Matthew 25

Qísaukuqara taikásee mánaaqauqa misára quandára ufa.

(Yísufa máru aukuana mánaaqa moó amundáraree qímasee káqi áqoonnanaikammáqoo fasiqafa miná áqoonafa narí maqúsai káqi márufanoo mi-fasiqáfa narí akoona maqusai naríara máaqa usaká taikáseenoo narí áqoonnana maqúsai tautúmánnimaqararee qímasee óonureenoo narí ánaaqa áfiqeenoo dóo narí máaqai áfiqee finau. Misá óosana miqínoo márunara Yísufa iriséenoo maa-ufána qímanniminau.)

Qinée qúmuanna aukuana aniráinanoo innaarúna ququsa maaqímminoo máriannoo. Qísaukuqara taikásee mánaaqa máriqau. Misá nári rambi úqirausa maqúsasaa asukuna rakísi márufanoo amundára fasiqa ánufaqa misá faqa firaa maqaki nárana náani qímasee áfeesímariqau. Moodáannai qísaukunamu fúrufari marúsa máridaqa nári rambi kái uqusée márida áfeesimariqau. Moodáannai qísaukunamu írirana faqaasa rambi faqa minakí adíee maria nammarina faqa uqusée máridaqa áfeesímariqau. Amundára fasiqa sía dauní áni marufaqa, áfeesímarufanoo nífuki aunduarúfaqa mandáiki máriqau.

Eendá ámuqusaikufanoo faiqí moó fannoo fífí qímaseenoo qímanniminau. Dóo amundárafa áni ifoo. Dóo deedaqiaqée qufaqa, mi-manaaqáusa fíndifufaqa qóoma quúmbeeqee rambisáa muqúrusoofanoo qanau. Rambi nammári síaisa quandáfiqa nammári faqaasara innaaru qiqau. Maasá faqa adía qímia, maasá qóoma qimbáfifaqa nammári sía márifaqa. Nammári faqaasa misá qáoo qímasee qiqau. Sía amana ínni adía nímianaura ínni adía nimiséeqa maasá faqa randáanoora ínnee sandéeqa sutuáqai óonu feefauríaqa. Miqí qufaqa misá eedóo qímasee sutuáqai nammáriara fiqau. 10 Misá fufanoo amundára fasiqa írirana faqaasa máruqoo aniréenoo ái misá nífiqeenoo firaa maqaki kéeqaqau. Kéeqafufaqa misá kooqí ititáseeqa nárana néemariqau.

11 Néemarufaqa fúrufari maru manaaqausa aniréeqa náaraqau. Óo karaambáiqa kooqí atuásainaqa maasá faqa kéeqafi naanáura. 12 Miqí qufanoo mifá iriséenoo qímanniminau. Sía qinée ínniara íridaqa ínnee yái máriaasee, dóo sée fuaqa dóo kooqí ititáseeqa. 13 Yísufa mánaaqauqa kíkiqa qususéenoo narí faiqi namu qímanniminau. Ínnee sía qinée qúmira aukuanara írimariafanoo sía deedaqifoora. Minára ínni qímannimidaqa ínnee íridaqa qiníara rakísiaqa.

Qaaramoo áinainira fasiqauqa misá quandára ufa.

(Ruka 19:11-27)

14 Mi-ufána taikáseenoo Yísufa innaarúna ququsara moo úfa kíkiqa úsinoo qinau. Innaarúna ququsa maaqímminoo máridanoo. Aináina faqaafa moo átinai fuani qímaseenoo narí aináinira fasiqauqa súquseenoo úfaasu narí aináina faqa maqa máaqa faqa misásaa quqaseenoo rakísiaqee qinau. 15 Moo fásiqa narí aináinirana amana moodáannai qísauku koondaa amanee firaaná áminau. Moo fásiqa narí aináinirana amana qaaraqánda kóondaa amanee óorudupirana áminau. Moo fásiqa óorudupimasee narí aináinirana amana moodáa koondaa amanee amiséenoo qímanniminau. Ínnee maa-munnimmána qumáreeqa minánnai ínneeqa aináinirana uqéeraaqanani. Kásooqaqee aniráanaqa miná ánoona munnimma faqa miná áti munnimma faqa qímiannee qímasee moo sáa finau. 16 Moodáannai qísauku koondaa amanee qumároofa minánnai aiqáma ainainirana nimisáidanoo nímimarufanoo dínni qísauku amanee mi-ainainiránasaa aniranau. Moodáanakikufanoo qísukuqara amanee marasée márinau. 17 Qaara koondaa amanee mároofa miqí kai ínoo kafáa qaara faqa qaara faqa aniranau. 18 Moodáa koondaa amanee mároofa mifá síamma aináininau. Mifá madika indufúseenoo munnimma minakí quqásee kukéeqasanau sía furufarianifeera idaaqinóo márianifeera kukéeqanau.

