Mark 3

Yísufa ásauku sufírana andeeqóofa.

(Mataioo 12:9-14; Ruka 6:6-11)

1Yísufa moó faasaana kafáa mi-amaana maqánaki kéeqafi qáfoofanoo faiqí moó ásauku súfirafa faiqí ánaasee moómoo námufaqa kéeqafi márinau. 2Akaqá fásiqa ánaasee Yísunara ufa qianée qímasee ámaarusidaqa ásauku súfirana faqa Yísuna faqa ámiqimasee nínda fee máriqau. Yísufa Sariríqasaa fee faiqí ásauku súfirana andeeqáannoo fee Mooseena sándufa rukíaannoo fee qídaqa qáfee máriqau. 3Yísufa amaana máqaki faiqí ánaasee amaana ufa qímannimidanoo ásauku súfirana áaramásee qínau anée maí anirée aiqámausa nífusaa kikíqia qímaseenoo quándaki faiqí ánaasee írammirinoo qínau. Mooseena sándufa Sariríqa faasaana sándufa fannoo maasára náqi fee qídanoo maasá minásaa faiqí anaasee dadaaqafée ianaúree kurídianaúree maasá faiqí márirana asumufée marannímianauree kurídi taikánnímaqaanauree miqí qufaqa misá sía ufa qiqau káqi kásoomáfiqau.

5Yísufa miná qáfamasee raiqára óori maraséenoo faiqí ánaasee aiqáma múnu nindá fee míni nindá fee máseenoo misá áaqarana afeeka irirana nindáfa másoofanoo misára ámuqusinau. Ámuqusufanoo mi-asauku sufira fasiqána qímaminoo qinau aneenná ásauku ratutáa qufanoo ásauku ratutásoofanoo miná ásauku ámiqinau. 6Farisai ámaana ufa qímarusa minakí márusa qáfamáseeqa amaana máqakiqari ráuda mákufaqa Eeroodeena ufa írimarusa faqa suqúfufaqa Yísuna árira ufa qímariqau.

Yísufa kanúqakiqari aiqáma máqannaasa ufa qímanniminau.

7Miqóoqari Yísufa Kariree fárumma firaa farumma tia márunnai óoqufufaqa faiqí ánaasee moómoosa áfaqa máree óoqu fiqau. Akaqáusa Kariree máqa maaqakiqari ániqau, akaqáusa Yudeea máqa maaqakiqari ániqau akaqáusa Yeerusaree máqusakiqari ániqau akaqáusa Idumeea máqa maaqakiqari ániqau akaqáusa Yooradana námmari dínni áfainni márusa ániqau, akaqáusa Tiree máqusakiqari faqa Sidoonna máqusakiqari faqa misaqá márusa faqa ániqau. Dóo mi-fasiqa anaaseesá moómoosuqanna tatúfufaqa Yísufa ímaru ainainausara iriséeqa qáfararee qímasee ani suqíqau. Faiqí ánaasee moómoosa Yísuna áuqaidaqa radámuaqaammímariqau.

9Yísufa misakínaana moómoo aurímarusa andeeqánnisée marúnara faiqí ánaasee aiqáma óosana óosana aurírana máraqanusa nísaukukoo Yísuna áuqaananoo maasá aurírana taikáanifee qímasaida Yísuna áuqaidaqa radámuaqaa ímariqau. Yísufa minára iriséenoo narí faiqinámu qímanniminau ínnee kanúqa rarisáma daaqá nammáriki quqáaqa misá qiní radámifaqa kanúaki akaráanaqa sía radamuaqa qufaqa misá miqímmiqau. 11Faiqí ánaasee fáafasaaqa naunduráki márusa Yísuna qáfamásoofaqa naunduraki máru fáafasaaqausa fáasai misá Yísuna qáfamaseeqa fáaqa quqásee koorooíqa qiqau. Anée Ánutuna ámaaku máriana fee qufanóo Yísufa nimambainá qímasee qáoo qínoo qinau sía ínnee áfaannauqa qiníara kooroo iaqa.

Yísufa qíkuni ooqu qaara marasée fasiqa narí faiqi námukiaqeera máranau.

(Mataioo 10:1-4; Ruka 6:12-16)

13Mi-fasannái Yísufa ámuaqu namusa óorureenoo narí áiku ásauku márianee qímarusa náara̱ másoofaqa aniroofanoo Yísufa misakínaana qísaukuqara faqa qíku ooqu qaara marasée núqu réenoo qiní faqa máriaqee qímasee núqu réenoo niqiqoo fásiqausee qímasee qímanniminoo qinau, qinée ínniara rusandeesámumásee máreeqa qinée ínni niqiqáanaqa maqúsa maqusa nídaqa qímannimiaqa. 15Faiqí ánaasee fáafasaaqa naunduráki márina aqiqée marúnna afeekana nímianaqa aqiqeefaranoo. 16Maanamúsa Yísufa rusandeesámumandee máranau.

Simoona Yísufa moo áuqundanau Peetoorooneé qímasee rusandeesámumandee miná faqa narí faiqi námuki quqánau.

