Hebrews 13

Ánutuna áidiramau fíra naakaparufa.

Ínnee ásauku mundíranaki márianara naríara naríara moodáa fasiqa ánaasee faiqiara foora úriqarara ainainee qímasee sía fífau nóonnoo kai nímuqusí marínaqa naríara naríara ruaqa ásaukunnoo áuqaidana naríara naríara ruaqa. Miqí kai ída sía taikáaqa. Ánaamuru sía óori qáfainna maqannaana ámiqi mándee nárana ámiqa máaqa ámiaqa. Akaqáusa miqídaqa sía irirai qangiroo ámiqi ámiqiqau. Ínnee karabúsaki máriasara misá faqa karabúsaki máridara foora ámiqimmandee rakísinnimaqaaqa. Ásauku mundírana ufasáara aupúree maríasa sía aunúaqa. Ínnee misá faqa moodáanaki aupúraranara foora nímuqusí marínaqa rakísinnimaqaaqa.

Ínnee aiqámausa faiqí ánaasee nimundáranara úriqarara ainainee qiaqa. Faiqí áneesee áqumummásainafa sía moonáindi quándaki qumáraa. Aiqámausa ínneeqá nammári kai néeqa andeeqásee máriaqa. Faiqí ánaasee dapi narí máree narí máree qiqá nuasa faqa qúmmuariqa nuasá faqa Ánutufa ufa iriséenoo náruannoo.

Ínni írirafa márirafa munnimma áinainara sía káaqa rída máriaqa, maqee máree maría ainainnara dóo amana máridee qímasee afaaqa quqásee mária. Ánutufa minára maaqí qinau.

Qinée sía ínni minnísee moosáa fuanáura. Ínni faqa
náaru márianauree qinau minára afaaqa quqásee mária.
Maasá mi-ufána iriséeqa paasóosamaseeqa máridaqa maaqí qianáura.

Karaambáiqa maasá dadaaqímarifa máridanoo
Minára maasá sía rufíaanaura,
Náqimasee maa-maqánasaa qaraasa maasá dárifaree. Sía
amana dárifaranoo.
Óoqai indaarú Ánutuna ufa qímannimusara sía aunúaqa. Misá ámiqi máriranara faqa misá kúqiranara faqa misá Ánutuna saqárikiranara faqa iriséeqa misá nímeeraameerá kai ída máriaqa. Yísufa ásauku mundírafa sía minakí óosana óosana írirafa márifa. Eendá faqa maqee faqa náaru náaru faqa amanamana kái andeeqára írira óosana márifa máridanoo. Ínnee faqa miqíaqa. Akaqáusa Ánutuna ufara óosana óosana írirana uqéeraidaqa. Ínnee sía misá naanna réeqa óonuree aniréeaiqa. Ánutuna áfaariranara mi-iriráfa kai ínni nimana mapukú nímaqainaqa máriaqa, mifá andeeqárafa ámiqirafa máridanoo. Óosana óosana sándufa moo nárana néeqa moo nárana sía néeqa mi-ufána qímaqoonannai sía ínneeqa nimana mapukúsee márifaranoo, mi-ufána mároosa sía mi-ufáfa misá nimana mapukú nímaqanau, sía misá dadaaqinau minára ínnee Ánutuna áfaariranara íriaqa.

10 Óoqai Yuda máqanna aanáiqikirausa Ánutuna úqiqaana maqa rakísimarusa Ánutuna ufamau fídaqa qaindásaa qaraa aandau tatúfirana suqée marúna akaqána marasée naqau. Maasá aandáu tatúfi maría qaindára foora moo máridanoo. Óoqeenáa uqiqaana máqakinaasa sía amana minásaaqaraana marasée nooqíni. 11 Óoqeenáa uqiqaana maqaki moodáa faasaana moodáanaki kíra faasaanasaa misá úriqararafa aandáu fidíka maréenoo firaa naaquqara maaqaki óonureenoo qaindásaa téeqimáseenoo ráudamaki mi-aandauná apata ámudaani amaqí aiqáma sía naqau, mara máreeqa faiqí naambeéqai múnu idá áree mariqau.

