Genesis 25

Abaraqaammáfa moó ánaaseesaa faiqi máqoo ufafa.

(1Stori 1:32-33)

Abaraqaammáfa ánaasee moó máranau. Miná áuqu Keeturaa námmarifa márinau. Minásaa faiqì moómoo máqanau. Faiqì mòó indaarúqaana áuqu Simaramafá márinau miná ánaaqianáafa Yookasanafá márinau miná ánaaqianáafa Meedanafá márinau miná ánaaqianaafa Midianaafa márinau. Miná ánaaqianaafa Isabakafá márinau nínaaqianaafa uqanna Suaafá márinau. Indaarúqaana ánaaqianaafa Yookasanafá mifá Seebabana faqa Deedana fáqa níkoofa márinau. Deedana áiku ásuku Asuraa máqannaasa faqa Reetusimma máqannaasa faqa Reeummimma máqannaasa faqa máriqau. Midiana ámaaku indaarúqaa faiqi Eefaafá márinau, miná ánaaqianaafa Eefeerafá márinau, misá nínaaqianaafa Qannookafá márinau misá nínaaqianaafa Abidafá márinau, misá nínaaqianaafa uqanná Eeradaafá márinau. Minamúsa Abaraqaammána ánaaqa Keeturaa námmarina sáaqari kambíqarausa máriqau.

Abaraqaammáfa narí aiqáma áinaina Isakeena káì áminau. Amiséenoo narí káqi máridanoo moó ánaasee faiqi námu faqa ámiqira áinaina óosana óosana Abaraqaammáfa káqi nimiséenoo Isakeefa máruqooqari súani óosana qáannai máqa máaqai níanai niiqoofaqá mitínai óonu máriqau.

Abaraqaammáfa kuqufufaqá ákundoo úfafa.

Abaraqaammáfa asooqáqeenoo kúqinau. 175 áukuana marasée kúqinau. Kuqufufaqá miná ámaaku qára Isakeesa Isamaeerasa miqandá nárì níkoona irí mara máree Makapeeraa máqa máaqaki Mamaree máqusa súani óosana qáannai óoni áamaraki ákundaqau. Mi maqána Eefaroona Sooqarana ámaaku Heetana áiku ásaukundi feefaurummáqoonaki Abaraqaammána ákundaqau. 10 Abaraqaammáfa káqi máridanoo Qeetana áiku ásauku feefaurú máqoonakina Saráqa námmarina faqa Abaraqaammána faqa níkundaqau. 11 Abaraqaammáfa kuqufufanóo miná ámaaku Isakeena Ánutufa ámiqi ámiqi ímarinau. Isakeefa káqi márira námmari dikaanda qiní qíqafaidanoo fee qímaru nammari dikaandána aaqá márinau.

Isamaeerána áiku ásauku núqu.

(1Stori 1:28-31)

12 Qakaara námmarifa Saráqa námmarina aináinira mánaaqa Isipa máqannaa mánaaqa márufa mifá Abaraqaammána ámaaku Isamaeerána máqoofa márinau.

13 Isamaeerána faiqi námu maaqímmiqa máriqau. Indaarúqaafa Neebaiootafá márinau, miná ánaaqianaafa Keedarafá márinau, misá nínaaqianaafa Adabeerafá márinau, misá nínaaqianaafa Mibasamafá márinau, misá nínaaqianaafa Misammafá márinau, misá nínaaqianaafa Dúmmaafa márinau, misá nínaaqianaafa Masafá márinau, misá nínaaqianaafa Qadadáfa márinau, misá nínaaqianaafa Teemafá márinau, misá nínaaqianaafa Yeeturafá márinau, misá nínaaqianaafa Nafisafá márinau, misá nínaaqianaafa uqanná Keedeemaafá márinau. 16 Misa qísaukuqara taikásee qíkunnooqu qaara marasée máqannaasa níkausaikiqa máriqau. Miqíqa máridaqa náriqa núqu náriqa máqusa faqa náriqa úiqaana máqusa faqa qafaafaurée máriqau. 17 Isamaeeráfa 137 áukuana maraséenoo kúqinau. 18 Isamaeerána áiku ásauku Isipa máqusaindari súani óosana qáannai Sura máqa máaqa faqa, Qafiraa máqa máaqa faqa qámbaana Asiria máqa máaqai fímaruqoo máriqau. Misá Abaraqaamána áiku ásauku akaqáusa máruqooqari náaduma máriqau.

