Galatians 4

(Óoqai Pauroofa máru aukuana aináina faqaasa faqa pisinísa faqaasa faqa munnimmara aináinimariasa faqa kudiuqá faqa máriqau. Aináina faqaasa faqa pisinísa faqaasa faqa nári aináinirana moómoo márifaqa sía amanaikífaqa akaqá fasiqauqa nífiqee nári aináiniranaki quqásee miná ákiaqara munnimma nímimariqau. Moo óosana faqa misáki márinau. Kudi fasiqauqa akaqáusa káaqa kudikí maríasa náararée márifaqa márianara aináina faqáasiannai óonuree iráifanoo aináina faqaafa aináina síaina karabúsara foora ira saikiranaki quqáseenoo sía feefaurú áminau. Káqi nárana faqa faiqárana faqa miná aináinirana ákiaqara amiséenoo feefaurú uqanna sía áminau. Misá minára karabúsa saika ímarusee qímariqau. Mi-karabusa saikánaki máru fasiqana áti miná áinaina kafáa mi-fasiqána idukíraree qímaseenoo munnimma firaatiá áqusee idukúmaree fímariqau.)

Mi-ufanásaa ootúpammásee maa-ufána aináinafaqaafa faqa narí ámaakuara faqa qímannimianaura. Faiqí moó fannoo kuqufínanoo miná faiqi miná aiqáma ainaina máraanoo. Miná ákoofa káqi máru kamuqoo miná faiqi sía innooqánoo márufanoo káqi narí ákoona aináinira faiqiara foora máridanoo. Narí ákoofa narí ámaakuara narí aináinira faiqiara foora márifanoo saiká úmmaqirana dadaaqí marínara nárana aandáu̱ ámidanoo. Narí ákoona aiqáma áinaina máraanínafa máridanoo káqi fífau aináinira faiqiara foora narí ákoona faqa máridanoo. Miná faiqi kumaaráa márifaqa miná ákoona aináinira faiqiuqa mi-faiqína faqa miná ákoona aináina faqa rakísiqa fífi ifaqa miná ákoofa dóo innooqée foo qímasaifanoo mi-faiqífa aináinasaa rakísidanoo. Miqí kai íqa maasá sía innooqéera fooqáa íra kámuqoo maasá maa-maqa maaqánasaaqaraa írira sándufa ámeemaanai máriqiafana. Ánutufa maa-aukuanára andeeqára aukuanee qímaseenoo narí ámaaku aqiqanau. Aqiqámaseenoo maasá Mooseena sándufa ámeemaanai miná rumbáranaki máriusa minakíqari feefaurú áquseenoo idukúsoofaqa fíndifiqa Ánutuna ámaaku kámambi máriaqeera Yísufa maa-maqa maaqánasaaqaraa ánaasee áranandaki rúmafufanoo maqasoofanoo Mooseena sándufa ámeemaanai maa-maqánasaa kambíqafi marínau.

Ánutufa ínniara miná ámaaku fee qiaqéera qímaseenoo narí ámaaku maraquna ínni nímuqusaki aqiqoofanoo kéeqafi marídanoo, mi-maraqunáfa ínni dadaaqifaqa ínnee faiqi ánaaqiara fooqáana Ánutunara qiní qíkoo fee qímariafanoo. Miqínara ínnee sía maqee fífau aináinira faiqi márifaranoo, ínnee faiqí faqa ánaasee faqa kúqaa Ánutuna faiqi áraamuqmaakaikámmafi maríafanoo. Dóo márifanoo narí ámaaku ámianinnana innaarúnai mári saqamana máreefandínausa máriafanoo. Ánutufa narí kai qifaqa ínnee miná ámaaku áraamuqmaaka miná innaarúnai máreefandínausa máriafanoo.

Pauroofa Karatia máqannaasara káaqammirímarinau.

Óoqai ínnee Karatia máqa maaqaki márusa sía Ánutuna aaqá óonuree ámiqimasee írimariqau áfaanna ainaina sía Ánutunaki máru ainaina ínnee miná rumbáranaki máriusa máriqau. Dóo maqee uqanná Ánutunara írimariafanoo, Ánutufa faqa dóo ínniara faqa íridanoo. Dóo nánaree ínnee miqóoqari kafáa quándaki kafáa mandá umooqukira kúquaqaaira maqásaa írirana innai faqa ínniqa náuraa mandá sándufa innái faqa quandée fee. Ínnee Ánutuna faiqikíranakiqari quándaki fífau maqásaa írirana rumbáranaki fídee miqídaqee. Sáina Yísunasaa rusírafa kai máriaqaana. 10 Ínnee Karatia máqannaasa káaqa Yuda máqannaasa óosana óosana sabáta fáasaanara rímariasa máriafanoo áaqaida miqí maríafanoo. Káaqa ínni moo qúqoonara náaquqaifaqa Ánutunara íri maría quqooná fée qímasaida minára kai írimariasa máriafanoo. Áukuanara faqa qámbaana sáqannara faqa káaqa minára rídaqa minánnai innaarúna áana máraanauree qídaqa áaqee maríasa máriafanoo. 11 Qinée Pauroosa ínniki márunausa ínniara rufíaidaqa. Ínniki aináiniafanafa fífaunni maqásaa rairaa ídanoommi foo qídaqa.