12 Miná amanakái Yísufa Yeerusaree máqusa naambeéqai kúqinau. Narí fidíkannai faiqí ánaasee mandáinaina findaukámannisáanifeera miqínau. 13 Maasá faqa Yísuna dadaaqíqa óoqeenáa máaqa naambeéqaira foora Yísufa máriqoo miná asaurírana dadaaqí máraanauranoo. 14 Maasá kásooqaqee uqanna maa-maqánasaa sía máridanoo. Maasá kásooqaqee kambíqaaninna máqusara innaarúnaindaraanara rakísidaqa. 15 Dóo minára maqee maasá maa-maqánasaa máridaqa Yísunannai Ánutuna dúfi dúfi qímamaqaidaqa. Maasá aandáu tatúfirana fooqáafa dúfi dúfi qírafa máridanoo. Maasá Ánutunara kúqaa ánoonnee qímaria noonákiqari minára dúfi dúfi qírafa maqee maqee kambíqaidanoo. 16 Maa-ainainná faqa sía aunúaqa, narí ámiqi narí ámiqiaqa, ínneeqa aináina ínnee íriranannoo kai raíneeqee niqoónausa narí ámi narí ámiaqa. Ánutufa miqíra ainainara ámiqira tatufira aandaura foora máridanoo fee qídanoo qáqaara ráidanoo.

17 Ínnee ínneeqa úriqararausa qínnandée kai iaqa. Misá Ánutuna saiká máraidaqa ínni nimanara maqee maqee rakísidaqa. Ánutufa kásooqaqee misá ínnisaa rakísiranara iráannoo. Ínnee misá ufara eedóo qífaqa misá asasammásee mi-ainainnámmifáranoo. Ínnee misá ufa rukíaifaqa misá nifaaqa qumooqukídaqa níkoo nikáa ifáranoo. Misá níkoo nikáa ídaqa sía ínni dadaaqifaranoo.

18 Ínnee maasára maqee maqee innaaru qiaqa. Maasá qimana sía moo áinainara íridaqa andeeqáraqóo kai fíranara rídaqa ínni qímannimidaqa. Ínnee minára maasára faqa innaaru qiaqa. 19 Qinée qeeqára faqa ínni qímannimidaqa. Ínnee qiníara faqa innaaru qífanoo Ánutufa qiní dadaa qínaqa ínnee ínnannai káqi káqi fúa.

Ánutufa ámiqi ámiqimma nímaqaanínnufana.

20 Náaru náaru moodáanaki kírana Yísufa ásauku mundírafa kúqiranannai miná fidíkannai dóo mapukúseenoo máridanoo. Ánutufa miná kúqiranakinaana uqéereeqeenoo faiqí ánaasee rakísirana firaanáikamáqaifanoo máridanoo. Narí kúqiranannai faiqí ánaaseesaa rakísirafa máridanoo. 21 Ánutufa asooárana faqaafa ínnee miná íriranamau fifándinna oosana akoofásaikirana ínni níminaqa fuaqéera. Ánutufa ásauku mundíranannai maasá faqa maréeqeenoo narí áidira óosanaki narí íriranamau fíranaki quqánnisáani. Aiqáma amooqírafa faqa káaqa aréenarafa faqa ásauku mundíranaindi náaru náaru máriannoo. Kúqaa.

Áti ufa.

22 Óo qiní qíkaqaafasaa ínnee maa-ufána ámiqimasee ásaana ruaqa. Dadaaqíra ufa máridanoo sía kísaaqa ákara ríqa minára qímannimidaqa. 23 Qinée maa-ainainnára faqa qímannimidaqa. Maasá qíkaqa Timootifa dóo Roomma máqannaa karabúsaki Yísuna ufasáara rumbáqoofa idukínoo máridanoo. Mifá dauní dauní maí aniráinaqa áfiqee ínnee márinnaqoo óonureeqa maaqandá ínni níqafaanaura.

24 Ínnee maasá qímandarana ínni úriqararausa faqa aiqáma Ánutuna ufa írimariasa faqa qímannimiaqa. Itari máqannaasa maaqóoqaraasaki máriasa ínni níkaqaafasaa máriasa ínni nímandaidaqa.

25 Ánutuna áfaarirafa ínni faqa máriani.

Copyright information for `BJR