Revelation of John 3

Saradisa máqusanaasara ufa Yísufa Yoohaneenasaa quqóo úfafa máridanoo.

Yísufa miqí qímasee Tiatira amaana máqasaa rakísirana qímamiseenoo quándakinoo Saradisa amaana máqasaa Paatoonara Yoohaneena qímaminau. Yoohanee anée maa-ufána ákara rúmeeqeenana Saradisa amaana máqasaa rakísira Paatoona ámaqaa. Ánutuna maraquna dínni taikásee dínni ani qaaramarasée maraquna qumáree marífa dínni taikásee dínni ani qaaraqánda fásau qumáree marífa Yísufa ínni Saradisa máqusanaasa qímannimidaqa. Qinée ínnee áuqeemarianara íridaqa. Misá únna qímasee ínniara kásimariasee qiafaqa qinée ínniara kúqimariasee qídaqa. Ínnee minára iriséeqa tautí fíndifuaqa nímuqusa káqikaaqoo kásimariqoo káaqa kúqifoora dauní fíndi fuaqa. Ínneeqa Ánutuna saiká máreemariana Ánutufa qáfaidanoo miná áfusaa sía ánoonaikidanoo minára qinée ínniara tautí fíndifi fuaqée qídaqa. Ínnee óoqai qiní ufa írimaria óosannara náaqoo irisée qiní ufara faqa irisée eedóo qímasee mi-maú fífanoo ínneeqa mandóosana quandáaqa. Ínnee sía faiqáranakiqari tautí fíndififaqa qinée úmmuari mari fasiqafara foora tautúmannimaqásee aniréeqa nárúanaura.

Ínniki Saradisa máqusanaasa akaqáusa sía qikairí fáisa máridaqa. Ínnee qikairí síaisa qiní faqa nifáranoo. Ínni ámiqira márirana amana kái éekara qámunna afisúnnimáqasaanaqa qiní faqa fifáranoo. Mandáinaina fannoo ínni maqee maqee rafáaqafímarifaqa mi-manda ainainná úriqararausa ínni naanna rámasee éekara qámunna afisúnnimáqarara qídaqa ínni núqu faqa náaru káqi márira pápiqakinaana sía ateekáanaura káqi márianifeera qídaqa. Qinée qeeqá qíkoona óorisaa faqa miná qangiroo misá nóorisaa faqa ínnee qikairí síaisara qiní faiqi námu fee qianáura.

Ánutuna maraquna fannoo aiqáma maqusa amaana máqaki kéeqee máriasa qímannimidanoo náaqoo faqaasa mi-ufána íriaqa.

Firadeerafia máqusanaasara ufa Yísufa Yoohaneenasaa quqóo úfafa máridanoo.

Yísufa miqí qímasee Saradisa amaana máqa Paatoona qímamiseenoo quándaki Firadeerafia amaana máqasaa rakísimarunara Yoohaneena qímaminoo qinau. Yoohanee anée maa-ufána ákara rúmeeqeenana Firadeerafia amaana máqasaa rakísira Paatoona maaqí qímasee ámaqaa. Óoqai Dafidifa kooqí kíqa uaqéeuna qinée Yísusa maqee miná uaqéeidaqa aní qímamidaqa. Qinée náaquqara andeeqarausa kúqaa ánoona óosana óosana máreemarúnausa maa-ufána ínni qímannimidaqa. Qinée kíqannai kooqí ititásaana sía amana moó fannoo atúarana amana máridanoo, kaifáa qinée kooqí atúasaananoo moó fannoo sía amana ititáannoo. Ínnee Firadeerafia máqusanaasara qinée ínni aiqámausara ámiqimasee íridaqa. Ínni nóorinni kooqí atúarana quqásaananoo moó fannoo sía amana miná ititáannoo. Ínni afeeka káqikaafa máridanoo ínnee qiní naakápara ufamau fímariasa máriafanoo. Ínnee maqee maqee qiníara kai íridaqa máriasa máriafanoo. Íriaqa, Sadanna faiqi námu akaqáusa máriasa náriara únna qímasee Yuda máqannaa fee qímasee qímariasa qinée misá maréeqee ínni níramandunnai quqásaanáura. Aiqámausa miná qáfeeqa óo Yísufa ínniara ámuqusifanoo miqídanoo fee qiaqéera.