12 Óo qiní qíkaqaafasaa máriasa ínniara afeekaikámandee qímannimidaqa. Qinée Pauroosa Yuda máqannaasa máriaafánausa máridaqa misá óosana faqa Mooseena sándufa faqa minnísee ánaamuru naanna rámasee Yísuna saqárikámmasee miná ámeemaanai máridaqa. Ínnee faqa miqí kai íqa qiní daanna réeqa Mooseena faqa Yuda máqannaasa faqa sándufa minnísee Yísuna kai saqárikiaqa. 13 Qinée aaqee indaarú ámiqira fasaasa ufa ínni qímannimiafanna oosannara írimariafanoo, qinée aurída máriafannanara ínni maqa máaqaki kísaaqasaa máridaqa qímannimiqiafana.

14 Qinée aurúafanaqa qíqafee sía qiníara níkooqoofaqa qiní mandáikamáqisasee minníqisaqau. Qiní aurírafa firaaqóo ínni nárufaqa minníqisaaneerusia sía minníqísaqau. Idaaqa kái máqisée marúfaqa máriqiafana. Ínnee qiníara Ánutuna qangiroorá foora mári ifoo qímasee qiní qumáraqau. Ínnee ásauku mundírana Yísuna qumároondeemmíqa qiní qumárasee ámiqi ámiqimmaqisaqau. 15 Mi-fasannái ínnee firaaqóo qiníara asasímariqau, maqee náqi fee ifaqée sía miqídee. Ínni óoqai máriranara maaqí qídaqa ínnee firaaqóo qiníara qimudáoo qímasee qiní dadaaqianée qímasee ínneeqa firaa uriqarara ainaina káqi qímuqini ínneeqa nífu faqa pitaqímeeqee káqi qiní qímuqini. 16 Dóo maqee Yísuna ánoona ufa qímannimunnanannái fee qiní namuqáa kámambi máridee. Óo sía miqífanoo andeeqáannoo.

17 Akaqá fasiqa anaasee áaqee maríasa ínni faqa ani máridaqa moo únna ufa qímannimi maríasa ínniara únna qímasee firaaqóo rídaqa ámiqi ámiqidaqa ueeqáidaqa sía ámiqira íriranarau miqídaqau, misá ínni mara máreeqa qiní Pauroosasáa qaraana rakée iaqeera miqídaqa, misá írirafa ínnee iannai ubeekanóo márifaqa ínni íriranara nári iannái ubeekámasee misá ufa íriaqeera miqídaqa. 18 Akaqáusa ínni rarisámaseeqa ínneeqa írirana misásaa atooqára óosanafa qaaraikámminoo máridanoo. Moo mándoosana moo ámiqira oosana maaqímminoo máridanoo. Misá ínni rarisámasee misá mandá óosana máraaqee qíra óosanafa mandóosana máridanoo. Misá ínni rarisámasee ámiqira oosana máraaqee qíra óosanafa ámiqira oosanafa máridanoo. Óoqai qinée Pauroosa ínni faqa máriafanaqa ínni irirafa qinísaa atooqáfi ínnee qiníara rídaqa máriusa máriafanoo maqee níanai márunaqa ínnee qiníara minnísee únna ufa qímariasara kai misára kai rímariafanoo. 19 Qiní faiqi námu qiní qímuqusimaria faiqi namúsa máriafanoo. Ánaasee moó fannoo faiqi ánaaqi máqaidanoo aupúraidanoo máqaidanoo. Qinée miqíkaimmásee ámiqira fásaasa ufa ínni qímannimisee ásauku mundírana andeeqára óosana márirana nírana ínniki kambíqaanifeera ínniara aupúraidaqa qímannimidaqa.

20 Óo qinée maqee níanai máridaqa ínni faqa máriaqaana níanai máridaqa ínniara ámiqira irirana íriaqaana káaqa ínniara daunduráki umaara ráidanoo.

