John 8

Ánaasee moó fannoo úmmuarimaruna paqúru ufafa.

[Oorifa áaqanai káqimma óoru faiqéenoo iqáqoofanoo Yísufa Yeerusaree firaa amaana maqaki kaifáa óoquree kéeqafufaqa faiqí ánaasee moómoosa suqúfufaqa miná fíqu fíqumma márufanoo óoqumarifi Ánutuna ufa qímannimimarinau. Mooseena sándufa akoofásauqa faqa Farisái ámaana úfa qímarusa faqa ánaasee moo fásiqa qúmmuari márufaqa aaqee óonu qáfamasee qumáree dóo máree ániqau. Yísufa máruqoo míni quqáseeqa maaqí qímasee qímamiqau.

Óo ufasáa rakísira maa-anaaseefá qúmmuari marífaqa maasá qáfamasee qumáree ánidaqa. Mooseena sándufa miqíasara óonisamú kai náriqa níni íqa kuqá narusaaqée qínoo máridanoo. Anée minára nána ufee qídanee.

Misá mi-ufánannai puteera foora fufídaqa qiqau. Yísufa áruanifeera qímasaida miqí márufanoo Yísufa narí iriséenoo fífau kummaramafufanoo ásaukunnoo maqá ákara rinau. Mifá maqá fífau ákara rímarufaqa misá fuki faakí qídaqa mi-anaaseená óonisamu áruanauree sía fee áruanauree rítidaqa iréemariqau. Káqikaaqoo marikínoo Yísufa fíndifi qímanniminau. Yáfee ínniki moó fannoo numóo síainafa mifá kai óonisamu indaarú áuna̱a atufínoo maa-anaaseená áruannoo fee. Yísufa miqí qímaseenoo kafáa kummáramáfinoo maqá ákara rímarufaqa dóo misá moodáa kai qaara kái ídaqa nári áaqaranara nisaurúsee fíndimeeqaida dóo fífainimariqau. Faiqí firaasa náaree fufaqa kafáa miqóo óorudupirausa fufaqá kumaaráa ínaaqianna dóo fífi̱qau. Misá fífufanoo mi-anaaseefá kai miqóo kikíqinoo márinau. 10 Yísufa fíndifinoo mi-anaaseená irámmirinau, misá yái fee fífee. Sía fee moó fannoo aní kúqira ufa ámianinafa máridanoo fee. Aiqáma fífee.

11 Mi-anaaseefá qinau. Óo rakísira sía kúqira ufa moó fannoo qímimarifa máridanoo. Yísufa iriséenoo qinau. Dóo qinée fáqa sía kúqira ufa aní ámianaura. Dóo fúa, sía kafáa mandá óosana máraa.]

Yísufa maa-maqa maaqánaki qóomara foora qu úfafa.

12 Moo kári Yísufa Yeerusaree ámaana máqaki faiqí ánaasee maaqí qímasee qímanniminau. Qinée maqásaaqaraasa qóoma máridaqa. Yáfasiqa ánaaseesa qiní fáqa fínausa misá káqi márira qooma máreefaranoo sía uqanna asukunakí fifáranoo.

13 Farisai ámaana úfa qímarusa miná iriséeqa qímamiqa qiqau. Anée aneennára kai ufa qídana aneenná áuqu uqéeree máriananoo. Miqíanna ufafa sía ánoonaikidanoo. Fífau ufa kái qímariananoo.

