Revelation of John 22

Káqi márira nammariara qímaqoo úfafa.

Mi-qangiroofá fúka Yeerusaree maqusa uqaqífiqaseenoo nammári miqóo máruna uqaqífiqanau. Mi-nammarífa Ánutuna faqa sipsípa ánaaqi Yísuna faqa máru qaarínakiqari qumurée fúka maqusa qámbaana óoqu fímarinau. Mi-nammarína áuqu káqi márira nammari fee qiqau. Ámiqira nammari sía dumúna maqá máru nammarifa mi-nammarífa mookoofa ámanee kai randáida qúmidanoo. Mi-nammarína dínni dínni áfai saqári kambíqanoo máridanoo. Mi-saqarísa aiqáma qúqoonasaa qaqamma íraidanoo kai máridanoo. Miná ámanee aiqáma máqannaasa aurírana teeroo taikánnisee marífa mi-saqari amaneefá máridanoo. Moo áinainara Ánutufa áqurarainna ainaina sía mi-fuka maqusánaki máriannoo, dóo taikáfuannoo. Ánutuna qaarí faqa sipsípa ánaaqi qaarí faqa mi-fuka maqusánaki máridanoo miná áiku ásauku mi-maqusánaki máriasa miná amooqifáranoo. Misá miná óori qáfeefaranoo misá níqinaaqa miná áuqu ákara rínoo máriannoo. Mi-maqusánaki asukuna taikánoo máridanoo sía kafáa máriannoo. Misá sía qóomara súaniara íridaqa fífau máridaqa, Karaambáiqa Ánutufa misá qóoma márinaqa miqóoqaraasa karaambáiqara foora náaru náaru rakísi nímaqeefaranoo.

Yísufa dóo qúmuaninna úfafa.

Mi-qangiroofá mi-ainaináusa uqaqífiqaseenoo qímaqiminoo qinau. Mi-ufáusa aiqáma qímamúnafa kúqaa minásaa mundímariafa márifaqa qímamiqa. Karaambáiqa Ánutufa narí maraquna tamummáqara fasiqauqa nímimarifa narí qangiroo niqiqáifaqa miná aináinira fasiqa ánaaseesa qúsasaa kambíqaaninna ainainausa uqannífiqaanifeera mi-ainaináusa aní uqafíqeeqa.

Yísufa ínniara maqásaa máriasara maaqí qídanoo, qinée qúsasaa kafáa óoqu fúanaura. Maa-papiqánakinaa ufa irisée mi-maú fímariasa misá asasifáranoo.

Qinée Yoohaneesa mi-ainainná aiqáma qáfamasee iriséeqa dáaquqoofaqa uqaqífiqee marí qangiroona áikuki maqásaa áqufiqa amooqianéeriafananoo mifá qáoo qímasee qinau. Óo sía miqía Ánutuna kai amooqía. Qinée aní faqa moodáa ainainí marúnausa máridaqa aní áfasausa tamummáqara fasiqauqa faqa moodáa ainainí marúnausa máridaqa. Maa-papiqánakinaa ufamau fímariasa misá faqa moodáa ainainí marúnausa máridaqa. Sía qiní qimooqia Ánutuna kai amooqía. 10 Mi-qangiroofá kafáa qímaqíminoo qinau. Yoohanee anée maa-papiqánakinaa ufa tamummáqara ufa máridanoo sía qumeeráa, qímannimia. Aiqáma maa-ainaináusa qúsasaa kambíqaannoo sía amana quandásee kaifáa kísaaqasaa fúannoo, qúsasaa dóo kambíqaannoo. 11 Ánaaseera fanandírana, faiqíara fanandírana, miqída naríara naríara rímariasa sáina miqídaqa máriaqa, mandóosana mandóosana máree maríasa sáina miqídaqa máriaqa. Ámiqira óosana máree maríasa sáina miqídaqa máriaqa. Máparaammásee ámiqira oosana firaaqóo máree máriasa sáina miqídaqa máriaqa.

12 Dóo íriaqa Yísufa ínniara qídanoo. Qinée qúsasaa óoqufuanaura. Ínnee máree maríanna ákiaqara úqirausa dóo óoqu fíqa múqu nímianauranoo. 13 Qinée óosana ároonakiqari márunausa máridaqa. Qinée taikáaninna aukuanna faqaasa máridaqa.

14 Nári qamunandá nammári uqusée ánukara qámunna faqáasa misá kai amaná fúka Yeerusaree máqusa kooqíki kéeqafiqa káqi náaru márira saqari qaqamma amaná díqisee neefáranoo. Miqímariasa asasifáranoo. 15 Mi-maqusána áqoosai káaqa ufa rukíee maríasa faqa áukainaina máraqa nuasa faqa faiqí ánaasee naríara naríara fanandí maríasa faqa faiqí ánaasee kuqá narí maríasa faqa saqárinnai faiqí nimana áuqusaida innaaru qímariasa faqa únna óosana áuqimariasa faqa únna ufa qímariasa faqa misá aiqáma áqoosai márifaranoo.

16 Qinée Yísufa maa-ufáusa amaana máqaki kéeqee maríasa qímannimiaqee qímasee qeeqá qangiroo aqiqéeqa. Qinée Dafidina óosanakiqari mináti máridaqa. Qinée kanánaana duqudéeqiara foo káaqa qéemarunausa máridaqa.

(Yísuna saqáriki maríasa aiqáma miná aqoónausara foora máriafanoo misára Yoohaneefa moodáanaki sipsípa ánaaqi Yísuna ánaaqa fée qídanoo maa-papiqánaki qídanoo.)
17 Ánutuna maraquna faqa sipsípa ánaaqi Yísuna ánaaqa faqa aiqámausara maí ániaqee qídaqa. Aiqáma maa-ufána írimariasa ínnee faqa quandáfi niqoónausa náaraaqa ániaqee qiaqa. Yísufa náaru márira nammari nímianee qídanoo. Aiqáma nammáriara nídimarisa dóo anirée naaqa. Sía feefaurífaranoo, nídimarinausa káqi naaqa.

Taikára ufa.

18 Qinée Yoohaneesa aiqámausa maa-papiqánakinaa tamummáqara ufa írimariasa dóori kándamasee aaquqímannimaqaidaqa faiqí moó fannoo maa-papiqánakinaa ufa moó narí úfa minásaa ootúpamásee qínafa miná ákiaqara Ánutufa maa-papiqánakinaa aupúrarana nárírana mara mi-fasiqána áriranasaa ootúpáinanoo firaanáikiannoo. 19 Kafáa faiqí moó fannoo maa-papiqánakinaa tamummaqara ufa áti rafáaqafínanoo minára mi-fasiqáfa náaru márira saqari qaqama néemariana Ánutufa rafáaqafuannoo sía náannee qíannoo miná náaquqara fúka maqusaki kéeqaranara faqa Ánutufa rafáaqafusee qáoo qíannoo. Maa-papiqánakinaa ufamau sía fuanára qáoo qíannoo.

20 Qinée maa-papiqánakinaa ufa qíma afeekaikámmannimi márunausa Yísusa maaqí qímasee qímannimidaqa kúqaa uqanna qinée qúsasaa ínnee iannái kaifáa óoqu fúanaura. Qinée Yoohaneesa minára maaqí qídaqa. Óo karaambáiqa Yísu dóo qúmuannee qídaqa.

21 Karaambáiqa Yísuna ámiqira áfaarirafa ínni aiqámausaki máriani.

Copyright information for `BJR