10 Qinée ínniara reendeenámandee máriaqee qíafanaqa ínnee miqí maríasa máriafanoo. Miqí maríana ákiaqara firaa teeroo máaqanna máaqanna nimanamásee qáfaanaura miqíanna aukuanna qinée ínni maréeqee káqi átinnai quqásaana asumu márifaranoo. 11 Qinée qúsasaa qúmuanaura. Ínnee úriqaraqa máriana ámiqimmandee rakísi qumáraaqa moó fannoo qumáraandoora. 12 Maa-maqánasaa mandáinaina qámbaanai úriqararana qinée miná qumáreeqee qeeqá qikoona amaana máqaki quqásaananoo mifá faakánaikinoo máriannoo. Qinée miná afaaqasáa qeeqá qikoona Ánutuna áuqu quqáanaura, qeeqá Ánutuna firaa maqusa fúka Yeerusaree áuqu faqa miná afaaqaí quqáanaura. Mi-maqusáfa innaarúnaindari qiní Ánutufinnainadari kásooqaqee qúmuannoo. Qinée qeeqá fúka dúqu faqa mi-fasiqána afaaqaí quqáanaura.

13 Ánutuna maraquna fannoo aiqáma maqusa amaana máqaki kéeqee maríasa qímannimidanoo. Náaqoo faqaasa mi-ufána íriaqa.

Raoodiseea máqusanaasara ufa Yísufa Yoohaneenasaa quqóo úfafa máridanoo.

14 Yísufa miqí qímasee Firadeerafia amaana máqasaa Paatoonara Yoohaneena qímamiseenoo quándaki Raoodiseea amaana máqasaa rakísiranara qímaminoo qinau. Yoohanee anée Raoodiseea amaana máqa rakísira Paatoora faqa maaqí qímasee ákara rúmamia. Qinée mapukúsee márunna fasiqausa Yísusa ínni qímannimidaqa. Qinée náaru náaru kúqaa ánoona ainainá kai qímarunausa ínni qímannimidaqa. Ánutufa aiqáma ainaina áuqimaruna óosana qinée márunausa ínni qímannimidaqa. 15 Qinée ínnee áuqee marú ainainnara íridaqa. Ínnee sía suarú qíqa máriafanoo ínnee sía idáidíqa máriafanoo Ínni óosana ámiqirafa márinaqau kaifáa minára faqa írini. 16 Ínni óosana súanisaa nammáriara foora náunanoo idídi márifaqa fídidaqa. 17 Ínnee únna qímasee ínneeqara aiqáma ainaina óosana óosana faqaasee qímariafanoo. Ínni nifaaqa rumbánoo márifaqa mandáikidaqa kudoosaápaqa máridaqa ínnee sía minára írimariafanoo. Ínnee kudí maríafanoo nífu qimbárausara foora máriafanoo káqisámuara foora máriafanoo. 18 Qinée maaqí qímasee ínni naamúa qidaqa, ínnee qiní kóora munnimmara foora feefaurúmaseeqa minánnai naundurákinaa qúmiasana moómoo máraaqa. Ínnee qinísaaqaraa andeeqárana feefaurúmasee éekara qámunnara foora marasée ínneeqa nisaurírana mandá nifaaqasaa afisúaqa. Ínneeqa nífu marasinna minníseeqa qiní marasínnara foora feefaurúmasee ínneeqa nífusanara foora nárímarínaki akusáifanoo ínni nífu ámiqiani. 19 Qinée nímuqusí maría fasiqa anaaseerá kai mandáinainaki kéeqaafaqa qáoo qímasee nárídaqa. Ínnee minára irisée kúqaa nóori runúsee ínneeqa márirana quandáaqa.

20 Íriaqa qinée Yísusa faiqí nímuqusa kooqí áfaisaa kikíqammambiqa kooqí atúaannee qímasee kúkúsidaqa. Faiqí moó fannoo qinée kúkusiannana írinoo narí kooqí atúqainaqa qinée miná ámuqusa óoki kéeqafiqa miná faqa naanáura mifá qiní faqa náannoo. 21 Qinée maa-maqánasaa mandáinainakiqari úriqararausa máridaqa qeeqá qíkoosandiri narí rakísira qaarisaa óoqufaaqée ídaqa. Maa-maqánasaa mandáinainakiqari rákirara foora úriqaráinafa mifá miqí kai ínoo qinée rakísira qaarisaa innaarúna ququsaki qiní faqa óoqufaaqee máriannoo.

22 Ánutuna maraquna fannoo aiqáma maqusa amaana máqaki kéeqee máriasa qímannimidanoo. Náaqoo faqaasa mi-ufána íriaqa.

Copyright information for `BJR