Revelation of John 6

Papiqa rumbárauru idukúnara qu úfafa.

Miqí qímasoofanoo sipsípa ánaaqi fannoo mi-papiqána kukúqirana qumáreenoo moo sánda rumbáqoona idukínau. Idukúsoofanoo Ánutuna aaqá qaara faqa qaara faqa aandáu̱ máriunakiqari moó miná ufa fannoo innaarúnai miqírafa dárara qímaseenoo qímaqiminau. Anée ániannee qufaqa qinée Yoohaneesa miqóo óonuráafananoo qóosa moó éekara arirafa márinau. Faiqí minásaa óoqufaaqéeu̱ fasiqafa durú faqaafa márinau. Miqóoqaraasa qafee afisúamaqásoofanoo máaqanna máaqanna rákiranannai narí áramandunnai quqáraree qímasee finau.

Mifá fufanóo sipsípa ánaaqi mi-papiqána sánda moó rúmbarana idukínau. Idukúsoofanoo Ánutuna aaqáqari aandáu̱ moó qiníara anirée qáfaannee qinau. Qinée óonu qáfaafananoo qóosa moó taatuqée árirafa animárinau. Miqóoqaraasa qaseema firaaná raiqárana mi-qoosánasaa máruna amisée qímamiqau. Anée óoqu maqásaaqaraasaki maa-qaseemánannai nírana fundákinaqa rákirana uqéera níminaqa narí ári narí áriaqa.

Mifá fufanóo mi-papiqána rumbárana sipsípa ánaaqi fannoo moo sánda idukínau. Idukúsoofanoo Ánutuna aaqáqari aandáu̱ moo fíndifinoo qiníara ániannee qufaqa óonu qáfaafananoo qóosa moó rundúqarirafa márinau. Mi-qoosánasaa márufa sikéera uqusée márufanoo Ánutuna aaqáqari aandáu̱ moó óokiqari ufara foora mi-fasiqána qímaminau. Aandaróo aukuana máridanoo moodáa faasaana saikíana amana kái ráisa nímia. Ráisa sía márinaqa kamaá miqí kaimmásee rainásee nímia. Misá fadaméena faqa nammári faqa sía anée miná árua sáina káqi nímia, nárana ainainá kai aandaróo náruannoo.

Miqí qímasoofanoo sipsípa ánaaqi mi-papiqána rumbárana moó idukúsoofanoo Ánutuna aaqáqari aandáu̱ moó fannoo qiníara anirée qáfaannee qinau. Qinée Yoohaneesa irisée óonuráafananoo qóosa moó afaaqa eeqaku árirafa márinau. Miná ataufakaaqá máruna áuqu Kúqirafa márinau. Faiqí nimana madikakínaasa faiqíara fooqíara mi-fasiqána faqa fídanoo narí dadaaqí narí dadaaqí máriqau. Miqóo innaarúnai márusa maaqí qímasee qímamiqau. Ínnee qóosa faqa faiqí faqa faiqí nimana madikakínaasa faqa maqásaa fasiqaki óoquree durú feefannái faqa aandaróonnai faqa auríranannai faqa káasau aandaunnai faqa moómoo fasiqa ánaasee maqúsa maqúsa máriasa nárida máriaqa.

Misá fufanóo sipsípa ánaaqi mi-papiqánasaa rumbárana moo sánda idukínau. Idukúsoofaqa qinée miqóo aandáu̱ tatúfimaru qaindána márufaqa qáfaqiafana. Mi-qaindána ámeemaanai kúqirausa nimana moómoo márufaqa qáfaqiafana. Sía fífau kúqirausa máriqau. Maqásaa máridaqa Ánutuna ufa andeeqásee faiqí ánaasee qímannimunara miná ákiaqara narusoosá kúqiqa máriqau. Misá óosana Ánutuna ufamáu kai fímarunara minára narusoofanoo Ánutufa misá nimana maréeqeenoo innaarúna qainda ámeemaanai quqánau. 10 Qinée Yoohaneesa qáfeemariafanaqa firaakari mindári Ánutunara naméera qiqau. Óo úriqarara karaambáiqa anée andeeqárafa náaquqarafa ánoona ufa kai qímarianafa máriananoo. Yáiree fee maqásaaqaraasa ufa iriséenee maasá dáruana ákiaqara nári nárinnaree. 11 Miqí qímasoofaqa innaarúnai márusa éekara qámunna marasée aiqáma nimisée qímannimiqau. Ínnee maaná afisúsee kafáa miqóo káqikaaqoo idooaaqa. Ínni níkaqaafasaa maqásaaqaraasa ínni naanna réeqa Ánutuna ufasáara kúqifanoo Ánutufa mi-karí ínni ufa faqa misá ufa faqa íriannoo.

12 Miqí qímasoofanoo sipsípa ánaaqi mi-papiqána rumbárana moo sánda idukínau. Idukúsoofanoo maqá firaaqóo uqanna kásinoo súani afu arusoofanoo rundúqarira qámunnaikinoo márinau. Quqoona faqa aiqáma taatuqée árinoo fidíkandandinau. 13 Fásau̱ saqári qaqamma miqírafa úfai úqifanoo adusá aiqáma maqásaa kakasídanoo aiqáma fasau maqásaa kakasináu. 14 Innaarúna kudimandá fannoo papiqa fooqáana átindari raqándaamámaree máfi aiqáma raqándaamma taikánau. Áaqana áaqana nári máruqooqari nári máruqooqari moosá mínifi máfi quqáidanoo ooruku námmariki afumáuqa faqa miqí kaimmínau. 15 Miqímarufa maqásaaqaraa karaambáiqauqa faqa úriqararausa faqa sundíaki kiatéenauqa faqa aináina faqaasa faqa nímudaanai qímarusa faqa faiqí aiqáma karabusara fooqáana aináini maríasa faqa káiqeesa faqa áaqanasaa máru ooni aamaranaki kéeqafi kukéeqafiqa áaqanara faqa óoniara faqa námeera qímasee qiqau. Ínnee maasásaa áqufiqa maasá dáriqa kukéeqaqimaqáaqa. Qaarísaa óoqumarinoo márina áfusaara rufíaidaqa ititáqimaqaa. Sipsípa ánaaqi áanooqiranasaa faqa ititáqimaqaa. 17 Miqandá firaa aanooqira faasaana dóo animáridanoo, sía moó fannoo amaná misá nífusaa kikíqiannoo.

Copyright information for `BJR