Genesis 2

1Miqímmáseenoo Anutufa aiqáma innaarúna faqa maqá faqa áuqu taikánau.

2Dínni taikásee dínni óonu qaaraqánda marasée 7 fáasaana Ánutufa narí aináinirana taikánau. 3Dínni taikásee dínni óonu qaaraqánda 7 fáasaanara Ánutufa afaaqóoqa qímasee, áaduma náaquqara fáasaanee qinau. Narí kadáapirirana mi faasaanná taikóonara mi faasaannára náaquqara fáasaanee qímasee idooanau.

Adamafa faqa Éewafa faqa.

4Miqímmaseenoo Anutufa innaarúna faqa maqá faqa áuqinau. 5Indaarú karaambáiqa Ánutufa maa maqána faqa mirí ínnaaruna faqa áuqu aukuanná aaku sía maqásaa quqóonara óosana óosana ándanda qaqama sía kambíqanau. Faiqí maqá apaurírafa faqa sía márinau. 6Mikamúqoo nammári fannóo maqákiqari ururéenoo aiqáma máqa máaqa uqeená ámaqanau.

Eedeena saqama ufa.

7Mikarí karaambáiqa Ánutufa maqá qumáreenoo faiqí minánnoo áuqinau. Áuquseenoo márirana ními marú aidooná aikáamarai fuaqásoofanóo mi fasiqáfa kásirana máranau. 8Mi fasannái Ánutufa súani áfu óosanai Eedeenna máqa máaqaki kadiqa firaaná áuquseenoo narí áuquqoo fásiqana minakí quqánau. 9Ánutufa óosana óosana ámiqira saqariara qufanóo minakí kambíqafufaqa ámiqira aqama íraqau. Kadiqa qámbaanai saqári qaaraqánda marinau. Moó sáqari fannoo márirana ními máru saqarífa márinau. Kafáa moó sáqari fánnoo mandáinainara faqa ámiqira áinainara faqa írimaria íriranna nímimárufa márinau.

10Nammári moó fánnoo Eedeena máqa máaqakiqari qumuréenoo kadiqa qámbaana maqá uqeená uqeená íanifeera qúmiqareenoo qaara fáqa qaara fáqaki rainá fufanóo óoqufinau. 11Moó ámara áuqu Pisoona námmari fée qiqau. Mifá Qafiraa máqa máaqa átindannai óoqu finau. 12Miqóo kóora ámiqirafa máridanoo, ámiqira áfundi máru saqari anoonáfa faqa miqoo márinau. Firaa feefauru áqimaría oonífa faqa miqóo márinau. 13Kafa moó ámara áuqu Kiqoona námmari márinau. Mifá Kusa máqa máaqa átindanai qúmifi márinau. 14Kafa moó ámara áuqu Taikirisa námmari márinau. Mifá Asiria máqa máaqa súani óosana qáannai átindanai qúmi márinau. Moó ámara áuqu Eeufarateesa námmari márinau.

15Karaambaíqa Ánutufa narí áuquqoo fásiqana máreeqee Eedeena kadidakína quqánau. Kadidakí maqá apaurídanoo aiqáma áinainasaa mi kadidánaki rakísianifeera quqánau. 16Ánutufa quqáseenoo mi fasiqána maaqí qímaseenoo aakápanau. Anée kadidakína aiqáma sáqari qaqama diqísee náannee qinau. 17Moodáa sáqariará kaí qinée qáoo qídaqa. Mandá áinainara írirana faqa ámiqira áinainara írirana faqa ními marí saqarína kai sía náa. Anée námaseenana mikarí kaí kúqinnaranoo.

18Mi fasannái karaambáiqa Ánutufa mi fasiqánara qinau, maa fasiqáfa naríaraa márifanoo síamma andeeqáidanoo. Qinée miná aqoónnana áuqusáananoo miná dadaaqíannoo.

19Ánutufa maqá qumáreenoo minánnai aiqáma áandau faqa ufiniuqá faqa áuqinau. Áuquseenoo aiqáma náarammeeqeenoo faiqí máruqoo núquráanifeera quqásoofanoo nána áinainee áuquroofa dóo mi nuqúna faqáasa máriqau. 20Miqímmáseenoo faiqí fánnoo kooqíkinaa áandauqa faqa káasau áandauqa fáqa ufiníuqa faqa núqu ráma quqánau. Miqíqa márufanoo Ánutufa mi fasiqána aqoónnanaikiranara misakí randéenoo sía paqúrinau. 21Minára faiqárana faiqí áminau. Faifufanóo Ánutufa miná aqaasana moodáa tatúseenoo miná amaqínnai minakí ititánau. 22Ititáseenoo karaambáiqa Ánutufa miná aqaasanannoo ánaasee áuqinau. Áuquseenoo faiqí máruqoo áfiqee finau.

23Quqásoofanóo faiqí fánnoo qáfamaseenoo qinau.
Doo maqee uqanná qiní fooqáairafa uqanná maridanoo,
ámudaani qiní qímudaani kínaafa,
amaqí qiní qimaqínnai áuqirafa,
qinée minára ánaasee fée qímasee áuquraanáura,
mifá faiqí kínaafa márinara miqí qímasee áuqu raanáura.
24Minára kaí faiqí narí ánoona ákoona minnísee narí ánaaqa faqa moodáanaki máfi moodáara foora máridaqa.

25Mi fasiqáfa narí ánaaqandíri káqisamu máruqanda máriqau, sía naríara naríara nisaurí máriqau.

Copyright information for `BJR