Matthew 3

Yoohaneefa nammári nímimarufa qímannimi ufana.

(Mareekoo 1:1-8; Ruka 3:1-18; Yoohanee 1:19-28)

Yísufa kumaaráa márufanoo mi-fasannái Yoohaneefa nammári nímimarufa kooroomáfinoo afeekaikámaseenoo Ánutuna ufa faiqí ánaasee maqúsa maqusa qímanniminoo ninau. Yuda máqannaasa aadána máqannai faiqí óodaa márunnai Yoohaneefa miqóo óonureenoo qímannimímarinau. Mifá maaqí qímasee fuki faakí qídanoo qímannimimarinau. Ánutuna quqúsa qúsasaa ínnisaa ititáfuannoo. Minára ínnee aiqámausa ínneeqa mandáinainara quqásee quandáfina Ánutufinnai nóori ubeekaaqa. Yoohaneefa miqí qímasee qímannimímarufanoo óoqai Ánutuna tamummáqara fasiqa Eesaia mifá qímaqoo ufafa ánoona Yoohaneenakí kambíqanau. Mifá maaqí qímasee ákara rinau.

Faiqí moó fannoo faiqí sía márunnaindari aadána máqannaindari ufa fífí qímasee faiqí ánaasee maaqí qímasee qímannimidanoo.
Karaambáiqa ánia̱nifeera miná aaná afisúaqa. Aaná eendírana andeeqásaifanoo karaambáiqa fúani.
Miqí qímasee ákara rinau.

Mi-fasiqáfa Yoohaneefa qamunna sía ámiqirana afisímarinau. Aadaiká aadaikírafa kamméera kísaaqa asausínnai áuqirana afisírafa nímarinau. Tamummáqara fasiqa naanna rámasee miqímmasee márinau.

(Kamméera fannoo firaa aandau qóosara foora máridanoo. Asausí kísaaqandauqa máruna miná marasée sufusee qamunna áuquqaqee afisímáriqau.)

Yoohaneefa aandáu̱ apatannái qamunandá rafáaqafu rumbánau. Miná nárana sía nárana uqanna. Ookasaasá ánoona faqa káasau oofaafana faqa miná áuqu pándaaqa oofaafana miná kai néemarinau.
Misá Yeerusaree máqusanaasa faqa Yuda áfumakinaasa faqa Yooradanna námmari dínni dínni afainni márusa faqa aiqáma Yoohaneefa máruqoo súqiqa márida Yoohaneena ufa írimariqau. Súqumaraidaqa misá nári mandáinainara akooroomáseeqa minnísarara kooroo qímarufanoo Yoohaneefa nammáriki rafúsu ooqu marinnímaqasee márufaqa rúmannimaqoofaqa nammárikiqari fíndifiqau.

Farisai ámaana ufa qímariasa faqa Sadikai ámaana ufa qímariasa misá faqa nammári márarara aniroofanoo Yoohaneefa níqidanoo qímanniminau. Ínnee sakáni faiqi ukadiqa faiqi námuara foora nári náriranara rufíamaree sandée máriafanoo. Yáfee ínnee qumeé aaquqímannimaqáifaqee ínnee Ánutuna áranaqaranara rufíamareeqa únna qímasee nammári rúmannimaqaannanara qinísaa mandaaqéefaree. Ínnee kúqaa naundurá quandárausee máridaqee. Únna qímariafanoo. Andeeqára óosana máraifaqa qáfeeqa ínniara kúqaa naundurá quandárausee qianáura. Yoohaneefa kaifáa qímanniminau. Ínnee ínneeqara maasá Abarahaana áiku ásauku máridaqee sía Ánutufa dáruannoo fee qímariasa. Maasára ámiqirausee qímariasee qímariafanoo. Miqí qímaria ufana sía qiaqa. Qiní ufa íriaqa Ánutufa máa̱ fífau óoniuqara qínanoo amaná Abarahaana áiku ásauku kambíqeefaranoo. Nánaree ínnee fífau maasá Abarahaana áiku ásauku máridee qída fee. Fífau faafau ufa dapi ufa qímariafanoo. 10 Dóo Ánutuna saasúnara foora saqári átuka ateekárara rauqíaqee ídanoo. Sía naundurá quandáinausa Ánutufa nárirafa qúsandaannoo. Yásaqari fee sía andeeqásee qaqamma írainafa kudi saqari Ánutufa miná ateeká idáraannoo.

11 Kúqaa qinée Yoohaneesa nammári kai ínni rúmannimaqaida. Ínniqa mandáinaina minnísee Ánutuna ufamau fíranara koorooíanifeera fífau nammári kai rúmannimaqaida. Kásooqaqee qiní qínaaqiannai moó fannoo kambíqaannoo. Mifá qiní úridaaqaraannoo. Qinée óoreeqárausa miná ámeemaanai márianaura. Náqimmásee fee qinée miná dadaaqianáuree mifá firaafá qiní faqa úridaaqararafa máridanoo. Mifá sía fífau nammárinnai kai ínni óoqumarinímaqaannoo. Mifá Ánutuna káaqa aréenara maraquna ínni náakunnimaqaannoo. Mifá kudimakírana idáqaanifeera idánnai faqa ínni rúmannimaqaannoo Yoohaneefa oofáafana kíkiqa úsuna maa-maqánasaaqaraasara qídanoo qinau. Ínnee Yísuna ásaukuki faiqí ánaasee oofáafanara foora dóo máridaqa. Káqikaaqóo utitíqamanniseenoo miná adi fuaqá áquannoo. Ánoona narí maréeqeenoo narí máaqaki quqáseenoo ánaaqmaara mandóosana máree maríasa idáraannoo. Idá firaaná sía dimbéemari idanaki áraannoo.

Yísufa nammári mároo ufafa.

(Mareekoo 1:9-11; Ruka 3:21-22)

13 Mi-fasannái Yísufa Karidaiaandári qumuréenoo Yooradanna námmari afainni Yoohaneefa nammári rúmamaqaanifeera qúminau. 14 Qumuroofanoo Yoohaneefa sáa qímaseenoo Yísuna qímaminau. Qinée aní nammári rúmamaqaananoo síamma amanaikíannoo. Anée qiní rúmaqimaqainanoo amana máriannoo.

15 Miqí qufanoo Yísufa maaqí qímasee qímaminoo qinau. Maqee káqi rúmaqimaqaa, Ánutuna ufamau kai fídaqa maaqandá andeeqáanauranoo. Miqí qufanoo Yoohaneefa írinoo eedóo qímaseenoo Yísuna nammáriki ukúqnamáseenoo mara uqéeranau.

16 Yoohaneefa Yísuna nammáriki óoqumari ámaqasoofanoo nammárikiqari fíndifufanoo mi-karí kai innaarúna rakéeufanoo Ánutuna náaquqara andeeqára máraquna fannoo Yoohaneefa qáfoofanoo nakipurúnara foora mámbufanoo qumuréenoo Yísunasaa quqánau. 17 Quqámáfufanoo innaarúnaindaraa ufa maaqí qímaseenoo akooqóo Yísunara qinau. Maa-fasiqáfa káaqa qiní qímuqusira qímaaku márifaqa minára qiní qímuqusa asooaifaqa susúidaqa.

Copyright information for `BJR