John 10

(Yuda máqannaasa fíri marú aandaufa sipsípa márinau. Misá akaqána arusáida néemarufa márinau. Moómoo rakísidaqa asausí aukúsaidaqa minánnai qamunnaina áuqimariqau. Sipsípa reendeénimarufa sía áanoo ímarufa márinau. Anée miná asausí aukídanee miná kúqarínanoo fee sía ufa qíannoo káqi muqúrinoo máriannoo. Mi-aukuanná sipsípasaa rakísimarufa nífunni fufaqa aiqáma sipsípa miná áfaqee fiqau. Isaraee máqannaasa sipsípa káqi miqídaqa. Misásaa rakísimarifa indaarú fifaqá sipsípauqa miná ánaaqianna fídaqa.

Sipsípasaa rakísirafa óoni moómoo marasée áaku aaku máseenoo quqúsa áuqusee eendáki sipsípa minakí quqásee kooqísaa narí faiqáidanoo. Káasau faini fee qúmmuarimari fasiqa fee arunáandoora rakísidanoo. Sipsípa níkoofa núqu rámaqaisá kai máridaqa. Kanánaana fíndifinoo núqu raifaqá kai aniréeqa ándandara randáidaqa.

Sipsípa rakísimariasa nári sipsípara rídaqa rakísidaqa nári sipsípasaara kúqifaranoo. Sipsípauqa fáqa nári rakísimariasa ufa íridaqa minára rídaqa. Akaqáusa moodáanaki óoni ququsa áuqusee minakí nári sipsípa aiqáma eendáki quqásaafanóo faiqí moó fannoo kooqísaa rakísidanoo. Kanánaana iqáqaifanoo sipsípasaa rakísirafa moó fannoo aniraifanoo kooqísaa rakísirafa atúasaifanoo sipsípa ákoofa narí sipsípa núqu rámasaifaqa narí sipsípauqa kai íriqa ráudamaki ándanda nárara fídaqa.)

Sipsípa faiqée maríana miná kíkiqusira úfa.

Yísufa kafáa miqóoqaraasaa qímannimidanoo sipsípara qínoo faiqíara qinau. Qinée ánoona ufa qímannimidaqa. Faiqí moó fannoo sía sipsípa ququsa kooqiki kéeqeemarifa káqinaindari quqúsasaa akaréemarifa mifá qúmmuarimari fasiqafa máriannoo. Sipsípa kooqíki kéeqee márifa mifá sipsípasaa rakísimarifa máridanoo. Sipsípa níkoofa moó fannoo aniráinanoo kooqísaa rakísirafa kooqí atúasaifanoo sipsípa ákoofa narí sipsípa núqu rámasee náarainaqa miná ufa iriséeqa ráudamaki narí fáqa nífiqainaqa ándanda nárara fifáranoo. Sipsípauqa nári rakísimarina ufa íriqa ráudee qúmuraifanoo mifá indaarú fifaqá misá miná ánaaqianna fídaqa. Sipsípa sía moo fásiqa áfaqee fifáranoo miná ufa irisée moó fannoo fée qímasee sandéefaranoo.

Yísufa mi-quandara ufána qímannimufaqa síamma íriqau.

Yísufa ámiqira sipsípasaa rakísirafa mi-ufáfa.

Minára iriséenoo kafáa kooroomásee qímanniminoo qinau. Qinée kúqaa ánoona ufa qímannimidaqa qinée qeeqá kai sipsípa kooqí máridaqa. Óoqai qiní dóorini indaarú ánusa qúmmuari marú fasiqausá kai animáriqau. Sipsípauqa sía misá ufa íriqau. Qinée Ánutuna quqúsa kóoqi máridaqa yáfasiqa ánaaseefée kooqísaarafoo qinísaa kéeqee marínafa Ánutufa mi-fasiqanaaseesá kúqiranakinaana marasée innaarúna asumu máriranaki quqáannoo. Mi-fasiqanaaseesá Ánutuna quqúsaki sipsípara foora kéeqee ráudeeida nárana néemarifaranoo. 10 Qúmmuarimari fasiqafa qúmmuaramásaina taikáanifeera fífau faafau qúmmuarianifeera faqa kuqánnáruanifeera faqa kurídinnimaqaanífeera faqa ániannoo. Qinée faiqí ánaasee asumu márirana nímianeera ánidaqa. Sía káqi dapi máriranarau qídau. Asumu márirana ámiqirana moó faqa moó faqa rairaaírana nímirara miná kai nímiraree qímasee qúmidaqa.

