Galatians 6

Pauroofa narí dadaaqi narí dadaaqiaqee qímaqoo ufafa.

1Qiní qíkaqaafasaauqa ínniki moó fannoo mandáinainaki áqufinaqa qáfeeqa Ánutuna óosanara írimariasa miná maréeqee andeeqáranaki quqáaqa, sía áanoomásee miqí iaqa reendeénamándee miqí iaqa anée mi-fasiqána dadaaqídana aneenná márirana faqa rakísia, anée faqa minakí áqufinafaara. 2Ínnee narí úmmaara narí úmmaara dadaaqiaqa, miqíqa ínnee ásauku mundírana sándufamáu káaqa andeeqásee fímariafanoo. 3Faiqí moó fannoo uréeqarafa naríara úriqararausee qímasee sía qinée óorudupirausa dadaaqianáuranoo fee qímarifa narí kai narí ákaruqidanoo miqí qídanoo. 4Aiqáma fasiqa anaasee náriqá kai nári márirana nírana nári kai amanamásee qáfaaqa, sía moo náindisaa amanamásee qáfaaqa naríkai narí márirana áuqarana ámiqirafa márinanoo narí kai qáfamasee asasíannoo. 5Aiqámausa nári umaara nári kai marasée quándaki aqoónausa faqa dadaaqiaqa.

6Akaqá fasiqauqa Yísuna ufa ínni qímannimifaqa ínnee misá ufa írimariana akiqara quándaki nárana munnimma, máaqa, ainaina náida nímiaqa. Miqídaqa ínnee misá ummaara dadaaqifáranoo.

7Ínnee sía náriqa níkaru qiaqa, sía ínnee amana Ánutuna áfusaa ititásee fúrufariranaki quqéefaranoo, mifá maasá óosanara íridanoo. Anée nárana asumu úmmaqinana miná kai unakínnaranoo, anée nána mandóosana níminana anée miná kai máreennaranoo. 8Faiqí moó fannoo narí faiqí faiqi mandá nídiranannai mandá maqaki úmmaquseenoo minakínaana kúqirana kai unakúannoo. Mifá Ánutuna maraquna óosana marasée Ánutuna áfuqaki úmmaquseenoo minakínaana náaru márirana kai unakúannoo. 9Minára iriséeqa ámiqira máriranara sia kudoosaápeeqa minnísaaqa maasá sía minníseeqa káqi mi-maú fídaqa kásooqaqee unnakírana paqúrianaura. 10Minára irisée maaná qímannimidaqa maasá aiqámausa ámiqira dadaaqírana dadaaqiaqa sía moodáakari kai, maqee maqee dadaaqírafa kambíqafinana dadaaqiaqa. Aiqámausa dadaaqídana niqoónausa Yísuna saqáriki máriasa firaaqóo dadaaqiaqa.

Pauroofa taikára aaquqirufa faqa nímandara ufa faqa qímaqoo ufafa.

11Dóo qinée Pauroosa moo fásiqa qímami márunanoo mifá ákara rídanoo dóo maqee qeeqá kai kirifi qumáree áti rafáaqafira ufa qeeqá kai firaaqóo ákara rídaqa. 12Ínniki nipatasáa akooqóo mári ainainará kai dárara̱ qímasee nimooqímariasa náriqa nimooqiaqée qímasaidaqa ínni fáinanduqiranara sandanáinai qída miqíaqee qímariasa máridaqa. Misá sía kúqaa ánoonainainau áuqaidau fáinánduquaqee qídau, misá ásauku mundírana aunírira saqarisaa árunara qímannímiafaqa miná ákiqara Yuda máqannaasa dárifoo qímasee fáinánduqira oosana Yísuna kúqiranasaa ootúpamásaifaqa Yuda máqannaasa níranaqarafa asooáifanoo sía dáruaqeera. 13Misá ínniara Yuda máqannaa fáinánduqira óosana máraaqee qímariasa nári sía Mooseena sándufamau fímariasa misá ínni Karatia máqannaara fáinanduqira óosanara eedóo qianára kai nári nimooqiaqéera qímasaidaqa ínni fuki faakí qídaqa.

14Qinée qeeqára qídaqa qinée maasá karaambáiqa, ásauku mundírafa, Yísufa aunírira saqarisaa kúqunara minára kai qinée uqéerasee amooqianáuranoo. Mi-auniriránasaa kúqunannai maa-maqa maaqánasaaqaraa ainaina kúqinoo mári ifoo qídaqa sía kásidanoo minánnai faqa qinée faqa kúqiara foora qímarunausa márunanoo maa-maqa maaqánakinaa mandáinaina sía qiní qumáraidanoo. 15Fáinánduqira fee, sía fáinánduqira fee, sía mifá ánoona ainaina máridanoo. Ánoona ainaina faiqí ánaasee kúqaa naundurákinaafa fúkaikámambinaqa andeeqásee márirafa mifámma ánoona máridanoo. 16Ínnee mi-iriránamau fímariasa qímannimianaura Ánutufa naundurái asooárana faqa Ánutufa áidira nífauarana ínniki faqa aiqáma Ánutuna faiqí ánaasee maqásaa máriasaki faqa máriani.

17Qiní Pauroosa rafáaqafira ufa maaqímminoo máridanoo. Sía moó fannoo kafáa qiníara Yísuna ufara sía andeeqásee qímannimimari fee qífaranoo. Qinée kúqaa uqanna Yísuna karabúsa aináinira fasiqa máridaqa Yísuna ufa andeeqásee qímannimiafannana akiaqara qiní dárufa qifaaqasáa qufaanakurú ánaaqi márifa mifá qiníara kúqaa Yísunaindi fee qímasee akoorooídanoo. Misá qiní darusaafaqa mi-ufaanakurúnara Yísuna ákarara foora máridanoo, aiqámausa qiní qíqafamasee Yísunaindi fee qiaqeera.

18Maasá karaambáiqa ásauku mundírana Yísuna áfaarirafa ínniki máriani. Kúqaa.

Copyright information for `BJR