19 Náaru kásooqaqee misá rakísirafa aniréenoo náaramáseenoo munnimma óosana óosanara irámmirinau. 20 Moodáannai qísauku koondaa mároofa aniréenoo narí rakísirana maaqí qímasee qímaminau. Óo qiní rakísirafa anée moodáannai qísauku koondaa kai qímunnana. Minánnai aináinammásaunanoo dínni qísauku faqa miná áti munnimma faqa aniraifaqa dóo qísaukuqara anímmamidaqa.

21 Miná rakísirafa minára iriséenoo dóo qímaseenoo írinau. Iriséenoo maaqí qímasee narí aináinira fasiqa qímaminau. Óo anée ámiqira fásiqa óori runúseenana aináini márianafa andeeqára fásiqa uqanna, anée káqikaa ainainasáa faqa andeeqásee rakísimarianafa máriananoo. Minára qinée firaa ainaina aiqáma ainainasáa rakísirana anísaa kai quqáanaura. Sía anée káqi aináinira faiqifau márinnandia. Anée qiní faiqiara foora márinnaranoo. Anée faqa qinée faqa moodáanaki asasírausa márianaura.

22 Miqí qímasoofanoo qaara koondaa amanee mároofa aniréenoo narí rakísirana maaqí qímasee qímaminau. Óo rakísirafa anée qaara amanee qímunaqa minánnai aináinammásaunanoo qaara faqa qaara fáqaikamáfifaqa, dóo anímmamíqa. 23 Narí rakísirafa miná ufa iriséenoo qímaminau. Óo anée faqa ámiqira fasiqa óori runúsee aináini márianafa andeeqára fasiqa uqanna, anée káqikaa ainainasaa faqa andeeqásee rakísi márianafa máriananoo. Minára qinée firaa ainaina aiqáma ainainasaa rakísirana anísaa kai quqáanaura. Sía anée káqi aináinira fasiqafau márinnandia. Anée qiní faiqiara foora márinnaranoo.

24 Miqí qímasoofanoo moodáa koondaa amanee mároofa aniréenoo narí rakísirana maaqí qímasee qímaminau. Óo rakísirafa qinée aní óosana íridaqa. Káaqa anée munnimmara rímarianaqa qinée qáfamáqaunausa. 25 Qinée aní koondáa amaneennái aináinammásaananoo aní munnimma fúrufariandoo qímasee minára rufíasee madika indufúseeqa minakí quqáqaunanoo máriina dóo miná kai anámiqa.

26 Miná rakísirafa miná ufa iriséenoo raiqásee qímaminau. Anée mandá fasiqa uqanna máriananoo, kudi uqanna áarara márianafa máriananoo. Anée qiníara káaqa munnimmara rímariana fee qínanee. 27 Anée qiní óosana miqínoo márinana anée qiní munnimma náqaa fee ifanee qiní munnimma béenaki quqáaqaana. Anée béenaki quqásainanoofau qiní munnimma faqa áti munnimma faqa márinaqau qeeqá marani. Anée madikakí kai ákundoonnanara kudi uqanna máriananoo.

28 Rakísirafa miqí qímaseenoo aináinimaru fasiqa namúsa qímanniminau. Ínnee miná moodáa koondaa amanee maréeqee qísaukuqara máreemari fasiqana miná ámiaqa. 29 Moó fannoo aináina uaqée ínnana moó faqa ámifanoo rairaá ínoo máriani. Aináina síainnana sía akaqá ainaina ámifara, minakí óodaa márinnana miná rafía máraifanoo káqi máriani. 30 Dóo maa-manda kudi fasiqána rarisámeeqeenoo mádaanai asukunakí áqusaaqa. Mi-asukunánaki máridanoo ikíraqaidanoo áfai riqídanoo máriani.

Taikára faasaana ufa írira faasaana mi-ufána.

31 Qinée faiqí nímaaku qúmuanna kari qeeqá rakísira áfeeka namufaqa qeeqá qangiroo námufaqa maa-maqánasaa qúmuanaura. Qumuréeqa ufaqíra qáari ámiqira qaari ufíqisee éekara ariranasaa óoqu marifínaqa maqásaaqaraasa ufa irisée andeeqánnimaqáanaura. 32 Qinée óoqumari fúa̱naqa maqúsa maqusa aiqáma súqeeqee qeeqá dóorisaa quqásee níndafeeqa qeeqá íriranannai ínni rainánnimaqaanaura. Qinée sipsípasaa rakísirausa fooqáasa márida. Misá sipsípa raíneeqee áaduma quqáidaqa mimmí raíneeqee áaduma quqáidaqa. Qinée qúmuanna aukuanna qinée miqíanaura. 33 Qinée sipsípa fooqáasa raíneeqee qísauku uqannai quqáanaura. Mimmí fooqáasa qísaaqai raíneeqee quqáanaura.