14 Yísufa miná iriséenoo qinau. Kúqaa qinée qeeqáraa ufa qídaqa. Qinée miqí qídaqa ánoona ufa kai qídaqa. Qinée qeeqá kambíqafi ániafannanara íridaqa qeeqá fuannánara íridaqa. Ínnee sía qinée kambíqaafannanara írimariafanoo. 15 Ínnee faiqí faiqi ufa irisée dapi iriranannái faiqí ánaasee rainánnimaqee maríafanoo. Sía qinée moo fásiqa ánaaseera rainánnimaqée marúnausa máridaqa. 16 Qinée akaqáusara rainánnimaqaidaqau andeeqásee rainánnisaunaiqini. Sía qeeqáraafau máridaqau ufa nímidaqau. Qeeqá qíkoofa qiní diqiqámaqoona faqa máridaqa dadaaqí marífaqa ufa qímannimidaqa. 17 Ínni sándufa ákara ufa moó maaqímminoo máridanoo. Qaara fasiqa moo áinaina nári nífunnai qáfamasee múnu kooroo qímasaifaqa aiqámausa minára ánoona ufa fee qifáranoo. 18 Qinée qeeqáraa ufa qídaqa qiní qíkoofa qiní diqiqoofa mifá fáqa qiní dadaaqifaqa ánoona ufa tia qímannimidaqa.

19 Miqí qímasoofaqa Farisai ámaana úfa qímarusa maaqí qímasee irámmiriqau. Aní ákoofa yái fee máridanoo aní dadaaqídanoo fee qufanoo Yísufa qinau. Ínnee qiníara fáqa qiní qíkoonara fáqa sía írimariafanoo. Ínnee qiníara írífau qiní qíkoonara fáqa írini. Ínnee sía maaqandára írimariafanoo.

20 Yísufa maa-ufáusa Yeerusaree firaa amaana máqaki qímannimimarínau. Mi-amaana maqánaki óosirafa moó márinau. Amaana máqaki quqée marú munnimma difaanífa minakí márufanoo mi-oosiránaki Yísufa máridanoo mi-ufáusa qímanniminau. Misá Yísuna qumáraanee qímasee sía qumáraqau. Sía miná kúqira áukuana adeedí ranoo márunara Ánutufa qumeé rafáaqafusoofaqa sía qumáraqau.

Yísufa qinau, qinée fuanánnai ínnee sía fifáranoo qímaqoo ufafa.

21 Moo kári Yísufa maaqí qímasee Yuda máqannaa úriqararausa qímanniminau. Qinée moosáa fúanaqa qiníara randáinaisia ínneeqa mandáinainaki kúqifaranoo. Qinée fúannaqoo ínnee sía amana fifáranoo.

22 Yuda máqannaasa úriqararausa mi-ufána iriséeqa narí qímami narí qímami qiqau. Mifá maasára sía narí innái fuaqéera qídaqinoo. Maasá sía miná ufa íridaqa. Mifá narí fee narí áruannoo fee miqí qídanoo fee.

23 Yísufa iriséenoo qímanniminau. Ínnee maindáraasa máriafanoo qinée miríndaraasa máridaqa. Ínnee maa-maqánasaaqaraasa máriafanoo qinée sía maa-maqánasaaqaraasau máridau. 24 Qinée minára qúnnana ínnee ínneeqa mandáinainaki kúqifaranoo. Ínnee sía qinée márunnanara ánoonee qímariafanoo minára kúqaa ínnee ínneeqa mandáinainaki kurídifaranoo.

25 Misá úriqararausa miná iriséeqa qiqau. Anée yáfee máridanee qufanoo Yísufa qinau. Indaarú qímannimiafanausa misá kai máridaqa. 26 Qinée moómoo ainainara ínniara qímannimianaura. Qiní diqiqámaqoofa mifá ánoona ufa kai qímarifa mifínaindaraana kai ínni maa-maqánasaa máriasa qímannimidaqa.

27 Yísufa narí ákoona áufakiana qímannimimarufaqa síamma írimariqau. Minára Yísufa kaifáa maaqí qímasee qímanniminau. 28 Kásooqaqee ínnee qiní faiqí nímaaku uqéereeqee aunírira saqarisaa quqáqisáseeqa mikamúqoo qinée máriaafannanara írifaranoo. Qiní qíkoofa qímaqimiqoo úfana kai ínni qímannimidaqa. Mi-karí ínnee minára faqa ámiqimasee írifaranoo. 29 Qiní diqiqoofa qiní fáqa máridanoo. Qinée miná áidira oosanamau kai fídaqa minára sía minníqisaifaqau qeeqáraafau máridaqau. Mifá qiní fáqa máridanoo. 30 Faiqí ánaasee moómoosa mi-ufána iriséeqa Óo kúqaa mifá Ánutuna ásauku mundíra fee qímasee minásaa mundíqau.

