Mark 16

Ánaaseeuqa madikakí óonu qáfaqau.

(Mataioo 28:1-8; Ruka 24:1-12; Yoohanee 20:1-10)

1Yísuna irí káqi óoni aamaraki márufaqa Máriana amaráfa Makadara máqusaindaraafa faqa Máriana moó ámarafa Yameesana ánoofa faqa moo ánaasee Saroomeesa faqa Sabata faasaana áiqaróofaqa kúqimariasa akunnímaqee maría marasinna feefaurúmámaree Yísuna irísaa ákuanee qímasee mi-eendánaki deedaqiqau.

2Kanánaana iqáqoofanoo súani maqee ururoofaqa mi-anaaseesá Yísuna ákúndoo óoni áamaranaki fiqau. 3Aanái fídaqa misá narí qímami narí qímami qiqau, firaa oonitia fannoo óoni áamara ititánoo márifaqa yáfee dadaaqínaqee umbaqí quqásee fee marasínna aku ámaqeefaree qímasee óonu qáfoofanoo óoni fáasai quanda quandamméeqee máfi áquqoofanoo márinau. 5Misá óoni qáfamasee óoni áamaraki kéeqafi qáfoofanoo ásauku uqannai kumaaráa moó fannoo qamunna éekara arirana afisúsee óoqu marifufaqa qáfamasee tautúmasee káaqa rufíaqau. 6Tautúmasee rufíoofanoo mi-kumaaraafá qímanniminoo qinau sía tautúmasee rufíaaqa. Ínnee Yísu Nasareetee máqusaindaraana aunírira saqarisaa pirímmannai áruanara randée maríafanoo, mifá sía maaqóo máridanoo fíndi finoo máridanoo. Dóo qáfaaqa, maaqóo misá mina irí quqéeaa. Dóo fuaqa maa-ufána narí faiqi námufaqa Peetooroona faqa qímannimiaqa. Yísufa ínni nóorinni Kariree máqa maaqai finoo, ínnee miqóo óonureeqa narí qundée kai íqa miná qáfeefaranoo.

8Mi-anaaseeuqa miná iriséeqa óoni áamarakiqari rafúdamakufaqa sandámáqaraasammiqau. Káaqa rufíarana faqa náindiri roofaqa sandáqau. Misá maqúsai óonureeqa káaqa rufíasee sía moosá qímannimiqau. 9Yuda máqannaasa Sariríqara amaanasáa fee qímasee amaanasáara indaarúqaa faasaanee qímariqau. Mi-indaaruqaa faasaanna sandóo anaasee namusa ánu faasaanasaa Máriafa Makadara máqusaindaraafa náaree Yísufa fíndifuna qáfanau. Óoqai Yísufa káqi máru kamuqoo fáafasaaqa narí ánoona amarána mi-Mariána aunduráki fáafasaaqa qísauku dínni taikásee dínni ani qaara marasée márufanoo Yísufa káqi máruqoo miná aunduráindaraa faafasaaqa niqiqoofaqa rafúdamaki sandámáfiqau. Yísufa mi-anaaseená áfusaa narí kúqiranakiqari fíndifuna indaarú kooroo inau. 10Yísufa mi-anaaseená áfusaa kooroomámbunara Yísuna áiku ásauku óonu maaqí qímasee qímanniminau, 11Yísufa kúqiranakiqari fíndifinoo márifaqa qinée qáfeeqee qufaqa misá káqi minára soofaarídaqa ikíraqée máruqoo márufaqa mi-anaaseenára únna qíifoo qiqau.

Yísufa kúqiranakiqari fíndifinoo narí faiqi námukiqari qaaraqánda kooroo inau.

(Ruka 24:13-35)

12Yísufa kafáa moo óosana maraséenoo narí faiqi námukina qaaraqánda nífusaa kooroo ináu. Miqandá Yeerusaree máqusaindari moo máqusa káqikaa maqusai fímarufanoo Yísufa aanái nífusaa kooroomámbufaqa miqandá óonurandee anirée Yísuna áiku ásauku qímannimufaqa únna fée qiqau.

Yísufa narí faiqinámuki kooroo inau.

(Mataioo 28:16-20; Ruka 24:36-49; Yoohanee 20:19-23; Niqiqoosa 1:6-8)

14Yísufa miná ínaaqiana narí faiqi námu qísaukuqara taikásee qíkunni óoqu moodáa márarausa nárana née márufanoo kooroo ináu. Kooroomáfinoo misá miná qáfee marúsa únna fee qunára níqinoo qinau, ínni írirafa ufa rukíee márisa máriafanoo sía qíqafee máriasa ufara ínnee írimariafanoo.

15Yísufa miqí qímasee qímannimiseenoo kafáa maaqí qímasee qímanniminau. Ínnee maa-maqa maaqána afaaqasása aiqáma maqannaa iannái uqanna óonureeqa qiní ámiqira fasaasa ufa qímannimiaqa 16Qinísaa írirana rusímariasa írirana rusídaqa nammári máree maríasa misá innaarúnai náaru márira asumu máreefaranoo. Qinísaa sía írirana rusímariasa misá náríranaki fifáranoo. 17Qinísaa írirana rusímariasa maa-afeeka ainainná misáki márinaqa qáfeefaranoo, misá faiqí naundurákinaa fáafasaaqa qiní dúqusaa niqiqeefáranoo misá moo máqannaasa ufa sía nári íri maríanakiqari qifáranoo. 18Faiqí kuqánnarímari sakanífa ukaqánimisáinaqa sía mandáikifaranoo. Misá ufaaqa námasee sía kúqifaranoo. Misá nári nísauku aurímariasasaa rusísaifaqa fíndi fifáranoo.

Yísufa innaarúnai óoru fu ufafa.

(Ruka 24:50-53; Niqiqoosa 1:9-11)

19Yísufa narí faiqi námu faqa ufa qíqisoofanoo Ánutufa miná uqéereeqeenoo innaarúnai narí aaqá ásauku uqannai quqásoofanoo miqóo óoqu marínau. 20Yísufa innaarúnai óoru fúfaqa miná faiqi námu aiqámai fífainídaqa Yísuna ámiqira fasaasa ufa qímannimiqa niqau. Misá miqí márufanoo Karaambáiqa qumeé dadaaqufanóo faiqí ánaasee misá ufara kúqaa fee qiaqéera faiqí sía áuqaaqaa ira afeeka nímufaqa áuqoofanoo ánoona kambíqee márinau.

Copyright information for `BJR