Mark 5

Faiqí aunduraindaraa áfaannauqa kúara aundurai kéeqaqau.

(Mataioo 8:28-34; Ruka 8:26-39)

Dóo miqóoqari kanúqa fannoo Kariree fárummaki fífiufanoo nammári dínnafai níanai Keerasa máqannaasa maqa máaqa múnu raquru áminau. Yísufa kanúqakiqari maqásaa áqufufanoo faiqí moo fáafasaaqa aunduráki márufa Yísufinnai aniranau. Mi-fasiqána máqannaasa faiqí irí mara máraida óoni áamarai ákundee máriqau. Mi-fasiqáfa mi-ooni aamaránaki faiqée marúfa márinau. Moómoo kari misá miná qumáreeqa sáinandannai miná áiku ásauku rumbá quqásoofanoo afeekaikámándeenoo ásaukusaaqaraa sáinanda rakéemma áquseenoo áiku rumbáqoo sáinanda túri mándee miná rakéemma áqusoofaqa sía amana miná qumáree maríqau. Miná afeeka úriqaranoo márunara misá sía amanaikíqa minnísoofanoo faiqí madikámaqoonakiaqa faqa áaqana áaqanakiaqa faqa fáaqa quqánoo nídanoo óonisamu qumáraidanoo narí afaaqa ateekánoonufa márinau.

Yísufa kanúqakiqari aniroofanoo mi-fasiqáfa óoni aamaraki níanaindari Yísuna qáfamaseenoo sandée aniréenoo Yísuna óorinni aqoori sáunara fínoo óorindari firaa kari fáaqa quqáseenoo Yísuna áaramáseenoo qinau. Óo Yísufa anée firaaqóo úriqarara Ánutuna ámaaku máriananoo. Anée nánaree maasá soodáa qídanee. Qinée afeekaikámándee aní qímamidaqa. Anée Ánutunara irisée sía qiní dárua. Mi-fasiqáfa sía fífau miqí qinau. Yísufa miná aundurákinaa afaannara anée mandá áfaanna maa-fasiqána aundurákiqari rafúdamaki fúa qunára mi-fasiqáfa miqí qinau. Yísufa miná ufa iriséenoo irámmirinau aní áuqu yáfee qufanoo mi-fasiqána aunduráindari áfaanna fannoo qinau. Maasá moómoosa qúsidaqa márunnanara maasá dúqu qúsirausee qídaqa.

10 Miqí qímasoofanoo áfaannauqa faqaa fasiqa fannoo narí aundurákinaa afaannauqara kafáa kafáa Yísuna qímaminau. Sía maa-maqa maaqánakiqari misá niqiqáa. Miqí qímaseenoo Yísuna qímamimarufanoo. Mi-nammarína áfainni ámeemai adeedí kúara moómoo andanda néemariqau. Mi-fasiqána aundurákimari áfaannauqa kúarauqara Yísunara afeekaíkiqa qiqau maasá díqiqannee qímasee diqiqáinaqa kúarauqa naunduráki fúa qufanoo Yísufa dóo fuaqée qufaqa mi-afaannáusa mi-fasiqána aundurákiqari rafúdamakufaqa kúarauqa naunduráki kéeqaqau. Kúarauqa naunduráki kéeqoofaqa mi-ameemánaindari sandámáqaraasufaqa farúmmaki bururú qufaqa aiqáma kuqu taikáqau. Mi-kuaráusa tu tauséenna (2,000) kúara máriqau óoni saqári áuqiqa máriqau núkudara foora máriqau.

14 Mi-kuaráusasaa rakísi marú fasiqausa mi-kuaráusa nindafamásee quqásee sandámáqaraasamásee maqúsai márusa faqa uíqaana maaqakiaqa márusa faqa qímannimiqau. Qímannimisoofaqa aiqáma qáfararee qímasee anirée qáfoofanoo moómoo áfaanna aundurái máriu fasiqafa andeeqásee qamunna afisúsee írirana marasée miqóo óoqumari fí márufaqa ani qáfoofanoo náaquqee náindiri ranau. 16 Fáasai máriusa Yísufa áfaanna niqiqoona faqa kúara nammáriki áqufunara faqa qáfoosa misá maqúsaindari aniroosa aiqáma ainainara qímannimisoofaqa misá iriséeqa Yísunara rufíaseeqa mifínnai óoquree kafáa kafáa irámmiridaqa qiqau maasá maqa máaqakiqari amanée anée finnáree qiqau.

18 Yísufa eedóo qímasee kanúaki akaréemárufanoo áfaanna aundurái máriu fasiqafa Yísunara afeekaikámáseenoo irámmirinoo qinau amanée qinée aní faqa funáuree qímasee fuki faakí qinau. 19 Yísufa irisée qáoo qímasee qímaminoo qinau. Anée aneenná máaqai anirandée óonureenana aneenná ánoona ákoona átiuqa qinée karaambáiqa aní firaaqóo dadaaqúnnanara faqa firaaqóo aníara ámuqusunnara faqa qímannimia. 20 Miqí qímasoofanoo anirandée narí maqa máaqai óonuree qísaukuqara taikásee máqusanaasee qímarusa aiqáma qímannimimáree fíqu fíqu qídanoo Yísufa dadaaqunara qímanniminoo nímarinau. Aiqámausa mi-ufána írimarusa firaaqóo náaquqoofaqa náindiri roofaqa óo kúqaa fee miqínoo fee qiqau.

