Genesis 46

Yakooboofa narí áiku ásauku faqa Isipa máqusai óoqu fú ufafa.

Yakooboofa narí aináina indáaíi máreenoo Beeraseeba máqusai óoqureenoo miqóo narí ákoona Isakeena Ánutuna aandáù tatúfirana súqaminau.

Miqóo eendáki faiqaqée ufanóo Ánutufa qainásaa áfu náreenoo qinau. Yakooboo Yakooboo qufanóo Yakooboofa foó qímaseenoo qinau qinée maaqóo máridaqa.

Qufanóo Ánutufa qímaminoo qinau. Qinée Ánutusa aní ákoona Ánutusa máridaqa. Anée sía Isipa máqasaa óoqu fíraranara rufíaa. Mi maqánasaa óoqu márinaqa aní áiku ásauku firaa maqanaasaikámma nísaanaura. Qinée aní fáqa Isipa máqasaa óoqu fúanaura. Yóoseefaafa aní faqa Isipa máqa máaqaki márinana máriinana kúqinnaranoo. Máriinaqa kásooaqee kafáa ani áiku ásauku maréeqee kafáa Kannaana máqasaa quqáanaura.

Beeraseeba máqusa Yakooboofa quqásee Kannaana máqa máaqai óoqufinau. Miná faiqì námu Yakooboona faqa nári faiqì ánaaqiuqa faqa nári nínaaqmaaka faqa máreeqee qóosa rarisée marú karána Isipa máqannaa karaambáiqa Fáraoofa nímaqoonasaa quqásee nífiqee óoqufiqau. Misa nári aandáu áina faqa náriqa umíasana faqa Kannaa máqasaa marídaqa maqéeiunauqa aiqáma máree óoqu fíqau. Yakooboofa narí áiku ásauku aiqáma nífiqee óoqu fínau. Yakooboofa narí faiqi námu fáqa narí ánaiqi mára akoonaiqíuqa fáqa narí áraamuqmaaka faqa narí ánaiqi mára mánaaqauqa faqa aiqáma nífiqee óoqu fínau.

Yakooboona faiqi námu Isipa máqasaa óoqu fúsa maaqí miqá máriqau. Yakooboona óoqa fáiqi Reeubeenáfa márinau. Reeubeena faiqi námu Qanookafa fáqa Parufa fáqa Qeeseeroonafa faqa Karamifa faqa máriqau. 10 Simeeona faiqi námu Yeemueerafa faqa Yaminafa faqa Ooqadafa faqa Yakifa faqa Sooqarafa faqa máriqau, misa aiqámausa moodáa ánaasee faiqi námu máriqau. Moó ánaasee faiqi Saurafa márinau. Miná ánoofa Kannaana máqannaa ánaasee márinau.

11 Réefina faiqì námu Keerasoonafa faqa Kooqafa faqa Meerarifa faqa máriqau.

12 Yudaana faiqi námu Seeraafa faqa Peereesafa faqa Siraafa faqa máriqau. Yudaana faiqi qaaraqánda Eerafa faqa Oonanafa faqa máriiufaqa Oonanafa Kannaana máqasaa kúqinau. Peereesana faiqi qára Qeesaroonafa fáqa Qamurafa fáqa máriqau.
13 Isakarana faiqi námu Toorafa faqa Puaafa faqa Yasubafa faqa Simaroonafa faqa máriqau.
14 Seeburuna faiqi námu Seereedafa faqa Eeroonafa faqa Yareerafa faqa mariqau. 15 Miqímmaseenoo Reeaa námmarifa Yakooboona faiqi námu Meesapotamia máqusai máridanoo máqanau. Mánaaqa moodáa áuqu Dinnaa námmarifa miná fáqa miqóo máqanau. Doo Reeaa námmarina faiqi námu mánaaqa akoonaiqí aiqámausa 33 máriqau.

16 Kadana faiqi námu Seefoonaa faqa Qakifa faqa Sunifa faqa Eesaboonafa faqa Eerifa faqa Aroodifa faqa Areerifa faqa máriqau. 17 Aseerana faiqi námu Iminaafa fáqa Isauaafa fáqa Isififa fáqa Beeriaafa fáqa misá nísookifa Seera námmarifa faqa máriqau. Beeriaana ámaaku qára Qeebeerafa faqa Marakieerafa fáqa máriqau. 18 Dóo miqímmasee Yakooboona áiku ásauku 16 nári aináinira mánaaqa Rábanafa Reeaa námarina ámuna Siripaa námmarinasaa máqanau.

