Matthew 4

Sadannafa Yísuna amanúfafa.

(Mareekoo 1:12-13; Ruka 4:1-13)

Miqóoqari nammári mara máreenoo Ánutuna maraquna fannoo Yísuna rarisámeeqeenoo fífau saqanna aadána máqasaa óonikinai quqásoofanoo márinau. Sía fífaufau. Áfaannauqa firaafá amanammásee qáfaanifeera quqásoofanoo márinau. Óonu márufanoo áfaannauqa firaafá Yísuna amanammásee qáfaanee qímaseenoo aniréenoo maaqí qímaseenoo amanammásee qáfanau. Yísufa sía nárana márufanoo, qaara fasiqa níku nísauku taikásee eendá faqa fáasaana faqa áiqaróofanoo áararanau. Miqímmasee fáasaana taikóofanoo firaaqóo áararoofanoo kudoosaápanau. Kudoosaápee márufanoo áfaannauqa firaafá mandáinainara amanammásee qáfarara aniréenoo Yísuna qímaminoo qinau. Anée kúqaa Ánutuna ámaaku mári inána maaqí qímasee kooroo ínaqa qáfaa, maa-oonísara qínanoo féemu kámambinana náinanoo ámuaqu ínaqa qáfaa. Yísufa iriséenoo áfaannauqa firaaná qímaminau. Ánutuna ákarakina minára maaqímminoo máridanoo. Faiqí nárana kai miná kai námasee sía amaná márifara. Ánutuna óokinaa ufa námufaqa námaseeqa néeqa amaná márifaranoo. Qinée miná Ánutuna ufamau kai fuanáura. Aní ufa síamma írianaura.

Miqí qufanoo áfaannauqa firaafá Yísuna áfiqeenoo Yeerusareenní amaana máqa, Isaraee máqannaa náaquqara firaa amaana máqa meeráqoo sandáaqai máruna miná ataufakaaqá faakána kísaaqa atisaa múru quqásee qímaminau. Kúqaa anée Ánutuna faiqi fee sía fee. Kúqaa Ánutuna faiqi mári inána maaqóoqari rafúsakinana maqásaa meemái áqufinaqa aiqámausa aní qáfaaqa Ánutuna ákara moó minára maaqímminoo máridanoo.

Ánutufa narí qangiroouqa niqiqáinaqa misá nísauku
qufíqisaifana minásaa áqufinaqa rafúsifaranoo, sía óonisaa áiku rupáurinnaranoo.
Minára anée maaqóoqari rafúsaki áqufinaqa misá aní dadaaqífana sía maqásaa árinnaranoo. Faiqí ánaasee qáfamásee kúqaa anée Ánutuna ásauku mundíra fee qifáranoo.

Áfaannauqa firaafá miqí qímasoofanoo Yísufa qímaminau. Ánutuna ákara kafáa maaqímminoo máridanoo.

Anée aneenná karaambáiqa Ánutuna sía amanammásee qáfeennaranoo. Sía uqanna.
Yísufa miqí qímasoofanoo áfaannauqa firaafá miná iriséenoo káqi afeekaikámaseenoo Yísuna kafáa áfiqamareenoo áaqana kísaaqasaa áfiqee múruseenoo aiqáma maqa maaqa maqúsa maqusa misá nári aréenaranaki márina Yísuna uqafíqaseenoo qímaminoo qinau. Anée maqásaa óorindari rupáitamafinana qiní Ánutusara foora qimooqínaqa qinée maa-aiqama ainainná uqafíqasaunnana aní kaimmámianaura.

10 Yísufa mi-ufána iriséenoo kaifáa qímaminoo qinau. Sadanna sée máree fúa. Anée íria. Ánutuna ákara moó maaqímminoo máridanoo. Ínnee ínneeqá Ánutuna kai amooqiaqa. Karaambáiqa Ánutufa mifá qínnandee kai iaqa. Qinée miná ufa káimma írianaura.

11 Yísufa miqí qímasoofanoo Sadannafa quqásee finau. Fufanóo qangiroouqa Yísufinnai qumuréeqa nárana aina ámidaqa ámiqi ámiqiqau.

Yísufa narí saika óosana ároo ufafa.

