Mark 2

Yísufa áiku ásauku pipisaaqá úsirana andeéqa̱isánau.

(Mataioo 9:1-8; Ruka 5:17-26)

Qaaraqánda fee qaaramoó fáasaanee áiqaróofanoo Yísufa narí maqúsai Kapeeranaumma maqusai aniréenoo narí máaqaki kéeqafufaqa faiqí ánaasee minára iriséeqa mi-maqánaki moómoo kéeqee qumbíqafufanoo kooqíki faqa naambeéqai faqa qumbíqaqufufanoo Yísufa máaqaki máridanoo Ánutuna ufa qímannimi márinau. Qímannimimarufaqa faiqí qaara faqa qaara faqa moó fasiqa áiku ásauku kúqirana qaindúsumaree miná áinaina faqa anirée Yísuna uqafiqáanee rufaqa faiqí ititáfufaqa kéeqarara anuqúsia misá máaqamau akarámáfiqa. Yísuna ákiaqa amummaqa nári eeféeda máaqa asaana rapéemandeeqa mi-fasiqána narí qaindá namufaqa minakí upeekásee quiqa quiqa ufanoo meemái Yísuna aaqá quqáqau.

Misá írirafa firaaqóo Yísunasaa atooqóonara Yísufa qáfamasee áiku ásauku kúqirana qímaminoo qinau. Qiní qímaaku aní mandáinaina ákiaqa minnáisáidaqa. Mooseena sándufa akoofásauqa miqóo óoqumarifí írufanoo níkooqoofaqa nári naunduráki óonu máfi íriqa qiqau. Maa-fasiqáfa náqifeemásee únna qímasee paasóosidanoo Ánutuna ámaaqa máqaidanoo fee mi-ufána qídanoo fee. Sía faiqí moó fannoo amana faiqí mandáinaina taikánnisaannoo Ánutufa kai amana miqíannoo. Miqí qímasoofanoo Yísufa aaqee uqanna misá naundurákinaana iriséenoo quándaki qímanniminau. Ínnee náqi fee qifaqée ínneeqa náaqookinaana mi-mandufána qídee. Qinée maa-fasiqánara mandáinaina númoo minnáisáidee qúnnana ínnee qiníara sía amanaikíaanoo fee qídee, qinée faiqí nímaaku maa-maqánasaa máridaqa faiqí mandáinaina taikárana qiní afeeka márinara kooroommá nímaqaanaura maa-firaa afeeka ainainánnai kooroommá nímaqaanaura qinée maa-fasiqánara aneenná qaindásaaqari fíndifinana mi-qaindánara maree ámaaqa fua qíanaqa qinée mandáinaina taikánnisaana afeeka qáfeefara. Miqí qímannimiseenoo quándaki mi-aiku asauku kuqirána qímaminoo qinau. 11 Aní qímamidaqa anée fíndifinana aneenná qainda mara máree ámaaqa doo fúa.

12 Miqí qímasoofanoo aiqámausa nífusaaqari mi-fasiqáfa fíndifinoo narí qainda mara qumáreenoo dóo ámaaqa káqi káqi finau. Misá qáfamasoofanoo firaaqóo náaquqoofaqa Ánutuna amooqídaqa qiqau. Maasá sía uqanna maaqíra áinaina qáfaunausa máridaqa.

Yísufa Reefina áfiqanau.

(Mataioo 9:9-13; Ruka 5:27-32)

13 Yísufa kafáa anirandée Kariree firaa farumma máruqoo fufaqa faiqí ánaasee moómoo miná áfaqee óonuroofanoo Ánutuna ufa qímannimimarinau. 14 Mifá mi-saqá óonuree anirée ídanoo faiqí moó narí máqannaasa takísa munnimma maréeqeenoo Roomma máqanna nímimaruna paqúrinau. Mi-fasiqána áuqu Reefifa miná ákoofa Arafaiusafa márinau. Reefifa narí oopísaki óoqumarifi márufanoo Yísufa miná qáfamasee anirée qímaminoo qinau. Anée qiní faqa fua qufanoo, Reefifa iriséenoo aaqee fíndifinoo Yísuna faqa finau.

15 Yísufa marikínoo moo kári Reefina máaqaki kéeqafi nárana née márufanoo mandá óosana máree márusa faqa takísa munnimma máree márusa faqa Yísuna faqa nímarusa misákiqari akaqáusa Yísufa narí faiqinámu faqa Reefina máaqaki óoqu marifi nárana née maríqau. 16 Mooseena sándufa akoofásauqa Farisai ámaana ufa qímarusa aniráma qáfamaseeqa Yísufa mandá óosana máree maríasa faqa takísa munnimma máree maríasa faqa náidanoo fee qímasee Yísuna faiqi námu umeé írammiriqa qiqau. Náqaa fee qifanóo fee takísa munnimma máree maríasa faqa mandá óosana máree maríasa faqa nárana náidanoo fee asaurírana sía fee márifanoo. 17 Miqí qufanoo Yísufa misá ufa irisée qímanniminau. Faiqí ánaasee ámiqimasee máriafaqa sía tutáqausiannai fídaqa, aurímaríasa kai tutáqa fínnai fídaqa. Sía qinée andeeqárausa náararara qúmuafanausa máridaqa, faiqí ánaasee ínnee mandá oosana máree maríasee qímasee nífaqee maríasa misára Ánutufinnai ubeekaaqéera náaraaqeera qinée qúmuafanausa máridaqa.