Seebeedina ámaakuqara Yameesafa faqa narí ákaqa Yoohaneena faqa miqandá Yísufa moo núquranau Booaneeraqeesafa mi-nuqúna óosana innaarúnai qímarina fooqáaqandee qímasee miqandá faqa rusadeesámumásee narí faiqi námuki quqánau.

18Andurufa faqa

Firipifa faqa

Baratooroomeeufa faqa

Mataioofa faqa

Toomasifa faqa

moo Yámeesafa Arafaiusana ámaaku máruna faqa

Tadeeusafa faqa

moo Símoonafa nári kaamánnaikiaqeera qímarúfa.

19Yudasifa Keerioota máqusaindaraafa Yísunara kásooqaqee uqeeqáaninafa miná faqa misáuqa faqa maréeqeenoo narí faiqi námuki quqánau.

Beeraseeburanannai áfaanna aqiqáidee qiqau.

(Mataioo 12:22-32; Ruka 11:14-23; 12:10)

20Miqóoqari Yísufa narí máaqai Kapeeranaumma máqusai máaqaki kéeqafufaqa faiqí ánaasee moómoo uqanna máaqaki ani umbíqafufanoo nárana naani quná minníseenoo narí faiqi námufaqa sía nanau. 21Faiqí ánaasee Yísunara dóo fúrufara mándeeaafoo qufaqá miná átiuqa níranaqoofaqa Yísuna óonu rarisée ánirara deedaqiqau.

22Mooseena sándufa akoofásauqa akaqáusa Yeerusaree máqusaindari qúmusa Yísunara maaqí qímasee qímariqau. Mifá áfaannauqa úriqararafa Beeraseeburafa miná aundurái márifa máridanoo fee qiqau. Akaqáusa Yísunara áfaanna úriqararausa afeeka ámimariafanoo minánnai áfaannauqa niqiqáidanoo fee qímariqau. 23Yísufa minára iriséenoo faiqí ánaasee náaramma quqásoofaqa aniroofanoo moo áinaina kíkiqa ususéenoo quandára ufa kai qímanniminoo qinau. Náqimasee Sadannafa quándaki Sadannana aqiqáannoo fee sía amanaikíanoo. 24Moó máqannaasa narínni narínni rákiqa rakeekaa íqa dóo mi-maqannáasa taikée kurídifaranoo. 25Moodáa oosana moodaa maaqaki máriasa rakuakíqa dóo misá faqa taikéefaranoo. 26Sadannafa narí quqúsakinaasa faqa miqíkai ínoo rakuakínanoo sía amana kísaaqasaa máriannoo moodáa moodáa ínoo taikáannoo.

27Úmmuarimari fasiqafa náqimandee afeeka fasiqa máaqa rapéemaseenoo miná aináina úmmuariannoo fee sía amanaikíannoo. Mi-ummuari mari fasiqáfa aniréenoo sánda qumáreenoo mi-afeeka fasiqána rumbá quqáseeno miqóo miná máaqaki kéeqafi miná aináina úmmuariannoo. Qinée Ánutuna afeekannái Sadannana rumbá quqáseeqa miná áfaannauqa faiqí nauduráki máriasa niqiqáidaqa. (v 30) Misá mandá óosana máree maru afaanna Yísuna aunduráki márunara Yísufa mi-ufána qinau.

28Maa-ainainára kai íriaqa sía aunúaqa. Faiqí ánaasee óosana óosana mandáinaina faqa óosana óosana mandá ufa qírana faqa moómoo kari qímariana faqa Ánutufa mináuqa ákiaqara amaná minínnisaannoo. 29Moó fannoo Ánutuna náaquqara máraqunara mandá ufa qínanoo Ánutufa miná ákiaqara sía uqanna minnáisáannoo mi-ufána qímarifa náaru náaru fímaria idánaki áaqarana marasaifanoo sía uqanna Ánutufa minnáisáannoo. 30(-)

Ánutuna ufamau fímariasa qiní áinaina máridaqa.

(Mataioo 12:46-50; Ruka 8:19-21)

31Yísufa miqída máaqaki ufa qímannimimárufanoo miná ákaqaafasaa miná ánoona saimbaqa naambeéqai ani kikíqiqa máridaqa Yísuna qímamíaneerufanoo sía amanaíkufaqa faiqí moó aqiqée óonu Yísuna qímaminanoo ániani fee qiqau. 32Máaqaki Yísuna fíqu fíquiqa óoqu mariqa márusa mi-ufána irisée qímamiqau aní ánoofa faqa aní ákaqaafasaa faqa mádaanai máridaqa ani áaréeaa foo qufanoo Yísufa iriséenoo miqóo márusa irámmirinoo qinau. Yáfee qiní qínoo fee yáfee qiní qíkaqaafasaa fee qímaseenoo narí faqa márusa múnu nínda fee míni nínda fee máseenoo qinau. Qáfaaqa, maaqóo qiní qínausa qiní qíkaqaafasaauqa máridaqa, qiní qíkoona íriranamau fímariasa misá kai qiní qíkaqaafasaa qiní dáuna qikaqa qiní qínausa máridaqa.

Copyright information for `BJR