Genesis 27

Yakooboofa Eesáuna afaaqóoqa úmmuaru ufafa.

1Isakeefa máriiufanoo doo asooqáqoofanóo áfu mandáikinau. Máriiufanoo moó kári narí indaarúqaa fáiqi Eesáuna áaroofanoo Eesáufa foó qinau.

2Fóo qímasoofanóo Isakeefa Eesáuna qímaminoo qinau. Doo qinée asooqá márida, qeeqá kúqira áukuana sía qáfaida, minára ani qímamiqa. 3Aneenná durú féefa máreenana nándaki aandáù aru máree qiní dídi márina míni suqá qíminaqa námseeqa ani afaaqóoqa qímamaqáseeqa kúqua.

5Isakeefa Eesáuna faqa ufa qíqiisoofanóo Reebeeka námmarifa iriséenoo qáfoofanoo Eesáufa nándakinai uaqárara fufanóo quandá fufanóo Yakooboona qumeé kai qímaminoo qinau. 7Dóo maqee aní ákoofa Eesáuna maaqí qímasee qímaminoo, anée aandáù arumáree míni suqá qíminaqa qinée námasee Karaambáiqa áfusaa aní afaaqóoqa amisée kúqua. 8Qiní qímaaku doo anée qiní ufa írisee qinée qíanandee ía. 9Aneé doo fúà óonu mimmí ánaaqiuqa márianakinaana afaaqa faqáana qaaraqánda míni sáinaqa qinée aní ákoona áidi márina suqá sáanana múnu ámià. 10Múnu áminano námaseenoo narí afaaqóoqa amiséenoo kúquani.

11Yakooboofa iriséenoo narí ánoona qímaminoo qinau. Qiní qífasaafa asausí faqáafa máridanoo asausí aadaikí marífa máridanoo. Qiní qifaaqa qisausí sía máridanoo umooqu kámmidanoo. 12Ábee qini qíkoofa qiní qifaaqa dúqama qáfamaseenoo íriannoo. Qiníara qíkaru qídanoo fee qíannoo. Miqíqa qinée rairaiqírana qeeqá qifaaqaí qifaaqóoqara foorá mara quqáanaura.

13Miná ánoofa mi ufána iriséenoo qinau. Aní áqira úfa fánnoo qinísaa kaí máriannoo, sía anee minára írià, sandéenana óonu mimmí ánaaqi káqi máree míni qímia.

14Miqí qíma soofanóo Yaakooboofa eedóo qímasee mara máree míni soofanóo miná ánoofa maraséenoo narí afaaqi Isakeena áidira nárana suqánau. 15Reebeeka námmarifa aandáu suqáseenoo Eesáuna ámiqira qámunna narí máaqaki quqáqoona maraséenoo Yakooboona afisú ámaqanau. 16Afisú ámaqaseenoo mimmí ánaaqi apata qumáreenoo Yakooboona áfaarinni faqa ásauku faqa asausí sía máruqoo afisú ámaqanau. 17Miqí mándeenoo mi adiafaaira naranná féemu námu faqa suqáqoona ámufanoo narí ákoo funnái máree finau.

18Óonuréenoo narí ákoona maaqí qímasee qímaminau. Qípoo dóo qinee aniréeqa, qufanóo Isakeefa qinau. Qiní faiqi námukiqari anee yáfee máridanee qinau.

19Yakooboofa qinau. Qineé aní indaarúqaa fáiqi Eesáusa máridaqa. Doo anée aandáura qíannana arusée suqámaree aniréeqa doo anee fíndi fínana námasee qifaaqóoqa qímia. 20Miqí qufanoo Isakeefa qinau. Óo qiní qímaaku anee náqaa fee máseenanee kái káqi paqúrinanee qufanóo Yakoobofa qinau. Karaambáiqa aní Ánutufa qiní dadaaqí paqúrimma qíminoo.

21Isakeefa minára iriséenoo Yakoobona áaramaseenoo qinau. Anée qiní daaqá adeedí ani ráinaqa qinée aní áuqama qáfàa. Kuqáa anee Eesáu fee máridanee.

22Miqí qufanóo Yakooboofa narí ákoona óorinni óonu kikíqamma fufanóo Isakeefa áuqama qáfamaséenoo qinau. Qinée írunanoo anée ufa qíanáfa aní Yakooboona áunda máridanoo aní ásauku áuqamásee qáfaunanoo Eesáuna ásauku máridanoo. 23Yakooboofa mimmí asausí afisúqoofanóo Eesauna ásaukuara foorá asausí ánaaqi márufanoo Isakeefa sía irinau. Isakeefa narí afaaqóoqa miná ámirarammáseenoo kaifáa irámirinoo qinau. Anée kúqaa Eesáu fee máridanee. Miqí qufanóo Yakooboofa qinau. Eeóò qinée Eesáusa máridaqa.

25Miqí qufanóo Isakeefa qinau. Doo aneenná aandáù míni qíminaqa námaseeqa afaaqóoqa qímamaqaanaura. Yakooboofa írinoo aandáù aina fáqa úainna nammari faqa míni ámufanoo nanau. 26Námaseenoo Yakooboona maaqí qímasee qímaminoo qinau. Qiní qímaaku maaqóo adeedí ani réenana qiní qímooqaa. 27Qufanóo Yakooboofa adeedí aaqá ani réenoo narí ákoona ámooqée márufanoo ándanda únda afaaqaindári ufanoo udiráma qáfamaseenoo maaqí qímasee afaaqóoqa qinau. Qiní qímaaku afaaqaí ámiqira únda fannoo Karaambáiqa afaaqóoqa qímamaqáqai máqana áfundara foorá ídanoo.