Nárana áura̱másee innaaru qufá.

(Mataioo 9:14-17; Ruka 5:33-39)

18 Moo kári Yoohaneefa nammári nímimarúna áiku ásauku faqa Farisai ámaana ufa qímarusa níku nísauku faqa Ánutufa maasá ufa írianífee qímasee nárana márufaqa miná minníseeqa náararée márufaqa innaaru sáika kai qímariqau. Akaqáusa Yísufunnai óonuree írammiriqau, náqi fee qifaqee aní áiku ásauku sía misá naanna ráida Yoohaneena áiku ásauku faqa Farisai ámaana ufa qímariasa níku nísauku faqa nárana sía narai náararee marifaqa innaaru qídaqa, aní áiku ásauku nánaree sía miqídee qufanoo 19 Yísufa qímanniminoo qinau, nimundára qóomaqa sakasée náidaqa suqímaríasa náararee máridee miqídee. Oo sía uqanna miqífara. Amundára fásiqa miqóo máridaqa asasíra faasaana márifaqa nárana náida máridaqa. 20 Kásooqaqee moo áukuana misá amundára fasiqa qiní misákinaana rumbámaree múnu darusáifaqa mi-karí qiní qíku qísauku nárana minníseeqa náarara máridaqa innaaruqífaranoo.

21 (Yísufa Farisai ámaana ufa qímarusa faqa Yoohaneena nammári máreemarúsa faqa misára óoqeenáa Mooseena sándufa nári níku nísauku qímannimimarúnakinara kíkiqususee qamunnara faqa úainna nammariara faqa miná kíkiqammúsinau. Kafáa narí qúmu fuka ufana narí faqa nímarusa qímannimunara fúka uainna faqa fúka qamunna faqa kíkiqusinoo maaqí qímasee qímanniminau.)

Sía faiqí moó fannoo fúka qamunna ati ateekárana marasée náuraa qamunnasaa ititáanee qímasee akunúannoo. Miqínanoo fúka qamunna ati fannoo óoqeenáa qamunna afauqáqarafa rakéeinoo firaaqóo anaqíannoo.
22 Yáfee faiqí moó fannoo náuraa tunda taqu maraséenoo fee fúka nammari adíaannoo fee. Sía miqíannoo. Ruqía fínanoo aiqáma nammari qúmiqaráandoora. Fúka taqu andásee fúka nammari minakí adíasainanoo miná amaná máriannoo.

(Yísufa maqásaa máru aukuanna misá uáinna nammarí tatisée aandáu̱ apatannái áuqira táquki adíasee kísaaqasaa máaqaki quqásoofanoo márinau. Marikínoo ámiqinoo márufaqa miná mara máree maqee maqee néemariqau. Uáinna nammari misá maqee maqee née marú nammarifa márinau. Mifá aandáu apatannai áuqira taquara qufaqa, maasá qeeqa ufakiqari táqu uqannée qídaqa.)

Sabátasaa sakuma ruqóosa noofá.

(Mataioo 12:1-8; Ruka 6:1-5)

23 Yísufa moó faasaana Sariríqasaa Yuda máqannaasa amaana fáasaana narí faiqi námufaqa maqúsamau nídanoo sakuma úmmaquqoo ququsanaki fídanoo miná faiqi námu fí sakuma rasáufú maree naqáfufanoo Farisai ámaana ufa qímarusa níndafamásee Yísuna qímamiqau. Aní faiqi námu Mooseena sándufa, Sariríqa sándufa rukíaidaqa sakuma ruqóosaidaqa aináinidaqa.

25 Yísufa miná iriséenoo quandáfi maaqí qímasee qímanniminau. Ínnee Dafidina óosana sía fee ínnee ásaana rídee. Óoqai Saurooofa miná árirarufanoo sandéenoo áararée márufanoo Ánutuna amaana máqaki Nooba máqusai márunaki kéeqafinoo Ánutuna ámimaru feemúna marasée námasee akaqána marasée narí faiqi námufaqa nímufaqa naqau. Mooseena sándufa rukíasee nanau, aanáiqikirausa kai née maría feemúna márufanoo sándufa rukíasee káqiqeefa nanau. Mi-aukuanná Abiatarafa aanáiqikirausa úriqararafa márinau. Ínnee moómoo kari miná ásaana rímariafa miná óosana ínnee sía fee minára íridee. 27 Ánutufa narínaindari faiqí dadaaqí mari ainainee qímasee Sariríqa amaana fáasaana áuqeeqeenoo faiqí níminau. Sía káqinaindari Sariríqa amaana fáasaanara irisée faiqí áuqeeqeenoo amaana fáasaana áminau. 28 Minára qinée faiqí nímaaku amaana fáasaana faqa miná sándufausa faqa úriqararausa márunausa máridaqa qinée misára naaqée qúnaqa náidaqa miqí marifanoo sía numóo máriannoo.

Copyright information for `BJR