Genesis 48

Yakooboofa Eefaraimána faqa Mannaseena faqa nifaaqóoqaqu úfafa.

Káqikaaqóo mári kufaqá misa Yóoseefaana qímamiqau. Aní ákoofa dóo ámiqimma aurídanoo. Yóoseefaafa mi ufána iriséenoo narí ámaaku qára Mannaaseesa Eefaraimasa níndiqeenoo narí ákoofunnái óoqu fínau. Misa Yakooboona qímamiqau aní amaaku Yóoseefaafa aní qáfarara qúmidanoo fee qufanóo Yakooboofa afeekaikámmasee fíndi fufanóo narí qaarísaa óoqu marínau.

Óoqu mari fufanóo Yakooboofa Yóoseefaana qímaminoo qinau. Óoqai qinée Kannaana máqa máaqaki núafannana kínai Rusa máqa máaqaki máriafánanoo Ánutufa aiqáma áfeeka faqáafa akooqoo kooroommá fufanóo qiní qifaaqóoqa qíma qímaqanau. Mifa maaqí qímasee qiní qíma qíminau. Qinée moómoo faiqi asumu ámiana anísaaqári ani aruakínausa moómoo máqannaasaika mifáranoo. Qinée maa maqána aní aíku ásauku nímiananoo naaru naaru misáindika minóo máriannoo.

Aní ámaaku qára Isipa máqasaa kambíqara qánda qinée Kannaana máqasaa káqi márunaqa kambíqaa qanda Mannaseesa Eefaraimasa qiní faiqi qára Reeubeenása Simeeoonasara foorá márifaranoo. Anée akaqá faiqì námu maqa sáinausa misá aníndika mámbi márifara. Misá nárì nífasaa qanda Mannaseesa Eefaraimasakínaa qúmiasana ainaina máree fáranoo. Qinée aní ánoona Raseera námmarinara íriqa miqí qídaqa. Mifá qiní firaa qímudaoo qíranaki Kannaana máqa máaqaki kúqinau. Qinée Meesapootamia máqa máaqaindari ani máriafananoo aanái Eefarataa máqusa aaqá kúqinau. Qinée miná irí Eefarata máqusai fímaru aanná áfainni ákundaqiafana. (Maqee Eefarataa máqusara Béedeeree máqusee qídaqa)

Yakooboofa miqí qímaseenoo Yóoseefaana ámaaku qára níndafeenoo qinau. Maaqandá yána faiqi qáree.

Qufanóo Yóoseefaafa qinau. Qiní faiqì qára Ánutufa Isipa máqasaa máriafananoo qímu qandá máridaqa. Yákooboofa mi ufána iriséenoo qinau. Dóo miqandá nífiqee maí qinée únnaqoo adeedí mínisáinaqa nifaaqóoqa qíma nímaqaa. 10 Yakooboofa náuraiqi márunara sía ámiqimmasee áfu máqee marínau. Yóoseefaafa narí ámaakuqara mínisoofanoo óonu máfi káqaramma qumáreenoo nímóoqánau.

11 Nímooqa námasee Yakooboofa Yóoseefaana qímaminoo qinau. Qinee sía kaifáa ani qáfaanauree qúnanoo Ánutufa kaí qifaqá aní faiqì námu níqafaidaqa. 12 Miqí qímasoofanóo Yóoseefaafa narí ákoona áfundana sáaqaraana narí faiqi qára qumáreeqeenoo narí ákoona áfunni óorindari maqásaa áqufinau. 13 Yóoseefaafa narí ákoona áfusaa kummáráma fufanoo Eefaraimmana mara múnu Yakooboona ásaaqai quqáseenoo Mannaseena miná ásaukuannai quqánau. 14 Quqásoofanóo Yakooboofa ásauku qára fíqaree áiqaree mámbufanoo ákáqa Eefaraimana sáa ásauku uqannái quqéenoo áfasaana Mannaseena sáa ásaaqai ásauku quqánau.

15 Miqí mándeenoo Yóoseefaana afaaqóoqa qímamaqeenoo qinau.

Qiní qíkausa mára Abaraqaammána faqa Isakeena faqa níkoofa Ánutufa maa faiqísa ámiqi ámiqimma nímaqaani. Qiní qífiqamaree maaqoo maqee míniqaifaqa márunna Ánutúfa misá ámiqi ámiqimma nímaqaani.
16 Qiní óosana óosana mádainaina kínaana ititá qímaqoo qangiroófa misá ámiqi ámiqimma nímaqaani.
Qiní dúqu faqa qiní qikooqandá Abaraqaammasa Isakeesa núqu faqa maa faiqì qandásaa máriani.
Miqandá moómoo fáiqi maqasáifanoo moómoo miqandá kíqari kambíqafi máriaqa.
17 Yóoseefaafa narí ákoona ásauku qáfoofanoo aundurá mandái kufanóo narí ákoona ásauku qumáreenoo áfasaanasaa ásaaqai ásauku quqáqoona maréeqee ákaqasaa quqásee ákaqasaa ásaukuannai ásauku quqáqoona maréeqee áfasaanasaa quqárara qinau. 18 Óo qípoo anée sía andeeqáananoo indaarúqaafa maí máridanoo aneenná ásauku uqannái ásauku miná ákiiqasaa quqáaqaana.

19 Miqí qufanóo miná ákoofa qáòo qída qinau. Qiní qímaaku qinée íridaqa miqídaqa. Indaarúqaafa mifá fáqa miná áiku ásauku moómoo márifaranoo. Ínaaqiannáana áiku ásaukuqa firaa afeeka maqannaáuqanna márifaranoo narí áfasaana óoraaqaránoo máriannoo. 20 Miqí qímaseenoo mi faasaanná nifaaqóoqa qíma nímaqeenoo qinau.

Isaraee máqannaasa nifaaqóoqa qíqa anísaa qímasaida qifáranoo.
Misá maaqí qifáranoo Anutufa Eefaraimmana fáqa Mannaseena undéemma ámaqaani. Miqúnannai Yakooboofa Eefaraimmana uqéerasee Mannaseena rafáaqa fínau.
21 Miqí qímaseenoo Yakooboofa Yóoseefaana qímaminoo qinau. Qinée kúqirara mídaqa Ánutufa aní faqa máridanoo aní áfiqee aninná akeekú akaakú maqásaa óoru fúannoo. 22 Seekeemma máqa máaqa ámiqirafa máridanoo. Qinée óoqai qeeqá durú feefannóo Amoora máqannaasa faqa rakusée máraafanna máqana aní ámianaura sía aní ákaqaa fasáauqa nímianaura.
Copyright information for `BJR