Kísaaqandaikimaru ánaaseena andeeqánau. Yísufa qufanoo Iairusana áraamuna fíndifinau.

(Mataioo 9:18-26; Ruka 8:40-56)

21 Yísufa miqóoqari kanúqaki akarámafufanoo nammári taqamáree díndanai kafáannai finau. Miqóo óonuroofaqa faiqí ánaasee moómoosa Yísuna ani mara ititásaqau. 22 Mi-maqusánaki amaana máqasaa rakísimaru fasiqafa miná áuqu Iairusafa aniréenoo Yísuna óorini maqásaa áqufufanoo afeekaikámandee fuki faakí qinoo irámmirinau. 23 Qiní qíraamuna káqikaa qiraamuna aurímarifaqa amanée anée aniréenana aneenná ásauku minásaa quqásainanoo fíndifuani kúquandoora qufanoo Yísufa miná faqa fíndifi finau. Fímarufaqa moómoosa titiqímafufaqa fídanoo misá rusadeesámumandee fímarinau.

25 Miqóo misáki ánaasee moo márinau. Qísaukuqara taikásee qíkuni óoqu qaara marasée aukuana kísaaqándaikimaru anaaseefa márinau, mifá moómoo tutáqausunnai fímarufanoo sía andeeqóofanoo firaa teeroo quqáranakí márinau. Mi-anaaseefá tutáqausunnai narí munnimma maqee maqee áqii taikásoofanoo sía miná aurírafa taikánau maqee maqee firaanáikinau. 27 Mi-anaaseefá Yísuna afeekara iriséenoo faiqí ánaaseekiaqa qumeé miná ánaaqiannai óonuree maaqí qímasee írinau, qinée óonuree miná qamunna kái áuqamasáananoo miná afeeka fannoo qiní aurírana taikáqisáannoo.

Miqí qímasee faiqí ánaasee titiqímafufanoo ánaaqianaindari misákiaqa rusandeesámumándeenoo ani miná qamunna áti kai áuqamásoofanoo narí aundurákiqari fidíka réereeufa taikánau, narí aurírafa taikáranara narí írinau.
30 Yísufa narí faiqí andeeqára afeeka narísaaqari funára iriséenoo faiqí ánaasee qámbaanai quandáfi irámmirinau yáfee qiní qamunna áuqeenoo fee qufaqa narí faiqi námu qímamiqa qiqau, moómoosa aní ititáfuanakina nánaree anee yáfee qiní qamunna áuqee foo qídanee moómoosa ititáfuanaki fímarinanoo. 32 Yísufa sía misá ufa írinau káqi randée marínau. 33 Mi-anaaseefá narí aurírafa taikóonara iriséenoo áindirireenoo áaquqoofanoo Yísuna áikuki óorindari aní kummáramáfufanoo aiqáma ánoona ufa kai qímaminau. 34 Yísufa iriséenoo qímaminoo qinau Óo qiní qíraamuna aneenná írirana qinísaa rusímarianafa mifá kai aní andeeqéenoo dóo asooáranaki fúa aní aurírafa dóo taikéenoo.

Miqí qímarufanoo Iairusána máaqaki márusa anirée Iairusána qímamiqau sía ufasáa rakísirana kadáapi árua dóo aní áraamuna kuqufínoo.
36 Yísufa sía misá ufa írinau. Iairusána qímaminoo qinau, Sía rufíaa, qinísaa kai aneenná írirana mundúa qímasoofaqa aiqáma miná faqa ániusa aiqáma Iairusana máaqaki kéeqararufanoo Yísufa qáoo qímaseenoo narí faqa Peetooroona faqa Yameesafa faqa miná ákaqa Yoohaneefa faqa dóo minamúsa kai Iairusána faqa nífiqamareenoo Iairusána maaqaki óoru fíqau. 38 Misá Iairusána máaqai óonuroofanoo Yísufa faiqí ánaasee ikífaafau qírana faqa fáaqa fuísee qírana faqa múnari mínari qírana faqa níndáfamáseenoo máaqaki kéeqafinoo qímanniminoo qinau. Nánaree múnari minári ída fee qikíraqáidee maa-faiqífa sía kúqinoo máridanoo faiqaqée ídanoo.

40 Misá minára irisée Yísunara naanaidara qímasee uteéti qufanoo Yísufa aiqáma niqiqámáseenoo faiqi ánaukoo faqa miná áiku ásauku qaaramoó faqa mánaaqa kúqiraqoo nífiqee kéeqanau. 41 Yísufa mi-kuqira manaaqána ásauku qumáreenoo nári ufakíqari káqikaa manaaqa qinée aní qímamidaqa dóo fíndi fúa qímasoofanoo mifá aaqee fíndifinoo dóo nináu. Minakí márusa miná qáfamasoofanoo náaquqeenoo náindiri ranau. Mi-manaaqáfa qísaukuqara taikásee qíkunni óoqu qaara aukuana marasoo mánaaqafa márunara náaquqanau. 43 Yísufa afeekaikámasee qímanniminau ínnee maa-manaaqána andeeqáqaunnufana umeéraaqee qímasee quándaki mánaaqara qinau maa-manaaqána nárana ámifanoo náani qímasoofaqa miqímmiqau.

Copyright information for `BJR