Philippians 1

Qinée Pauroosa Timootisandiri ásauku mundírana Yísuna rumbára ainainira fasiqaqara máridaqa maa-akarána rúmannimaqeeqa. Ínnee Firipi máqusai mária Ánutuna áiku ásauku mária fasiqa anaaseesa ínnee faqa ínnee ufa suqímariana rakísirausa faqa ínni niqoónausa ínni dadaaqí maríasa faqa, ínnee aiqámausa ínneeqa írirana ásauku mundírana Yísunasaa rusímariasa, ínni ákara rúmannimaqaidaqa. Maasá qíkoofa Ánutufa faqa miná ásauku mundírafa maasá karaambáiqa Yísufa faqa nári áfaarirana faqa nári naunduráki asooárana faqa nímiani.

Pauroofa Firipi máqannaasara innaaru qu úfafa.

Qinée ínni Firipi máqannaasara dáaqoo írifaqa Ánutufinnai dúfi dúfi qímasee asasammásee ínniara innaaru qídaqa. Óoqai indaarú ínni maqúsai aniréeqa Yísuna ámiqira fasaasa ufa qímannimiafanaqa ámiqimmandee dadaaqammámaree áni marúfaqa níndafaafannanara ínniara dáaqoo iriséeqa Ánutunara asasammámaqaidaqa.

Qinée maa-ainainnára ámiqimasee íridaqa Ánutufa ínniki ámiqira saika uqéeroofa káqi ínniki mi-saikána kai uqéeranoo fífi ínoo taikára aukuana ásauku mundírafa Yísufa qúminna faasaanna miqóo kai taikáannoo. Ánutufa narí saiká Yísunara qímannimira saiká adíafaa ímari saikána qímufaqa ínnee aiqáma minakí márida dadaaqí marúsa máriafanoo, minára ínniara asasírafa andeeqárafa kai máridanoo. Óoqai sía qinée karabúsaki máriafanna kamu qóo qinée Yísuna áufakiana faiqí ánaasee káqi nídaqa qímannimiseeqa naunduráki mapukú nísasee máriqiafana, akaqáusa minásaa ootúpeeqa áaqaranaki quqásoofaqa qinée óonuree miná ateekáafanaqa ínnee faqa dadaaqí marúsa máriqau. Dóo maqee faqa Roomma máqannaa karabúsaki máridaqa ínnee faiqí ánaasee mapukúnnisee maríana qiní dadaaqí máriasa márianara ínniara Ánutufinnai asasírafa andeeqánoo máridanoo. Ánutufa íridanoo qinée kúqaa ánoona ufa ínni qímannimidaqa. Ínniara qiní qimudáoo qírafa firaafá márina ásauku mundírana Yísuna ámuqusa óokiqari kambíqara qimudáoo qírafa máridanoo.

Ínnee ámiqira oosana kai irisée máraaqee qídaqa maaqí qímasee ínniara Ánutufinnai innaaru qídaqa, Óo Ánutu Firipi máqusanaasa naríara naríara rírafa maqee maqee innooqáidanoo kambíqaani miná sía áaqara írirafa ánoona írirafa faqa rainásee akoofásaikira írirana faqa maasáki innooqéenoo uqannífiqainaqa úriqarara aaná kai umáree fuaqéera qídaqa. 10 Ánutufa miqínoo ínni dadaaqínaqa ásauku mundírafa qúmira faasaanasaa ínnee ikairí síaisa, ufa síaisa máridaqa ásauku mundírafa nímira ámiqira ánoonaikira márirafa ínniki márifanoo aiqámausa miná qáfammasee Ánutunara dúfi dúfi qímasee amooqifáranoo.

Pauroofa kúqiranee káqi máriranee ásauku mundíranaindi márianauree qinau.

12 Qinée Pauroosa Yísuna ufa maqúsa maqusa qímannimi marúnnana ákiaqara karabúsa rumbásaafaqa máridaqa. Náriqa qiní rumbáqaafanoo Yísuna ufa aru rafáaqa fíraree qímasee qinée rumbáqa máruna sía misá Yísuna ufa rafáaqa fía, qiní rumbáranannai misá sía irirai miná múru poodúqaafanoo. 13 Qinée Roomma máqusai firaa uriqarara kiapana máaqa ámiqira maaqa aaqá rumbára maqaki máridaqa mi-firaa maqánasaa rakísi maría sundiauqa faqa rumkátasaa faqa qinísaa faqa rakísimaria poorisáusa faqa aiqáma maaqóo máriasa faqa qinée ásauku mundírana aináinira faiqi miná ufasáara rumbáqa marunnanara írimarusa máridaqa sía qinée moo mándoosana máraafannanara íridaqa. 14 Qiní qíkaqaafasaauqa, maqúsa maqusa Yísuna ufa írimariasa qinée karabúsaki márunnanara iriséeqa misá paasóosirafa firaaqóo innooqámaree fídaqa faiqí ánaasee Yísunara qímannimidaqa sía rufíaidaqa.