(Mareekoo 1:14-15; Ruka 4:14-15)

12 Mi-kamusaqá rakísirafa Eeroodeefa Yoohaneena nammári rúmannimaqee máruna karabúsakina rumbá quqánau. Yísufa minára iriséenoo Karidaia máqusai finau. Miqóo óonureenoo káqikaa maqusa moo áuqu narí maqúsai Nasareetee, miqóo óonu márinau. 13 Káqikaaqóo miqóo márinoo quqáseenoo Kapeeranauma máqusai Karidaia fáruma átinni mi-maqusánai óoqu marínau. Kapeeranauma máqusai Seepuruna máqa máaqa faqa Napatari máqa máaqa faqa miqóo Kapeeranauma máqusa máridanoo. 14 Yísufa Kapeeranauma máqusai óoqu márufanoo Ánutuna tamummáqara fasiqa áuqu Eesaia, miná óoqeenáa ufa ánoona kambíqanau. 15 Mifá qinau.

Seepuruna máqa máaqaki máriasa faqa Yooradanna námmari dínnafai máriasa faqa farúma dínni, ooruku nammari dínni qámbaana maqa máaqaki máriasa faqa Kariree máqa maaqaki ánaamuru óosana óosana máriasa faqa ínnee aiqáma faiqí ánaasee asukunakí máriasa maqee káaqa qárana qáfeefaranoo. Kúqiranakiara foora asukunaki máriasa ínniki maqee káaqa qárafa radíqifinoo máriannoo.
Tamummáqara fasiqa miqí qinau.

17 Yísufa Kapeeranauma máqusai óoqu máridanoo maa-ufána óosana arasée faiqí ánaasee maaqímmasee qímannimímarinau. Innaarúna ququsa adeedíranoo máridanoommi, ínnee ínneeqa mandáinainara maqee kái aupúree quándakiqa Ánutuna óorinni nóori quandáaqa.

Noodáanna máree márusa náaroo ufafa.

(Mareekoo 1:16-20; Ruka 5:1-11)

18 Yísufa Kapeeranauma máqusai máridanoo moo fáasaana Kariree fáruma áfaiqara fídanoo qaara fasiqa narí qísafasaasa paqúrinau. Miqandá núqu Peetooroosa Andurusa máriqau. Miqandá firaa pateeuqa nammáriki áqimariqau. Misá noodáanna kai árimarusa máriqau. Misá aináina dóo mi-ainainná faqaasa máriqau. 19 Yísufa miqandá paqúrimásee qímanniminoo qinau. Ínneeqara qiní faqa ániaqa. Ínneeqara maqee maqee noodáanna máree máriaqanda máriafanoo qiní faqa aniréeqa faiqí noodáannara foora maréeqee Ánutuna quqúsaki quqéefaranoo. 20 Miqandá mi-ufána iriséeqa nári pateeuqá ainaina faqa quqásee fíndimeeqee Yísuna faqa fiqau.

21 Yísufa miqandá nífiqeenoo miqóoqari farúma áfaiqara fídanoo mooqára nári qísafasaasa paqúrinau. Miqandá núqu Yameesa Yoohaneesa miqandá níkoona áuqu Seebeedi. Sía nammári nímimaru Yoohaneefa márinau, miná amaráfa márinau. Miqandá nári níkoona faqa kanúqaki óoqumaridaqa fáfaa eendáki nári pateeuqa nammáriki áqusee noodáanna maráanee qídaqa deedaqímaríqau. Misáuqa faqa noodáanna ainainirana faqaasa máriqau. 22 Yísufa náaramásoofaqa miqandá fíndifufaqa nári kanúqa faqa nári níkoona faqa minnísee Yísuna faqa fiqau.

Káriree máqannaasa aurírausa andeeqánnisoo ufafa.

(Ruka 6:17-19)

23 Mifá Karidaia máqa máaqa aiqáma fíqu fíqu inoo nídanoo innaarúna ququsara fúka ufa qímanniminoo ninau. Aurímarusa faqa óosana óosana ainaina máree márusa faqa teeroouqée márusa faqa idaaqamánnimaqee márianu. 24 Miqí márufanoo miná áuqu aiqámai daráaninau. Siria máqannaasa faqa aiqáma íriqau. Iriséeqa ámiqi márusa misá aiqáma óosana oosana aurirana maree marúsa faqa káaqa nídafi marúsa faqa faiqí fuéena naundurái kéeqeemarusa faqa fuséenasana nári marúsa faqa níku nísauku aadánusi márusa faqa aiqáma Yísufinnai máraida múnu quqée márufanoo Yísufa andeeqánnisee márinau. 25 Mifá maqúsa maqusa fímarufaqa faiqí ánaasee moómoo suqúmaree miná faqa fímariqau. Karidaia máqa máaqaindaraasa faqa qísaukuqara taikásee maqusa márunaki márusa faqa Yeerusaree máqannaasa faqa Yuda máqa máaqa afumáki márusa faqa Yooradanna námmari dínnafai márusa faqa suqú maree miná faqa fiqau.

Copyright information for `BJR