Rumbárausara faqa idukírausara faqa qímaqoo ufafa.

31 Yísufa minára iriséenoo qímanniminau. Ínnee qiní ufa qímannimunnana irisée mi-maú maqee maqee fífaqa kúqaa qiní faiqi námu márifaranoo. 32 Ínnee kúqaa ánoona ufa kái írifaranoo. Ánoona ufa fannoo ínniqa mandáinainakiqari ínni idukúannoo.

33 Misá mi-ufána iriséeqa qiqau. Maasá Abarahaamana áti máridaqa, sía mooná rumbáranaki máridaqa. Nánaree anée maasára idukúaqee qídanee.

34 Miqí qufanoo Yísufa kafáa qímanniminoo qinau. Qinée kúqaa ánoona ufa ínni qímannimidaqa. Faiqí moó fannoo mandóosana máree marífa mi-manda oosanáfa miná rumbáqaifa máridanoo. 35 Faiqí moó fannoo mooná aináina íinoo óosana oosana ainaina naríndiara foora íinoo. Kásooqaqee dóo aináiní taikáseenoo mi-aiqama ainainná narí amiséenoo dóo káqisamu fúannoo. Mi-ainainná faqaana faiqi fannoo sía amana taikáannoo káqi narí akoona ámaaku máriannoo káqi narí ákoona ámaaqa maqa fínoo miná qumíasana maraséenoo sía aináinira faiqi naanna réenoo taikáannoo, káqi miqóo máriannoo. 36 Qinée Ánutuna ámaaku máridaqa. Qinée ínniqa mandá oosanakiqari idukúsaanaqa ínnee kúqaa idukíqa márifaranoo. 37 Ínnee Abarahaamana áti máriafaqa qinée minára íridaqa sía ínnee miná aanna réemariafaqa, qiní ufa sía márararee qídaqa qiní dáriraree qímariafanoo. Abarahaamafa sía miqí márufa minára ínnee sía Abarahaamana faiqi námu uqanna máriafanoo. 38 Qiní qíkoofa qiní uqaqífiqoona kai ínni qímannimidaqa. Ínnee miná minníseeqa ínneeqa níkoona moó Sadannana ufa írimariafanoo. 39 Misá mi-ufána iriséeqa maaqí qiqau. Maasá qíkoofa Abarahaamafa máridanoo. Yísufa minára qinau. Ínnee Abarahaamána faiqi námu máridaqau miná ufamáu fini. 40 Qinée qeeqá qíkoonasaaqaraa ufa kái ínni qímannimimarunaqa ínnee quandáfiqa qiní dárirara qímariafanoo Abarahaamafa sía mi-oosanná máranau. 41 Ínnee ínneeqa níkoona uqanna óosana máraidaqa miqí maríafanoo. Misá mi-ufána iriséeqa qiqau. Maasá sía qúmmuara faiqifau máridaqau. Maasá moodáa fásiqa faiqi Ánutufa narí uqanna maasá qíkoofa máridanoo.

42 Yísufa misá ufa iriséenoo maaqí qímasee qímanniminau. Ánutufa ínni níkoofa márinaqau kúqaa ínnee qiníara rini. Qinée Ánutufinaindari maaqóo qumumáridaqa. Qinée sía qeeqáfau qúmiqau mifá diqiqoofaqa qúmiqiafana. 43 Ínnee náqaa fee ifaqée sía qiní ufa óosana íridee. Ínnee qiní ufa íriafanoo níkooqaidanoo miqídaqa sía írimariafanoo. 44 Áfaanna níkoofa Sadannafa máridanoo. Ínnee miná faiqi námu máridaqa miná aanna rée maríafanoo. Óoqaindari faiqí kuqánnárimarufa máridanoo. Sía ánoonufakifau mapukínoo máridanoofau. Anoona ufa sía uqanna minakí márifa máridanoo. Mifá únna ufa qínoo narí óosanamau kai fídanoo. Mifá únna ufa qímarifa máridanoo únna ufa qímariasa níkoofa máridanoo. 45 Qinée kúqaa ánoona ufa kai qímannimi marúnnanara ínnee sía írimariafanoo. 46 Qiní mandá óosana moodáa máridanoo fee sía fee máridanoo. Ínnee qáfee qiqá qímaqimiaqa. Qinée kúqaa ánoona úfa kai ínni qímannimunaqa náqi fee ifaqée ínnee sía minára ánoonee qídee. 47 Ánutufa dadaaqifaqa miná faiqi námu áraamummaakaikímariása kai Ánutuna ufa írifaranoo. Ínnee sía Ánutunaindaraasau máriafanoofau sía qiní ufa írimariafanoo.

