Genesis 33

Yakooboofa Eesáuna paqúrinau.

1Yakooboofa qáfoofanoo Eesáufa 400 fasiqa faqa áninau. Yakooboofa miná qáfamáseenoo narí faiqi námu raínásee Reeaa námmarina faqa Ráseera námmarina faqa aináinira ánaasee qaaraqánda faqa níminau. 2Nimiséenoo indaarú narí aináinira ánaasee qára faqa nárì faiqi námu faqa niiqoofaqá fiqau. Misá nínaaqianna Reeaa námmarifa narí faiqi námu fáqa finau. Ínaaqianna uqanna Raseera námmarifa narí faiqi Yóoseefaana fáqa finau. 3Yakooboofa misá nóorinni indaarú finau. Óonu réenoo dínni taikásee dínni óonu qaara marasée kári maqásaa mapáminoo fífiufanoo narí áfasaafa máruqoo óonuranau.

4Eesáufa Yakooboona óori qáfamaséenoo sandámámmáreenoo ani káqaramma qumáraseenoo ámooqánanau. Miqandá aiqáma qára qikí ráqaqau. 5Qikí raqaséenoo Eesáufa quandá fufanóo Yakooboona faiqì ánaasee níndafamaséenoo qinau. Máà aní faqa ániasa yáusee máridee. Qufanóo Yakooboofa qinau. Oo úriqararafa maa faiqì anaaseesánnoo Anutufa qiní ámiqi ámiqimma qímaqeenoo.

6Miqí qímarufanoo Yakooboona aináinira ánaaseeqara nárì faiqi námu faqa Eesáuna óorisaa ani ninuka túqu náumoo amisée reendeéniqau. 7Miqandá nínaaqianna Reeaa námmarifa narí faiqi námu fáqa aniréenoo miqínau. Miná ánaaqianna uqanna Raseera námmarifa narí faiqì Yooseefaana fáqa aniréenoo miqikai inau. 8Miqíma soofanóo Eesáufa Yakooboona maaqí qímasee qímaminau. Fáasai qáfaunna áandausa óosana náqaa fee inóo máridano fee qufanóo Yakooboofá qinau. Aní áqoondikiraree qímasee káqi aní ámidaqa.

9Miqí qufanoo Eesaufa narí qímaminoo qinau. Qiníndi moómoo máridanoo aneenáindi aneenná kai máraà.

10Miqí qufanóo Yakooboofa qinau. Qinée aní áqoondikiqa ámunna áinainausa káqi máraa. Anee qiní káaqa aqoondi kíannanara qínee aní óori Ánutuna óoriará foorá qáfaidaqa. 11Qinee ani ámiraree qímasee máree ánunna ainainausa máraa. Anutufa qiní ámiqi ámiqimma qiseenoo qiní dídimari aiqáma ainaináusa qíminoo. Yákooboofa máraanifeera afeekaikí márufanoo Eesáufa máranau.

12Eesáufa Yakooboona qímaminau. Doo uqéeraina aníndiri fúà qinée aní óorinni fúanana anée qiní qínaaqianna ánià.

13Qufanóo Yakooboofa qinau. Óo qiní úriqararafa anée írià, qiní faiqì námu ummooqúkiqa máriafaqa qinee sipsípa faqa misá ánaaqiuqara faqa íridaqa. Misá moodáa fáasaana rarisáqa fímarianaqa aiqáma áandáuqa kúqifaranoo. 14Anée indaarú fínaqa qinee aní áfaqee kásooaqee qeeqá aandáuqa faqa faiqì námu faqa fífiinaqa Eedoomma máqa máaqaki aní paqúrianauranoo.

15Miqí qufanóo Eesáufa qinau. Dóo amaná qiní faiqì námu akaqáusa aní dadaaqí fifáranoo. Qufanoo Yakooboofá qáoo qinoo qinau. Qinee aní áqoondikúnnanara minára kaí firaa ainaineé qídaqa. Doo amaná qeeqá kai fuanáuranoo.

16Eesáufa mi ufána iriséenoo doo mi faasaanná kaí anirandée narí maqa máaqai Eedoomma máqa máaqai finau. 17Miqúfanoo Yakooboofa Sukoota máqa máaqai óonureenoo narí máaqa faqa narí aandáu auqaaná faqa usakánau. Minára mi maqusána áuqureenoo Sukoota fee qinau.

18Yakooboofa Meesoopootamía máqa máaqaindari óonurandee ámiqimmaseenoo Kannaana máqa máaqai Seekeemma máqusaki aniréenoo narí úiqaana máqa mi maqusána adeedí usakánau. 19Usakáseenoo Yakooboofa mi maqána Amoorana Seekeemana ákoona áiku ásauku unnái wan handareeta 100 siruáa múnnimmannoo feefaurínau. 20Feefaurú máseenoo tatúfirana suqára qáinda áuquseenoo mi kaqikaa maqusána áuqureenoo Eeraa fée qinau. Mi auqúna óosana Isaraee máqannaasa Ánutu fée qinau.

Copyright information for `BJR