Genesis 21

Isakeena máqoo ufafa.

1Karaambáiqa narí qímaqoondee ínoo Saráqa námmarina ámiqi ámiqimma ámaqanau. 2Miqímmasoofanóo Abaraqaammáfa náuraiqi márufanoo Saráqa námmarifa ámuaqu qáikinoo Abaraqaammána faiqì Ánutufa qímaqooqoo máqanau. 3Maqasoofanóo Abaraqaammáfa miná áuqu Isakeeneé qinau. 4Áuqu rámaséenoo qísauku dínni taikásee dínni ani qaaramoó maraséenoo 8 faasaana áiqaramá fufanóo Abaraqaammáfa Ánutufa qímamúndee ínoo Isakeena afaaqa áti ateeká áqinau. 5Abaraqaammáfa uan handeeréeta 100 áukuana faqáafa márufanoo Isakeena máqanau.

6Saráqa námmarifa Isakeena maqaséenoo maaqí qinau. Ánutufa asasírana faqa naanaidara qírana faqa qíminoo. Aiqámausa minára írinausa qiní faqa naanaidara qífáranoo. 7Miqí qímaseenoo Saráqa námmarifa maaqí qinau. Yáfee moó fánnoo Abaraqaammána qímaminoo Saráqa námmarifa narí faiqì maqasée amana náamma ámiannoo fee qíannoo fée, sía amana moó fánnoo miqí qíannoo. Miqí qímariafaqa qinee asooqá námuki Abaraqaammána faiqì akoonaiqí máqeeqa. 8Isakeefa áaqoo írinoo náamma minnísoo fáasaana Abaraqaammáfa qoomáqa firaaqóo suqánanau.

Abaraqaammáfa Qakaarana faqa Isamaeerana faqa niqiqoo úfafa.

9Miqímmasee máriufanoo moó kári Isipa máqannaa ánaasee Akaara námmarina ámaaku fannoo Saráqa námmarina ámaaku Isaakeena faqa sararí márinau. 10Sararímarufanoo Saráqa námmarifa miná qáfamaseenoo Abaraqaammána qímaminoo qinau. Maa ainainira manaaqána fáqa narí faiqì fáqa niiqáinaqa fuaqa. Maa anaaseená faiqì fannóo sía aní qumíasana qiní faiqì máraree qínnana máraannoo.

11Isamaeeráfa faqa Abaraqaammána faiqì márunara Abaraqaammáfa mi ufána írufanoo aundurá ummaara ranau. 12Miqúfanoo Ánutufa Abaraqaammána qímaminoo qinau. Sía faiqì ánaaqi qísanoosára ámuqusiani. Anée Saráqa námmarifa qímamindee ía. Isakeena sáaqari kai qinee qíma afeekaikíafannandée ínoo moómoo asumu kambíqeefaránoo. 13Aní aináinira ánaasee faiqì fáqa qinée dadaaqíananoo moómoo faiqì maqasáinaqa moó máqannaasara foorá marifaranoo. Mifá faqa aní faiqì kái máridanoo.

14Abaraqaammáfa mi ufána iriséenoo moó kánanaana fíndifinoo féemu áafaqa faqa aandáù apata táquki nammári sakaséenoo Akaara námmarina uqáruma amiséenoo faiqì áakuamaqáseenoo aiqanau. Akaara námmarifa narí ámaaku áfiqeenoo Beeraseeba máqa máaqaki aadána máqa máaqaki óoqu máridanoo óonuree anirée ída márinau.

15Aandáu apata táqukinaa námmari aiqáma taikáfufanóo Akaara námmarifa narí faiqì káqikaa sáqari atukakí áisanau. 16Aisáseenoo káqikaaqóo kísaaqasaa óonu óoqufaqee ídanoo narí kaí qímirinau. Qinée sía amana qeeqá faiqì kúqirana qáfaanauranoo. Miqí qímaseenoo miqóo óoqufaaqée máridanoo ikí ráqee márinau.

