Hebrews 3

Yísufa Mooseena úraaqararafa máridanoo.

Qiní qíkaqaafasaa ínnisaimbaqa Karaambáiqa áiku óosana márunausa máridaqa ínnee faqa qinée faqa Ánutufa dáarama quqásaifaqa ani máriasa máridaqa. Ínnee Yísuna qáfaaqa qáfaidaqa óonumafi íriaqa Ánutufa aqiqámaqoofa máridanoo. Maasá qímarunna amaana ufana aanáiqikira úriqararafa márianífeera aqiqámaqoofa máridanoo. Óoqai Mooseefa Ánutuna áiku ásauku Isaraee máqannaasaki aiqáma ainaina áuqeemaruna miqóo kai máridanoo óori runúsee andeeqánoo kai márinau. Yísufa miqíkai máseenoo narí ásauku mundúsee aqiqoofa Ánutunara iriséenoo miná aináinirana andeeqáidanoo áidimarufanoo márinau.

Faiqí misá fúka maaqa qáfamasee sía máaqa amooqídaqa faiqí máaqa usakái fasiqaná kái amooqídaqa. Miqíkai íqa, sía Mooseena amooqiaqa. Mifá fífau máaqa máridanoo Yísuna kai ámiqimasee firaaqóo amooqiaqa. Mifá máaqa usakée marífa ánoona uqanna máridanoo. Sía máaqa moo fífau kambíqaidanoo. Aiqáma maaqa usakéemarifa kai usakáidanoo. Ánutufa mifá aiqáma ainaina áuqeemarifa márifanoo Yísufa Ánutuna ámeemaanai máaqa usakée marífa márinara Mooseena úraaqáranoo máridanoo. Mooseefa Ánutuna áiku ásauku Isaraee máqannaasaki maqee maqee miqóo kai máridanoo óori runúseenoo andeeqánoo kai márinau. Mifá Ánutuna aináinira faiqi máridanoo. Ánutufa qímannimianinna ainainara faiqí ánaasee qímannimimarufaqa írimariqau. Yísufa sía káqi aináinira faiqi máridanoo. Isaraee máqanaasa níkoofa ámaaku uqanna máridanoo. Mifá Ánutuna áiku ásauku maqásaa máriasa rakísinnimaqee márifa miqóo kai mi-saikánaki márifa andeeqásee misásaa rakísimarifa máridanoo. Maasá náaru náaru Yísuna saqárikidaqa minára asasídaqa paasóosidaqa miqídaqa maasá Ánutuna faiqi námu miná áiku óosana márunausa máridaqa sía miqídaqa sía miná áiku ásauku márunaiqini.

Ánutuna ufa írimariasa idooáranara naakápaidanoo.

Ánutuna náaquqara andeeqara maraquna fannoo maaqí qídanoo.

Ínnee maqee Ánutuna ufa íriaqa ínni sáimbaqa Isaraee máqannaa nínausa níkausa óoqai aadána maqa maaqaki fídaqa ititámmasee ufa rukíoondee ínnee síammiaqa. Misá Sinái aadána maqásaa Masaa máqasaa faqa Meeribaa máqasaa faqa nammári sía márunara Ánutuna amanamándee qáfaida náundaufa náundaufa qiqau.
Minára Ánutufa maaqí qinau.

Ínni níkausa nínaakusa qiní qimanammásee qáfararee qímasaida múnari mínari ídaqa qiní qimaniqau.
Qaara fasiqa áiku ásauku taikásee áukuana aiqáma amiqira ainaina quqannífiqaafanaqa qáfeeqa miná minníseeqa quándaki moo áinaina kai máreemaríqau.
10 Qinée minára iriséeqa qáfamaseeqa máa̱ Isaraee máqannaara qíranaqaidanoo.
Qinée maaqí qímasee níqidaqa.
Misá írirafa fífau fáafau qídanoo áaqaidanoo.
Misá kísaaqasaa qiní faqa ánidaqa sía qiní oósana qáfeeusa.
11 Qinée minára íranaqaifaqa maaqí qímasee qímafeekaíkiqíafana.
Sía uqanna misá qiní faqa anusufíqa adooeefáranoo.
Ánutuna ufa miqíminoo márifaqa qinée minára maaqí qídaqa.

12 Qiní qíkaqaafasaauqa, ínnee ámiqimandee rakísiaqa. Moó fannoo narí mandíriranannai faqa narí ufa rukíee márinannai faqa narí ámuqusaki márinara káqi márira Ánutuna nímeesa uqamáqeefoora. 13 Maa-aukuannasaqá ínnisaimbaqa káqikai máridaqa maa-ainainnára rakísiaqa, faasaambáasaana narí poodúe̱e nári poodúe̱e ímariana. Ínnikina moó fannoo narí mandóosana fannoo rarisámeeqee Ánutuna ufara sía írianaki quqáandoora eeráiriaqa. 14 Maasá indaarú paasóosamandee Yísuna qumáreeqa. Maqeendári maqeesáa paasóosamasee Yísuna qumáreeqa miná kai áfaqaqa fífi ínaqa taikáinna áukuana qumárainaqa maasá miná faqa moodáanaki aináini marunausara foo máfiqa miná qumáraanaura.

15 Ánutuna ákara maaqí qídanoo,

Ínnee maqee Ánutuna ufa íridee sía fee íridee íriqa sía óoqai undée iaqa.
Óoqai ínni sáimbaqa nínausa níkausa aadána maqa maaqaki Ánutuna ufa irisée áanoo qídaqa mandúfa qíma rukíasee náaqoo síaisa máriundee sía maqee ínnee miqíaqa.
Ánutuna ákara miqíminoo márifaqa qinée minára maaqí qídaqa.

16 Yáu yáusee Ánutuna ufa irisée ufa rukíasee nímeesa úqiqau. Mooseefa Isipa máqanaindari nífiqee ánusa misá kai miqíqau. 17 Yáusaree qaara fasiqa níku nísauku taikásee áukuana Ánutufa áanoománnimaqaannoo fee inau. Faiqí ánaasee ufa rukíasee mandóosana máree marusa aadána maqasaa óonuree kúqu taikóosara misára kai áanoo qinau. 18 Ánutufa misára maaqí qinau,

Qiní faqa anusufínausa sía uqanna qiní faqa adooeefáranoo.
Ánutufa miqí qímasoofaqa qinée minára maaqí qídaqa. Mifá yáusaree miqí qínoo fee. Mifá narúfa iriséenoo rukíee marúsara miqí qinau.
19 Maqee maasá miná qáfamasee maaqí qídaqa. Sía naundurá nímuqusa Ánutuna ufasáa rusúnara minára misá sía fúka maqa maaqaki Kannaa máqa maaqaki adooáranaki fiqau. Káqi aadána maqa maaqaki kúqiqau.

Copyright information for `BJR