Genesis 19

Soodoomma faqa Koomoora faqa mandá óosanna máraqau.

Abaraqaammáfa múqunnisoo qangirooqandá Soodoomma máqusai óoquree maqúsa kooqíki qáfoofanoo Róotafa miqóo óoqu faaqée márinau. Máridanoo Róotafa miqandá níndafeenoo máqeenoo óonu miqandá nóorinni óorindari maqásaa rupáitama fufanóo maaqí qímasee qímanniminau. Óo qiní úriqarara qanda qinee ínniqara dadaaqírara máridaqa. Ínnee qára qiní máaqaki anirée níku nammári uqusée qiní máaqaki faiqaaqa. Faiqée dúna kanánaana fíndi fínaqa ínneeqa fínnannai fuaqa. Miqí qímasoofaqa miqandá qáòo qída qiqau. Sáina maa qandá maqúsa qámbaana faiqaanáura.

Róotafa sandanáinái qimaseenoo ufaqá miqandá miná fáqa máaqaki kéeqaqau. Óoru roofanóo Róotafa narí aináinira fáiqiuqara qufaqá misá ooruku anoona sía qái féemuna faqa ámiqira nárana faqa suqásee nímufaqa naqau. Námaseeqa faiqárara ímarufaqa mi maqusánaasa faiqí kumaaráa náuraiqi aiqáma anirée Róotana máaqa fuseemmá datí mámbufaqa Róotana maaqí qímasee áaraqau. Mi faiqi qandá fáasai aní máaqaki kéeqaa qanda yái fee máridaqee. Anée miqandá maasá qíminaqa mi qandá mandá óosana nímia.

Róotafa misá ufa iriséenoo ráuda máfinoo narí ánaaqianaindari kooqí ititásee qímánníminau. Qinée qáòo qíra ufa ínni qímannimidaqa. Sía uqanná maa manda oosanná máraaqa. Íriaqa, qeeqá qíraamuna qaara qánda sía faiqí fáqa núaqánda ínni nimisáanaqa ínneeqa íriranannai kai máraaqa. Maa fasiqa qandá qiní máaqaki ani raafaqá áqoondi kámmaqauna máriafaqa qinee ámiqimmasee miqandásaa rakísidaqa.

Miqí qímasee qímannimisoofaqa misa aiqáma maaqí qiqau. Anée moó máqannaafa maasáki ani márianafa. Yáfee qifanéè anee maasára qáòo qídanee. Anée nímaaráa. Sía nímaaráinaqa sía aní áqoondiqara kai mandáikamma nímaqaanaura, aní fáqa firaaqóo mandáikamma ámaqáanaura. Miqí qímaseeqa misa Róotana afeeqá áquseeqa miná kooqí rufádáairara iqau.

10 Máaqakiqári Róotana áqoondiqara Róotana qumu rarisámeeqee máaqaki áqusee kooqí ititáqau. 11 Ititáseeqa mi fasiqáusa madáanai márusa aiqáma nífu qimbásoofaqa kooqíara randóosia minnísàqau.

Róotafa Soodoomma máqusakiqari fínau.

12 Minní soofaqá Róotana áqoondi qára irámiriqa qiqau. Máà anée márianna maqusánaki aní áti akaqáusa máridee. Kái káqi aneenná áraamuqmaaka faqa áiraamaku óondamara faqa aneenná átíuqa faqa aiqáma nífiqee moosáa fua. 13 Maasá maa maqusána damunámma áquanaura. Karaambáiqa maa maqusánakina óosana óosana mandáinaina kambíqáifanoo mi ufána iriséenoo maaqandá diqiqaifaqá maa maqusána kurídirara qúmidaqa.

14 Róotafa iriséenoo narí áraamuna qara nifaaqi qárara qútaaqámaqoo fásiqa qánda fáqa qímanniminau. Doo ánifaqa ínnisaimbaqa moótinai fúaqa. Ánutufa maa maqusána damúnirara qínoo. Miqí qufaqá miná áiraamaku qara sía íriqau. Quteéti qídanoo mifoo qímasee káqi máriqau.

15 Iáqoo faqa kanánaana angirooqára Róotana kafáa fuki faakí qiqau. Dóo kái káqinana aneenná ánaaqa fáqa aneenná áraamuna qara fáqa nífiqee fúà. Ínnee faqa maa maqusána námu faqa kurídifaara.

16 Róotafa iriséenoo óonáuqee anauqee ímarufánoo miná áqoondiqara miná ásauku faqa miná ánaaqa ásauku faqa miná áraamunaqara fáqa qumáree rarisámeeqee aanái ubeekaqáu. Yáaweefa Róotanara ámuqusufanóo miqínau. 17 Nífíqa quqásoofanóo angiroo moó fánnoo qímanniminoo qínau. Ínnee sandámáfuaqa kúqifaara. Fídaqa sía quandáfi qáfaaqa. Afaasásaa faqa sía kásooiaqa. Ínnee kúqifaara, áaqanai sandée óoru fúaqa.

