Genesis 38

Tamaara námmarifa Yúdana ákaru qinau.

Mi aukuanná Yúdafa narí áinaina minníseenoo Qiraana faqa Aduramma máqusai óoqu márinau. Miqóo Yúdafa Kannaana máqannaa fásiqa Suana áraamuna qáfamasee máranau. Máriufanoo mi anaaseefá ámuaqu qáikinoo akoonaiqí maqasoofanóo Yúdafa miná áuqu Eera feé qinau. Kafaa máriufanoo mi anaaseefá ámuaqu qáikinoo faiqi moó maqaséenoo miná áuqu reenoo Oonaneé qinau. Kaifáa ámuaqu qáikinoo akoonaiqí moó maqaséeoo miná áuqu Seeraa feé qinau. Yudafa Keesiba máqusai márufanoo miná ánaaqa fannoo Seeraana máqanau.

Yúdafa narí indarúqaa faiqì áuqu Eerafa innooqá fufanóo ánaasee Tammaara námmarina mára áminau. Eerana márirafa Karaambáiqa áfusaa mandáika uqanná ufanóo kuqá árinau.

Kúqufanoo Yúdafa miná ákaqa Oonana qímaminoo qinau. Anee maasá óosana máreenana aneenná áfasaana ánaaqa faqa aaná fínanoo faiqi maqasainanóo aní áfasaana áuqu sía taikáani. Oonanafa miná iriseenoo maaqí qímirinau. Qinée faiqì maqasáananoo sía qiníndi kíandoo qímaseenoo narí áfasaana ánaaqa faqa aaná nídanoo káqinni kai nammári adíee marínau. Narí áfasaana faiqì asumu sía márianifeera miqí márinau. 10 Oonanafa mi oosanná mároofanoo Karaambáiqa qáfoofanóo mandáika uqanna ufanóo miná kuqámma árinau.

11 Kuqufufanóo Yúdafa narí ánaakuqu Tammaara námmarina qímaminoo qinau. Aneenná ákoona maqa máaqai óonu adeedaana káì márinaqa Seeraafa innooqá fínaqa miná fáqa aní kaí ámianaura. Seeraafa faqa narí áfasaaqanda undée ínoo mi anaaseená marasée kúquandoora miná ákoofa miqíqinau. Miqí qufanóo Tammaara námmarifa narí ákoona máaqai finau.

12 Máriufanoo Yúdana ánaaqa Suana áraamuna kúqinau. Kuqufufanóo soofaara taikáseeoo Yúdafa narí áqoondi Aduramma máqusanaana miná áuqu Qiraana fáqa Timinaa máqusai narí sipsípa asausí aukímaruna níqafarara óoru finau.

13 Faiqí moó fánnoo Tammaara námmarina qímaminau. Aní ánaakuqu Timinaa máqusai narí sipsípa asausí ateekárara óoru fídanoo fee qinau. 14 Tammaara námmarifa mi ufána iriséenoo adeedaana márida afisíu qamunnana raipáquséenoo moó qámunna afisúmareenoo narí óori káqikaa qamunnannái ititáseenoo Eenaimma máqusaki fímaru áannanasaa óoqufaaqée márinau. Tammaara námmarifa Seeraafa innooqánoo márifanoo sía qímiannoo fee qímasee miqínau.

15 Yúdafa ani qáfoofanoo qamunnannái óori rafáaqafusee márufanoo dapi máraqa nua ánaaseefá mifoo qinau. 16 Miqí qímaseenoo aaná áfainni mi anaaseefá márufanoo óonuree qímaminau. Aní rarisáma sáana miná ákiiqara náqumma féefauru fée máridanoo fée. Yúdafa mi anaaseenára sía narí ánaakuqu fée qímasee miqí qinau. Miqíqufanoo mi anaaseefá qinau. Miná ákiiqara nanée qíminnaree.

17 Miqí qufanóo Yúdafa qinau. Qinee mimmí moó timmusa aní ámaqaanaura. Miqí qufanóo mi anaaseefá qinau. Anée moó áinaina qímiqaina uaqéeiana kásooaqee mimmí qíminna kari aninná ámianaura.