Yísufa Abarahaamanara qímannimu ufafa.

48 Yuda máqannaa úriqararausa Yísuna ufa iriséeqa áqiqa qiqau. Anée mandá Samaria maqannaa máriananoo áfaanna moó aní aunduráki márifa máriananoo. Maasá kúqaa fee qídee, sía fee.

49 Yísufa iriséenoo qinau. Áfaanna sía qiníki máridanoo. Qinée qeeqá qíkoona áuqu uqéeraidaqa ínnee qiní dúqu maqásaa quqéemaríafanoo. 50 Qinée sía qeeqá dúqu uqéeraranara randáidaqa. Moó fannoo qiní dúqu uqéerarafa máridanoo. Ínnee qiní dúqu maqásaa quqéemaríafanoo Ánutufa kai qiní dadaaqínoo ínni rafáaqa fúannoo. 51 Yáfasiqa ánaasee fée qiní dóokinaa ufa irisée márainafa mifá sía kúquannoo náaru máriannoo.

52 Yuda máqannaa úriqararausa mi-ufána iriséeqa qiqau. Dóo maasá aní óosana iriséeqa anée kúqaa áfaanna faqaafa máriananoo, Abarahaamafa maasá qíkoofa dóo óoqai kúqinau. Ánutuna tamummáqara fasiqauqa dóo kúqiqau. Anée náqi fee másee maa-ufána qídanee qiní ufa írimariasa sía kúqifaree qídanee. 53 Maasá qíkoofa Abarahaamafa kúqinau. Anée miná úriqarara fee máridanee qídanee. Ánutuna tamummáqara fasiqauqa maqásaa fasiqauqa kuqufufaná anée aneennáraa náqira fasiqee máridee qídanee. 54 Miqí qímasoofanoo Yísufa qímanniminau. Qinée qeeqá dúqu fífau uqéerasaana sía ánoonaikiannoo, fífau máriannoo. Qiní qíkoofa Ánutufa qiní dúqu uqéeraidanoo dadaaqídanoo, ínnee únna qímasee minára maasá Ánutunee qímariafanoo. 55 Ínnee óoqaindari sía miná áuqu írimariafanoo. Qinée miná áuqu íridaqa. Qinée minára sía íridau ínni naanna réemarunausa únna ufa qímarunausee qíni. Qinée qeeqá qíkoonara íridaqa miná ufamáu fímarunausa máridaqa. 56 Ínni níkoofa Abarahaamafa óoqai káqi máridanoo qinée maqee márunnanara káaqa qáfaaqaa ímarufa márinau. Dóo qíqafamaseenoo asasinau. 57 Yuda máqannaa úriqararausa mi-ufána iriséeqa maaqí qiqau. Anée kumaaráa máriananoo. Anée náqimásee Abarahaamana qáfanée inau, óoqai máriufa máridanoo. 58 Yísufa minára maaqí qímasee qímanniminoo qinau. Abarahaamafa sía kambíqoo áukuanna qinée máa̱ márunausa mikamúqoo máriqiafana. 59 Yuda máqannaasa miná iriséeqa óo maa-fasiqáfa naríara Yaawee fee qídaqinoo qímasee áanoomasee óonisamu qumáree áruaneerufanoo mifá kukéeqakinoo amaana máqakiqari ráudamaki moosáa finau.

Copyright information for `BJR