18 Róotafa iriséenoo maaqí qímasee qímaminau. Sía aneenná qíannannai diiqáà. 19 Anée firaqóo qiníara ámuqusifana qiní kúqiranakinaana máraananoo. Áaqána níanai márifaqa minní fímaríananoo mi nariráfa qiní fáqa dárinaqa kúquanoora. 20 Anée káqikaa máqusa muqúnni qáfaidanee. Mifa adeedí márifaqa amanée qinee minní sandáanauree. Káqikaa máqusa uqanná máridanoo qinée minní óonureeqa asumu márianaura.

21 Miqí qímasoofanóo angiroo moó fánnoo qímaminau. Dóo amaná qinee minára eedóo qídaqa. Sía qinée mi maqusána kurídianaura. 22 Dóo kái káqi sandáà. Anée óonu ráinaqa miqóo qeeqá qúnna áinaina áuqaanaura. Róotafa mi maqusánara káqikaa máqusee qunára misa mi maqusána áuqu Sooara fée qídaqa.

Karaambáiqa Soodoomma máqusa faqa Koomoora máqusa faqa kurídinau.

23 Mi kananaanná súani afu maqee úri márufanoo Róotafa Sooara máqusai óonu ranau. 24 Oonuroofanóo Karaambáiqa idá námu faqa koorootaqásàaqári qéemari idánara foorá írana námufaqa quqásoofanoo aakuara foora Soodoomma máqusasaa fáqa Koomoora máqusasaa fáqa áqufinau. 25 Áqufinoo mi arumúnaki máru maqusáusa faqa aiqáma faiqí ánaasee faqa ándanda faqa náru taikánau. 26 Róotana ánaaqa narí afaaqi fáqa sandée fídanoo óonu quandáfinoo áfu máqeenoo doo miqóo ooruku kámmafi kísaaqa saqáriara foora rakíqanoo márinau.

27 Moó kánanaana Abaraqaammáfa fíndimeeqeenoo Karaambáiqa fáqa ufa quqóo óoqu finau. 28 Miqóoqari Abaraqaammáfa mara muamí qáfoofanoo Soodoomma fáqa Koomoora fáqa mi afaasánasaa máru maqusáusaki idá muna fannoo firaafa uqanná óoru fúfánoo qáfanau.

29 Ánutufa mi afaasánasáa máru maqusáusa faqa máqa maaqá faqa kurídidanoo Abaraqaammánara iriséenoo Róotafa máriu maqúsausa nárídanoo Róotana kái maréeqee kaqínni quqánau.

Mooabana fáqa Amoona faqa níku nísauku kambíqoo ufafa.

30 Róotafa Sooara máqusara rufíaséenoo narí áraamuna qara nífiqeenoo ámuaqu námusaa óoni áamara márunaki óoru márinau. 31 Máriufanóo miná áraamuna indaarúqaafa ínaaqianaana maaqí qímasee qímaminau. Dóo maasá qíkoofa asooqá máridanoo. Sía maa saqánna aníndiri marasée faiqì mara qímifaqa máqara fásiqauqa máridaqa. Aiqáma faiqí áuqeeu óosanafa sía anindíriki máridanoo. 32 Doo áninaqa aníndiri uáinna námmari áuquseeqa nári níkoona ámíànanóo moómoo námaseenoo fúru fárinaqa aníndíri miná fáqa sakasée faiqáà. Miqí másaifanóo aníndiri níkoofa aníndiri faiqì mara qíminaqa aníndiri faiqi námu fíndifíqa máriaqa.

33 Miqí qímaseeqa mi eendánaki miqandá uáinna námmari moómoo nári níkoona amisoofanóo néeneeséenoo fúrufara másoofanóo ánasaafa náaree narí ákoona fáqa sakasée faiqanau. Úainna námmari fánnoo miná fúru fára másoofanoo narí áraamuna áuqoo áinainara sía írinau.

34 Kanánaana ánasaafa narí áuna qímaminoo qinau. Fáasái eendáki qinée qeeqá qíkoona faqa sakasée faiqéeqa. Doo fáfaa eendáki aníndiri uáinna moómoo kaifáa ámiananóo námaseenoo fúru fárinana aneé faqa miná sakasée faiqáà. Miqímasee anínidiri qeeqá qíkoona faiqi máqasaana faiqí asumu káqi máriaqa. 35 Miqí qímasee doo mi eendánaki miqandá uáinna námmari moómoo nári níkoona amisoofanóo fúru fárammá soofanóo áuna fannoo narí ákoona faqa sakaséenoo faiqanau. Róotafa uáinna námmari námseenoo fúru fáridanoo narí áraamuna áuqoo áinainara sía írinau.

36 Miqímmasee Róotana áraamuna qára nárì níkoona faqa faiqoonánnai nímuaqu qáikiqau. 37 Miqímásee márufanoo indaarúqaa áraamana fánnoo faiqi akoonaiqí maqaséenoo miná áuqu Mooaba neé qinau. Máriu fanoo Mooabafa fíndifinoo Mooaba máqannaasa níkoofaikamminóo márinau. 38 Áuna fannoo mifá fáqa faiqi akoonaiqí maqaséenoo miná áuqu Beenaami feé qinau. Máriu fanóo Beenaamifa fíndifinoo Amoona máqannaasa níkoofaikamminóo márinau.

Copyright information for `BJR