18 Miqí qufanóo Yúdafa qinau. Nána áinainee ámianauree. Miqí qufanóo mi aneeseefá qinau. Aneenná ásaukukinaa ísaaqama faqa aneenná sáunu faqa qímia. Miqí qufanóo Yúdafa mináuqa amiséenoo mi anaaseená faqa aaná númasoofanoo ámuaqu qáikinau. 19 Tamaara námmarifa fíndi fufanóo nari maqúsai óonureenoo dapi anaasee máraqanu qámunnana raipáqusee adeedaana qámunna kaifáa afisínau.

20 Yúdafa narí qáqoondi Qiraanasáa mimmí ánaaqi timmusa quqáseenoo múnu mi anaaseená amisée narí aináina uaqéeuna óonu míni qímiannee qufanóo óonu randóosiaa sía mi anaaseená paqúrinau. 21 Mifa óonureenoo Eenaimma máqusanaa fásiqauqa irámirinoo qinau. Yáifee dapi máraqanua ánaaseefa maa aannána áfainni óoqufaaqéeiufa máridanoo fée. Miqí qufaqá misá qiqau. Sía maa maqusánaki dapi máraqanua ánaaseefa máridanoo.

22 Miqí qufanóo mi fasiqáfa kafáa anirandéenoo Yúda funnái óonureenoo qímaminau. Óo qinée sía mi manaaqána paqúriqa. Mi maqusánakinaa fásiqauqa faqa qíqa, sía óoqaindari maasá maqúsaki dapi máraqanua ánaaseesa márida míaafoo qía.

23 Miqí qufanóo Yúdafa qinau. Sáina mi anaaseefá mi aínaináusa uaqée iani. Faiqí maasára naanaidara qifóora qíkooqaidanoo. Minára qinee mi anaaseená feefaurú ámirara qúnana anée óonuree sía paqúriananoo.

24 Qaarammoó qúqoona áiqaramáfufanoo Yúdana qímamiqa qiqau. Aní ánaakuqu fannoo dapi máraqanua ánaaseesara foorá númaseenoo maqee mifa ámuaqu qáikinoo máridanoo. Yúdafa mi ufána iriséenoo qinau. Mi anaaseená máree múnusee idárasaifanoo qáani.

25 Misá áfiqee fímarufanoo narí ánaakuqu Yúdanara ufa quqánau. Qinée maa ainaináusa faqáa fásiqa faiqi úqa faqa máridaqa. Qafamásee íria, yána aináinauqee máridanoo fée. Maa qisaaqamáfa fáqa miná sánda fáqa sáunù fáqa yánaindi fée máridanoo fee.

26 Yúdafa qáfamáseenoo qinau. Maa anaaseefá andeeqánoo máridanoo. Qinée kai áaqeeqa. Qínee qeeqá qímaaku Seeraana ámiaqaana. Miqí qímaseenoo Yúdafa sía kaifáa mi anaaseená faqa aaná finau.

27 Mi anaaseená faiqi máqarafa aniroofaqa qáfeeqa qiqau. Maa anaaseefa qaara faiqì máqaannoo fee qiqau. 28 Faiqì máqarara aupúree márufaqa moo fánnoo náaree ásauku quqásoo qumuroofanoo mina innaammuna áfeesu ánaaseefa ásauku qumáraseenoo taatuqée sánda rumbáseenoo qinau. Maafá indaarúqaafa máridanoo. 29 Miqí qímasoofanóo ásauku raqándaamma mároofanóo moó káiqeena náaree máqanau. Maqasoofanóo innaamunaí áfeesu ánaaseefa qinau. Anée náqaa fée ifanée káqinnaindari anée náaree qúmidanee. Minára miná áuquréenoo Peereesaneé qinau. 30 Miná ínaaqianna miná ákaqa taatuqée sánda ásaukusaa rumbárana máqanau. Maqaséenoo miná áuqu Séeraa feé qinau.

Copyright information for `BJR