Genesis 32

Yakooboofa Eesáuna óori qáfarara deedaqu úfafa.

Yakooboofa miqóoqari fíndi fufanóo narí ánaukoo unnái aanái fímaru fánoo Ánutuna angiroouqa aanái ani paqúriqau. Yakooboofa níndafamaséenoo qinau. Maa maqa maaqáfa Ánutuna úiqaana máqusa máridanoo. Miqí qímasee mi maqusána áuqureenoo Maqannaimmeé qinau.

Yakooboofa narí faiqi námu qaaramoó ufa máree narí áfasaafa Eesáu funnái fuaqeera niiqoofaqá Eedoomma máqa máaqai fiqau. Miqóo qiní qífasaana paqúrimmásee qini maa ufána qímamiaqa. Qinée Yakooboosa aní aináinira fáiqi maaqí qímasee ani Eesáuna qiní úriqararana qímamidaqa. Qinee Rábannana faqa máridaqa ánirara másaidaqa máriifaqá maqee ánidaqa. Qinee burimmakáu faqa doonkíuqa faqa sipsípa faqa mimmíuqa faqa aináinira fáiqiuqa faqa faqáasa máridaqa. Qinee aníara ufa quqáidaqa qiní úriqararafa qini maa ufáfa aní asooámamaqaanífeera qídaqa.

Ufa máreefu fásiqausa óonu randée anirée Yakooboona maaqí qímasee qímamiqa qiqau. Dóo maasa aní áfasaana qímamisáunanoo mifá narí aináinira fásiqauqa foo handaréeta 400 námu faqa maasá ínaaqíanna ánidanoo.

Yakooboofa mi ufána írufanoo áaququqoofanóo moómoo írirana máranau. Miqúfanoo narí sipsípauqa faqa mimmíuqa faqa burimakáuqa faqa kamméerauqa faqa qaarakí rainá quqánau. Maaqí qímasee qímirinau. Eesáufa aniréenoo moó úsiranaki nárinaqa moó úsiranakiqari amaná sandéefaranoo. Miqímmasee Yakooboofa maaqí qímasee innaaru qinau. Óo Ánutu, qini qínaakuna Abaraqaammána Ánutufa qiní qikoona Isakeena Ánutufa qiní innaaru íria. Karaambáiqa anée qiní qíma qímiananoo aneenná maqa máaqai aneenná áinainiannai fínaqa qinée aiqáma áinaina andeeqá áisaanauranoo fee qinau. 10 Óo Ánutu anée qiní ámiqi ámiqimma qísarana faqa aní mapukíra dádaaqiranara faqa írunanoo úriqaráifaqa qinee óorudupiqa maridaqa. Qinee óoqai Yóoradanna nammari qeeqá sáunu kaí úqirausa táqaqiafana doo maqeé qinee qaaraki rainárausa faqa ánidaqa. 11 Qinee qeeqá qífasaana Eesáuna ásaukukinaana asumu mara quqáqisaanneera innaaru qídaqa. Qinee minára rufíaidaqa. Mifa aniréenoo maasá faiqì ánaasee faqa aiqáma dáru taikáandoora rufíaidaqa. 12 Anée maaqí qímasee qiníara qíma afeekaíkinau. Aní aiqáma áinaina andeeqámma áisaanauranoo fee qinau. Aní moómoo faiqi asumu ámianaqa sía amana moó fannoo ásaana rúannoo, núkudara foorá sía kásoo uqanná márifaranoo fée qinau.

13 Yákooboofa miqí qímaseenoo innaaru qímaseenoo mi eendánaki miqóo faiqéenoo iáqoofanoo narí aandáù Eesáuna ámiraree qímasee rainá quqánau. 14 Mifá mimmí ánaasee 200 faqa mimmí ákoona 20 faqa sipsípa ánaasee 200 faqa sipsípa ákoona 20 fáqa rainá áaduma quqánau. 15 Miqímmaseenoo kaifáa kamméera ánaasee 30 fáqa nárì ánaaqi náamma néemarusa fáqa burimakáù ánaasee 40 faqa ákoona 10 fáqa doonkí ánaasee 20 faqa ákoona 10 fáqa rainá quqánau. 16 Yákooboofa raíneeqeenoo aandáù óosana óosana náadu náadu káì quqáseenoo narí aináini máru faiqísa moodáa moodaa máreeqeenoo mináuqasaa rakísiaqeera quqánau. Quqáseenoo maaqí qímasee qímanniminoo qinau. Ínnee qini qífunni fídaqa adaaráika másaidaqa níana niana máridaqa fuaqa.

