Galatians 5

Pauroofa idukíranaki máriasara ámiqimasee rakísi qumaráaqee qufa.

Ásauku mundírafa Mooseena sándufakinaana idukúeeqee narí idukíranaki quqáqaifaqa maasá minakí máridaqa, dóo minára iriséeqa idukíra fásiqara foora dóo minakí mapukúsee máridaqa sía kafáa sándufa óosana óosana rumbáranaki fíraree qíaqa.

Ínnee maaná íriaqa qinée Pauroosa qímannimidaqa, indaarú ínnee ásauku mundírana saqárikiqau. Kafáa maqee moó fannoo ínniara Yuda máqannaasa fáinanduquséeqa Yísunasaa ookáamambiqa innaarúnai fuaqée qínaqa ínnee miqífanoo Yísufa sía amana ínni dadaaqíannoo fífau áinainara foora mifá máridanoo. Qinée kafáa qímannimianaura afeekaikámmasee qímannimianaura moó fannoo ínniara Yuda máqannaasa fáinánduquaqee qínaqa fáinánduquséeqa Mooseena sándufa ámeemaanai doo minakí óonuraafanoo sía Yísuna námufaqa fuaqa mi-maú kai fuaqa. Mooseena sándufannai Ánutuna innarúnai amanaikíranaki fíraree qímariasa dóo Yísunasaaqaraana dóo ínneeqa ateekáseeqa máriafanoo Ánutuna káqi áfaarinoo nímiranasaaqaraana áqoosai máriafanoo. Maasá sía miqídaqa sía sándufasaa ookáaidaqa, maasá írirafa Ánutunasaa kai mundíqa máridaqa mífa narí kai maasá maréeqeenoo narí innaarúna amanaikíranaki quqáqiseenoo fee qímasee írirana minásaa kai rusísee máridaqa. Ínniqasaimbaqa Yísuna saqáriki márunanoo Ánutuna maraquna fannoo minásaaqari maasá dadaaqifaqa maasá Ánutuna innaarúnai kéeqáannanara asasamándee áfeesidaqa. Maasá ásauku mundírana Yísuna faqa moodáanaki máridaqa Yuda máqannaasa fáinánduqirana faqa sía fáinánduqirana faqa miqandá fífau ainaina máridaqa. Ánoona ainaina maaqímminoo máridanoo. Naríara naríara úriqarara ainainee qímasee naríara naríara ámuqusirafa ínni Yísunasaa rusírana akooroo ímarifa mi-ainaináfa ánoona uqanna máridanoo.

Óo Karatia máqa maaqaki máriasa ínnee ámiqimasee mi-maú fímarusa máriafanoo, nánaree ínnee maqee ánoona ufa minnísee mandóosana máree fee. Ánutufa ínni náarammeeqee Yísunaki quqée marífa mifáu ínni maréeqee káqi rúnna quqéenoofau. Faiqí moó fannoo ádudu fooqáafa ínni qámbaanai moodáa mári ifa mifá kai aiqámausa radíqifinoo ínni nifaaqái sukáqamánnimaqaifaqa aiqámausa káqirunna fíraridaqa. 10 Qinée Pauroosa ínni Karatia máqa maaqaki máriasara andeeqára áatata fíranara íridaqa, máridaqa. Maasá ínni faqa karaambáiqasaa atooáqa márirafa qiní qifaaqa quqárana qímidanoo, ínniara sía moó íriranamau fifáranoo fee qídaqa ínni mara moo áatata ubeekée marí fasiqausara qinée sía íridaqa, Ánutufa misá náruannoo fee qídaqa.

11 Óo qiní qíkaqaafasaauqa qeeqára qímannimianauranoo qinée Yuda máqannaasa fáinánduqira ufa ásauku mundíranasaa ookáammásee minánnai innaarúnai fíraree qímariana mi-ufána maqúsa maqusa qinée qímannimi maríanaqau misá sía maqee maqee qiní dárimaría̱qini. Fáinánduqira ufa Yísunasaa ookáairafa ánoona márinoofau qinée ásauku mundírana aunírira saqarisaa árunara qímannimíanaqau sía dáruqini. Yísunasaa mundírunará kai qímannimimarúnaqa íridaqa dárimáriafanoo.

(Misá mi-aukuanná fáina káfaqianda úqidee qímasaida Yúda máqannaasa maasá Ánutuna faiqi námu fee qímariqau. Nífaandama ítirausara ínni níanasaa náadumasaa máriaqee qímariqau. Pauroofa minára irisée maa-ufána qímanniminau.)

12 Ínni Karatia máqannaasa maréeqee moó áatata quqéemariasara qídaqa misá nári fáinánduqiranará kai qídaqa nári nífaandama itírana faqa mináki ookáammaseeqa doo náadumasaqanna máridaqa sía áaqaranaki ínni fuki faakí qíma quqáaqeera.