15 Misákiqari akaqáusa naríara naríara rairaiqídaqa raiqáidaqa ásauku mundírana áuqu uqéeraidaqa, akaqáusa moómoosa sía miqídaqa ámiqira írirana íridaqa qímannimidaqa. 16 Miqí maríasa nímuqusa óokiqari qiní Pauroosara rídaqa Yísunara ámiqimaseeqa faiqí ánaasee qímannimidaqa. Akaqáusa Yísuna ufara kaukaata qídaqa maréeqee káqirúnna ubeekáidaqa, Ánutufa qiníara anée minásaa ititáannee qifaqa ititáidaqa, qiní dadaaqí maríasa miqí marúnausa márunnanara irisée ámiqimmandee qiníara rídaqa dadaaqídaqa. 17 Akaqáusa rairaiqídaqa qímannimi maríasa sía nímuqusa óokiqarifau ásauku mundírana saikára qímannimidau náriara nári núqu uqéerararee qímasee miqí qídaqa. Misá Yísunara miqí qímasee qímannimifaqa Roomma máqannaasa miná irisée kafáa kafáa qiní karabúsaki ámiqimma dáruaqeera miqí qídaqa.

18 Qinée misá óosanara íridaqa sía firaaqóo misá óosanara óonumafi íridaqa. Qinée minára maaqí qídaqa. Akaqáusa ámiqira írirana marasée ásauku mundíranara kooroo iafaqa asasídaqa, akaqáusa áaqara írirana marasée ásauku mundíranara qímannimiafaqa minára faqa asasídaqa, misá óosana óosana íriranannai ásauku mundíranara kooroo ída fee qídaqamma asasídaqa. Sía qinée maqee kái asasianáura náaru náaru asasianáura. 19 Ínni innaaru qírafa faqa ásauku mundírana Yísuna maraquna faqa Roomma máqannaasa qumeé dadaaqínaqa nári karabúsakinaana qiní idukú qímaqeefaranoo, qinée minára iriséeqa maqee maqee asasídaqa.

20 Qeeqá qímuqusa óokinaa dídira írirafa maaqímminoo máridanoo. Qinée qeeqá saiká Ánutufa qímu saikána sía kudoosaápee minnísaanáuranoo aiqáma aukuana faqa maqee Roomma máqannaasa karabúsaki márunnanara faqa qiníki qiní paasóosirafa qumbiqáfinaqa qeeqá Roomma máqannaasa dárifaqa kúqiranannai fee qeeqá káqi máriranannai fee qeeqá márirana aiqámannai ásauku mundírana áuqu uqéerarana qiníki márianifeera dídidanoo. 21 Káqi márirafa nána ainainee máridanoo fee, qiní márirafa ásauku mundíranara kooroo ímarifa kai máridanoo, Roomma máqannaasa dárífaqa kúqiqa ámiqiranaki úriqararanaki márianauranoo fee qímasee minára dídidanoo. 22 Qinée minára íridaqa kafáa maaqí qídaqa qinée sía dárifaqa káqi máridaqa ámiqira ánoona saiká amaná máraanauree qímasee minára faqa dídidanoo. 23 Qaara irirafa qiní daundurái máridanoo dínni dínni óonurarisée ani rarisée ímariafaqa máridaqa. Roomma máqannaasa qiní kuqá kai dárifaqa qinée maa-marirána minnísee ásauku mundírafa márinnai fírara firaaqóo dídidanoo ámiqira ainaina máridanoo. 24 Misá sía qiní dárifaqa káqi márida qinée ínni Firipi máqannaasa dadaaqírana úriqarara ainaina máriannoo. 25 Qinée minára íridaqa káqi márianauree qídaqa. Qinée ínni faqa máridaqa ínni dadaaqíanaqa ínneeqa saqárikiranaki nídaqa ínneeqa saqárikirana firaanáikidaqa ínni asasírafa faqa firaanáikianífeera káqi máridaqa dadaaqianáura. 26 Qinée Pauroosa karabúsaki máridaqa ínnee qiníara irisée asasídaqa nasunásu rída máriaqa. Misá qiní karabúsakinaana idukífaqa ínnee iannái fúanaqa qiní qíqafamasee ásauku mundírana Yísunaki fídaqa qiníara fíqaramásee asasídaqa qimooqifáranoo.

27 Misá qiní dárifaree idukífaree ínni írirana moodáa maaqímminoo máriani, ínnikina narínni narínni rírafa ásauku mundírana ámiqira fasaasa ufa írimariasa misá naanna rámafi máriaqa. Ínnee miqídaqa márifaqa qinée ínni óonu níndafaanauree sía fee óonu níndafaanauree miqídaqa ínni ámiqira óosanara níanaindari írianaura, ínni írirafa Yísuna ámiqira fasaasa ufa saqárikirana faqa mi-maú fírana faqa minára kai íridaqa aiqáma ínnee moodáa írirana faqa moodáa firanamau faqa moodáanaki ruúmbakiqa máridaqa rákimariasa naanna rámasee mapukíqa márifaqa írianaura.

28 Yísuna ufara namuqáaki maríasara sía rufíaaqa, paasóosiaqa. Ínnee sía rufíaifaqa misá nári kurídifandinnanara írifaranoo. Ínni innaarúnai asumu márifandínnanara faqa írifaranoo. Ánutufa narí kai uqannífiqaannoo. 29 Ánutufa ínni firaaqóo adíafaairanaki quqánniseenoo ásauku mundírana aináiniranaki quqánnisaifaqa ínnee minakí máridaqa sía ínni írirana minásaa rusíranara kaifáu ínni níminoofau miná ufasáara nídafirana máree fandínnanara faqa ínni níminoo. 30 Dóo maqee ínnee Firipi máqannaasa qiní Pauroosa rákimariasa naanna rámasee dadaaqiaqa. Óoqai ínnee qiní qíqafoonakinaa rákirafara foora faqa maqee káqi mári rakirafara foora faqa ínnee minára qíqafamasee írimariafaqa amaná maqee dadaaqiaqéera qímannimidaqa.

Copyright information for `BJR