34 Raínannimaqaseeqa qinée firaa karaambaiqa quandáfinaqa qísauku uqannaindaraasa maaqí qímasee qímannimianaura. Qiní qíkoona ámaakummara máriasa ániaqa aniréeqa áiqarée miná ámiqira ququsaki kéeqafi máriaqa. Óoqai maa-maqa maaqáfa sía márufanoo mi-ququsána ínniara quqáqoofa máridanoo. 35 Qiní dáararoofaqa nárana qímusa máriafanoo. Qiní nammáriara dídimarufaqa nammári qímusa máriafanoo. Qinée ánaamuru fooqáasa máriafana ínnee qiní áqoondikiusa máriafanoo. 36 Qinée káqisamu máriafana ínnee qamunna qímusa máriafanoo. Qinée aurímariafana ínnee anirée qiní qíqafee sukudaakútiqa, qimudáoo qímaqimaqéeusa máriafanoo. Qinée karafúsaki máriafana ínnee qiní úndara aniréeqa áia̱aée qímaqimaqóosa máriafanoo. Qinée minára iriséeqa ínniara Ánutuna ámiqira ququsaki fuaqée qídaqa.

37 Miqí qíanaqa misá qísauku uqannaindaraasa maaqí qímasee ufa qiní qímaqimifaranoo. Óo karaambáiqa miná anée fee yáiree fee aní áararée márufaqee nárana ámiqiafana. Nammáriara áidufaqa yáiree fee aní ámiqiafana. Maasá sía aní qáfaqiafana. 38 Yáiree fee anée ánaamuru fooqáafa márunaqee aní áqoondikiqiafana. Yákari fee káqisamu márunaqa qamunna aní ámiafannanara qídanee. 39 Yáiree fee aurímarunaqee maasá óonu aní qáfaqiafana. Yákari fee anée karafúsaki márunaqee maasá óonu aní qáfaqiafana. Anée qínaqa maasá íriaqa. 40 Qinée misá ufa iriséeqa quandáfiqa kooroo qímannimianaura, máa̱ qiní qíkaqaafasauqa misáki uréeqarausa ínnee misá ámiqimmánnimaqaidaqa qiní faqa ámiqimmaqimaqee marúsa máriafanoo minára ámiqira ququsaki kéeqaaqeera qímannimidaqa.

41 Qinée misá qímannimiseeqa quandáfinaqa qísaaqaindaraasa maaqí qímasee qímannianaura. Ínnee Ánutuna áqira ufa ínnisaa márisa ínnee idáki áqufuaqa. Ánutufa Sadannanara faqa narí mandá qangiroouqa faqa áfaannauqa faqa idá áqufuanifeera áuquqoofa máridanoo náaru náaru qéemari idafa sía qimbéemari idafa, ínnee minakí áqufuaqa. 42 Qiní dáararée márufana náranara qáoo qímasee sía qímusa máriafanoo. Qiní nammáriara dídufaqa qáoo qímasee sía qímusa máriafanoo. 43 Qinée ánaamuru fooqáasa máriafana ínnee qiní áqoondikiranara qáoo qusa máriafanoo. Qinée káqisamu máriafana, qáoo qímasee sía qiní qamunandá qímusa máriafanoo. Qinée aurída máriafana ínnee sía óonu qiní qíqafoosa máriafanoo.

44 Qinée miqí qímasee misá qímannímianaqa misá quandásee maaqí qímasee qiní qímaqimifaranoo. Óo karaambáiqa yákari fee náranara áararanóofée inau nammáriara áidinóo fee inau. Yáiree fee ánaamuru fooqáafa márunaqee káqi samu márinee inau. Yáiree fee aurímarinee inau. Yáiree fee anée karafúsaki márinee inau. Anée yákari fee miqúnaqee maasá sía ámiqi ámiqiafana. Anée qínaqa maasá írianaura. 45 Qinée misá ufa iriséeqa maaqí qímasee kooroommásee qímannímianaura. Máa̱ qiní qíkaqaafasauqa misáki uréeqarausa sía ínnee ámiqimmannimaqaidaqa qáoo qunára mi-fasannái qiní faqa sía ámiqimmaqimaqoonara, qáoo qunára minára qinée ínniara idáki fuaqée qídaqa. 46 Miqí qímasaina misá náaru náaru náriranaki kéeqafina márifaranoo. Andeeqée maríasa misá náaru náaru máriranaki kéeqafi márifaranoo.

Copyright information for `BJR