13 Óo qiní qíkaaqaafasaauqa ínniara qinée qianáura. Ínnee ínneeqa mandáinaina rumbáranaki máriafanoo Ánutufa minakínaana ínni náarameeqeenoo Yísuna idukíranaki quqéenoo. Doo ínnee minakí máridaqa ínni nifaaqa mandá nídimari ainainafa sía quándakinoo ínnisaa rakísidanoo ínni níkaruqiranannai mínni ubeekámannimaqáani. Sía miqíaqa maaqíaqa ínneeqa naríara naríara rírafa nimudáoo qírafa ínni nífiqeeqeenoo naríara naríara dadaaqíranaki quqáani. 14 Mooseena sándufa aiqámatia maa-moodaa ufánaki ánoona kambíqaidanoo, mi-ufáfa maaqímminoo máridanoo. Ínnee ínneeqa niqoónausara ínniqa nifaaqára foora nídinaqa dadaaqiaqa. 15 Ínnee aandáu̱ra foora narí áidafirana narí áidafirana narí ukáqami narí ukáqami irana narí ámi narí ámi ídaqa rufíaaqa qúsaasa ínnee narínni narínni naru taikáseefáara, minára naríara naríara nídiranara qídaqa.

Pauroofa maqásaaqaraa írirana faqa maraquna írirana faqa miqandára qímaqoo ufafa.

16 Qinée Pauroosa minára ínni qímannimidaqa. Sía ínnee ínniqa maqásaa írirannai ubeekaaqa. Ánutuna maraquna fannoo ínni náakinoo márifa maqee maqee ínni náaqooki ámiqira oosana máraaqeera qímaseenoo mandóosanara aaquqídanoo. Ínnee mi-ufamaú fíqa sía uqanna ínneeqa maqásaa íriranamau fifáranoo. 17 Maqásaa fasiqa anaasee maqásaa irirafa faqa Ánutuna maraquna áidimari ainainafa faqa maasá naundúraki narí maqaúruamaqee narí maqaúruamaqee ídaqa miqandá namuqáa márianara ínnee fíraree qímariaqoo sía amana fifáranoo. Minára ínnee Ánutuna maraquna ufamáu fuaqa. 18 Ánutuna maraquna fánnoo ínni rakísifaqa ínnee sía Mooseena sándufa ámeemaanai máriafanoo.

19 Faiqí faiqi maqásaa irirana oosana káqi akooqóo máridanoo. Miná óosana maaqímmasee koorooídanoo, faiqí ánaasee narí úmmuari narí úmmuarirana faqa adi námufaqíra óosana óosana faqa írirana síaisa fúrufarida káqi mandáinaina máraqanuana faqa saqárinnai únnaqira Ánutuna amana auqúsee írirana miná ámimariana faqa áukainaina ufaaqa áfaannainaina máraqanuana faqa, faiqí ánaasee namuqáa kírana faqa rákirana faqa rairaiqírana faqa qúsufa qímasee áanooqirana faqa, aiqáma ainaina náriará kai fatúsimariana faqa, náadu náadu rakéekaammásee náriqá kai náadu náadu suqímaríana faqa, naríara naríara rairai qímariana faqa nammári námasee fúrufarirana faqa, misá suqúfifaqa óosana óosana mandóosana uqéeree maríana faqa óosana óosana mandóosana máraidaqa. Qinée óoqai aaquqímannimaqaafanausa kafáa maqee faqa aaquqímannimaqaidaqa, mi-oosanná máree mariasa sía uqanna Ánutuna quqúsaki kéeqeefaranoo.

22 Ánutuna maraquna fannoo sía miqí maría mandóosanakina uqannífiqaidanoo. Ínnee miná ufamáu fífanoo ínni maréeqee ámiqira saqari qáqammara foorá íreefaranoo. Maa-amiqira oosanáusa íreefaranoo, naríara naríara úriqarara ainaina máridee qímasee naríara naríara rírana faqa Ánutunara asasírana faqa naunduráki asooárana faqa faiqí ánaaseera reendeeníra írirana faqa ámiqimandee dadaaqí maríana faqa áfaarirana faqa ámiqira ainaina áfaarirana faqa sía minnísee fírafa miqóokai márida áuqainna ainaina auqaida márirana faqa fisoofísoommásee ufa qírana faqa narí mandóosanara ákooqamasee andeeqásee fímarina faqa Ánutuna maraquna fannoo mi-ainaináusa kai uqannífiqaidanoo, sía moó sándufa fannoo mi-amiqira ainaináusara qáoo qíannoo. 24 Ásauku mundírana Yísunaindi máriasa misá náriqa faiqí faiqi írirana márirana faqa nári maqásaa írirana faqa aunírira saqarisaa Yísuna namufaqa kuqá kai áru quqée máriasa máridaqa. 25 Ánutuna máraquna fannoo maqee óosana arasée náaru márirana qímimarifa márinara mifá kai maasá márirana nírana rakísiani.

26 Sía maasá qeeqára dóori uqéeraseeqa ámiqirausee qímasee qeeqá qimooqía sía naríara naríara sukúfa qía sía naríara naríara rairai qiaqa.

Copyright information for `BJR