Luke 18

Ánaasee maqee maqee siáasa qimamímarú quandara ufana.

Yísufa narí faiqi námuara sía níkoo nikáa másee innaaru qíranara minnísaaqée maqee maqee afeekaikámasee innaaru qiaqéera quandára ufa qímanniminau.

Moo máqusaki siáasa márinau, mifá mandá fasiqa máridanoo sía Ánutunara áaquqamásee andeeqára siaasa saika máranau, sía faiqí ánaaseera ámuqusa ímarinau. Mi-maqusánaki kai adeedaana anaasee moó márinau, miná afaaqi kuqufufá naríaraa kadáapiriranaki márinau, mifá maqee maqee siáasinnaí óonuraidanoo sandanáinai qímarinau, óo siaasa anée dadaaqínana qiní mandáikamáqimaqée maríasara qáoo qía. Siáasa fannoo kísaaqasaa mi-adeedaana anaaseená ufa írinoo fídanoo narí kai qímirinoo qinau, Qinée sía Ánutunara rufíqaunausa faiqí ánaaseera sía qímuqusímarisa máridaqa. Maa-anaaseefá narí aináina úmmuari maríafanoo narí aináinara qiní dáruaqaamminoo sáina dadaaqíananoo taikáani.

Karaambáiqa Yísufa mi-manda fasiqánara narí faiqi námu qímanniminoo qinau, Ínnee mi-manda siaasána ufa írida fee. Ánutufa sía miqí marífa, ámiqirafa máridanoo mifá narí faiqí ánaasee eendáki fáasaana misá ikíraqárana iriséenoo sía anuqúannoo qinée qímannimida dauní dauni dadaaqíannoo. Minára sía innaaruqíranara níkoo nikáa másee minnísaaqa, afeekaikámasee innaaru qiaqa, qinée faiqí nímaaku kafáa qumurée qáfaanaqa faiqí ánaasee Ánutuna saqárikidaqa innaaru káqi fee ída márifaree sía fee ída márifaree.

Narí amooqímaruna faqa narí reendeénimarufa faqa miqandúfa.

Faiqí ánaasee akaqáusa náriara andeeqárausee qímasaidaqa niqoónausara mandáikirausee qímasaidaqa fídiaqaa ímarianara Yísufa níqafamásee maa-quandara ufána qímanniminau. 10 Faiqí qaaraqánda Yeerusaree máqusai náaquqara amaana máaqaki innaaru qíraree qímasee kéeqaqau, moó fannoo Farisai amaana ufa qímarufa moó fannoo qúmmuarira takisa munnimma máree marúfa miqandá kéeqaqau. 11 Farisai amaana ufa qímarufa innaaru qíraree qímaseenoo narí kai narí amoo qídanoo qinau, óo Ánutuna qinée sía aináinara rímarunausa máridaqa sía únna ufa qúnausa sía ánaasee qúmmuarunausa sía aiqámausa naanna ráunausa máridaqa. Óo dúfi dúfi sía maa-umuarira takisa munnimmána máree márina aanna ráunausa máridaqa, aiqáma amaana aundurái qaara faasaaana nárana minnísee dáarara innaaru qímarunausa máridaqa qeeqá munnimma aiqáma rainásee dínni qísauku taikásee dínni ani qaara faqa qaara faqa (9) munnimma qeeqáraa máraidaqa moodáa munnimma aní ámidaqa, oo Ánutu dúfi dúfi qinée miqí márunausa máridaqa. 13 Úmmuarira takisa munnimma máree marúfa innaaru qírara firaaqoo asaurídanoo áadumasaa kíkiqammafinoo sía innaarúnai óori uqéereenoo kummáramafinoo narí áaqaranara áia̱aée qídanoo ásauku róotee rootee kídanoo narí áaqaranara asaurúseenoo qinau, óo Ánutufa qinée áaqee marúnausa máridaqa anée qiníara ámuqusia.