11 Qinée sipsipasaa ámiqimasee rakísimarunausa máridaqa. Sipsipasaa ámiqimasee rakísimarifa narí sipsípasaara kúquannoo. 12 Feefaurúara aináinímarifa sía miqíannoo káasau faini aniráinanoo rufíasee sandáannoo. Sandámafinanoo káasau faini aniréenoo sipsípa qumárainaqa dáraanifaranoo. 13 Feefaurúara aináinímarifa sía sipsípara ámuqusiannoo feefaurúara kai rakísidanoo. 14 Qinée sipsípasaa ámiqira rakísirausa máridaqa. Qiní qíkoofa qiníara íridanoo. Qinée miqí kai íqa qeeqá qíkoonara faqa íridaqa. 15 Miqí kai íqa qeeqá sipsípara íridaqa misá fáqa qiníara faqa íridaqa. Qinée qeeqá sipsípasaara amaná kúquanauree qídaqa. 16 Sía maaqóoqaraasá kai qiní quqúsaki maríaqeera. Qiní quqúsa fannoo moómoo maqusanaasaki fáqa máridanoo. Minakínaasauqa fáqa nífiqa quqáanaura. Misá faqa qiní ufa irisée eedóo qifáranoo. Miqóo moodáanaki márifaranoo moodáa rakísirafa misásaa máriannoo.

17 Qeeqá sipsípara qímuqusina qeeqá márirana misá nímaaqa maqaséeqa kúqirinaki quqásee kaifáa qeeqá márirana minakíqari máraanaura. Qinée miqíraree qúnnanara qiní qíkoofa qiníara rídanoo asasídanoo. 18 Sía moó fannoo narí afeekannái qiní márirana máraannoo. Qinée qeeqákai qeeqáraa irisée qeeqá márirana kúqiranaki quqáanaura. Qiní qíkoofa qínaqa qeeqá márirana kúqiranaki quqáraree qímasee quqáanaura. Quqásee kafáa márararee qímasee maráanauranoo. Qiní qíkoofa miqí qímasee ufa qímaqimifaqa íridaqa.

19 Yuda máqannaasa miqóoqaraasa Yísuna mi-ufána iriséeqa raináfufaqa akaqáusa qiqau. Maa-fasiqána audurái áfaanna máridanoo, márifanoo dapi dápi ufa qídanoo, nánaree ínnee miná ufa íridee.

21 Miqí qímasoofaqa akaqáusa misá qímannimiqa qiqau. Akasáa áfaanna aunduráki márinafa sía maa-fasiqáfa indéemasee ufa qíannoo. Áfaanna fannoo amanée áfu dimbárana maqáiseenoo fee sía amanaikíannoo.

Yuda máqannaasa Yísuna minnísoo úfafa.

22 Mookári Yuda máqannaasa Yeerusaree máqusai suqúfufaqa amaana máqara qoomáqammásaida néemaríqau. (Óoqai namuqáa amaana máqaki míni madaapeé quqásoofaqa miná ánukamáquseeqa dóo miqóoqari áukuana aukuana ánukara qoomaqaqee qímasaida sakasáida néemaríqau.) Suara áukuana mi-qoomaqána ímariqau Yeerusaree máqusai. 23 Yísufa Yeerusaree máqusai óorureenoo amaana máqa átisaa tidá áuquqoonasaa aakuara rufíasee minakí nímarinau. (Faiqí ánaasee moómoo aaku suarara rufíaseeqa minakí kai máriqau.) Amaana máqa átimau tidásaa kísaaqa firaaqóo márinau. Yísufa Sooroomoona amarána máaqa atimau tidásaa nímarufaqa Yuda máqannaa úriqararausa ititáseeqa irámmiriqa qiqau. Anée sía quandaqáandia, ámiqimandee akooroomásee maasá qímaqimia, kúqaa fee Ánutuna ásauku mundíra fee máridanee.