17 Miqí qímáseenoo Yakooboofa indaarúfu faiqina qímaminoo qinau. Qiní qífasaafa Eesáufa paqúri máseenoo iráinana yáfee aní úriqararafa máridanoo fee yáifée anée fídanee yána aandáùqee anée máree fídanee, qínana anee maaqí qímasee narí qímamia. Maa aináusa aní aináinira fáiqi Yakooboooonaindí máridanoo. Mifa narí úriqararana Eesáuna ámiannee qímasee quqásaifaqa máree ánidaqa. Yákooboofa narí ínaaqianna ánidanoo mifoo qia.

19 Yakooboofa indaarú fu faiqina qímamundee kái mínoo miná ánaaqiana fusá fáqa miqí kaimmásee qímanniminau. Ínnee Eesáuna paqúrimmasee miqí kaimmásee qímamiaqa. 20 Ínnee maaqí qiaqa. Eeóo aní aináinira fáiqi Yakooboofa ínaaqianna ánidanoo mifoo qiaqa. Yakooboofa narí kai óonu máfi írinoo qinau. Qinée maa ainaináusa ámiannanannoo miná írirana quandásaananoo qiníara ámiqi ámiqiani. Qinee miná paqúrimásaananoo aqbee mifá qiní numoóo minníqisaannoo. 21 Eesáuna ámaqoo áinainausa indaarú fífufanoo doo narí miqóo mi uiqaana maqusánaki faiqanau.

Yakooboofa Peenieera máqa máaqai angiroo faqa narí qumáree narí qumáree qu úfafa.

22 Mi eenda amuqusánai Yakooboofa fíndi fufanóo narí ánaaqa qara fáqa narí aináinira ánaasee qandá fáqa narí faiqi námu qísaukuqara taikásee qíkunni óoqu moodáa marasée 11 nífiqamáreenoo Yabooka námmari fítaqamáreenoo muqú áfainai múnu nísanau. 23 Múnusee niiqámasoofaqa fufanoo narí aiqáma áandauqa faqa mara quqásoofaqa misá faqa táqaqau. 24 Taqá nímaqaseenoo naríaraa dinni áfainni káqi márinau. Márufanoo faiqí moó fánnoo aniréenoo áitata fufanóo Yakooboona qumáranau. Uaqéeidanoo narí rúdammiqi narí rudámmiqi ídamárufanoo iáqarafa adeedí ranau. 25 Sía mi fasiqáfa Yakoboona úraaqaránau. Miqí usíanoo ásauku sámu Yakooboona úpisuna áranaiqi árinau. Miqúbaqa Yakooboona úpisuna árufanoo ámudaani ootúparafa aikátamáfufanoo raaqee ráaqee inóo ninau. 26 Iáqoofanoo mi fasiqáfa Yakooboona qímaminau. Doo qiní quqásainaqa fúa, doo iáqarafa adeedí reenoo. Yakooboofa iriséenoo qinau. Sía aní quqáanaura. Anée qiní qifaaqóoqa qíma qímaqásainaqa quqáanaura.

27 Mi fasiqáfa Yakooboona qímaminoo qinau. Aní áuqu yáfee. Aneenná áuqu ráinaqa íria. Yakooboofa qinau. Qiní dúqu Yákooboosa máridaqa.

28 Miqí qufanoo mi fasiqáfa qinau. Maqee maaqóoqari Yakooboofa taikáannoo aní áuqu Isaraeerafá márinnaranoo. Anée Ánutuna fáqa faiqí faqa áitatáfi qumáraanannannoo úriqararafa márianaqa minára aní áuqu Isaraeerá fée qídaqa.

29 Miqí qímasoofanóo Yakooboofa mi fasiqána qímaminoo qinau. Aneenná áuqu qímaqímia. Miqú qufanóo mi fasiqáfa qinau. Nánaree anee qiní dúqu írirara iráidanee. Miqí qímaseenoo Yakooboona afaqóoqa qímama qáseenoo doo quqáseenoo finau. 30 Mi fasiqáfa fífufanóo Yákooboofa qinau. Qinée Ánutuna óori qáfamáseeqa sía kúqiqa káqi máridee qímaseenoo miqóo áuqureenoo Peenieera fée qinau. 31 Súani afu ururoofanóo Yakooboofa Peenieera máqa quqáseenoo úpisuna áidafi márufanoo réetaa réetaa qinóo finau. 32 Miqooqari óosana arasée Isaraee máqannaasa sía aandáù úpisunakinaa ámaqi néemariqau. Maqee fáqa sía náidaqa. Ánutuna angiroo fannóo Yakooboona úpisunaki árunara íridaqa sía náidaqa.

Copyright information for `BJR