Pauroofa Abarahaamána ánaaqaqara kíkiqusúfa.

21 Ínnee indaarú Mooseena sándufakiqari idukúfi Yísuna ufasaa atooqáfi máriaasa maqee Mooseena sándufa ummaara ámeemaanai múnari mínari kafáa kéeqararee qímariasa máriafanoo. Ínnee sía fee mi-sandufána íridaqee minaki kaifáa kéeqaidee.

22 Mifá maaqí qídanoo, Abarahaamáfa qaara faiqi máqoofa máridanoo, moo índaaruqáa faiqi anoofa aináinira ánaasee rumbárafa márinau, moo fáiqi ínaaqiannaana ánoofa idukíra ánaasee Abarahaamána ánaaqa uqanna márinau. 23 Abarahaamana ámaaku Isamaeerafa rumbára ánaasee faiqi márinau, faiqí ánaasee ímarúndee ínoo kai faiqi máqanau. Idukíra ánaasee Saráqana faiqi áadumasaa kambíqanau Ánutufa qíma afeekaikámasoofanoo Saráqafa qáafa anaasee asooqá máridanoo Abarahaamána faiqi máqanau.

24 Mi-anaasee qandá qaara irirana kíkiqammusíqa máridaqa. Moó Qakaarafa Sinái áaqanasaa kambíqara anaasee márifa márifaqa miná faiqi námu Mooseena sándufa ámeemaanai rumbáranaki kambíqarausa máridaqa. 25 Qakaarafa Arabia máqa maaqaki mári aaqanna kíkiqammusinoo máridanoo maqee mária Yeerusaree máqusa kíkiqa faqa úsinoo máridanoo mi-maqusána faqa mi-maqusánaki mária fasiqa anaaseesa faqa rumbáranaki Mooseena sándufa nímaarusira rumbáranaki máridaqa. 26 Abarahaamána moo ánaasee Saráqafa sía rumbára ainainira anaasee, sía Mooseena sándufa rumbáranaki márifa idukíra ánaasee márifa maasá Yísunasaa rúsimariasa nínoofa uqanna máridanoo. Mifá innaarúnai fúka Yeerusaree máqusara foora Yísunasaa rúsimariasa firaa maqusa misá nínoofa uqanna máridanoo.

27 Óoqeenáa ákarakinaa ídi fannoo Saráqanara maaqí qídanoo,

Ínnee faiqi síai anaaseesa asasíaqa, faiqi síai anaaseeuqa sía aupúrarana fáaqarimariasa, dóo maqee ínnee asasíranara kai fáaqaruaqa. Afaaqi minnísai asooqa adeedaana, nifaaqi faqaasa úraaqaramásee moómoo faiqi máqaannoo.
(Abarahaamafa Isamaeerana ánoona mifínnai óori ukeekéenoo narí ánaaqa uqanna Saráqarana máfi ámeesuqusoofanoo máriufanoo mifá faqa asooqánamuki Abarahaamána faiqi uqanna Isakeena máqanau. Minára faiqí minnísainna ánaaseefa faiqi moómoo máqeenoora foora firaaqóo asasiannoo fee qinau.)

28 Qinée Pauroosa minára maaqí qídaqa. Saráqana ámaaku Isakeefa Ánutuna qíma afeekaikíra ufasaa kambíqanoo márinau, dóo maqee ínnee qiní qíkaqaafasaauqa miqí kaimmásee Ánutuna ufasaa miná faiqi námu kámmambiqa máriafanoo. 29 Mi-aukuanná Isakeena áukuana faiqí ánaasee undée mándoofanoo kambíqoofa Isamaeerafa quándakinoo Ánutuna maraqunannái kambíqoona Isakeena mandáikammamaqánau, dóo maqee faqa mi-oosanáfa miqíkaimminoo máridanoo. Mooseena sándufa ameemaanai máriasa ínni aaná ititáidaqa. 30 Óoqeenáa tamummáqara ákara fannoo minára maaqí qídanoo, Rumbára ánaasee faqa narí faiqi faqa aqiqámasaina moosáa fífuani. Rumbára ánaasee ámaaku Isamaeerafa idukíra ánaasee ámaaku Isakeena faqa sía miná ákoona aináina moodáanaki máraani.

31 Dóo minára qiní qíkaqaafasaauqa ínniqasaimbaqa sía rumbára anaasee faiqi námu máridaqa idukíra ánaasee faiqi námu máridaqa, Yísuna idukíranaki máridaqa.

Copyright information for `BJR