17Miqí márufanoo Ánutufa mi faiqína ikí ráqarana írufanoo innaarúnaindari Ánutuna angiroo moó fánnoo Akaara námmarina qímaminoo qinau. Akaara námmari anée nánaree ummaara máraidanee. Sía rufíaa. Aní ámaaku ikí ráqarana Ánutufa dóo írinoo. 18Dóo fíndi fínana óonu faiqì rafúsusee ámiqi ámiqia. Qinée miná sáaqari kambíqainausa firaa maqannaasaiká mánnisaanaura.

19Miqí qímaseenoo Ánutufa Akaara námmarina áfu maqa ámufanoo nammári mádika qáfanau. Qáfamaseenoo aandáù apata táqu mara máreenoo óoqu saka narí faiqì ámufanoo nanau.

20Ánutufa Isamaeerána rakísi ámaqee márufanoo innooqánau. Innooqáfufanóo mifa Paraana aadána máqa maaqáki máridanoo uaqárana akoofása márinau. 21Paraana aadána máqa máaqaki márufanóo miná ánoofa Isipa máqusaindaraa mánaaqa mara áminau.

Abaraqaammafa Abimeereekána faqa moodáanaki kíra úfa qinau.

22Mi karí Abimeereekáfa Pikoorana narí rákira fásiqauqa uriqararana áfiqeenoo Abaraqaammáfa máruqoo óonu réeqa maaqí qímasee qímamiqa qiqau. Anée aiqáma áinaina áuqaannánaki Ánutufa dadaaqídanoo. 23Doo maqee Ánutuna áfusaa qíma afeekaikámmásee qiní faqa qiní faiqi námu faqa qiní sáaqari náaru kambíqainausa faqa sía mandáikamma nímaqaa. Qinée aní ámiqimma ámaqáqiafana anée faqa miqí kai ínana qíma afeekaikámmásee qiní faqa maa maqa maaqána anee márianna maqa maaqána fáqa ámiqimma qímaqaa.

24Abaraqaammáfa minára iriséenoo qímaminau. Qinée miqímmianauree qímasee qíma afeekaíkinau.

25Miqí qímaseenoo Abaraqaammáfa Abimeereekána óori kándara úfakiqari qímaminau. Aní aináinira fáiqiuqa qiní nammári mádika rákirara máseeqa máreeà. 26Abimeereekáfa iriséenoo qímaminau, Qóo qinée sía miná íridaqa, yáfee miqínoo fee. Anée minára sía qíma qímunaqa sía íriqiafana. Maqee káì íridaqa.

27Abaraqaammáfa minára iriséenoo burimakáuqa faqa sipsípauqa faqa maréeqee Abimeereekána áminau. Amisée miqandá moodáanaki kiqáu. 28Abaraqaammáfa sipsípa ánaaqiuqa dínni taikásee dínni ani qaara marasée 7 náadumasaa rainá quqánau. 29Abimeereekáfa miná qáfamáseenoo Abaraqaammána irámirinau. Anee nánaree miqídanee.

30Miqí qímasee iroofanóo Abaraqaammáfa qinau. Anée maanáuqa máraà. Anée márainnanannóo qiníara maa nammari dikaandána indu fínaufoo qinnáranoo.

31Misá miqóo qíma afeekaiká máseeqa mi maqusána áuqureeqa Beeraseeba fée qiqau.

32Miqanda Beeraseeba máqa máaqaki moodáanaki kíra úfa qímasoofanoo Abimeereekáfa narí rákira fásiqauqa úriqararana Pikoorasandíri nárì maqúsai Firistia máqa máaqai fiqau. 33Miqandá fufanóo Abaraqaammáfa tamarisika sáqari Beeraseeba máqusai úmmaquseenoo náaru náaru márira Káraambaiqa Ánutunara innaaru qímarinau. 34Mi kamúqoo Abaraqaammáfa kísaaqasaa Firistia máqa máaqakina márinau.

Copyright information for `BJR