Genesis 9

Ánutufa Nooana faqa moodáanaki kinau.

1Ánutufa Nooana narí faiqi námu fáqa nifaaqóoqa qínoo qinau. Ínni asumu moómoo kambíqafi aiqáma máqa máaqa amana kái máriaqa. 2Aiqáma áandauqa faqa ufiniuqá faqa noodáanna faqa ínniara rufíaranaki máriaqa. Misá ínni afeeka ámeemaanai máriaqa. 3Innee maaqóoqari sía ándanda kai náaqa mi aandausá namu faqa naaqa. Ínnee náranara foorá naaqéera nímidaqa.

4Innee moodáa ainainá kaí sía naaqa, fidíka amaqíki márinnana kaí sía naaqa. Mifá márirana nímimarífa márinara sía naaqa. 5Faiqí moó fánnoo faiqí faiqì fidíka ruqíqainaqa qinée miná ákiiqara ummaara ámianauranoo. Aandáù moó fánnoo faiqí faiqì kuqá nárinaqa qinee mi aandauná kuqá áruanaura. 6Ánutufa faiqí faiqì narí fooqáasa áuquqoonara yáfee mooná áuqu qímasee kuqá árinnana akaqáusa miná ákiiqara narí árifaranoo.

7Ínnee moómoo faiqì maqasáifaqa aiqáma máqa máaqaki amanaikámmafi máriaqa.

8Ánutufa Nooana faqa narí faiqi námu faqa kaifáa qímanniminoo qinau. 9Maqee qinée ínni faqa ínnisaaqari kásooaqee kambíqainausa faqa moodáanaki kíra úfa qidaqa. 10Aiqáma áinaina ufiniuqá faqa aiqáma aandáuqa faqa aní faqa sípakiqari ánusa faqa moodáanaki kianáura. 11Maa ufáusannoo qinee moodáanaki kíra ufa ínni faqa qídaqa. Qinée kúqaa qíma afeekaiká qídaqa sía kaifáa nammári áufirafa faiqí faqa aiqáma áinaina faqa náruannoo. Sía uqanna kafáa nammári áufirafa maa maqa maaqána mandáikíannoo.

12Qinee náaru márira móodaanaki kíra ufa aní faqa aiqáma áandauqa faqa dóodaaniuqa faqa qúnafa maaqí qímasee uqannífiqaanaura. 13Qinée qeeqá óondanda oonnámuki quqáanaura. Mifá qinée maa maqánasaaqaraasa faqa moodáanaki kírana uqannífiqaannoo. 14Yáiree fée qinée oonnámunnai innaarúná ititá sáananoo miqóo óondanda kambíqaannoo. 15Oonnámuki óondanda raféeqna fínaqa qáfeeqa qinée aní faqa aiqáma áandau dóodaani faqa qíma afeekaikíra ufara irisée sía kaifáa nammári áufirafa náruannoo. 16Óondanda oonnámuki raféeqnáinaqa qáfamáseeqa náaruara qinee ínni maqásaaqaraasa faqa náaru márira móodaanaki kíra ufa qíafannanara írianaura.

17Minánnai qinée aandáuqa faqa dóodaaniuqa faqa qíma afeekaikíafanna ufana kooroo ídaqa.

Nooana faqa narí faiqi námuara faqa qídanoo.

18Nooana faiqi námu sípakiqari ánusa núqu maaqímminoo márinau. Séemmafa faqa Qámmafa faqa Yáfeetafa faqa máriqau. Qámmafa Kánnaana ákoofa márinau. 19Nooana mi faiqi qaaramoo namúsa aiqáma maa maqánasaaqaraasa nikeekú nikaakú máriqau.

20Nooafa áfuqaki áinaini marufa márinau. Mifa indaarú óosana arasée áfuqa áuqusee uáinna sanda moómoo úmmaqinau. 21Mifa uáinna aqama tatiséenoo moómoo néeneeséenoo fúrufara máseenoo narí qamunna raipáquseenoo narí úiqaana máqaki káqi sámu faiqanau. 22(Yáfeetafa indaarúqaafa Séemafa miná ánaaqianaafa márinau Qámmafa ínaaqianaafa márinau.) Qámmafa Kannaana ákoofa máridanoo aniréenoo narí ákoofa káqi sámu faiqaqée ufanoo óonu qáfeenoo narí ákaqaafasaaqara náaramáseenoo qímanniminau. 23Séemafa faqa Yáfeetafa faqa minára iriséeqa qáòo qímasee qamunna marasee moó fánnoo dínni áti narí áururusaa quqásoofanoo moó fánnoo dínni áti narí áururusaa quqáseeqara nínaaqianaindari uíqaana máaqaki kéeqa fíqaqara nárì níkoona afaaqa ititá ámaqaqau. Miqandá nóori káqinni quqásee nisaurúanoo qímasee sía nárì níkoona qáfaqau.

24Nooafa kásooqaqee írirafa kambíqafufanóo narí ínaaqianaa fáiqi mifa áuqoo áinainnara írinau. 25Iriséenooo maaqí qímasee áquráranau. Qinee aní ámaaku Kannaanasáa áqurara úfa quqáanaura. Anee aneenná ákaqaafasaauqa saiká fáiqi mária. 26Miqí qímaseenoo Nooafa quandáfinoo Qammana ákaqaafasaa qarara maaqí qinau.

Karaambáiqa Séemana Ánutuna amooqírana ámia.
Kannaafa Séemana aináinira fáiqi máriannoo.
27Ánutufa qínanoo Yáfeetanakiqari moómoo kambíqafiqa miná faiqì námu Séemana faiqì námu fáqa moodáanaki márifaranoo.
Miqíqa márifanoo Kannaafa Yafeetana aináinira fáiqi máriannoo.
28Nammári áufirafa taikóofanóo miqóoqari Nooafa 350 áukuana maraséenoo kúqinau. 29Miná áukuana aiqáma moodáanaki 950 áukuana maraséenoo kúqinau.

Copyright information for `BJR