25 Yísufa maaqí qímasee qímanniminau. Dóo qímannimuna síamma írimariafanoo. Qinée moómoo qeeqá qíkoofinaindaraa ainaina áuquseeqa minánnoo ínni uqannífiqaunausa máridaqa. 26 Ínnee sía qinée fírimarunna aandau sipsípauqau máriafanoofau minára sía qiníara ánoonee qímariafanoo. 27 Qiní sipsípauqa qiní ufa íridaqa qinée misára fáqa íridaqa, misá minára aiqáma qiní faqa fídaqa. 28 Qinée náaru náaru márirana nímidaqa sía kúqifaranoo. Sía amana moó fannoo qiní qísaukukinaana rafíeefaranoo. 29 Qiní qíkoofa qiní sipsípauqa qímufa aiqámausa úriqararafa máridanoo, sía moó fannoo miná ásaukukinaana rafíeefaranoo. 30 Qiní qíkoofa fáqa qinée fáqa moodáa márunnanara sía amana rafíeefaranoo.

31 Yuda máqannaasa mi-ufána iriséeqa áanoomasee óonisamu qumáree Yísuna árirarufanoo qinau. 32 Qinée moómoo ámiqira ainaina áuqaidaqa qiní qíkoofa qímu ainaina áuqaidaqa ínnee nána ámiqira ainainara irisée fee minásaara óonisamu qiní dárirara qídee.

33 Yuda máqannaa úriqararausa miná iriséeqa kafáa áranaiqi qímamiqa qiqau. Sía ámiqira dadaaqíra ainaina áuqaananarau áriraridau. Aneenáraa Ánutuna mandáikammámaqaidana anée aneennáraa maqásaa fasiqa márianafa anée Ánutufaikina máriannanara áriraridaqa.

34 Yísufa miná iriséenoo qinau. Ínni sándufa ákaraki Ánutufa qinau. Ínnee faiqí faiqi Ánutunaikammida máriafanoo. 35 Sándufa andeeqánoo máridanoo náaru náaru sía áaqee maríafanoo, ínnisaimbaqa minára íridaqa. Ánutufa narí ufa misásaa quqáseenoo misára Ánutu fee qinau. 36 Ánutufa qiní maraseenoo maa-maqa maaqánaki diqiqámaqoonaki máridaqa. Qinée qeeqáraa Ánutuna ámaaku fée qúnnanara náqimasee fee minánnai Ánutuna mandáikamma amaqáanauree sía amanaikíannoo. 37 Qinée qiní qíkoofa áuqamáqai ainaina áuqaanaqa qáfamasee kúqaa ánoonammifoo qiaqaana. Qiní qíkoofa sía áuqamáqai ainainna áuqaanaqa qáfamasee únnammifoo qiaqaana. 38 Ínnee qeeqáraa ufa qúnnanara únna fee qímasaida qinée faiqí sía áuqaaqaa ira ainainna áuqaanaqa qáfamasee qiníara kúqaa ánoona fee qímasee kúqaa miná ákoofa minakí márinara miqídanoo fee qiaqaana kaifáa mifá faqa naríki márinara miqídanoo fee qiaqaana.

39 Yísufa miqí qímasoofaqa misá qumáraaneerufanoo káqimbinau.

40 Yísufa Yooradanna námmarinni óoqureenoo óoqitaqa máreenoo óoqai Yoohaneefa máridanoo nammári nímiuqoo miqóo óoqu marínau. 41 Faiqí ánaasee moómoosa suqúfufaqa Yísufa máruqoo máridaqa narí qímami narí qímami maaqí qiqau. Yoohaneefa nammári nímimarufa sía moo áinaina firaa ainaina áuqanau. Yoohaneefa maa-fasiqánara qufá dóo aiqámainaina ánoonaikidanoo. 42 Miqóo faiqí ánaasee moómoosa Yísunara kúqaa Ánutuna faiqi fée qímasee miná saqárikiqau.

Copyright information for `BJR