Genesis 34

Seekeemmafa Dinnaa námmarina mandáikámma ámaqanau.

Moó kári Dinnaa námmarifa Yakooboosa Reeaa námmarisa niraamuna fannoo Dinnaa námmarifa Kannaa máqannaa ánaaseeuqa níndafàanée qímaseenoo finau. Seekeemmafa Amoorana ámaaku Qifina áiku ásaukukinaafa mi maqa maaqánakinaasa úriqararafa Dinnaa námmarina aanai paqúrimaseenoo rarisanau. Mifá qáfoofanoo Dinnaa námmarifa káaqa ámiqirafa márufanoo ámuqusa mandáikufanoo ámiqira úfannoo mi manaaqána ámuqusa reendeénianée qímasee ámiqira ufauqa qinau. Seekeemmafa narí ákoona Qamoorana qímaminau. Anée maa manaaqána feefaurúmma qíminaqa qínaaqara máraà.

Yakooboofa narí áraamuna Dinnaa námmarina rarisoonára iriséenoo kásoo inóo márinau. Narí faiqì námu narí aandáusaa rakísi marúsa níanai márufanoo nífeesi márinau.

Seekeemmana ákoofa Ammoorafa Yakooboona faqa ufa qírara finau. Oonuroofaqá kai Yakooboona faiqi námu aandaùsaa rakísiusa aniraqau. Misá Dinnaa námmarina rarisoonára írufanoo sía faiqí áuqaaqaa íra áinaina márufaqa káaqa níranaqeenoo nífai sándurinau. Seekeemmafa Yakooboona áraamuna rarisoonánnoo Isaraee máqannaasa núqu mara máree qúminau.

Qamoorafa maaqí qímasee Yakooboona qímamínau. Qiní qímaaku Seekeemmana írirafa aní áraamunara firaaqóo áqufifaqa aní qímamidaqa. Amanéè mina máraannoo fee. Sáinaqa maasá moodáanaki kíra ufa qímasáanaqa káqi aní máqannaa faqa qiní máqannaa faqa káqi narí máree narí máree iaqa. 10 Miqí mándaanaqa ínnee maa maqánasaa máridaqa káqi dapi maa maqa maaqánaki óonuree anirée ídaqa maqá ákausa máriaqa. 11 Seekeemmafa Dinnaa námmarina ákoona faqa ásooqmaaka faqa qímanniminoo qinau. Ínnee qiní dídi márindee másaifaqa ínni nídi marí áinaina nímianaura. 12 Ínni nídi marí áinainnara qímaqimifaqa nímianaura. Firaa feefauruara qífaqa nímianaura. Ínnee qiníara miná máraannee qímasee ínnee iráifandinna áinainná kai nímianaura.

13 Miqí qímasoofaqa Yakooboona faiqì námu nárì nísookina rarisoonára iriséeqa ákaru qíra úfa Seekeemmana faqa miná ákoona Amoorana faqa qímannímiqau. 14 Maaqí qímasee qímamíqau. Maasá sía amana qeeqá dáuna nifaaqa áti sía aukírausa nímianaura. Miqíqa maasa firaaqóo qisaurúanoora. 15 Ínnee maasá daanna réeqa ínneeqa faiqi námu nifaaqa áti aukúsaifaqa minára kaí maasá eedóo qianáuranoo. 16 Miqímmásaifaqa maasá ínniara eedóo qímasee ínni faqa narí máree nari máree ífaranoo. Maasa ínni qámbaana máridaqa ínni faqa moodáa máqannaa márianauranoo. 17 Ínnee sía mi ufánara eedóo qímasee nifaaqa áti ateekáifaqa maasá qeeqá dáuna áfiqámaree doo fuanáura.

18 Mi ufáusara Qamoorafa faqa miná ámaaku Seekeemmafa faqa iriséeqa amanée qiqau. 19 Seekeemmafa kái káqi uqanná ínoo misá qímamúndee inau. Mifa Yakooboona áraamunara áidi márunara miqínau. Seekeemmafa narí áiku ásaukukiqari káaqa úriqararafa márinau. 20 Amoorafa narí ámaaku Seekeemmasandíri ufa súqimaru máqusanasaa faandaaura kooqíki óonuree nárì maqusánaki márusa maaqí qímasee qímanniminau. 21 Maa fasiqáusa áqoondiuqa máridaqa. Sáifaqá maa maqánasaa máridaqa mána mána iqá nuaqa. Maa maqáfa firaafá máridanoo. Misá faqa amaná márifaranoo. Maasá misá níraamuqmaaka máraanaqa misá faqa maasáindi máreefaranoo. 22 Maa fasiqáusa maasá qámbaana márirara eedóo qídaqa moodáa máriranaki máriranara eedóo qídaqa. Maasa misá naanna réeqa qeeqá faiqi námu akoonaiqíuqa nifaaqa áti ateekáaqeera qídaqa. 23 Maasá miqíànaqa misáki sipsípa burimakáu aina márifa maasáindi kámmiannoo. Ánifaqa eedóo qíanaqa maasá qámbaana máriaqa.

24 Aiqáma mi maqusánakinaasa Qamoorana fáqa Seekeemmana fáqa ufa iriséeqa eedóo qímasee aiqáma akoonaiqí qísakoosa nifaaqa áti aukú áqiqau.

25 Qaarammoó fáasaana áiqaroofaqa nifaaqa áti aukúqoosa firaaqóo nammúana nídafi márufaqa Yakooboona ámaaku qára Simeeoonafa fáqa Réefifa fáqa miqandá Dinnaa námmarina ásooki qanda nárì faaqaaná qara mara máree umeé kaí Seekeemma máqusai óoru réeqara aiqáma faiqí kumaaráa náru taikáqau. 26 Qamoorana fáqa Seekeemmana fáqa narusée Dinnaa námmarina Seekeemmana máaqakinaana áfiqamaree doo quqásee fiqau. 27 Narusoofaqa Yakooboona faiqi námu akaqáusa ínaaqianna óonu réeqa nárì nísookina rarisooná ákiiqara mi maqusánakina aiqáma ainaina máraqau. 28 Misá sipsípauqa fáqa burimmakáuqa faqa doonkíuqa faqa aiqáma áinaina mi maqusánaki máruna faqa mi maqusána átiqara máru ainaináusa aiqáma máraqau. 29 Misá aiqáma ámiqira áinaina kaí máraqau. Aiqáma faiqì ánaasee faqa máraqau. Aiqáma máaqakinaa áinainauqa faqa máree fiqau.

30 Yakooboofa míqunara írinoo Simeeoonná fáqa Réefina fáqa maaqí qímasee qímanniminau. Ínneeqara qiní ummaaraki quqáqisáafanoo. Kannaa máqannaasa fáqa Peerisaa máqannaasa faqa aiqáma maa maqa maaqánaki máriasa qiníara fídiaqáammifaranoo. Qiní faiqí sía moómoo máriafaqa, misa aiqáma moodáanaki anirée qiní dáriqa aiqáma maasá faiqì ánaasee kurídi nímaqeefaranoo. 31 Yakooboofa miqí qufaqa miqandá narí qímamíqa qiqau. Maasá sía qeeqá qísookína quqáqaanaqa aanásaa ánaaseerá foora káqi máraqa nifáranoo.

Copyright information for `BJR