Genesis 40

Yóoseefaafa karafúsaki marusa qainúna kooroo qímaru ufafa.

1Káqikaaqóo márinoo Isipa máqannaa karaambáiqa úainna ànoona tatímaru fásiqafa faqa miná féemu suqée márufa faqa náriqa úriqararana mandáikamma ámaqaqau. 2Mandáikamma ámaqasoofanoo mi qandára áranaqoofanoo narí sundíauqara qufaqá qumáraqau. 3Qumáraseeqa sundíauqa úriqararana karabúsa máqaki Yóoseefaafa máru maqánaki quqánau. 4Mi qandá kísaaqasaa karabúsaki márufanoo karabúsasaa rakísirafa qufanóo Yóoseefaafa misásaa rakísi márinau.

5Miqóo karabúsaki máridaqa moó éendaki úainna táti márufa faqa féemu suqée márufa faqa qaíniqau. Úainna táti márufa miná qaína óosana áaduma márinau. Féemu suqée márufa miná qaína óosana áaduma márinau.

6Mi kananaanná miqandá nóori runúsee márufanoo Yóoseefaafa ani níndafeenoo irámirinoo qinau. 7Ínneeqara nánaree káaqa moómoo írira írida máridee. 8Qufaqá miqanndá qiqau. Maaqandá qaína máqaqee ídaqa qaína óosana qímannimi márifa sía márifaqa maaqandá minára óonu máfi írida máridaqa. Yóoseefaafa miqandá ufa iriséenoo qíma níminau. Ánutufa kai qainá óosana qímannimirana nímidanoo. Ínneeqa qaína qíma qímifaqa íria. 9Miqí qímasoofanóo Fáraoona úainna námmari táti marú fasiqáfa narí qainá maaqí qímasee Yóoseefaana qímaminau. Qinée qáfaunanoo úainna sánda qiní dóorinni márifaqa qáfeeqa. 10Qaarammoó ásaana minásaa márifaqa qáfeeqa. Ámanee ifaqá qáfaunanoo áfuféenaarifaqá qáfaunanoo qaqama irafí akuqéenoo. 11Qinée karaambáiqa Fáraoona káafa uaqéeidaqa akuqámafina minakí anoona tatiisée múnu ámiqa.

12Yóoseefaafa miná iriséenoo maaqí qímasee qímaminau. Sánda qaarammóo ásaana qáfaannana miná amana qaaramoó fáasaana márinnara. 13Qaaramoó fáasaaana taikáinanoo Fáraoofa aní idukú áisainana kafáa aneenná saikáki finnáranoo. Ánee óoqai miná úainna tátira fáiqi máridana miná úainna káafa ámiunnándee ínana kaifáa áminnaranoo. 14Anee miqimma fínana qiníara qimudáoo qímasee karaambáiqa Fáraoona qímaminanoo qiní dadaaqínoo idukú qísaani. 15Misa óoqai qiní Qeeburu máqusaindaraana úmmuara mámaree ániqau. Qinee maaqóo Isipa máqa máaqaki márida sía moó mánda óosana máreeqa. Misa fífau qiní karabúsaki quqáqaafaqa máridaqa.

16Féemu suqée márufa narí aqòónnana qainá óosana qímamuna írufanoo ámiqufanoo Yóoseefaana qímaminoo qinau. Qinée faqa moó qaínammiqa. Qinée qaarammoó féemu dífaani qumbiqárana qíkiiaaqa akuaqée ídaqa qáfeeqa. 17Meeráqooqaraa dífaaniki óosana óosana féemu áinaina úriqararanaindi márifanoo ufiniuqá née máriafaqa qáfeeqa.

18Yóoseefaafa miná qainá óosana iriséenoo maaqí qímasee narí qímaminau. Qaarammoó dífaani qáfaanafa qaarammoó fáasaana máridanoo. 19Qaaramoó fáasaana amana mina qaaramoó féemu dífaani márifana qáfaananoo. Qaaramoó fáasaana áiqaráinanoo Fáraoofa aní ani qumáreenoo múnusee ánuka ateekásee aní irí saqárisaa dirisáinaqa ufiniuqá aní amaqí neefáranoo.

20Miqíqimasee qíma nímisoofanóo miqóoqari mi qaaramoo faasaanná áiqaroofanoo mikarí Fáraoona máqoo aukuanafa aniroofanóo nárana firaaqóo suqáseenoo narí aináinasaa rakísi márusa níminau. Mifá narí úainna táti máruna faqa féemu suqée máru fásiqana faqa idukúmaree míni narí aináinasaa rakísi márusa nífusaa quqánau. 21Idukúseenoo úainna táti máru fásiqana maréeqee óoqai máreeu sáikanaki kafáa quqásoofanóo úainna tátimarinau. 22Féemu suqée máruna idukúseenoo anuka ateekásoofaqa sándannai miná qirí saqárisaa díriqau. Aiqáma áinaina Yóoseefaana ufamáu andeeqáseenoo mimáu kaímbinau.

23Úainna táti márufa kafáa Fáraoona aináinidanoo Yóoseefaanara síamma írinau. Qaunúsee márinau.

Copyright information for `BJR