28Ánutufa innaarúnaindaraa qifí fáramu quqásainanoo aní maqá áinoo ainoommáseenoo moómoo nárana ámiani.
29Moó ánaamuru márinausa aní ainaínira fáiqi kámmambi fáranoo.
Máaqanna máaqanna máriasa misá aní ani qáfeeqa nóorindari maqásaa kummáree fáranoo.
Anée aneenná ákaqaafasáauqa firaafái kiná márinnaranoo.
Aní ánoona faiqi námu aní ani qáfeeqa nóorindari maqásaa kummáree fáranoo.
Moó fánnoo aní áqinafa mi ufáfa naríki kaí máriannoo.
Moó fánnoo aní ámiqi amiqimma ámaqainafa naríki faqa máriani.

Eesáufa narí ákoona afaaqóoqara qíiaqee qu úfafa.

30Miqí qímasee Isakeefa Yakooboona afaaqóoqa qímami soofanóo Yakooboofa narí ákoona máaqakiqári ráudamakúfanoo díndanai fufanóo dóo Eesáufa díndanai uaqánoo níniiufa aniranau. 31Eesáufa aniréenoo ádiafaa íra áandau áina suqá máreenoo narí ákoofuqóo óonu réenoo qinau. Qípoo dóo fíndi fínana námasee qifaaqóoqa qímia.

32Miná ákoofa qinau. Anee yáfee. Miqí qufanóo mifá qinau. Qinée Eesáusa indaarúqaa fáiqi máridaqa.

33Isakeefa minára iriséenoo bóo qímasee tautú máseenoo áindiri áindiri ímarufanoo qinau. Yáfee moó fánnoo aandáù arusée míni qímifaqa, námasaunana anee aniraananoo. Qinee námaseeqa dóo qeeqá taikára áfaaqooqa qímamaqásaunanoo náaru náaru mináindi máriannoo.

34Eesáufa miná iriséenoo firaaqóo aundurái sukáqoofanóo qinau. Óo qípoo qiní faqa qifaaqóoqa qímia. 35Qufanóo Isakeefa qinau. Aní ákaqa fannoo qíkaru qímaseenoo dóo aní afaaqóoqa máree fífinoo.

36Eesáufa minára írufanoo Yaakooboonara árana qoofanóo qinau. Óo miná áuqu Yakooboofa máridanoo narí áuqu mau káimbinoo qiní aináina qaara karí qiní qíkaru qímasee máreenoo. Indaarú mifá qinée indaarúqaa fáiqi úriqararausa máraani qíafanna áinaina mároofa maqee miqí kai ínoo qiní qifaaqóoqa qírana dóo máree finoo. Miqí qímaseeno Eesáufa narí ákoona qímaminoo qinau. Anée afaaqóoqa sia fee qiní faqa qíseenanee.

37Miqí qufanóo Isakeefa qinau. Doo qinee aní úriqararafa márianifee áfaaqooqa amiséeqa. Kaifa miná áinaina miná aináinira fáiqi kiaqée afaaqooqa faqa ámiqa. Qinee óosana óosana nárana fáqa nammári faqa ámiqa. Qiní qímaaku, maqee sía moó áinaina márinaqa aní ámianauranoo.

38Eesáufa narí ákoona kafáa kafáa ikí ráqaidanoo iranau. Moodáa áfaaqooqa márinee áminanee sía fee moó qiní faqa qíminnaree. 39Isakeefa minára írinoo maaqí qímasee Eesáuna qímaminau.

Sía innaarúnaindaraa qífi faramu aníndi máriannoo.
Sía áinoo faqáa máqa aníndi máriannoo.
40Anee durú sáamu uqéerasaidana aneenná ámiqira márirana paqúrinnaranoo.
Miqídana anée aneenná ákaqa aináinira fáiqikina máriinana rakéemmaki áaduma finnáranoo.

Isakeefa Yakooboona Qaraana máqusai aqiqoo úfafa.

41Yakooboofa Eesáuna afaaqóoqa máree fífufanoo Eesáufa narí ákaqara ákoo qáidanoo fídiaqaammí márinau. Miqí márufanoo maaqí qímasee narí kai óonu máfi íriséenoo qinau. Káqi kaaqóo maasá qíkoofa kuqu fínaqa soofaara taikáseeqa mikarí qeeqá qíkaqa kuqámma áruanaura.

42Reebeeka námmarifa mi ufána iriséenoo Yakooboona áaramaseenoo aaqu qimamaqeenoo qinau. Íria aní áfasaafa Eesáufa afaaqóoqara qímammareenoo aní áruannoo. 43Qiní faiqi qinee qímamíanandee ía. Anée quqásee sandéenana Qaraana máqusai qiní qísookifa aní anaufá Rábannafa márinnai fúà. 44Anée óoru miqóo márinanoo ani áfasaana árana qárafa asooáinana qúmua. 45Anee miná mandáikamma ámaqaannanara qaunúsainaqa qinée akaqáusa niiqáanaqa aní óoru áfiqee qúmuaqa. Qinée qíkoo ínneeqara moodáafa kúqiranara írunanoo qaifaqa doo quqásee fúà.

Isakeefa Yakooboona aiqoofanoo Rábana funnai óoru finau.

46Miqandá nínoofa Reebeeka námmarifa óonu réenoo narí afaaqi Isakeena qímaminoo qinau. Qinée maa Qeeta maqannaa anaasee qandára Eesáuna ánaaqa qarara qíkoo uqanna fídiaqáammidaqa. Yakooboofa Qeeta máqannaa ánaasee maaqírana moó márainaqa qinee kúquanauranoo.

Copyright information for `BJR