Eesáusa Yookooboosa máqoo ufafa.

19 Moó ufa Abaraqaammána ámaaku Isakeena ufá máridanoo.

20 Isakeefa qaara fasiqa níku nísauku taikásee 40 áukuana maraséenoo Beetueerána áraamuna Reebeeka námmarina máranau. Rábannana ásookina máranau. Beetueeráfa Arameeannaindáraafa Meesoopootamia máqa máaqaki ani márinau.

21 Reebeeka námmarifa sía faiqì máqanau áafanaasee márinau. Isakeefa minára iriséenoo Yáaweenara innaaru qímarinau. Yáaweefa miná ufa iriséenoo dadaaqufanóo Reebeeka námmarifa ámuaqu qáikinau. 22 Ámuaqu qáikufanóo faiqì qaara qánda miná áranandaki máridaqa ráki máriqau. Ráki márufanoo Reebeeka námmarifa qinau, maa ainaináfa nánaree qiníki kambíqaidanoo fee qímaseenoo karaambáiqunnai óonuree ánoonufa qímamianifeera innaaru qínau. 23 Innaaru qufanóo Yáaweefa qímaminoo qinau.

Qaara maqannaasá aní áranandaki máridaqa.
Anée naríara naríara rairai qímariasa níkooqanda máqeennaránoo.
Moó fánnoo moó úriqarara afeeka faqáafa márianno.
Ákaqa fannoo áfasaana rafáaqa fúaninafa máriannoo.
24 Reebeeka námmarina faiqì máqarafa aniroofanóo qaara qánda máqanau. 25 Indaarúqaana afaaqa káaqa taatuqée árinoo márinau, miná afaaqasása asausí ánaaqi márinau. Miná áuqu Eesáu née qiqau. (Miná áuqu óosana asausí fee qiqau). 26 Ínaaqianaafa indaarúqaana áiku átaa rakisisimmá úqirafa qúminau. Minára miná áuqu Yakooboo neé qiqau. (Miná áuqu óosana áiku átaa fée qiqau.) Isakeefa qaaramoó fásiqa níku nísauku taikáséenoo 60 áukuana maraséenoo miqandá máqanau.

Eesáufa narí indaarúqaa fáiqi aináina miná ákaqa áminau.

27 Miqandá innooqáfufaqá Eesáufa uaqárana akoofása máridanoo sía óoqu márufa káqi níranara áidimárufa márinau. Miqí márufanoo Yakooboofa sía miqí márinau. Fifírafa máridanoo maqúsasaa márufa márinau. 28 Isakeefa Eesáunara áidi márinau. Mifá aandáù arusoofanóo née márunara minára áidi marínau. Reebeeka námmarifa Yakooboonara rímarinau. 29 Moó kári Yakooboofa nárana suqásee áuqee márufanoo miná áfasaafa nándaki níniiufa áararoofanoo aniréenoo qinau.

30 Anee taatuqée nárana áuqee máriannana doo miná mara qíminaqa náa dáarandée márifaqee qinau. Miqi qímasoofaqá misa minára iriséeqa Eesaunara Eedoomeé qímariqau. Mi auqúna óosana taatuqée fée qímariqau.

31 Yakooboofa iriséenoo qinau, anínidiri qíkoofa anée indaarúqaa fáiqi máriananoo ani afaaqóoqa qíma ámaqée márina qíminaqa nárana ani ámianauranoo.

32 Eesáufa qinau. Sáà qinée dáararai faqa kúqua qáammidaqa qiní mi ainaináusa sía qiní dadaaqífaranoo.

33 Yakooboofa iriséenoo qinau, aneenná ufa qímá afeekaiká mándee qímínaqa qinee nárana aní ámianaura. Qímasoofanóo Eesáufa Yakooboonara qímá afeekaíka mándee indaarú miná ákoofa qútaaqama ámaqoo ainainná ámiraree qinau.

34 Miqí qíma afeekaiká másoofanóo Yakooboofa quandá fufanóo féemu faqa nára áinaina faqa nammári fáqa Eesáuna ámufanoo námasee doo finau. Miqí máseenoo Eesáufa narí indaarúqaa fáiqi márunara ákooqoofanóo narí ákaqa amisée quqásee finau.

Copyright information for `BJR