Revelation of John 5

Rumbárauru pápiqa faqa Ánutufa áruaninna sipsipa anaaqiara faqa qu úfafa.

Misá idí rámasoofaqa rakísinnimaqee maru qaarína qámbaana márunna Ánutuna ásaukuki mifá papiqa kukúqirana ásauku uqannái márufaqa qáfaqiafana. Mi-papiqána aunduráki faqa adisáa faqa ákara márufaqa qáfaqiafana. Sánda rumbárafa qísauku dínni taikáseenoo dínni ani qaara maraséenoo mi-papiqána qámbaana qámbaana rumbánoo márufaqa qáfaqiafana. Qinée miqóo qangiroo moo qáfaqia ámudaanai qímarufa afeeka qáfamasaafananoo firaa kari naméera qínoo qinau. Yáfee moó fannoo andeeqárafa márinafa maa-sandáusa rakéemaseenoo fee papiqa qairísee ásaana ruannoo fee. Misá innaarúnai faqa maqásaa faqa maqá ámeemaanai kúqirausaki faqa randáafanoo sía moó fannoo amanaikínoo mi-papiqána sánda rakéemaseenoo qairísee ásaana rúaqaainoo márufaqa qáfaqiafana. Qinée Yoohaneesa mi-papiqána qáfammasee ikíráqeeqa sía moó fannoo andeeqárausa amaná máriafaqa qinée qáfeeqa firaaqóo ikíraqaqiafana. Ikíraqee máriafananoo úriqararausakiqari moó fannoo qímaqiminoo qinau. Sía ikíraqaa áfu qáfaa Yakooboona faiqi námukiqari Yudana áiku ásaukukiqari moó fannoo raióonara foora aiqáma mandainaina úrinaaqararafa Dafidina áti firaa auqu faqáafa mifá amaná mi-sandáusa rakéemasee qairísee ásaana rúannoo.

Miqí qímasoofaqa qinée qáfaafananoo sipsípa ánaaqi fooqáafa Yísufa Ánutuna qaarísaa kikíqinoo márufaqa qaara faqa qaara faqa aandáu̱ faqa moodáa fasiqa taikásee moo fásiqa qaara faqa qaara faqa marasée úriqarara fasiqauqa faqa Ánutuna qaarí átiara fíqu fíqu iqá márufaqa qáfaafananoo. Sipsípa ánaaqi qámbaanai márinau. Mi-sipsipa anaaqífa kúqufa kúqiranakiqari fíndifinoo márufaqa qáfaqiafana miná aanai dínni qísauku taikásee dínni ani qaara marasée aanái kambíqanoo márufaqa qáfaqiafana miná áfu qísauku dínni taikásee dínni ani qaara marasée márufaqa mi-afunamúsa Ánutuna maraquna námu aiqáma máqa maaqai Ánutufa niqiqoofaqa nímarusa níndafaqiafana. Mi-sipsipa anaaqífa Yísufa qámbaana qaarísaa Ánutuna ásauku uqannái uaqéeu̱ pápiqana marasoofaqa aandáu̱ namu faqa úriqararausa fíqu fíqumma márusa faqa aiqámausa miná áramandunnai nóorindari áqufufaqa idí moo fúka raqau. Idí ráidaqa piripúna árimarufa dínni nísaukuki márinau kóora áuqimaru qáfeesa dínni nísaukuki márinau ámiqira afundí maru ainainausa mi-qafeesáki márinau, máaqanna máaqanna Ánutuna ufa írimariasa innaaruqírafa mi-qafeesáki mi-amiqafundi maru ainaináusa kíkiqa úsinoo márinau. Misá fúka idi maaqí qímasee raqau.

Óo Yísufa sía moó fannoo amanaikíannoo anée aneenná andeeqáranannai kai aneenná ákoona ásaukukinaana papiqa marasée idukínnaranoo.
Misá aní arusoofana aneenná kúqiranannai faiqí feefaurúmmeeqeenana Ánutuna ásaukuki quqánau.
10 Aiqáma káqikaa máqannaa faqa firaa maqannaa faqa akaqáusa aneenná fidíkannai feefaurúmmeeqee Ánutuna ásaukuki aanáiqikiranaki quqóonafa kásooqaqee miqóoqari misá maa-maqánasaa úriqararausaíkifáranoo.
11 Qinée Yoohaneesa mi-idína roofaqa irisée uqéerafi níndafaafanaqa qangíroo moómoo núkudara foora kikíqiqa máriqau. Aandáu̱ namufaqa úriqararausa namufaqa Ánutuna rakísira qaari fíqu fíqumma kikíqiqa márusa nínaaqiannai núkudara foora qangiroouqa moómoosa fíqu fíqu mámbufaqa miqóo márusa aiqámausa idí moó raqau, firaa kari maaqí qímasee raqau.

12 Óo sipsípa ánaaqi anée faiqí árunaki reendeenámasee kéeqoonafa aní andeeqárafa kai amanaikínoo márinara
Ánutufa úriqararana faqa aináina moómoo faqa írirana firaaná faqa afeeka faqa áuqu uqéerarana faqa aréenarana faqa aní amooqírana faqa aní Yísuna ámiannoo.
13 Misá mi-idína rámasoofaqa kafáa iriséeqa aiqáma innaarúnaindaraa ainaina faqa maqásaa ainaina faqa ooruku námmarikinaa ainaina faqa maqá ámeemaanaindaraana faqa aiqámai Ánutufa áuquqoo ainainausa moodáanakikámmambiqa maaqí qímasee idí raqau.

Qaarísaa óoqu marínoo márifa sipsípa ánaaqi faqa ínniqara nimooqírana faqa núqu uqéerarana faqa aréenarana faqa afeeka faqa náaru náaru ínnindi márianifee qídaqa idí ráidaqa.
14 Misá miqí qímasee idí roofanoo qaara faqa qaara faqa aandáu̱ namu misá roo ídina irisée kúqaa fee qufaqa miqóo úriqararausa márusa nóorindari maqásaa rupáitamáfufaqa Yísuna amooqímamaqáqau.

Copyright information for `BJR