Genesis 50

Yóoseefaafa narí áfasausamara asooára ufa qímannimu ufafa.

Yakooboofa kuqu fufanóo Yóoseefaafa aundurá mandáikufanóo narí ákoona qirísaa roofeebáaqa mámbufanóo narí ákoona óori ámooqeenoo qikí ráqanau. Qikí raqaséenoo Yóoseefaafa Isipa máqannaa óosana máreenoo tutáqausa qímannímufaqa aniréeqa sía kái káqi mandáikianifeera marasínna óosana óosana akuámaqee máriqau. Misa Isipa máqannaasa óosana maraséeqa qaara fasiqa níku nísauku taikásee 40 faasaanasáa marasínna Yakooboona qirí akuámaqaqau. Isipa máqannaa qaaramoó fásiqa faqa qísaukuqara taikásee 70 fáasaanasáa Yakooboonara ikí ráqaida soofaarí máriqau. Soofaarírana taikásoofanóo Yóoseefaafa Fáraoona aaqá márusa úriqararausa qímanniminoo qinau. Innee maa ufána mara máree múnu karaambáiqa Fáraoona qímamiaqa. Qiní qíkoofa kúqirara ídanoo qíma afeekaikámmasee qiní qíma qíminoo qinau. Qinée kúquanana qiní qirí mara máree Kannaana máqa máaqaki óoni áamara deedaqammá qáafannanaki qíkundaa. Minára amanée qinée óorureeqa qeeqá qíkoona minakí ákundamaséeqa qúmuanauree.

Minára Fáraoofa irisée qímaminau. Doo óoruree aneenná qíma afeekaíkianandee ínana aneenná ákoona ákundamasee qúmua. Yóoseefaafa narí ákoona ákundarara óorufufaqa Fáraoona aaqá úriqararausa márusa faqa Faraoona kóota írimarusa úriqararausa faqa Isipa máqannaasa indaarúnniki ímaru fasiqáusa faqa Yóoseefaana faqa óoru fíqau. Miná áiku ásauku faqa miná áfasausa mára faqa miná ákoona áiku ásauku akaqáusa faqa aiqámausa Yóoseefaana faqa óoru fiqau. Misá aandáù faqa faiqì ánaaqiuqa faqa káqi kaí Kooseena máqa máaqaki máriqau. Akaqáusa qóosasaa óoru fíqau. Akaqáusa qóosa rariséemarú karánaki óoru fíqau. Yóoseefaana fáqa faiqí tatúfufaqá óoru fíqau.

10 Misa aiqámausa súani óosana qáanai Yóoradana námmari áfainni sakuma faqa ráisa adiuqá mara qáqimaru maqusánasaa óoruree misa firaaqóo kísaaqasaa soofaariqau. Yóoseefaafa narí ákoonara qísauku dínni taikásee dínni ani qaara marasée 7 fáasaana soofaarinau. 11 Kannaana máqusanaasa miqóo márusa ikí ráqoona qáfamásee qiqau. Níndafaaqa Isipa máqannaa firaaqóo fáaqa rúmasaida ikí ráqaida. Miqí qímaseeqa misa mi maqusána áuqu Abeera Misaraima fée qímariqau. Mi auqúna óosana Isipa máqannaa soofaaríra máqusa fée qiqau.

12 Yakooboona faiqi námu nári níkoofa qímannimundee iqau. 13 Misa nári níkoona qirí mara máree Kannaana máqa máaqai óoruree Makapeeraa máqa máaqaki Mámaree máqusa súani óosana qáannai márufaqa miqóo óoni áamaraki ákundaqau. Qeeta máqanaa fásiqa mina áuqu Eefaroona Abaraqaammáfa feefaurú máqoonaki quqáqau. 14 Yóoseefaafa narí ákoona ákundamaséenoo narí fáqa fusá narí ákaqaafasaauqa fáqa moosá fáqa kafáa anirandée Isipa máqusai fiqau.