14 Yísufa mi-fasiqaqandára narí faiqi námu qímanniminoo qinau, úmmuarira takisa munnimma máree marúna mandáinaina Ánutufa taiká aisóofanoo andeeqásee finau, Farisai ámaana ufa qímarufa sía andeeqánau káqi finau, naríara úriqararausee qímariasa Ánutufa asauríranaki quqáannoo, naríara uréeqararausee qímariasa Ánutufa úriqararanaikámanimaqáannoo.

Yísufa faiqi ánaaqiuqa nifaaqóoqa qinau.

(Mataioo 19:13-15; Mareekoo 10:13-16)

15 Faiqí ánaasee akaqáusa náriqa faiqi námu nífiqamaree Yísufinnai múnusaana misá nifaaqaí narí ásauku quqásee nifaaqóoqa qímannimaqaanifeera nífiqee ániqau. Aniroofaqa Yísuna faiqi námu misá farafára qifoo qímasee níqiqau. 16 Yísufa misá níqira ufa iriséenoo qáoo qímasee faiqiuqáindi náaraifaqa maí ániaqee qímasee narí ufa írimariasa qímanniminau, faiqi ánaaqiuqa sía rafáaqa fuaqa, sáifaqa maí ániaqa Ánutuna quqúsa miqírausaindi máridanoo. 17 Ínnee maanára kai irisée sía aunúaqa yáfee moó fannoo sía káqikaa faiqi naanna rámasee Ánutuna quqúsa márainafa sía uqanna minakí kéeqaannoo, faiqi ánaaqi naanna rámasee Ánutuna quqúsa márainausa misá kai minakí kéeqeefaranoo.

Qumíasana faqaafa náaru máriranara iranau.

(Mataioo 19:16-30; Mareekoo 10:17-31)

18 Moo kári Yuda máqannaasa úriqararausakiqari moó fannoo Yísuna írammirinoo qinau, Óo ufasáa rakísirafa andeeqárafa nána saikee áuqamamaqáananoo fee Ánutufa náaru náaru márirana qímiannoo fee qufanoo Yísufa qinau, anée nánaree qiníara andeeqára fee qídanee sía moó fannoo andeeqárafa máridanoo Ánutufa kai andeeqárafa máridanoo. 20 Anée sándufa ákara írimariananoo mimaú fínana maaqímmia anée sía ánaasee úmmuaria, anée sía faiqí ánaasee kuqánnárua anée sía aináina úmmuaria anée sía únna ufa qía aneenná ánoona ákoonara áidimarinana miqandá núqu uqéeraidana ámiqimasee rakísinnimaqaa qufanoo mi-fasiqáfa iriséenoo qinau. 21 Qinée mi-ufáusa kumaaráasaaqari aiqáma mi-ufamaú fúafanausa máridaqa. 22 Yísufa iriséenoo qímaminau, moodáa ainainá kai anée sía amanaikíanano anée aneenná qumíasana moómoo márina makéetámasee munnimma maraséenana kudi fásiqa ánaaseeuqa nimisáinanoo aní qumíasana aní áfeesara innaarúnai máriani, miqímaseenana anée qiní faqa ánia. 23 Qufanoo mi-fasiqáfa iriséenoo miná qumíasana moómoo márunara firaaqóo óori runúsee finau.

24 Yísufa miná óori runírana qáfamaseenoo qímanniminau, qumíasana moómoo faqaasa Ánutuna quqúsaki kéeqarara firaaqóo anúqidaqa. 25 Qóosa fannoo úkáamaraki ruqíqaki fírafa sía amanaikíannoo, qumíasana moómoo faqaafa innaarúna ququsaki firara miqí kai ínoo sía amanaikíannoo. 26 Miqóo márusa mi-ufána irisée tautúmasee Yísuna irámiriqa qiqau, anée qíanandee aináina faqaasa sía innaarúnai fífaqa yáfee moó fannoo innaarúnai asumu máriranaki amana kéeqaannoo fee sía moó fannoo amanaikíannoo, qufanoo Yísufa qinau, maqásaa fasiqa ánaasee sía amanaíkimaria ainaina Ánutufa amanaikí marífa máridanoo.

