Genesis 4

Káinasa Ábeerasa ufa.

Adamafa narí ánaaqa Éewana faqa aaná númásoofanoo ámuaqu qáikinoo faiqì maqaséenoo miná áuqu Kainafeé qinau. Maqaséenoo Éewafa qinau, Ánutufa dadaaqifaqá qinée faiqì akoonaiqí máqeeqa. Kafaa máriufanoo faiqi moó maqaséenoo miná áuqu Ábeeranee qinau. Ábeerafa innooqáfinóo kooqíkinaa áandausaa rakísirafa márinau. Miná áfasaafa Kainafa innooqáfinoo áfuqakina aináini marúfa márinau.

Máriufanóo moó kári Kainafa narí áfuqakinaa áinaina maraséeoo Ánutuna tatúfirana suqá áminau. Ábeerafa mifá faqa Ánutuna tatúfu ámiraree qímaseenoo narí fírimaru aandausákinaana óoqasáa máqarana afaaqafaqáana aruséenoo ámíqira áfaaqa kai tatúfirana suqá áminau. Ábeerana tatúfirana Ánutufa qáfeenoo ámiqira fée qímasee asasinau. Kafaa Kainaindí qáfamasee minnísanau. Kainafa miná qáfoofanóo firaqóo árana qoofanóo óori runínau.

Ánutufa Kainana qáfamaseenoo qímaminau, nánaree aní árana qáidanoo fée. Nánaree aní oori mianní qúmidanoo fee. Anée ámiqira áinaina áuqeenanau asasá míanáiqini. Anée mandáinaina áuqaannanara numóo fannoo aní kooqíki aní ámaara úsinoo maridanoo. Mifá aní rafáaqa fírarinana anée miná úraaqaraa.

Miqí qímasoofanoo Kainafa narí ákaqa Ábeerana qímaminoo qinau. Áninaqa aaná fúa. Miqandá moósaa óonureeqa Kainafa narí ákaqa Ábeerana kuqá árinau.

Árusoofanoo Ánutufa Kaina irámirinoo qinau, aní ákaqa Ábeerafa yáifee máridanoo fee. Kainafa qinau, Ábee qinee sía íridaqa, anee qiníara narí ákaqasaa rakísimarifee fée qídanee.

10 Ánutufa miná iriséenoo qinau. Kaina anée nánee máreenee. Anée íria, aneenná ákaqa fidíka maqásaa téeqiananoo. Mi fidikáfa miná ákiiqara íannee qímasee maqákiqari qiní dáaraifaqa íriqa. 11 Anee aneenná ákaqa fídika maa maqánasaa téeqiananoo maqá qóo raqáfinaki aní ákaqa fidíka minakí kéeqeenoo. Minára qinée aní áqurara ufa ámeemaanai quqáidaqa. Anee sía kaifáa maqáki nárana ummaqusaida neennáranoo. 12 Anée nárana úmmaqusáinanoo maqá fánnoo sía aní nárana ámiannoo. Minára anee máaqa síainafa máridana áiku qúqirafa máaqa máaqa káqi ninnáranoo.

13 Kainafa minára iriseenoo Ánutuna qímaminóo qinau. Anée qummaara firaaná qiní qímiananoo sía qinée amana uqéeráanaura. 14 Qinee maa maqánasaa aní afusaa márunnana anée diqiqáanaqa qinee qíku qúqirausa aiqámatinai nuanaura. Qinée máaqanna máaqanna dapíkiqa núànanóo yáfee qiní qíqafainafa mifá kuqá dáruannoo.

15 Karaambáiqa minára iriséenoo qímaminoo qinau. Sía miqífara, faiqí moó fánnoo yáfee aní árinnana qinée miná ákiiqara dínni taikásee dínni ani qaaraqanda marasée náruanaura. Miqí qímaseenoo karaambáiqa Kaina afaaqasáa sía áruaqee akara quqánau. 16 Miqóoqari Kainafa Ánutuna óorisaaqari fínoo Éedeena kadida aaqáqari súani óosana qáannai moó máqa máaqai miná áuqu níku qúqirausa nùa máqusa fee qímarunnai finau.

Kainana áiku ásauku núqu.

17 Miqóo óonureenoo Kainafa narí ánaaqa faqa faiqi moó akoonaiqí maqaséenoo miná áuqu Éenookánee qinau. Kainafa narí ánaaqa faiqi máqoo kari maqúsa moó áuquseenoo mi maqusána áuqu narí ámaaku amaránaikinoo Éenooká máqusa fée qinau. 18 Éenookafa faiqí kámmafinoo akoonaiqí Iradana máqanau. Iradafa faiqí kámmafinoo akoonaiqí Meequyaeerana máqanau. Meequyaeerafa faiqí kámmafinoo akoonaiqí Metusaeerána máqanau. Metusaeeráfa faiqí kámmafinoo akoonaiqí Rámeekana máqanau.

19 Rámeekafa faiqí kámmafinoo qaara anaasee máranau, mooná áuqu Adaa námmarifa moona áuqu Siraa námmarifa máriqau. (Adaa námmarina áuqu óosana ámiqira fée qímaqoofa márinau. Síraa námmarina áuqu óosana auqaaná fee qímaqoofa márinau.) 20 Indaarúqaa ánaasee áuqu Adaa námmarifa faiqì moó Yabarana maqasoofanóo fíndifinoo aandáu apatannái uíqaana maqa usakásaida nímarusa níkoofa márinau. 21 Yabarafa fírimaru aandausásaa rakísi márusa níkoofa márinau. Yabarana ákaqa Yubarafa márinau. Mifá fíndifinoo qufíreena fuaqée márusa faqa piripúnna árimarusa faqa níkoofa márinau. 22 Rámeekana ínaaqiana ánaasee moó Siraa námmarifa márinau. Mifá akoonaiqí Tubarakaina maqasoofanóo fíndifinoo koopáannai faqa qáinnannai faqa aináina áuqimarúfa márinau. Tubarakainana áuna auqu Naammaa námmarifa márinau.

23 Rámeekafa narí ánaaqaqara maaqí qímasee qímanniminau.

Adaa námmarisa Siraa námmarisa qiní ufa íriaqa,
Qinée Rámeekausa qiní qínaaqaqara ufa qíanaqa ámiqimmasee íriaqa.
Faiqí moó fánnoo kaakadi dárifaqa qinée miná kuqámma áriqa.
Ásauku sámu qiní dárina ákiiqara mi kumaaraaná kuqámma áriqa.
24 Moó fánnoo Kainana árinnana ákiiaqara Ánutufa dínni taikásee dínni ani qaara marasée 7 fásiqa náruannoo. Moó fánnoo qiní Rameekausa dárinnana ákiiaqara Ánutufa fíqaramasee 77 fásiqa náruannoo.

Seetana áiku ásauku núqu.

25 Adamafa kaifáa narí ánaaqa faiqì mara amisoofanóo ámuaqu qáikinoo akoonaiqí moó maqaséenoo miná áuqu Séetanée qinau. Miqí qímaseenoo miná ánoofa qinau. Ánutufa qiní qímaaku moó qíminoo narí áfasaana Ábeerana ámaaqa máqaanifeera qíminoo mifá Kainafa áruna ámaaqa máqaannoo.

26 Séetafa innooqáfinoo akoonaiqi Éenoosana máqanau. Éenoosafa máru kámuqooqari óosana arasée misá Ánutunara innaaru qídaqa minára náaqura Karaambaiqée Yáawee fée qídaqa innaaru qímariqau.

Copyright information for `BJR