Yóoseefaafa narí akaqaa fasáauqa áqoondikira ufa níminau.

15 Yóoseefaana ákaqaa fasáauqa misá níkoofa kuqufufaqá Yóoseefaanara rufíeeqa narí qímami narí qímami qiqau. Óoqai maasa Yóoseefaana mandáika mámaqaafánausa márida. Miná ákiiqara íannoofee. 16 Misa miqí qímaseeqa Yóoseefaa funnái ufa quqáseeqa maaqí qimasee qímamiqau. 17 Óo Yóoseefaa maasá qíkoofa kúqiraridanoo aníara maaqí qímasee maasá qímaqiminau. Yóoseefaa aní ákaqaafasaa aní mandáika mámaqoonara qaunúmmasaa síamma íria. Misá aní mandáika mámaqoonara dóo qinée mi ufána óosana íriqa. Maasá qíkoofa miqí qunára minára maasa aní qímamidaqa. Ani akoona Ánutuna aináinira fáiqiuqa maasa aní mandáikamma ámaqaafánna númoona minní qísaa. Miqí qufanóo Yóoseefaafa minára iriséenoo ikí ráqanau.

18 Miná ákaqaa fasáauqa minára iriséeqa aniréeqa náriqa Yóoseefaana óorinni maqásaa kummárama fufaqá qiqau. Maasa aní aináinira fáiqi kákai mámbi márianaura.

19 Yóoseefaafa iriséenoo qinau. Ínnee sía qiníara rufíaaqa. Sía qinée qeeqá qifaaqa Ánutuna ámaaqa máqaanaura. 20 Kúqaa ínnee qiní mandáikamma qímaqaaneera tipúndaarufanoo Ánutufa miná mara quandásoofanoo ámiqinau. Moómoo maqee káqi máriasa márirana dadaaqíanifeera miqínau. 21 Sía rufíaaqa. Qinée ínni fáqa ínni faiqì ánaasee faqa nárana nímida rakísi nímaqaanaura. Miqí qímasee Yóoseefaafa narí áinaina nifaaqa quqáaqeera qíma níminau.

Yóoseefaafa kúqu ufafa.

22 Miqóo Yóoseefaafa Isipa máqannai narí áinaina fáqa káqi márinau. 23 Mifá wan handeréeta faqa qísauku qára faqa 110 maraséenoo kúqinau. Yóoseefaafa miqóo máridanoo narí ámaaku Eefaraimmana faiqì fáqa qáfanau narí ánaiqi fáqa narí afaqnáusa faqa níndafanau. Yóoseefaafa Mannaaseena faiqì Makirana faiqi námu narí afaqnáusa marasée fírinau. 24 Kúqiraridanoo Yóoseefaafa maaqí qímasee narí áinaina qímanníminau. Qinée kúqirarammidaqa. Qinée kuqu fúànanoo Ánutufa ínnisaa rakísidanoo ínni indaarúnnikinaqa ooqai Abaraqaammána fáqa Isakeena fáqa Yakooboona fáqa qíma afeekaíka mándee nimiqoo máqanasaa ínni níndiqamaree miqóo múnu quqáannoo. 25 Yóoseefaafa minára kaí kafáa qímanníminau. Ánutufa ínni nífiqee fínaqa qiní qímudaani fáqa mara máreeqa miqóo múnu madikáma qísaaqa. Ínnee minára qíma afeekaí kífaqa qinee íria. Misá irisée qíma afeekaikámmasoofanóo Yóoseefaafa kúqinau.

26 Yóoseefaafa Isipa máqa máaqaki máridanoo wan handeeréeta faqa qisauku qara faqa 110 áukuana maraséenoo kúqinau. Kuqufufaqá misa sía kái káqi putaá íanifeera mi marasinná aku ámaqaseeqa bukísaki quqáqoofanoo márinau.

Copyright information for `BJR