28 Peetooroofa iriséenoo Yísuna qímaminau, maasá qeeqá maqúsaina minnísee aní faqa nídaqa anée maasára náqi fee qídanee. 29 Yísufa qímanniminau, qinée maa-ufána aní qímamidaqa, moó fannoo narí máaqa fee narí ánaaqa fee ákaqaafasaa fee narí ánoona ákoonee narí faiqi námu fee Ánutuna quqúsa saikaramámaree minnísainafa mifá maqee mária kamuqoo aabaá faqa máraannoo kásooqaqee ánianínna aukuana náaru asumu márirana máraannoo.

Yísufa narí kúquaninnanara qímanniminau.

(Mataioo 20:17-19; Mareekoo 10:32-34)

31 Yísufa narí faiqi námu nífiqamaree áadumai óonureenoo qímanniminau, Ínnee íriaqa ínnisaimbaqa Yeerusareenni óoru fídaqa, miqóo márianaqa óoqai máriu tamummáqara fasiqauqa faiqí nímaaku qiníara ákara rúmaqoo ufafa ánoonaikiannoo. 32 Qiní máqannaasa qiní maréeqee ánaamuru nísaukuki quqáqisáifaqa qiníara ataasá átaasa ufa faqa mandá ufa faqa qídaqa níqaara fidi qímaqeefaranoo. 33 Misá qiní uaiáqa samu firaaqóo qifaaqa ateekáseeqa múnu kuqá dárifaranoo, darusáifanoo qaarammoo fáasaana áiqaráinanoo Ánutufa qiní mara fíndifuma qímaqaannoo. 34 Yísuna faiqi námu mi-ufána iriséeqa sía minára íriqau. Mi-ufána ánoona Ánutufa kukéeqamá nímaqaqaifaqa sía íriqau.

Áfu qimbárana Yísufa áfu maqáisanau.

(Mataioo 20:29-34; Mareekoo 10:46-52)

35 Yísufa faiqí ánaasee moómoosa faqa Yeerikoo máqusaki fíraree qímaseenoo aanásaa fímarufanoo naambeéqai aaná áfainni faiqí moó áfu qimbárafa óoqufaaqee máridanoo faiqí ánaasee fíqaree áiqaree ímarufanoo nárana mara née marú munnimmanara innaaru qímarufa márinau. 36 Mifá faiqí ánaasee moómoosa fíqaree márufanoo níku ái iriséenoo irámirinoo qinau, maaná nána ainainee kambíqaidanoo fee qufaqa misá qiqau. 37 Yísufa Nasareetee máqusaindaraafa dóo áiqaráidanoommifoo qufanoó mi-fasiqáfa iriséenoo fáaqa rúmasee qinau. 38 Óo Yísu Dafidina áti márianafa anée qiníara ámuqusinana qiní dadaaqía. 39 Faiqí ánaasee indaarú fusá miná fáaqarirana irisée miná áqiqa qiqau, anée ufasáa qufanoo mifá firaaqóo fí fí qímasee qinau, óo Dafidina áti márianafa anée qiníara ámuqusinana dadaaqía qufanoo.

40 Yísufa kásoomáfinoo mi-fasiqána máree maí ániaqee qufaqa áfiqamaree míni Yísuna aaqá quqásoofanoo Yísufa irámirinau, 41 Anée qiníara náqimma ái̱sáanauree qídanee qufanoo mi-fasiqáfa qinau. Óo úriqararafa anée qiní qífu maqaqísaanneera qídaqa qufanoo 42 Yísufa qímaminau, dóo aneenná áfu írirana qinísaa rusíananannoo ámiqianano.

43 Miqí qímarufanoo aaqee kái mi-fasiqána áfu ámiqimáfufanoo Yísuna faqa fídanoo Ánutunara dúfi dúfi qímammaree finau. Faiqí ánaasee moómoosa Yísuna faqa fífiíusa miná qáfamasee misá faqa Ánutuna amooqímámaqáqau.

Copyright information for `BJR