Genesis 12

Ánutufa Abarammana áaroo úfafa.

Abarammana ákoofa Teeraafa kuqufanóo Karaambáiqa Abarammana qímaminoo qinau. Aneenná maqá faqa aneenná áiku ásauku faqa aneenná ákoona maqa máaqakinaa áinaina faqa quqásee minníseenana maqa máaqa moó uqafíqáanana miqóo fúa.

Miqóo óonu márinaqa aní faiqì moómoo ámiananoo maqa máaqa qumbiqáfi márifara.

Qinée aní ámiqi ámiqimma ámaqásaanana anée áuqu faqáafa márinnaránoo.
Miqímma fínaqa anísaaqaraa ámiqi ámiqirana faiqí ánaasee máreefaranoo.
Aníara ámiqi ámiqi máriasa qinée faqa quandáfiqa misá faqa ámiqi ámiqi ianáura aní áqurarainausa qinée faqa quandáfiqa misá faqa níquraráanaura.
Aníaróo qímasee misá aiqáma maqásaaqaraasa ámiqi ámiqimma nímaqaanaura.
Abarammafa 75 áukuana maraséenoo Qarana máqusa minníseenoo Kannaana máqa maaqai Karaambáiqa qímamúndee ínoo fufanóo Róotafa mina faqa finau. Abarammafa narí ánaaqa Sarai námmarina fáqa narí ákaqa faiqì Róotana fáqa narí moómoo qúmiasana aináinira fáiqiuqa fáqa nífiqeenoo Arana máqasaa máriuna nífiqeenoo Kannaana máqa máaqai finau.

Misá Kannaana máqasaa óonuroofanóo Abarammafa óonuree anirée inóo niniiufanóo Seekeema máqa máaqaki náaquqara máqusasaa tatúfirana suqée máruqoo Mooree máqa máaqaki náaquqara saqári átukaki aniranau. Mi aukuanná Kannaana máqannaasa mi maqa maaqánaki káqi máriqau. Abarammafa mi maqusánai óonu márufanoo Karaambáiqa akooqóo mina áfusaa kooroomáfinoo qímaminau. Qinée maa maqa maaqánara aní qímamúnnana aní áiku ásauku nímianaura. Miqí qímasoofanóo Abarammáfa miqóo miná áfusaa koorooú Káraambaiqana tatúfirana suqá ámira qáinda áuqusee tatúfirana suqá áminau.

Suqá amiséenoo Abarammafa fíndifinoo áaqana máqa máaqai óoru fínau. Beeteera máqusa fánnoo súani kéeqoo qaannai márufanoo súani óosana qaannai Ai máqusa márufanoo qámbaanai narí úiqaana máqa usakánau. Usakáseenoo miqóo Karaambáiqa aadáù tatúfira óoni qáinda faqa áuquseenoo Ánutuna áaramaseenoo innaaru qímarinau. Miqínoo faiqanóo fífíiùfanoo súani áfu dínni átaaqeenni Kannaana máqa máaqa dínni átinni Isipa máqa máaqa óosira qáannai óoquranau. Neekeefa máqasaa ooqu finau.

Abarammafa Isipa máqa máaqai óoqu fú ufafa.

10 Miqóo márufanoo aandaroo firaafá Kannaa máqannaasa nárinau. Abarammafa miná qáfoofanoo mandáikufanoo narí áiku ásauku faqa narí aináina námu faqa Isipa máqasaa óoqu finau. 11 Isipa máqa máaqa adeedí ráma soofanóo Abarammafa narí ánaaqa Sarai námmarina qímaminoo qinau. Aní afaaqa ámiqirafa máriananoo. 12 Isipa máqannaa aní qáfamasee, óo miná ánaaqammi foo qímasee qiní darusée aní máree foora. 13 Anée aneennára qiníara áuna fee qínaqa sía dárífaqa aníndiri káqi márianau.

14 Abarammafa Isipa máqa máaqai aniroofaqa Isipa máqannaasa Sarai námmarina qáfamásee bóo ámiqira fee qiqau. 15 Isipa máqannaasa rakísirafa Fáraoona miná faiqi námu Sarai námmarina qáfamaseeqa Fáraoona qímamiqa qiqau, qóo ámiqira manaaqa fée qufanóo Fáraoofa qímannimufaqa Sarai námmarina ani maréeqee Fáraoona kínna máaqaki quqáqau. 16 Miná ákiiqara Fáraoofa Abarammana ámiqi ámiqimmáseenoo sipsípauqa faqa mimmíuqa faqa burimakáuqa faqa doonkíuqa faqa kamméerauqa faqa aináinira fáiqiuqa faqa mánaaqauqa faqa feefarú Abarammana áminau.

17 Fáraoofa Sarai námmarina mároonara Karaambáiqa fánnoo óosana óosana mánda áurirana Faraoona faqa miná máaqaki márusaki faqa quqánau. 18 Faraoofa miná qáfamaseenoo Abarammana áaramáseenoo áqinoo qinau. Anee qiní náqaa fée máqímaqeenee. Anee nánaree sía qiní qínaaqa fee qímasee qímaqiminanee. 19 Anee nánaree qiní dáuna fee qíanaqee qinée qeeqára qínaaqara maréeqee qeeqá máaqaki quqée fee. Máà aní ánaaqa márinoo, doo ani áfiqee fífua. 20 Fáraoofa miqí qímaseenoo narí sundíauqa niqiqoofaqá Abarammana faqa narí ánaaqa faqa narí aiqáma áinaina faqa nífiqa maree nári maqá átinni múnusoofaqa fíqau.

Copyright information for `BJR