19 Yakooboona ánaaqa Raseera nammarifa faiqì qaaraqánda máqanau. Yóoseefaafa faqa Beensaminnafa faqa máriqau. 20 Yóoseefaana faiqiqára qaaraqánda Isipa máqasaa kambíqaqau. Miqandá núqu Mannaseefa fáqa Eefaraimmafa fáqa máriqau. Miqandá nínoofa Aseenata námmarifa márinau. Aseenata nammarina ákoona áuqu Pootifeeráfa márinau. Mi fasiqáfa Qeerioporisa máqannaa amaana máqasaa rakísi marúfa márinau.

21 Beenasaminna faiqi námu maaqímmiqa máriqau. Beerafa fáqa Beekeerafa fáqa Asabeerafa fáqa Keerafa fáqa Naamanafa fáqa Eeqifa fáqa Roosafa fáqa Mupimafa fáqa Qupimafa fáqa Aratafa fáqa máriqau. 22 Dóo miqímmasee 14 Yakooboona áiku ásauku Raseera námmarinasaa qari kambiqaqau. (Rabanafa Biriqaa námmarina narí aináinira mánaaqa Ráseera námmarina narí áraamuna ámufanoo mifá maréeqeenoo narí afaaqi Yakooboona ámufanoo faiqi maaqí mándee máqanau.) 23 Biriqaa námmarina indarúqaa faiqi Dannafá márinau. Dannana faiqi moodáa márinau miná áuqu Qusimafá márinau. 24 Biriqaa nammarina faiqi moó Nafatarifá márinau. Nafatarina faiqi námu maaqí miqá máriqau. Yaqaseerafa fáqa Kunifa fáqa Yeeseerafa fáqa Sireemafa fáqa máriqau. 25 Dóo miqímmasee Yakoobooona áiku ásauku 7 narí aináinira manáaqa Rabanafa Raseera námmarina ámunasaa Biriqaa námmarinasaa máqanau.

26 Yakooboona áiku ásauku uqanna Isipa máqasaa óoqufusaa aiqáma moodáanaki 66 máriqau. Misá nínaakuqmaaka sía nísaanariqa. 27 Yóoseefaana faiqì qára Isipa máqasaa kambíqaqau. Miqandá fáqa Yóoseefaana fáqa Yakooboona faqa moodáanaki ootúpamásee 70 fásiqa óoqu fíqau.

Yakooboofa narí áiku ásauku faqa Isipa máqusai máru ufafa.

28 Yakooboofa Yúdana aiqoofanóo indaarú óoqu Yóoseefaana qímaminanoo Kooseena máqasaa misá paqúriani féera aiqanáu. 29 Yóoseefaafa narí qóosa rarisée marú karánaki akaráma fufanóo Kooseena máqa máaqai narí ákoona paqúrirara finau. Óonu paqúrimmaseenoo Yóoseefaafa narí ákoona anukakí óonu mafi káqaramma umáreenoo kísaaqasaa ikí ráqee márinau.

30 Ikí ráqee márufanoo Yakooboofa Yóoseefaana qímaminoo qinau. Dóo qinée kúqiraridaqa qinée maqee aní qáfeeqa anée sía kúqina máriana káqi máriana.

31 Yóoseefaafa ikí raqaséenoo narí áfasausa mára fáqa narí ákoona áiku ásauku aiqáma fáqa qímanniminoo qinau. Qinée Fáraoofa máriqoo óoruree ínniara qímamianaura. Qiní qíkoofa fáqa qiní qífasausa fáqa Kannaana máqusaindari qinée márunnannai qumuréeaa foo qianáura. 32 Qinée ínniara sipsípasaa rakísi máriasa máridaqa náriqa sipsípa faqa burimakáu faqa náriqa aiqáma áinaina faqa máree qumiaa foo qímasee qímamianaura. 33 Qinée miqí qímasee qímamisáananoo Fáraoofa ínni náaramásee ínnee aináini márianara iráinaqá maaqí qímasee qímamiaqa. 34 Óo maasá úriqararafa maasá qikeekú qikaaku óoqai sipsípa kai rakísi marúsa márufaqa maasá fáqa maqee minásaa kai rakísidaqa. Ínnee miqí qímasee Fáraoona qímamifánoo mifá Kooseena máqa ínni nímiannoo. Isipa máqannaasa sipsípa rakísiranara níkoo uqanná qáidanoo. Minára ínni náaduma sáa Kooseena máqa nímiannoo.

Copyright information for `BJR