráfaaqa maasá mandáinaina ákiaqara aunírira saqárisaa paasóosamásee quqánau. Ánutuna aréenarana faqa amooqírufa faqa náaru náaru ámimariani, dóo miqíani.

Sía moo ámiqira fasaasa ufa máridanoo moodáa kai.

Óo Karatia máqannaasa qinée ínni óosanara tautúmmiqa. Ínnee dauní aaqee uqanna Ánutuna minnísaafaqa qinée minára iriséeqa tautíqa, mifá narásauku mundírana idaaqírana káqi nímiranannai ínni náarama quqásoofaqa ínnee aaqee uqanná quqásee sandéeqa moo ámiqira fasaasa ufara foora randóofaqa iriséeqa tautíqa. Sía moo ámiqira fasaasa ufa máridanoo moodáa kai máridanoo, faiqí ánaasee akaqáusa ásauku mundírana ámiqira fasaasa ufa qumáree maréeqee káqinni ubeekéeqa minánnai fúrufarirana ínni nímimariafanoo.

Indaarú maasá Yísuna ámiqira fasaasa ufa ínni qímannimiafannana dóo maqee maasée moó fannoo fee innaarúnaindaraa qangiroo moó fannoo fee moo fúka áaqee maría fasaasa ufana qímannimufaqee Ánutuna áqurarara ufa misásaa máriannoo. Maasá óoqai qímannimiafannanasaa kafáa maqee qímannimidaqa, moó fannnoo maasá óoqai qímannimiafannana moosáa qímasee qímanniminafa mifá Ánutuna áqurarara ufa ámeemaanai máriannoo.

10 Faiqí nífusaa qeeqá qimoofée qída fee nasurída fee miqí qídaqee óo sía uqanna qinée miqíanaura. Ánutuna kúqaa eedóo qíra ufara qinée randáidaqa. Qinée faiqí nífusaa fífau nasurídaqa miqí qídafau sía ásauku mundírana aináiniranaki márini maqee maqee qiní dárirara kai qiafaqa moo áinainiranaki funáiqini.

Pauroofa Yísufa niqiqoo fasiqausaikammafi óosana ároo ufafa.

11 Óo qiní qíkaqaafasaauqa qinée maa-ainainnára qímannimianaura. Qinée qímannimíanna fasaasa ufana sía faiqí áuquqoofa máridanoo. 12 Sía faiqíkinaana qinée máreeqa, sía moó fannoo qímaqimifaqa íriqa ásauku mundírafa Yísufa narí uqanna kooroomámbi qímaqiminau.

13 Qinée óoqai kumaaráa máriafana Yuda máqannaa amaana úfa ámiqimandee firaaqóo qímariqiafana. Qinée Yuda máqannaasa amaana úfara qeeqá qikiaqauqa úrinnaaqaramasee mi-ainainná qiqíafana. Qinée misá úrinnaaarammásee firaaqóo maasá qikeekú qikaakú óosana máraqiafana. Qinée minakí fídaqa Ánutuna ufara faqa Yísuna ufara faqa suqímarusa sía nífauaqiafana afeekaikámándee misá mandáikamma nímaqaqiafana. Qinée minára ámiqimandee taikáanee qídaqa mandaikamma nímaqaqiafana.

15 Ánutufa sía qiní mandóosanara írinoo narí idaaqíra ámiqi ámiqira máriranaki márinoo qiní qínoofa sía qiní máqoo kamuqoo narí aináinira sáikaki márianifeera óoqai indaarú qiní dáarama mi-saikánaki quqáqisoofaqa kísaaqasaa sía íriqiafana, mána mána kai qiqíafana. 16 Ánutufa qiníara narí ámiqira fasaasa ufa ánaamuru qímannimiannee qímaseenoo Damasakusa máqusai fímariafanna aanásaa narí ámaaku qiní uqaqífiqanau. Uqaqífiqasoofaqa sía moo fásiqunnai óonureeqa Yísuna áufakiana íriqia, narí ámaaku uqaqífiqaannee qímaseenoo sía Yísufa niqiqoo fasiqusakina óoqai márusakina Yeerusareenni sía óoruree iráafanaqa qímaqimiqau. Sía qinée miqí qiafana qinée andeeqásee quándaki Arabia máqa maaqai óonu marikíqa óonu randéeqa aniréeqa kafáa Damasakusa máqusai fiqíafana. 18 Yísufa indaarú kooroommáqooqooqari qaaramoo áukuana áiqarammafufaqa Yeerusaree máqusai óoruree Peetooroo funnái miná qáfamasee áqoondikianáuree qímaseeqa miná faqa qaara amaana máraqiafana. 19 Mi-kamúqoo sía Yísufa niqiqoo fásiqausa níndafaqiafana misakíqari Yísuna ákaqa Yameesana miná kai qáfaqiafana.

20 Qinée maa-akaránakinaa ufa ánoona kai qídaqa sía únna ufa qídaqa. Faiqí sía Yísuna fasáasa ufa qímaqimiqau, Yísufa narí kai qímaqiminau. Ánutuna áfusaa máridaqa ánoona ufa kai qídaqa.

21 Qinée Yeerusareenni qaara amaana maraséeqa Siria máqa maaqaki faqa Sirisia máqa maaqaki faqa óonu kísaaqasaa máriqiafana. 22 Mi-aukuanna mi-kamúqoo Yudeea máqa maaqaki máridaqa Yísuna ufara suqímarusa sía qiní qíqafaqau. 23 Akaqáusa qiníara qímannimunara írimarusá kai máriqau. Misá maaqímandee qiníara qímannimiqau. Maasá mandáikamma qimiqéemaru fasiqafa dóo maqee quándaki narí naru taikée marú ufana qímannimidanoo. 24 Misá mi-ufána iriséeqa Ánutufinnai qiníara dúfi dúfi qímariqau.

Copyright information for `BJR